1 Ana mantsa ma na A̱sulazuva aa tara Iliya a̱ tyo zuva a̱tsuma̱ a̱ lipa̱ ma rawai zuzu, Iliya na̱ Elisha a̱ da̱na̱ ta̱ a mmalu diga Gilgal. 2 Reve Iliya damma Elisha, <<Isawan pa, A̱sulazuva a̱ lyungu mu ta̱ Betel.>>

Amma a̱vu Elisha damma, <<N kucina ta̱ na̱ A̱sulazuva a na a̱ ri wuma na̱ wuma wa̱ wu waru, maa lyawa wu shi.>> Ɗaɗa a̱ ka̱ra̱i a̱ cipa̱ a̱ tyo Betel.

3 Reve oɓolo a ama̱sula̱ a na a̱ ri Betel o uta̱ reve e ece Elisha, <<Ko vu reve ta̱ a na ana'an A̱sulazuva a ta tara zagbain va̱ wu a̱a̱ ka̱ra̱?>>

Reve Elisha usu, u damma, <<Ee, n reve ta̱, amma she i da̱shi yuwan adanshi adama o ndolo wan.>>

4 Reve Iliya damma Elisha, <<Isawan pa nda Elisha, adama a na A̱sulazuva a̱ lyungu mu ta̱ Jeriko.>>

Reve Elisha usu yi, <<N kucina ta̱ na̱ A̱sulazuva a na a̱ ri wuma na̱ wuma wa̱ wu waru, maa lyawa wu shi.>> Reve a̱ ka̱ra̱ a̱ tyo Jeriko.

5 Reve oɓolo a ama̱sula̱ a na a̱ ri Jeriko a rawa zuzu reve e ece Elisha, <<Ko vu reve ta̱ a na ana'an A̱sulazuva a ta tara zagbain va̱ wu a̱ ka̱ra̱?>>

Reve u usu, <<Ee, n reve ta̱, amma she i da̱shi yuwan adanshi adama o ndolo wan.>>

6 Reve Iliya damma Elisha, <<Isawan pa nda, A̱sulazuva a̱ lyungu mu ta̱ o Uɗolu wa̱ Urudu.>>

Reve Elisha usu, <<N kucina ta̱ na̱ A̱sulazuva a na a̱ ri wuma na̱ wuma wa̱ wu waru, maa lyawa wu shi.>> Ɗaɗa a̱ ka̱ra̱i ele ra.

7 Reve a ama kupoton a̱tsuma̱ o oɓolo a ama̱sula̱'a̱ a̱ 'ya̱wa̱ e isawain makasu nu uba̱ta̱ u na Iliya na̱ Elisha e isawain a̱ nge'en mu Uɗolu wa̱ Urudu. 8 Reve Iliya foɗo utugu wa̱ yi, reve u punda̱ra̱ yi reve u fabaa mini na̱ a̱yi. Reve mini'i me ne'eshenlei upasu wu usa'ani nu ugula̱, a̱vu ele ra a pasa e iɗa yu u'yewu.

9 Ana a pasai, a̱vu Iliya damma Elisha, <<Damma mu ili i na maa yuwaan wu, kafu a tara mu a̱ ka̱ra̱ n lyawa wu.>>

A̱vu Elisha usu, <<Lyawa n tsura̱ agadu a akunda a̱ ruhu va̱ wu toto ure.>>*

10 Reve Iliya damma, <<Vu pati ta̱ ili yu usa̱n. Suru na̱ ne, na̱ ve ene mu yashi i na aa tara mu a̱ ka̱ra̱ n lyawa wu, u to o za va̱ wu, na̱ ne ɗa gba shi, to, woo o'wo ne shi.>>

11 Ele a̱tsuma̱ a mmalu na a yuwin adanshi, babu usa̱n a̱vu keke vi ido va akina ni ido ya akina i ta̱wa̱ reve u uwa e memere me ele wu kasa le, a̱vu a tara Iliya a̱ tyo zuva a̱tsuma̱ a̱ lipa̱. 12 Ana Elisha enei ili i nda reve u saala, <<Dada va̱! Dada va̱! Ikeke yi ido, na akumbi e ikeke yi ido ya Isra'ila!>> Elisha da̱shi ene yi waru shi. Reve Elisha reme a̱tugu a̱ yi reve u karalai nle.*

13 Reve u tara umuna u na u riya̱i za va Iliya, reve u ka̱mba̱ wi isawan a̱ nge'en mu Uɗolu wa̱ Urudu. 14 Reve u tara umuna wa Iliya u na u riya̱i'i, reve u fabaa mini na̱ a̱yi. Reve u damma, <<Te ɗa A̱sulazuva, A̱sula̱ a Iliya?>> Ana u fabai mini'i, reve u ne'eshenlei ure upasu wu usa'ani nu upasu wu ugula̱, ɗaɗa u pasai.

15 Reve oɓolo a ama̱sula̱ a̱ Jeriko a na enei ili i na i farai, a damma, <<Ruhu va Iliya ta̱ nden a aci a Elisha gogo.>> Reve a̱ 'ya̱wa̱ a ga'aton yi, reve a̱ ka̱ɗa̱to hali she e iɗa a̱ ma̱ka̱ka̱n ma̱ yi. 16 A̱vu a damma yi, <<Ka̱lyuwa̱ nda, a̱tsu agbashi a̱ wu tsu ta̱ na ama o ucira kupoton. Lyawa a̱ 'ya̱wa̱ a zami zagbain va̱ wu. U ta gura o'wo Ruhu va̱ A̱sulazuva a tara yi ta̱ reve u vari yi a masasan mo o ro ko a̱tsuma̱ o uka̱ri u ro.>>

A̱vu Elisha usu, <<O'o, she i lyungu le wan.>>

17 Amma a̱vu a gbagba a lyawa shi hali she na u lyawa nle a̱ 'ya̱wa̱. Ɗaɗa u damma le, <<Lyungu nle a̱ 'ya̱wa̱.>> Ɗaɗa a̱ lyunguyi ama kupoton aza a na a zami niyi hali rana ta'atsu agba a̱ tsura̱ yi shi. 18 Ana a̱ ka̱mba̱i ya Elisha za na shi Jeriko, a̱vu u damma le, <<N damma ɗu she i 'ya̱wa̱ wan shi?>>

19 A̱vu ama a̱ lyuci va̱ Jeriko a damma Elisha, <<Ka̱lyuwa̱, zagbain tsu, vu ta gura ene lyuci nda tu ulobonu wa̱ a̱ka̱nla̱. Amma mini ma̱ lyuci'i ma̱ ri yu ulobonu shi, iɗa'a waru waa matsasan itana yu uɗuma̱ ya̱ a̱ɓula̱ shi.>>

20 A̱vu Elisha damma, <<Ta̱wa̱a̱ numu na aasa'atsu a sa'avu a̱vu a̱ tsun akpaɗi pe.>> Ɗaɗa a̱ ta̱wa̱a̱ niyi.

21 A̱vu u ka̱ra̱ a̱ 'ya̱wa̱ uba̱ta̱ we esu a̱ mini'i a̱vu u tsun pe akpaɗi'i a̱vu u damma, <<Apa ili i na A̱sulazuva a dammai, <N ka̱mbuwa̱ ta̱ mini ma nda gbaga. Wa̱a̱ da̱shi ta̱wa̱ nu ukwa̱ shi, ko u da̱shi zuwa iɗa'a u kuɗa̱ a matsan ili ya̱ a̱ɓula̱ shi.> >> 22 A̱vu gba mini'i mo lobono hali a̱ tyo ana'an, cine Elisha dammai.

23 Diga lo, reve Elisha gawan a̱ tyo Betel. A̱yi a̱tsuma̱ a mmalu o ure, a̱vu olobo o ro o u ta̱ a̱tsuma̱ a̱ lyuci reve a yuwaan yi ulamu, a dansa, <<Ka̱ra̱ a gawan, a̱vu za vu ukparu!>>

24 A̱vu u vadala u ka̱lyuwa̱ le, reve u yuwaan le una̱ na ala a̱ A̱sulazuva. A̱vu nan biya e re o uta̱ a̱tsuma̱ e iɗanga a̱vu a kara olobo amunga ne ejere a̱tsuma̱ o olobo'o.

25 Reve Elisha ka̱ra̱ a̱ tyo a Masasan ma Kame reve diga ɗe u ka̱mba̱ Samariya.