1 A mantsa mo tsugono tsa̱ Da̱wuda a yuwan ta̱ ambulu a'wan a ta'atsu ukuruwula̱i, a̱vu Da̱wuda zami urewesu wa̱ A̱sulazuva. Reve A̱sulazuva a damma, <<Adama o wocosu wu mpasa ma Shawulu ɗa nu u'wa wa̱ yi a na wu unai aza a Gibiyon.>>

2 Ama a Gibiyon aza a Isra'ila a ɗa shi, amma akapi a aza Amoriya a na a la'ai ɗa. Aza a Isra'ila a kucina ta̱ ɗe a ta lyawa le, amma Shawulu gba yuwan ta̱ mpolo n na wo o una le suru adama a̱ tsushu'un tsa a na u ri na̱ yi adama a ama a Isra'ila na̱ Yahuda. Reve mogono me ɗe aza a Gibiyon a̱vu u yuwan adanshi ne ele,* 3 we ece e le, <<Nye maa yuwaan ɗu? Cine matara ume wu unusu adama e iwuya i na a yuwan n ɗu adama i zuwaa agadu a̱ A̱sulazuva aba'un?>>

4 A̱vu aza a Gibiyon a̱ usu yi, <<Amayun, azurufa ko zinariya aa gura foɓo tsu nu u'wa wa Shawulu shi, ko tse ece wuma wu nanza a̱tsuma̱ a Isra'ila.>>

A̱vu Da̱wuda ece ele, <<To, nye i cigai n yuwaan ɗu?>>

5 A̱vu a̱ usu mogono, <<Adama a vuma na una n tsu, waru u yuwain ifoɓi i na wo o kototo tsu, adama tsu tsura̱ tsu yuwan wuma a̱tsuma̱ e iɗa ya Isra'ila suru wan, 6 lyawa a ca tsu muwun mo olobo n cindere a̱tsuma̱ a limatan va̱ yi, adama o una le, a̱vu tsu sa̱ga̱do lipu le zuva vu uɗanga a̱ ma̱ka̱ka̱n ma̱ A̱sulazuva a Gibiya lyuci va Shawulu mogono ma na A̱sulazuva a tawai.>>

Ɗaɗa mogono ma dammai, <<To, n ta ca ɗu ele.>>

7 Amma a̱vu mogono ma lyawa Mefiboshe ulobo wa Jonata, mawun ma tsukaya ma Shawulu, adama a akucunu a na a̱ ri lo Da̱wuda na̱ Jonata ulobo wa Shawulu a̱ ma̱ka̱ka̱n ma̱ A̱sulazuva.* 8 Amma mogono ma tara ta̱ Armoni na̱ vuma ro na a̱ shi tsu ɗe fo Mefiboshe olobo e re a Rizfa usheli wa A'iya, aza na u matsayin Shawulu, oɓolo no olobo o ton a Mera* usheli wa Shawulu aza a na shi u matsayin Adriye ulobo wa Bazilai za va Mehola.* 9 A̱vu u ca le e ekere aza a Gibiyon, reve a̱ sa̱ga̱do le zuva vu uɗanga a masasan a̱ ma̱ka̱ka̱n ma̱ A̱sulazuva. Mecindere me le suru a̱ kuwa̱ ta̱ urana uta̱. O urana wu ufaru a mantsa ma na e temei ikani i yitabo.

10 A̱vu Rizfa usheli wa A'iya, ka vu nge'en va Shawulu, ma tara akashamuna a̱ a̱tsumola̱ngu reve u foɓoo aciya̱yi uba̱ta̱ wu nden ɗe a aatali'i uba̱ta̱ u na a̱kwa̱kwa̱'a̱ a̱ ri. U da̱nu ta̱ lo uba̱ta̱'a̱ diga a mantsa ma na e temei ikani hali a cina mantsa ma̱lyuwushi ma na mini ma̱ cipa̱a̱ n le. Nu urana u tsu gba̱ra̱ ta̱ asala diga uba̱ta̱ wa̱ a̱kwa̱kwa̱'a̱, na ayin waru u tsu gba̱ra̱ ta̱ inama yu una diga uba̱ta̱ u le.

11 A mantsa ma na a dammai Da̱wuda ili i na Rizfa usheli wa A'iya ka vu nge'en va Shawulu yuwain, 12 a̱vu Da̱wuda 'ya̱wa̱ u tara etele a Shawulu na̱ a̱za̱ o ulobo wa̱ yi Jonata diga uba̱ta̱ wa ama a Jabe Giliyadu. Amma ama a Jabe Giliyadu a̱ shi ta̱ e iva̱ lipu va Shawulu na̱ Jonata usokowu diga a agalaci a̱ lyuci va Bet Shan uba̱ta̱ u na aza a Filistiya a̱ shi a̱ sa̱ga̱do nle a na o unai Shawulu a masasan ma Gilbowa.* 13 Da̱wuda 'ya̱wa̱ ta̱ ta̱wa̱ ne etele a Shawulu na̱ a̱za̱ o ulobo wa̱ yi Jonata diga ɗe, reve o ɓoloto etele a aza a na o unai na shi a̱ sa̱ga̱doi. 14 A̱vu a̱ ciɗo etele a Shawulu na̱ a̱za̱ o ulobo wa̱ yi Jonata a aason a Kish dada va Shawulu a̱tsuma̱ Zela e iɗa ya Banyami, a̱vu a yuwan ili i na mogono ma zuwai suru. Ana a̱yi ndolo kotoi A̱sula̱ a̱ usu ta̱ avasa e ele o una̱ we iɗa'a.

15 Urana u ro aza a Filistiya a̱ 'ya̱wa̱a̱ ta̱ aza a Isra'ila nu uvon. A̱vu Da̱wuda cipa̱ na̱ a̱soja a̱yi, reve a yuwan uvon na aza a Filistiya hali u kuna̱. 16 A̱vu Isbi Beno vuma ta̱ a̱tsuma̱ a limatan va Rafa za na aaci e ibata yi rumushili va̱ yi rawai ume kilo o uta'atsu na akapi, za na waru shi wunlu na̱ matsun me pe'eni ma sa'avu, u damma u to o una Da̱wuda. 17 Amma a̱vu Abishai ulobo wa Zeruya ta̱wa̱a̱ Da̱wuda ni ikambishi. A̱vu u ga̱la̱ za va Filistiya'a, a̱vu wu una yi. Reve a̱soja'a a zuwa Da̱wuda a na waa kucinaa le, a na wa̱ da̱shi toni le a̱ 'ya̱wa̱ uba̱ta̱ o uvon shi. Waru a damma ta̱, <<A̱vu ɗa ucira wa aza a Isra'ila agba tsu ciga tsu lamba wu shi.>>*

18 A mantsa mo ro waru a yuwan ta̱ uvon u ro na aza a Filistiya a Gob. A̱tsuma̱ o uvon u ɗaɗa Sibekai vuma va Husha unai Saf limatan va Rafa.

19 A̱vu aza a Isra'ila a yuwisan uvon u ro na aza a Filistiya a Gob, reve Elhanan ulobo wa Jayi za va Batalami una Goliya vuma va Gat, za na ugba̱mu wi ibata ya̱ yi u ta̱ tsu ushin.*

20 A̱vu aza a Isra'ila'a a̱ da̱shi yuwisan uvon u ro waru a Gat. Vuma gbain ro shi ta̱ lo na akatsu a̱ ta̱li a̱ ta̱li o ukere na akatsu a̱ ta̱li a̱ ta̱li a ana, akatsu ushin na̱ a̱za̱ a̱ na̱shi suru suru. A̱yi fo limatan va Rafa ɗa. 21 A mantsa ma na u yuwaan yi aza a Isra'ila ulamu, a̱vu Jonata za na a̱yi ɗa ulobo wa Shimeya mawun ma̱ a̱na̱wun ma̱ Da̱wuda mo una yi.

22 A̱soja a Filistiya a̱ na̱shi a nda limatan va Rafa ɗa shi diga a Gat, a̱vu a̱ kuwa̱ e ekere a̱ Da̱wuda na̱ a̱soja a̱ yi.