1 Ana a tarai mantsa ma̱ a̱bunda̱, a̱tsuma̱ a aa'wan a ta'atsu, a̱vu adanshi a̱ A̱sulazuva a̱ ta̱wa̱ ya Iliya, <<'Ya̱wa̱ vu roco aciya̱wu uba̱ta̱ wa Ahabu, adama a na n ta̱ lyungu ni iro'i a̱tsuma̱ o uvaɗi. >> 2 Reve Iliya ka̱ra̱ adama a na wo roco aciya̱yi uba̱ta̱ wa Ahabu. Adama a na ambulu a suɗuwa ta̱ lon a̱tsuma̱ a Samariya, 3 a̱vu Ahabu ɗe Obadiya, zana da̱na̱i zagbain vu ukobu wa̱ yi. Obadiya gba vuma ɗa za na da̱na̱i na̱ wovon wa̱ A̱sulazuva. 4 A mantsa mo ndolo Yezebel da̱na̱ ta̱ o unusa ama̱sula̱, Obadiya soko ta̱ ama̱sula̱ ukpaku a̱tsuma̱ a̱ a̱ba̱nu e re, kupoton a̱ a̱a̱ba̱nu a̱ ta̱ kupoton a za ta̱. Reve u ta̱wusa̱a̱ le ni ilyalya na̱ mini. 5 A̱vu Ahabu damma Obadiya, <<Ka̱ra̱ a̱ tyo we iɗa na̱ ɗolu nu uka̱ri. Ko tsu ta gura tsura̱ anlya adama e ido i tsu na̱ nloli mi ido i tsu adama tsu wawa le, ta̱wa̱ tsu lamba iliyamunga i tsu iro wan.>> 6 Adama o ndolo a̱vu e ne'eshen iɗa'a adama a na a pasalai pe, Ahabu tyo wu upasu uta̱ Obadiya waru upasu uta̱.

7 Obadiya a̱tsuma̱ a mmalu a̱ ka̱ra̱, reve a ga'asan na̱ Iliya. A̱vu Obadiya reve yi, reve u ka̱ɗa̱to a̱ ma̱ka̱ka̱n ma̱ yi, a̱vu u damma, <<A̱vu ɗa mayun, zagbain va̱ Iliya?>>

8 Reve u usu yi, <<Ee, ka̱ra̱ a̱ 'ya̱wa̱ vu damma zagbain va̱ wu, <Iliya tu pa nda.> >>

9 Reve Obadiya damma, <<Nye ɗa unusu u va̱, a na va casu aagbashi a̱ wu Ahabu a na o unai? 10 N kucina ta̱ na̱ a̱ A̱sulazuva A̱sula̱ a na a̱ ri wuma, babu lo nɗa ko tsugono a na zagbain va̱ lambai a na wa̱ lyungu nanza a zami wu. N na damma vu lo shi, reve u zuwa nɗa'a ko tsugono'o a kucina yi, a damma ene wu shi. 11 Amma gogo vu damma mu ta̱ n 'ya̱wa̱ uba̱ta̱ wu zagbain va̱ n damma, <Iliya tu pa nda.> 12 Me reve uba̱ta̱ u na Ruhu va̱ A̱sulazuva a tara wu a̱ tyo shi a mantsa ma na n lyawa nu wu. N na̱ 'ya̱wa̱ a na ma damma Ahabu a ɗa a̱ wu agba u cina wu pa shi, u ta una mu. Agba a̱mu aagbashi a̱ wu n yuwaan ta̱ A̱sulazuva a̱ga̱nda̱ a̱mu a̱ tsu lolobo. 13 Vu uwa aɗa a nda shi, zagbain a̱ va̱, ili i na n yuwain a mantsa ma na Yezebel da̱na̱i o unusa ama̱sula̱ a̱ A̱sulazuva shi? N soko ta̱ ama̱sula̱ a̱ A̱sulazuva ukpaku a̱tsuma̱ a̱ a̱ba̱nu e re, kupoton a̱ a̱a̱ba̱nu a̱ ta̱ kupoton a za ta̱. A̱vu n ta̱wusa̱a̱ le ni ilyalya na̱ mini. 14 Amma gogo vu dammu ta̱ n ka̱ra̱ a̱ tyo uba̱ta̱ wu zagbain va̱ n damma, <Iliya tu pa nda.> U ta una mu!>> 15 A̱vu Iliya damma, <<N kucina ta̱ na̱ a̱ A̱sulazuva o oɓolo a̱ a̱soja a zuva a na a̱ ri wuma, za na ma yuwusaan a̱ga̱nda̱, na amayun n ta̱ roco aciya̱va̱ uba̱ta̱ wa Ahabu ana'an.>>

16 Reve Obadiya ka̱ra̱ a̱ 'ya̱wa̱ uba̱ta̱ wa Ahabu a̱vu u damma yi, a̱vu Ahabu ka̱ra̱ adama a na wa cina Iliya. 17 Ana we enei Iliya, reve u dammai, <<A̱vu ɗa nda'a, za na a̱ ta̱wa̱sa̱ Isra'ila na̱ a̱tsuma̱lima̱?>>

18 A̱vu Iliya usu yi, <<N zuwaa Isra'ila a̱tsuma̱lima̱ shi. A̱vu nu u'wa wa aabara a̱ wu a ɗa i ta̱wa̱yi Isra'ila na̱ a̱tsuma̱lima̱ a na i 'yuwain a yuwan tsutoni na̱ wila̱ wa̱ A̱sulazuva, reve i yuwaan a̱a̱ma̱li Ba'al a̱ga̱nda̱. 19 Gogo vu ɗe suru ama a Isra'ila, a cina mu a Masasan ma Kame. Waru vu ta̱wa̱ na ama̱sula̱ a̱ a̱a̱ma̱li a Ba'al ukpakuna̱shi na̱ kupoton (450), na ama̱sula̱ a̱ a̱a̱ma̱li a ka Ashera ukpakuna̱shi (400) aza a na a lyuwusa apada a Yezebel.>>

20 A̱vu Ahabu lyunguwa̱ adanshi a̱tsuma̱ ama a Isra'ila suru oɓoloto oɓolo na ama̱sula̱ a̱ a̱a̱ma̱li'i a Masasan ma Kame. 21 Reve Iliya isawan a̱ ma̱ka̱ka̱n me le, reve u damma, <<Hali a̱ tyo a mantsa ma̱ ne ma ɗa yaa gura zuwa okolo a̱ ɗu uba̱ta̱ u ta̱? Nna̱ A̱sulazuva A̱sula̱ a ɗa, i yuwaan yi a̱ga̱nda̱, agba nna̱ Ba'al A̱sula̱ a ɗa, i yuwaan yi a̱ga̱nda̱!>>

Agba ama'a a damma ili shi.

22 A̱vu Iliya damma le, <<A̱mu ɗa vumava̱sula̱ va̱ A̱sulazuva zana la'ai goon, agba a̱ɗu ɗa nda ama̱sula̱ Ba'al ukpakuna̱shi na̱ kupoton (450). 23 Gogo i ta̱wa̱ no ogono e inan e re. A̱vu a ɗangula za ta̱ adama aciya le, reve a pupaɗa yi mukoɗi mukoɗi reve a̱ kuru inama'a a ɗanga, babu na a zuwai akina. A̱mu fo n ta foɓo ogono a̱ ire a̱vu n kuru yi zuva vu ɗanga waru maa zuwa akina shi. 24 A̱vu i ɗe ala musula̱ n ɗu, reve a̱mu waru n vasa a̱ tyo e ekere ala a̱ A̱sulazuva. Reve za na usuyi u lyungu yi na akina, a̱yi ɗa A̱sula̱.>>

Reve ama'a suru a̱ usu, << Ana, wu ntsa ta̱ ne. >>

25 A̱vu Iliya damma ama̱sula̱ a Ba'al ana, <<I fara ɗangula ogono ɗu i foɓoi, adama a na i ri ya̱ a̱bunda̱. I ɗe ala musula̱ n ɗu, amma she i zuwa akina a ɗanga'a wan.>> 26 A̱vu a tara ogono a nan a na a ca nle reve o foɓoi.

A̱vu e ɗe ala a Ba'al diga usana acina urana. A̱vu a sala <<O'o Ba'al usu tsu!>> Agba a̱tsura̱ u uɗyo shi, babu lo za na usuwu yi. A̱vu a yuwusan uje'en a̱ ka̱nda̱ruwusa̱ masa'a ma na a yuwain.

27 Nu urana, reve Iliya teme a yuwusaan le ulamu, reve u damma, <<Da̱shi oruwoi nu ucira, amayun a̱ yi ma̱sula̱ ma ɗa! U to o'wo u ta̱ na̱ majiyan ma̱ a̱ru'un, ko u da̱na̱ a yuwusan ulinga u ro, ko u yuwan ta̱ mmalu. Ko u ta nlavu adama i jisan yi.>>

28 Reve a̱ ka̱ra̱ a yisaali lon, hali a̱ ka̱ra̱ a kyu'usan aciyele na̱ matsun me pe'eni ni ibata, ununa agadu le a̱ ri, hali she na̱ mpasa n le n yenei. 29 Ne ɗa a yuwusain hali urana u koto a̱ tyo a mantsa ma̱ kucci vu ulivu. Agba babu uɗyo wu nanza, babu za na usu yi, babu za na zuwai atsuvu.

30 Reve Iliya damma suru ama'a, <<Ta̱wa̱i nda!>> A̱vu a̱ ta̱wa̱ ya̱'a̱ yi, reve u lapula masa'a ma̱ A̱sulazuva, ma na ma̱ shi ma̱ lungusa̱i. 31 A̱vu Iliya tara atali kupa ne ejere, aatali a̱ ta̱ biti o una̱ wu ugundo wu matsun wa Yakubu, ekere a za na adanshi a̱ A̱sulazuva a̱ ta̱wa̱i, a dansa, <<Aala a̱ wu o to o Isra'ila. >> 32 Naa atali ɗaɗa u suwa yi masa'a na aala A̱sulazuva, reve u ka̱pa̱ a̱a̱ka̱ri washin a̱ ka̱nda̱ruwa̱ masa'a'a cine waa gura tara ndele mini aza a ata'atsu. 33 A̱vu u ɓoloto ɗanga a masa'a'a, reve u pupaɗa ogono nan mukoɗi mukoɗi. A̱vu u damma le, <<Shitoyin ara'atsu a̱ na̱shi na̱ mini, reve i tsuwa̱a̱n kucci na̱ ɗanga'a suru.>>

34 A̱vu u damma le waru, <<Yuwisain ne.>> Reve a yuwisan ne. A̱vu u damma, <<A yuwan ne u ta'atsu.>> Reve a yuwisain ne toto ta'atsu. 35 Hali mini me yene a̱vu u da̱nu tapu a̱ a̱a̱ka̱ri a masa'a'a.

36 Ana mantsa ma na a ca kucci vu ulivu yuwain, reve Iliya vumava̱sula̱ ka̱ra̱ a̱ tyo uba̱ta̱ u masa'a'a, reve u vasa, <<A̱sulazuva, A̱sula̱ a Ibrahim na̱ Ishiyaku na̱ Yakubu, vu roco ama ana'an a na a̱vu ɗa A̱sula̱ goon a̱tsuma̱ a Isra'ila, waru a̱mu aagbashi a̱ wu a ɗa. Vu roco a na a̱vu ɗa vu zuwa numu n yuwan ili i nda. 37 A̱sulazuva vu usu avasa a̱ va̱, vu usu mu, tsa̱ra̱ ama a nda e reve a na a̱vu ɗa A̱sulazuva A̱sula̱, waru a̱vu ɗa vu ka̱mba̱to yi okolo e le.>>

38 Reve akina A̱sulazuva a̱cipa̱, a̱vu u kula̱to kucci'i na̱ ɗanga'a na atali'i na̱ ma̱bula̱, a̱vu waru u 'yeweto mini ma̱ a̱ka̱ri'i.

39 Ana suru ama e enei ili i nda, reve o von ma̱kpa̱ɓa̱, a̱vu a sala, <<A̱sulazuva A̱sula̱ a ɗa! A̱sulazuva a̱yi ɗa A̱sula̱!>>

40 Reve Iliya damma, <<Remei ama̱sula̱ a Ba'al. She i lyawa ko za ta̱ a̱tsuma̱ e le suma wan!>> A̱vu e reme le. A̱vu Iliya zuwa a̱ ta̱wa̱ ne le o uka̱ri wa Kishon a̱vu i paɗa le ɗe.

41 Reve Iliya damma Ahabu, <<Gogo ka̱ra̱ vu lyuwa vu sowo, mu uwwa ta̱ ma̱gugwa̱ mo o ucira wi iro'i.>> 42 A̱vu Ahabu ka̱ra̱ u lyuwa u sowo, a̱vu Iliya kumba zuva Masasan ma Kame, uba̱ta̱ u na u kingyoi a̱vu u zuwa urewesu wa̱ yi e memere ma̱ a̱lu a̱ yi.

43 A̱vu u damma aagbashi a̱ yi, <<Ka̱ra̱ a̱ 'ya̱wa̱ vu ka̱lyuwa̱ upasu u mala.>> Reve aagbashi'i a̱ 'ya̱wa̱ u ka̱lyuwa̱, u damma,

<<Ko ili me ene shi.>>

<<Ka̱mbisa̱>> Ucindere u ɗa Iliya dammai u 'ya̱wa̱ u ka̱lyuwa̱.

44 We cindere reve aagbashi'i a damma, <<Me ene ta̱ eleshe ke'en tsa a apata o ukere u vuma a̱ 'yosun diga a mala.>>

A̱vu Iliya damma, <<Jika̱ vu 'ya̱wa̱ uba̱ta̱ wa Ahabu, <Vu damma yi u jika̱ u kumba keke vi ido va̱ yi gogo, u jika̱ adama mini ma putsa yi a na wa̱a̱ ka̱ra̱ wan.> >>

45 A jima shi, a̱vu eleshe a̱ lima̱ na̱ wunla̱ u 'yon, reve upepu u keɓe, a̱vu iro'i yu ucira i ta̱wa̱ a̱vu Ahabu ka̱ra̱ a̱ tyo Yezireyel. 46 Reve ucira wa̱ A̱sulazuva a̱ cipa̱a̱ Iliya, a̱vu u rono una̱ wu utugu wa̱ yi wu nla̱ yi e ikyun, reve u suma hali u fara rawa Ahabu o uwata wa Yezireyel.