1 Ana Ishboshe ulobo wa Shawulu wu uwwai Abna kuwa̱ ta̱ a Heburon, a̱vu okolo a̱ yi a kuɗa, ɗaɗa fo wovon u remei aza a Isra'ila suru. 2 Ishboshe da̱na̱ ta̱ na azagbain e re aza a na ele ɗa nan yali ya̱ a̱soja a na a̱ tsu 'ya̱wa̱ a̱ riya̱a̱ ilyuci yi n'yuwatan nu uvon. Aala a za ta̱ a̱yi ɗa Ba'ana za ve ire waru a̱yi ɗa Rekab, ele olobo a Rimon vuma va Biyaro diga o ugundo wa Banyami ɗa. Adama a na e kece ta̱ lyuci va Biyaro a̱tsuma̱ o upasu wi iɗa ya Banyami, 3 adama a na aza a Biyaro a suma ta̱ a̱ tyo Gitayim, uba̱ta̱ u na a̱ ri a̱ nden n tsumocin hali na ana'an.

4 Jonata ulobo wa Shawulu u da̱na̱ ta̱ nu ulobo za na da̱na̱i na aala Mefiboshe za na da̱na̱i a̱a̱kutsuma̱. U da̱na̱ ta̱ na a'wan o ton nu umatsun a na wu uwwai aɗa o ukwa̱ wa Shawulu na̱ Jonata diga o una̱ wa Yezireyel, a̱vu za na o goloɓuso yi sheɗe yi a̱vu u suma na̱ a̱yi. A̱yi a̱tsuma̱ e ilaɗi, a̱vu ulobo'o u riya̱ ɗaɗa u kutsuma̱i.*

5 Urana u ro a̱vu Rekab na̱ Ba'ana olobo a Rimon vuma va Biyaro, e reme ure a̱ tyo o u'wa wa Ishboshe, a̱vu a rawa ɗe nu urana a aci, a̱yi nven a̱ a̱a̱ga̱da̱ a̱ yi e ivuwusan. 6,7 Ana a uwai hali a̱ tyo a̱tsuma̱ o u'wa'a uba̱ta̱ u na u da̱na̱i nven a aasula a̱ a̱a̱ga̱da̱ a̱yi, a̱vu a yuwan ngashi a ciga ta̱ e kene yitabo, a̱vu a sapa yi a̱ a̱a̱tsuma̱ o una yi reve o koɗo aaci a̱ yi a̱ ka̱ra̱ na̱ a̱yi.

A̱vu a̱ kuru nu Uka̱ri wa Araba, ɗaɗa gba a asai a mmalu. 8 Reve a̱ 'ya̱wa̱a̱ mogono Da̱wuda na aaci a Ishboshe ɗe Heburon. A̱vu a damma yi, <<Nda aaci a Ishboshe, ulobo wa Shawulu, ma'yuwatan ma̱ wu, za na shi cigai u tara wuma wa̱ wu. A̱sulazuva a tsupaa ta̱ zagbain tsu mogono e ekere a Shawulu nu u'wa wa̱ yi.>>

9 Amma Da̱wuda usu ta̱ Rekab na̱ mawun ma̱ a̱na̱wun ma̱ yi Ba'ana, olobo a Rimon vuma va Biyaro, <<N kucina ta̱ na̱ A̱sulazuva a na a̱ ri wuma, za na wawa numu a̱tsuma̱ a addama a̱ va̱ suru! 10 Ana za ro damma numu, <Shawulu kuwa̱ ta̱,> a̱vu u yuwusan majiyan u ta̱wa̱a̱ mu ta̱ nu udammu u sa'ani, n reme yi ta̱ a̱vu n zuwa za ta̱ a̱tsuma̱ a̱ a̱soja una yi a Ziklag. Akunda a na n ca niyi ɗa ndolo adama o udammu wa̱ yi!* 11 Cine woo o'wo e ekere a̱ a̱za̱ e iwuya a na o unai za va̱ a̱ɓula̱ o u'wa wa̱ yi waru a̱ a̱a̱ga̱da̱ a̱ yi? Gogo n ta tsupaa mpasa ma̱ yi e ekere a̱ ɗu, a̱vu n tawa ɗu o uvaɗi!>>

12 A̱vu Da̱wuda zuwa ali o uvon a̱ yi, ɗaɗa gba o una nle. A̱vu o koɗo ekere e le na ana e le a̱vu a̱ sa̱ga̱do lipu le zuva vu uɗanga zuzu no ooko'o a gbain a Heburon. Reve a tara aaci a Ishboshe reve a̱ ciɗo yi a aason a Abna a̱tsuma̱ a̱ Heburon.