1 Mantsa ma na mogono Dawuda da̱nuyi o ukobu wa̱ yi, reve waru A̱sulazuva a ca yi wivuwun e ekere a n'yuwatan ma̱ yi n na n ri uka̱nda̱ruwa̱ na̱ a̱yi suru, 2 reve mogono ma damma Natan vumava̱sula̱, <<Ka̱lyuwa̱, a̱mu ɗa nda nden o ukobu wa akpata a ɗanga sida, amma Akpati a Nzuwulai a̱ A̱sula̱ uzuwu o oogodo.>>

3 Reve Natan usu mogono u damma, <<'Ya̱wa̱ vu yuwan ili i na i ri o okolo a̱ wu suru, adama a na A̱sulazuva a̱ ta̱ oɓolo na̱ a̱vu.>>

4 Amma na ayin o ndolo A̱sulazuva a yuwan ta̱ adanshi na̱ Natan u damma, 5 <<'Ya̱wa̱ vu damma aagbashi a̱ va̱ Da̱wuda: <Apa ili i na A̱sulazuva a dammai, a̱vu ɗa za na aa suwaa mu u'wa u na ma̱a̱ da̱nu shi. 6 Koto n da̱nu o u'wa shi diga mantsa ma na mu uta̱yi aza a Isra'ila diga e iɗa ya Masar hali a cina ana'an. Amma n te igaru ba̱ta̱ ba̱ta̱ a̱tsuma̱ o oogodo za na wo o'woi uba̱ta̱ wu nden n va̱. 7 Uba̱ta̱ u na n 'ya̱wa̱i na aza a Isra'ila suru, koto me ece azagbain a Isra'ila, a na n zuwai a na aa guɓa ama a̱ va̱ aza a Isra'ila suru, <<Nye i zuwai koto i suwaa numu u'wa na akpata a sida shi?>> >

8 <<To gogo, vu damma Da̱wuda aagbashi a̱ va̱, <Apa ili i na A̱sulazuva o oɓolo a̱ a̱soja a zuva a dammai: N tara wu ta̱ uba̱ta̱ wa aguɓa u na vaa guɓusa mgbele, adama mo o'woto wu zagbain va ama a̱ va̱ aza a Isra'ila. 9 N da̱na̱ ta̱ oɓolo na̱ a̱vu uba̱ta̱ u na vu 'ya̱wa̱i biti, waru n kototo ta̱ n'yuwatan ma̱ wu elime a̱ wu suru. N ta ca wu ala a gbain, cine vu revei ala a azagbain suru suru a̱tsuma̱ o uvaɗi. 10 Waru n ta ca ama a̱ va̱ aza a Isra'ila uba̱ta̱ a̱vu n shuwa̱ le, tsa̱ra̱ a̱ da̱na̱ nu uba̱ta̱ wa aciyele. Waru a buwa a̱ da̱shi damaton le shi. Waru ama a wuya a̱a̱ da̱shi ɓongi le cine a yuwusain nu ufaru shi, 11 diga a mantsa ma na n zuwai a̱za̱ o uge'etosu wa ama a̱ va̱ aza a Isra'ila. N ta ca wu wivuwun e ekere a n'yuwatan ma̱ wu biti. A̱mu A̱sulazuva a ɗa a damma nuwu, a̱mu na aciya̱va̱ a ɗa ma̱a̱ shuwa̱ u'wa wa̱ wu. 12 Na̱ rana va̱ wu shiwan vu ta̱ kuwa̱ vu cine nkaya ma̱ wu, n ta ya̱sa̱n mawun ma̱ ta̱ a̱tsuma̱ a aza a na vu matsain, za na oo uta̱ a mpasa ma̱ wu, a̱vu n zuwa tsugono tsa̱ yi tsa̱ shuwa̱.* 13 A̱yi ɗa waa suwa u'wa adama a Ala a̱ va̱, waru n ta̱ shuwa̱ ootogu o tsugono tsa̱ yi babu okotu. 14 N to o'wo dada va̱ yi, a̱yi waru wo o'wo ulobo u va̱. Nu u yuwan unusu, n ta ca yi oforo ununa dada tsu ca mawun ma̱ yi oforo na aasuɗu. Waru ama ɗa oo o'wo asuɗu a̱ va̱.* 15 Amma icigi i va̱ i na i tsu vadala shi yaa kasa na̱ a̱yi cine n usa niyi uba̱ta̱ wa Shawulu shi, za na n tawai a̱ ma̱ka̱ka̱n ma̱ wu. 16 U'wa wa̱ wu na̱ tsugono tsa̱ wu tsu ta lyuwa elime a̱ ma̱ka̱ka̱n ma̱ va̱ hali hali. Ootogu o tsugono tsa̱ wu tsu ta̱ shuwa̱.> >>*

17 Reve Natan ka̱mbuwa̱ Da̱wuda idanshi yu udammu i na A̱sula̱ a cuɗuwa niyi suru.

18 Reve Da̱wuda mogono ma̱ 'ya̱wa̱ u uwa o oogodo a na o foɓoyi Akpati a Nzuwulai A̱sulazuva u da̱nu a̱ ma̱ka̱ka̱n ma̱ A̱sulazuva reve u yuwan avasa u damma, <<Zane ɗa a̱mu n ri A̱sulazuva Zagbain, nye i ɗa waru u'wa u va̱, a na vu rawato numu uba̱ta̱ u nda? 19 Agba suru na̱ ne ili i ke'en i ɗa e ekere a̱ wu, A̱sulazuva Zagbain. Vu yuwan ta̱ waru adanshi e isa'ani ye elime o u'wa wa aagbashi a̱ wu. Tsundolo tsa ɗa vu tsu yuwusan na̱ vuma, A̱sulazuva Zagbain!

20 <<Ili i ne i ɗa waru a̱mu Da̱wuda ma̱a̱ da̱shi damma wu? Adama a na vu reve ta̱ ɗe aagbashi a̱ wu, A̱sulazuva Zagbain. 21 Adama adanshi a̱ wu ni ili i na okolo a̱ wu a cigai, ɗaɗa vu yuwain ili i gbain i nda suru a̱vu vu lyawa aagbashi a̱ wu e reve le.

22 <<A̱vu zagbain ɗa lon, A̱sulazuva Zagbain! Babu lo za tsa̱ wu, waru babu lo A̱sula̱ she a̱vu, cine tsu uwwai na atsuvu a̱ tsu suru. 23 To zane ɗa ri lo tsa ama a̱ wu aza a Isra'ila, iɗa i ta̱ i na i ri o uvaɗi za na vu tsupayi o o'wo ama a̱ wu, vu yuwaan ta̱ aciya̱wu ala reve waru vu yuwaan le ili i gbagbain i wovon ya asalama a na vu loyi nɗa na̱ musula̱ n le a̱ ma̱ka̱ka̱n ma ama a̱ wu, aza a na vu tsupayi diga Masar?* 24 Vu zuwa ta̱ ama a̱ wu aza a Isra'ila a̱ shuwa̱ hali hali. Waru a̱vu A̱sulazuva vo o'wo ta̱ A̱sula̱ e le.*

25 <<Gogo A̱sulazuva A̱sula̱, shiton nzuwulai n na vu yuwayin aagbashi a̱ wu nu u'wa wa̱ yi hali hali. Vu yuwan cine vu dammai, 26 tsa̱ra̱ ala a̱ wu a̱ da̱na̱ na̱ tsugbain hali hali. Ama'a a ta damma, <A̱sulazuva o oɓolo a̱ a̱soja a zuva A̱sula̱ a aza a Isra'ila a ɗa!> Waru u'wa wa aagbashi a̱ wu Da̱wuda u ta shuwa̱ a̱ ma̱ka̱ka̱n ma̱ wu.

27 <<Amma adama a̱ wu A̱sulazuva o oɓolo a̱ a̱soja a zuva, A̱sula̱ a aza a Isra'ila, a̱vu ɗa vu rocoi aagbashi a̱ wu, a dansa, <N ta shuwa̱ u'wa wa̱ wu.> A̱yi ɗa i zuwai aagbashi a̱ wu a̱ tsura̱i ugbamu wo okolo a na waa yuwan avasa a nda a̱ tyo ya̱'a̱ wu. 28 To, A̱sulazuva Zagbain, a̱vu ɗa A̱sula̱! Waru idanshi ya̱ wu amayun a ɗa, waru a̱vu ɗa vu yuwayin aagbashi a̱ wu nzuwulai me ili isa'ani i nda. 29 Gogo lyawa u lobono wu, vu yuwan ma̱za̱nga̱ vu zuwaa u'wa wa aagbashi a̱ wu aba'un, adama u lyuwa elime a̱ ma̱ka̱ka̱n ma̱ wu hali hali. A̱sulazuva Zagbain, vu yuwan ta̱ adanshi, waru na aba'un a̱ wu a ɗa u'wa wa aagbashi a̱ wu wa̱a̱ da̱na̱ na aba'un hali hali.>>