1 Ana Egbere lyuci va Sheba uwwai aɗa ala a Sulemanu adama a tsugbain tsa a na u ta̱wa̱ a̱ yi ala a̱ A̱sulazuva, oɓolo nu ukobu u na usai u ta̱wa̱ ta̱ adama u lyungwa̱ yi na̱ yeci yu usa̱n. 2 U rawa ta̱ Urishelima no oɓolo a̱za̱ o ushewusun a̱bunda̱, na arakumi utanuwu ni itana yu ucita na̱ zinariya va̱ a̱bunda̱, na atali e ikebe. Ana u rawai uba̱ta̱ wa Sulemanu a̱vu u yuwan adanshi na̱ a̱yi e ili i na i ri o okolo a̱ yi suru. 3 Sulemanu gba usu ta̱ yeci ya̱ yi suru, ko ili i ta̱ i yuwan mogono usa̱n na waa cuɗuwa yi shi. 4 Ana Egbere va Sheba uwwai ugbozu wa Sulemanu suru na̱ cine we enei u suwai ukobu u tsugono tsa a̱ yi, 5 na̱ cu'un vi ilyalya ya̱ yi na̱ cu'un vu nden ma azagbain a̱ yi, na̱ cine a̱za̱ a̱ a̱ga̱nda̱ a̱ yi a̱ ri o ulinga, na̱ cu'un va̱ a̱tugu o uga'an e le, na aza a na aa casu yi ili yo oso, na̱ kucci vu ukula̱tosu na u yuwain a̱tsuma̱ a̱ A̱a̱'isamapaɗa a̱ A̱sulazuva, reve u uwa asalama.

6 Reve u damma mogono, <<Alabari a na mu uwwai e iɗa i va̱ adama o ulyuwu wa aci wa̱ wu nu ugbozu wa̱ wu amayun a ɗa. 7 Amma n shi n usu aalabari'i shi she na n ta̱wa̱ me enei ne esu a̱ va̱. Amayun ko uɓatsulai a damma mu shi, a̱tsuma̱ o ugbozu nu utsuru vu la'a ta̱ alabari a na mu uwwai lon. 8 Ama a̱ wu a̱ ta̱ na̱ ma̱za̱nga̱ lon! Azagbain a̱ wu a̱ ta̱ na̱ ma̱za̱nga̱, ele na e isawusan a̱ ma̱ka̱ka̱n ma̱ wu kuci a uwwusa ugbozu wa̱ wu! 9 Ica a̱ tyo e ekere a̱ A̱sulazuva A̱sula̱ a̱ wu, za na a uwwusa uyo'o wa̱ wu, a̱vu u zuwa wu o ootogu o tsugono tsa Isra'ila. Adama e icigi ya̱ A̱sulazuva i na i tsu vadala shi e ekere a Isra'ila, u zuwa wu ta̱ mogono, adama vu yuwan uge'etosu u mejege na̱ a̱ɓula̱.>>

10 Reve u ca mogono zinariya vu ume ukpaku nu ushin (120) ni itana yu ucita ya̱ a̱bunda̱, na atali e ikebe. A̱ da̱shi ta̱wa̱ ni itana yu ucita ya̱ a̱bunda̱ tsa aza a na Egbere va Sheba cayi Mogono Sulemanu shi.

11 Antsun a gbagbain a Hiram a̱ ta̱wa̱a̱ ta̱ na̱ zinariya diga Ofi, reve a̱ ta̱wa̱a̱ na̱ ɗanga alumug diga ɗe oɓolo na atali e ikebe. 12 Mogono ma yuwan ta̱ ulinga na̱ ɗanga alumug u yuwan atsura e ikyun ya̱ A̱a̱'isamapaɗa a̱ A̱sulazuva oɓolo nu ukobu u tsugono, a̱vu waru u yuwan ikumburu ni igaraya adama a ashipi. A̱ da̱shi ta̱wa̱a̱ ko e ene ɗanga alumug tsundolo shi diga o urana u ndolo.

13 Mogono Sulemanu ma ca ta̱ egbere va Sheba ili i na u cigai suru waru u patiyi, babu ni ili i na u ca niyi diga a̱tsuma̱ o utsuru wa̱ a̱bunda̱ o tsugono tsa̱ yi. Reve egbere'e u ka̱ra̱ a̱ ka̱mba̱ e iɗa ya̱ yi oɓolo na a̱za̱ o ushewusun a̱ yi.

14 A̱bunda̱ a zinariya a na a̱ tsu ta̱wa̱a̱ Sulemanu aa'wan suru ume wa̱ yi u tsu rawa ta̱ Ukpaku uta̱li na̱ kupota̱li na̱ a̱za̱ a̱ ta̱li (666). 15 Babu nu utafa u na aza a atsulu na awina oɓolo na aza a na ngono ma Araba suru na̱ nan gwamna e iɗa'a a tsu ca.

16 Mogono Sulemanu ma yuwan ta̱ a̱ra̱ga̱ a gbagbain a zinariya na a rumai ukpaku ure (200), za ta̱ suru a yuwan yi ta̱ nu ukunzuwu u zinariya ukpaku uta̱li (600). 17 U yuwan ta̱ waru a̱ra̱ga̱ e keke'en a na a rumai na̱ zinariya ukpaku uta'atsu (300), za ta̱ suru nu ukunzuwu u zinariya uta'atsu. Mogono ma zuwa le ta̱ o Ukobu u Tsugono u na a yuwain na akpata a̱a̱rumbu a Lebanon.

18 Reve mogono ma yuwan a̱ba̱jini ootogu o tsugono na anga a agiwa, reve a sura alanga a̱ yi waru na̱ zinariya. 19 Ootogu'u a̱ shi ta̱ nu udasata u ta̱li, ucina̱ wa̱ yi waru ogbodolu. Nge'en mu nda̱na̱ta̱ suru u shi ta̱ nu uzuwata we ekere nu uruma wu kamu mishin e eɓele suru. 20 Ruma vi ikamu kupa ne ejere a̱ da̱na̱ ta̱ mishin za ta̱ suru a̱ nge'en mu udasata biti vu udasata ta̱li'i. Koto a̱ shi a yuwan ootogu o tsugono oroci o ndolo o uba̱ta̱ u tsugono tso ro shi. 21 Mukotto me ili yo oso i Mogono Sulemanu aza a zinariya a ɗa a̱ shi suru, waru itana yu u'wa'a fo wu Ukobu u Tsugono u na a yuwain na akpata a̱a̱rumbu a Lebanon suru aza a zinariya a ɗa can. Ko ili i ta̱ a yuwan na̱ azurufa shi adama a na a̱ shi a tara azurufa ili ya̱ a̱ɓula̱ lon a mantsa ma Sulemanu shi. 22 Mogono ma̱ shi ta̱ na Antsun a̱ a̱bunda̱ a mala adama a atsulu na awina oɓolo na antsun a Hiram. A̱tsuma̱ a a'wan a ta'atsu a̱ tsu ka̱mba̱ ta̱ Tarshishi uta̱ utanuwu na̱ zinariya na̱ azurufa na anga a agiwa ni iyomo oɓolo na̱ a̱gba̱da̱gi.

23 Mogono Sulemanu ma̱ shi ta̱ ma la'a ngono mu uvaɗi suru utsuru nu ugbozu. 24 Uvaɗi ma̱ɓula̱ a ciga ta̱ a̱ ta̱wa̱ ya Sulemanu adama a uwwa ugbozu u na A̱sula̱ a ca niyi o okolo. 25 Aa'wan suru, za na ta̱wa̱i biti u tsu ta̱wa̱ ta̱ nu une'e wi itana i azurufa na̱ zinariya, na̱ a̱tugu o uga'an ni itana yu uvon ni itana yu ucita ni ido oɓolo na̱ nloli mi i do.

26 Sulemanu ɓoloto ta̱ ikeke yi ido na akumbi e ido. U da̱na̱ ta̱ ni ikeke yi ido ukpakukupa nu ukpaku una̱shi (1,400) na akumbi e ido ukpakukupa ure (12,000), aza a na u zuwai e ilyuci yi ikeke yi ido oɓolo na̱ mogono a̱tsuma̱ a̱ Urishelima. 27 Mogono ma zuwa ta̱ azurufa o'wo a̱bunda̱ pere a̱tsuma̱ a̱ Urishelima tsa atali, na̱ ɗanga sida waru a̱bunda̱ tsa̱ a̱bunda̱ ɗanga vu ubiri e ikyun yi iɗa i mugaɗi. 28 Sulemanu ta̱wa̱ ta̱ ni ido diga Masar na̱ Kuye, aza a na aza a atsulu na awina o mogono a ɗa a tsula nle diga Kuye. 29 A̱ ta̱wa̱ ta̱ ni ikeke yi ido diga Masar o una̱ u azurufa ukunzuwu ukpaku uta̱li (600), ido suru o una̱ wu ukpaku na̱ kupoton (150). Reve waru o uta̱a̱ le a̱ tyo uba̱ta̱ wu ngono wa aza a Hitiya na aza a Suriya.