1 Mantsa ma na Da̱wuda mogono pasai ncilecile n masasan wa'a, she gba lo Ziba aagbashi a̱ Mefiboshe, o purosu tsa̱ra̱ a ga'asan. Ziba ta̱wa̱a̱ ta̱ na̱ nloli n re utanuwu na akpatali opopofu ukpakure (200), no ogbodolu a̱ muwun n ina̱bi o u'yewu ukpaku (100), nu umatsun u muwun mu ɗanga ukpaku (100), na̱ tsa̱n vu ukwan masayan ma̱ ina̱bi.*

2 Reve mogono Da̱wuda ece Ziba, <<Nye i zuwai vu ta̱wa̱i ni itana i nda?>>

A̱vu Ziba usu yi, <<N ta̱wa̱ ta̱ na̱ nloli adama a̱za̱ o u'wa o mogono a kumba. Opopofu na̱ muwun mu ɗanga waru tsa̱ra̱ ama a tama. Masayan waru tsa̱ra̱ aza na a̱ kuna̱i a̱tsumona o sowo.>>

3 Reve mogono me ece yi, <<A̱ te ɗa Mefiboshe mawun ma tsukaya ma zagbain va̱ wu Shawulu?>>

A̱vu Ziba usu yi, <<U ta̱ ɗe Urishelima, adama a na u ta yuwusan majiyan, <Ana'an u'wa wa Isra'ila u ta̱ ka̱mbuwa̱a̱ mu tsugono tsa akaya va̱ Shawulu.> >>*

4 Reve Da̱wuda damma Ziba, <<Suru ili i na i ri za va Mefiboshe, wo o'wo ta̱ za va̱ wu ana'an nda.>>

A̱vu Ziba damma, <<Wuma wa̱ wu ujima n kingyo ta̱ na̱ a̱lu a̱ va̱ e iɗa, lyawa n tsura̱ isa'ani uba̱ta̱ wa̱ wu zagbain va̱ mogono kuci.>>

5 Ana Da̱wuda mogono rawai a̱ lyuci va̱ Bahurim, a̱vu vuma ro za na ri umatsun uta̱ na̱ Shawulu, za na ri na aala Shimeyi ulobo wa Gera wu uta̱ u ka̱ra̱ a yuwusan a̱yi una̱. 6 A̱vu Shimeyi reme mavara ma̱ Da̱wuda na azagbain a na a̱ da̱na̱i oɓolo na̱ a̱yi suru na atali, oɓolo na̱ a̱soja a na a gurai uvon suru a na a̱ da̱na̱i uka̱nda̱ruwu na̱ a̱yi. 7 Shimeyi da̱na̱ ta̱ a yuwusaan Da̱wuda una̱ a dansa, <<Uta̱, uta̱, a̱vu za wocosu wu mpasa, vuma vama! 8 A̱sulazuva a tsupaa ta̱ suru alaki a mpasa mu u'wa wa Shawulu, za na vu yuwain tsugono o una̱ wa̱ a̱yi, agba gogo A̱sulazuva a ca ta̱ tsugono'o uba̱ta̱ o ulobo wa̱ wu Absalom. Ka̱lyuwa̱ gogo meleshe ma ta aaci a̱ wu adama a na a̱vu za wocosu wu mpasa n ɗa.>>

9 A̱vu Abishai za na mma va̱ yi ɗa Zeruya damma mogono, <<Nye i zuwai vu lyawai a̱kwa̱kwa̱ a̱ musa̱n ma nda a yuwusan zagbain va̱ mogono una̱? Lyawa m pasa n 'ya̱wa̱ n koɗo aaci a̱ yi.>>

10 Amma mogono ma damma ta̱, <<Nye i ɗa i bura numu na̱ a̱ɗu, olobo a Zeruya? Na̱ waa yuwusan una̱ adama a na A̱sulazuva a damma niyi, <Yuwaan Da̱wuda una̱,> za ne ɗa aa damma, <Nye i zuwai vu yuwain ne?> >>

11 A̱vu waru Da̱wuda damma Abishai na azagbain a̱yi suru, <<Hali na wo o'woi ulobo wa̱ a̱a̱tsuma̱ a̱ va̱ u ciga ta̱ na wo una mu, to bele vuma va Banyami ndolo! Lyawa niyi u lyuwa elime na̱ mayan mo una̱'a̱, adama a na A̱sulazuva a ɗa a damma niyi u yuwan ne. 12 U ta gura wo o'wo A̱sulazuva a̱ ka̱lyuwa̱ a̱tsuma̱lima̱ a na n ri pe, waru u tsupaa mu ni isa'ani adama o una̱ u na Shimeyi yuwan numu ana'an.>>

13 Ɗaɗa Da̱wuda na ama a̱yi a lyuwai elime na̱ mmalu o ure, Shimeyi gba a mmalu o upasu uta̱ u masasan nu u yuwusaan yi Da̱wuda una̱, na̱ wu vuvarasa niyi na atali, nu u tsuwusa̱a̱n niyi ma̱buta̱. 14 Mogono na ama a na a̱ ri oɓolo na̱ a̱yi suru a rawa ta̱ o Uɗolu wa̱ Urudu ukunu. Ɗe ɗa e ivuwain.

15 Ele lo reve Absalom na ama a Isra'ila aza a na a̱ ri oɓolo na̱ a̱yi suru a uwa Urishelima. Ahitofe fo u da̱na̱ ta̱ oɓolo na̱ a̱yi. 16 Mantsa ma na Hushai vuma va Arki, i'utsa̱ ya̱ Da̱wuda i rawai uba̱ta̱ wa Absalom, reve u damma, <<Wuma wa̱ wu u jima, mogono! Wuma wa̱ wu u jima, mogono!>>

17 A̱vu Absalom ece Hushai, <<Icigi ya amayun i na vo rocosu i'utsa̱ ya̱ wu Da̱wuda ɗaɗa nda'a? Nye i zuwai vu toniyi i'utsa̱ ya̱ wu u shi?>>

18 A̱vu Hushai usu yi, <<Ne ɗa shi, a̱mu n ta kurusu za na A̱sulazuva a ɗangulai, na̱ za na ama a nda na̱ aza a Isra'ila a ɗangulai suru. A̱yi ɗa n ri oɓolo na̱ a̱yi. 19 Babu na̱ a̱yi ndolo, jene ɗa u lobonoi n yuwaan tsugbashi u ka̱ra̱i ulobo wa̱ yi? Cine n lingayi dada va̱ wu, ne ɗa maa lingaa wu.>>

20 Reve Absalom vadaluwa u damma Ahitofe, <<Ca tsu a̱sa̱la̱ a̱ wu. Nye i ɗa tsaa yuwan?>>

21 Reve Ahitofe usu yi, <<'Ya̱wa̱ vu von na̱ a̱ma̱ci a̱ nge'en a na dada va̱ wu lyawai a̱ ka̱lyuwusa̱ ukobu na akapi a linga vu u'wa'a. Ne ɗa suru ama a Isra'ila e reve a na a̱vu na̱ dada va̱ wu i ri a muwwulai shi. Za ndolo ta̱ da̱shi ca aza a na a̱ kurusu wu ucira.>> 22 Reve o foɓoo Absalom oogodo zuva vu ukwa̱'a̱ wu ukobu u tsugono, a̱vu Absalom uwa u von na̱ a̱ma̱ci a̱ nge'en a dada va̱ yi a̱ ma̱ka̱ka̱n ma aza a Isra'ila suru.*

23 Suru a̱sa̱la̱ a na Ahitofe casu nle a mantsa mo ndolo wo o'wo ta̱ she damma udammu wa̱ A̱sula̱ a ɗa. Ne tsundolo tsa ɗa Da̱wuda na̱ Absalom a̱ usuyi a̱sa̱la̱ a Ahitofe.