1 U tara ta̱ Sulemanu a'wan kupa na aza a ta'atsu kafu u koto usaa wu ukobu wa̱ yi. 2 U suwa ta̱ Ukobu wa Akpata a̱a̱rumbu a Lebanon aza a na a̱ da̱na̱i nu uga'an e iɗa ukpakukupa na̱ kupoton (150), na̱ washin udasu kupocindere na̱ ozo o ton na̱ uga'an mishin amunga na̱ ozo o ton, waru u da̱na̱ ta̱ usuwu ugeru u na̱shi wa atsura a akpata a gbain a sida na akpata a na a̱ kuru yi zuva va atsura'a. 3 A̱ ɓa̱ru yi ta̱ na̱ sida zuva va akpata ukuruwu ugeru amunga no ozo o ton, gendu o ugeru biti. 4 A ɓaɓu re'e a yuwan ta̱ uba̱ta̱ wu sowoto wu upepu ba̱ta̱ ta'atsu, a̱ nka̱la̱la̱i. 5 Akpata a̱ na̱ntsu'u na̱ ozo o sowoto wu upepu a̱ da̱na̱ ta̱ a̱za̱ a̱ na̱shi, a̱da̱na̱ ta̱ upasu we elime ugeru ba̱ta̱ ta'atsu a̱ nka̱la̱la̱i.

6 U yuwan ta̱ ma̱kisa̱ a na a̱ ri na atsura wu udasu uga'an e iɗa kupocindere na̱ ozo o ton na̱ washin udasu amunga na̱ ozo o ton. Elime a̱ yi waru ma̱kisa̱ mo ro ma̱ da̱na̱ ta̱ lo na atsura nu ukwa̱'a̱.

7 U suwa ta̱ aasula o mogono wo Ootogu o tsugono, za na tsu ɗe Ukobu wu Uge'etosu, uba̱ta̱ u na wa̱a̱ da̱na̱ a yuwusan uge'etosu, reve wu pala yi na̱ ɗanga sida diga e iɗa a̱ tyo zuva. 8 U'wa u na waru wa̱a̱ da̱nu u suwa yi ta̱ na̱ a̱ca̱pa̱ na̱ cu'un vu usaa u ta̱ na̱ Ukobu wu Uge'etosu. Sulemanu waru suwaa ta̱ usheli wa Firi'awuna na u zuwai u'wa tsu za nda.

9 Saa ndolo suru, diga alanga a cina ukowo u gbain a yuwan le ta̱ na atali e ikebe a na a paɗai diga e ikyun a̱ tyo o ukwa̱'a̱ aza a na o ritoi reve a paɗa le na̱ ma'inutsu. 10 A̱ vara ta̱ ikyun yu usa'a na atali e ikebe a gbagbain o ulobonu lon, aza a na a̱ ri udasu kupa no ozo o ton, ozo o ro waru kupa ne ejere. 11 Diga ɗe zuva waru a̱ da̱na̱ ta̱ na atali e ikebe a na a paɗai lon oɓolo na akpata a gbain a ɗanga sida, aza a na o koɗoi ni ili yu uritosu. 12 Ukowo u gbain wa̱ a̱tsuma̱ u shi ta̱ uka̱nda̱ruwu nu uɓaɓu wa atali a na a paɗai nu ukuruwu u ta̱ wa akpata a gbain a sida na o koɗoi, cine ukowo wa̱ a̱tsuma̱ wa̱ A̱a̱'isamapaɗa a̱ A̱sulazuva a̱ shi oɓolo nu uwata wa̱ yi.

13 Mogono Sulemanu lyungu ta̱ ama a̱ 'ya̱wa̱ Taya a̱ ta̱wa̱a̱ na̱ Hiram, 14 za na mma va̱ yi da̱na̱i ma̱runa̱ za vu ugundo wa Nafutali za na dada va̱ yi da̱na̱i vuma va Taya za na gurai uruma wu rumushili. Hiram da̱na̱ ta̱ nu urevu nu uguru wu ulinga wu cu'un vu rumushili biti. U ta̱wa̱ ta̱ uba̱ta̱ u mogono Sulemanu a̱vu u yuwan cu'un vu ulinga u na a ca niyi suru.

15 Waru u zuɗa̱ ta̱ atsura e irumushili ejere, atsura suru mishin ma̱ yi u da̱na̱ ta̱ udasu ushin na̱ aza a cindere, na̱ iɗana washin udasu kupa na̱ kunla̱ a̱ka̱nda̱ruwa̱. 16 Reve waru u yuwan aci e re a rumushili adama a zuwa ɗe zuva va atsura e re'e, uga'an wu za ta̱ suru u da̱na̱ ta̱ udasu ucindere na akapi. 17 Zuva va aci a atsura'a suru, wu kala yi ta̱ na̱ yironishi e cindere ya akani ukaɓulai. 18 U yuwan ta̱ muwun mu uɗanga m peme ugeru u re a̱ka̱nda̱ruwa̱ za̱ ta̱ suru wukalu zuva va a aci atsura'a. U yuwaan ta̱ aci ya atsura suru ne. 19 Aci a na a na a̱ ri zuva va atsura a̱tsuma̱, zuva va atsura'a a̱tsuma̱ o ukobu'u a̱ da̱na̱ ta̱ no oroci a̱ yipa̱lu, uga'an udasu uta̱li. 20 Ɗe a aci a na a̱ ri a atsura'a suru, gon vu uruma u na u rotsoi akwanu zuzu na akani e gere ta̱ muwun mu ɗanga m peme ukpakure (200) a̱ka̱nda̱ruwa̱.

21 Hiram shuwa̱ ta̱ atsura o ndolo o uwata wa̱ A̱a̱'isamapaɗa. Atsura a na a̱ ri upasu wu uyagi u ɗe yi ta̱ Yakin. Za vu upasu wu ugana waru gba Buwaza. 22 Aci a na a̱ ri zuva va atsura a̱ da̱na̱ ta̱ nu uruma u yipa̱lu. Ne tsundolo tsa ɗa o kotoi ulinga wa atsura'a.

23 U yuwan ta̱ aakwanu a gbain a̱ mini wu uzuɗu wu rumu ma̱ka̱nda̱ri, udasu kupa no ozo o ton diga a̱ nge'en a̱ tyo a̱ nge'en. Waru u da̱na̱ ta̱ na̱ a̱ru'un udasu wu ucindere na akapi, a̱ka̱nda̱ruwa̱ yi ta̱ suru ni iɗana uga'an udasu wu amunga no ozo o ton. 24 Za̱la̱ vu nge'en mudele n ka̱nda̱ruwa̱ yi ta̱, mudele n ta̱li a̱tsuma̱ o udasu u ta̱ biti. A yuwan ta̱ mudele'e ugeru u re uba̱ta̱ u ta̱ na akapi aakwanu a̱ mini'i.

25 U da̱na̱ ta̱ mishin zuva vo oroci o ogono e inan kupa ne ejere, aza a ta'atsu a̱a̱ ka̱lyuwusa̱ upasu wu ugana, aza a ta'atsu a̱ ka̱lyuwusa̱ a̱livu, aza a ta'atsu a̱a̱ ka̱lyuwusa̱ uyagi aza a ta'atsu waru a̱a̱ ka̱lyuwusa̱ asana. Aakwanu a̱ mini'i u da̱na̱ ta̱ zuva le, aatangulu e le a̱ da̱na̱ ta̱ a̱ tyo e memere. 26 Ugba̱mu wa aakwanu a̱ mini'i u rawa ta̱ utapu wu ukere, waru nge'en ma̱ yi n rotso ta̱ nge'en m mokkoto, tsa̱ yipa̱lu tsa na tso ɓosoi. U tsu lyuwa ta̱ aakpatalutsu a̱ mini ukpakukupa kupa na̱ ukpakukupa uta̱ na̱ ukpakuton (11,500).

27 Waru u yuwan ta̱ wisawatan u na a tsu tawa kupa wu rumushili, za ta̱ suru uga'an wa̱ yi udasu uta̱li, udasu uta̱li washin, nu udasu una̱shi na akapi mishin. 28 Apa nda cine a yuwain wisawata'an: A̱ da̱na̱ ta̱ ne eɓele uɓoluloi ni irumu a̱ nge'en. 29 Reve ɗe eɓele'e a zuwa ɗe yironishi yi ikamu no ogono e inan na̱ nan kerobobi ni irumu a̱ nge'en fo. Reve a ruma lulu yipa̱lu za̱la̱ na̱ zuva vi ikamu no ogono e ina'an. 30 Wisawatan u ta̱ biti u da̱na̱ ta̱ na̱ a̱ga̱nda̱mu a̱ na̱shin a̱ rumushili vi ikeke yi ido, za ta̱ suru da̱na̱ ta̱ na aasa'atsu uzuwu zuva va atsura a̱ na̱shin, u na a̱ zuɗa̱ yi uruma u yipa̱lu e eɓele suru. 31 Wisawata'an u da̱na̱ ta̱ nu ukpa̱tu'wa̱ta̱ uka̱nda̱ruwu u na nge'en ma̱ yi n shi a̱ru'un udasu u ta̱ na akapi. Una̱ wa̱ a̱ yi u da̱na̱ ta̱ na̱ she'en eɓele'e, a̱ka̱nda̱ruwa̱ una̱ wa̱ yi u shi ta̱ ni iɗana. Uga'an na̱ washin we eɓele'e a̱ da̱na̱ ta̱ una̱ta̱, agba uka̱nda̱ruwu shi. 32 A̱ga̱nda̱mu a̱ na̱shi a̱ shi ta̱ za̱la̱ ve eɓele, aɗanga a̱ a̱ga̱nda̱mu'u a̱ da̱na̱ ta̱ uɓoluloi na ana'an. Uga'an wa̱ a̱ga̱nda̱mu suru u da̱na̱ ta̱ udasu u re na akapi nu uɓatsulai una̱shi. 33 A̱ga̱nda̱mu'u o rotso ta̱ a̱ga̱nda̱mu e ikeke yi ido, na̱ rumu na ri uɓa̱nu na ana'an, na̱ rumu va̱ a̱ga̱nda̱mu, na̱ mu rumu va̱ a̱ga̱nda̱mu'u, na̱ upondo u keke suru a̱za̱ o uzuɗu a ɗa.

34 A̱ da̱na̱ ta̱ na̱ wisawatan e eɓele a̱ na̱shi suru, wisawatan suru u oɓolo a̱ ta̱ na̱ a̱ga̱nda̱mu e ikeke yi ido'o. 35 Ɗe zuva wisawata'an ili i ro i shi ta̱ ɗe ma̱ka̱nda̱ri va̱ a̱ru'un utapu u ta̱ nu uɓatsulai. Ili i na i guza̱ niyi ne eɓele'e a̱ ta̱ uɓoluloi ɗe gon wisawata'an. 36 U she'en ta̱ lulu kerobobi na̱ vi ikamu na̱ vu shuwa a̱ lipu vi ikyun ne eɓele'e uba̱ta̱ u na u ri nu ure suru, na̱ yipa̱lu a̱ka̱nda̱ruwa̱. 37 Ne ɗa u yuwain wisawatan kupa'a. A̱ zuɗa̱ le ta̱ suru urotsuloi a̱vu waru a̱ da̱na̱ mgbain una̱ta̱.

38 Reve waru Hiram yuwan asa'atsu e keke'en a̱ mini kupa a̱ rumushili, aasa'atsu a̱ ta̱ suru u tsu lyuwa ta̱ ukpakure nu ushin (220) wa a aakpatalutsu a̱ mini. Aasa'atsu suru a̱ da̱na̱ ta̱ udasu wu uta̱li a̱ka̱nda̱ruwa̱, waru aasa'atsu a̱ ta̱ suru u da̱na̱ ta̱ a wisawatan u ta̱. 39 U zuwa ta̱ wisawatan ton upasu wu uyagi wa̱ A̱a̱'isamapaɗa ozo o ton waru upasu wu ugana. Reve u zuwa aakwanu a̱ mini a gbain o upasu wu uyagi ɗe o ukosu wo obolu wa asana wu uyagi wa̱ A̱a̱'isamapaɗa'a. 40 Reve waru Hiram yuwan n sa'atsu ni isheburu na akwanu o wukyo'onusu. Ne ɗa Hiram kotoi ulinga u na u yuwayin Mogono Sulemanu suru a̱tsuma̱ a̱ A̱a̱'isamapaɗa a̱ A̱sulazuva:

41 Atsura e re,

nu ukosu u na u rotsoi akwanu e re zuva va atsura,

na̱ ugeru u re u na wukalai ukosu u na u rotsoi aci ye e re a na a̱ ri zuva va atsura,

42 muwun mu ɗanga m peme adama o ugeru u re wa akani, ugeru suru u da̱na̱ ukpaku, ugeru u re biti adama a akani a̱ ta̱, a kalai ukosu wa aci zuva va a atsura'a,

43 na̱ wisawatan kupa'a oɓolo na asa'atsu kupa e le,

44 Na aakwanu a̱ mini oɓolo no ogono e inan kupa ne ejere za̱la̱ va̱ yi.

45 na̱ mpondo ni isheburu na akwanu o wukyo'onusu.

Itana i nda suru i na Hiram yuwayin Mogono Sulemanu adama a̱ A̱a̱'isamapaɗa a̱ A̱sulazuva, a yuwan le ta̱ na̱ rumushili vu ugboru cine Mogono Sulemanu ca yi udammu. 46 Agalaci a na a̱ ri zuzu nu Uɗolu wa̱ Urudu, e memere ma̱ Sukot na̱ Zaretan, Mogono ma zuwa ta̱ a̱ zuɗa̱ le a̱tsuma̱ a̱ka̱ri a mayuwan mo o olo'o a na o foɓoi e iɗa adama a̱ ma̱zuɗa̱ me e itana'a. 47 Sulemanu rito ume wi ili i nda suru shi adama a na a̱ shi ta̱ a̱bunda̱ lon, e reve ume wu rumushili'i shi.

48 Sulemanu waru yuwan ta̱ suru itana yu ulinga ya̱ A̱a̱'isamapaɗa a̱ A̱sulazuva:

masa'a ma zinariya,

na apada a zinariya a na a tsu zuwa opopofu a na a tawai,

49 oɓolo na̱ wisawatan u fitila za zinariya can ozo o ton o upasu wu uyagi ozo o ton waru o upasu wu ugana, na̱ elime o Upasu u na u La'ai Akiza,

na̱ yipa̱lu wukalu ni ifitila na̱ mukkana mu ukimususa̱n wa akina wa zinariya can, 50 na̱ mukkoto n keke'en,

mukkana mu ukimususa̱n wa akina,

na akwanu a gbagbain

na aayimba a̱tsuka̱ suru a aza a zinariya can,

na̱ akwanu e mekene ma akinkina akina,

ni ili i na i tsu ɓana na̱ntsu vu Upasu u na La'ai Akiza, oɓolo na̱ za vu na̱ntsu u gbain wa̱ A̱a̱'isamapaɗa.

U yuwan le ta̱ na̱ zinariya can.

51 Ana o kotoi ulinga u na Mogono Sulemanu yuwain adama a̱ A̱a̱'isamapaɗa a̱ A̱sulazuva suru, a̱vu u ta̱wa̱a̱ ni itana i na dada va̱ yi Da̱wuda tawai, azurufa na̱ zinariya ni itana yu ulinga, reve u zuwa le o uzuwata wa̱ A̱a̱'isamapaɗa a̱ A̱sulazuva.