1 Ahitofe damma ta̱ Absalom, <<Lyawa n ɗangula ama ukpakukupa kupa nu ukpakukupa ure (12,000), tsa̱ra̱ tsu saɓa Da̱wuda na ayin a nda. 2 N ta̱ riya̱a̱ yi nu uvon mantsa ma na u kuna̱i waru u ta̱ka̱lyuwa̱i. N ta ca yi wovon lon hali ama a̱yi e bete'we suru a lyawa yi. Mogono ma ɗa goon moo una. 3 N ta̱ ta̱wa̱a̱ wu na a ama'a suru cine ama'a she o toni Da̱wuda, vuma na va zama vu una, akapi a ama'a gba a̱ ta̱ da̱na̱ gbaga.>> 4 A̱sa̱la̱ a nda o yo'onoto ta̱ Absalom okolo oɓolo na̱ mbara ma a Isra'ila suru.

5 Amma Absalom damma ta̱, <<Ɗeyi Hushai za va Arki, a̱yi fo tsu uwwa a̱sa̱la̱ a̱ yi.>> 6 Ana Hushai ta̱wa̱i uba̱ta̱ wa̱ yi, reve Absalom damma, <<Apa a̱sa̱la̱ a na Ahitofe cayi. Tsu yuwan ili i na u dammai? Na̱ ne ɗa gba shi, vu damma tsu majiyan ma̱ wu.>>

7 A̱vu Hushai damma Absalom, <<A̱sa̱la̱ a na Ahitofe ca yi a mantsa ma nda ma̱ ri ulobonu shi.>> 8 A̱vu Hushai dammisa, <<Vu reve ta̱ a na dada va̱ wu na ama a̱yi a gura ta̱ uvon lon. A̱ tu usuɗuwu cine vu revei nama gbain vu una na a̱ tsu ɗe biya na a usai muwun. Suru na̱ ne, dada va̱ wu gura ta̱ uvon a̱bunda̱ lon, u tsa asa oɓolo na̱ a̱soja na ayin shi. 9 Ko gogo u ta̱ ɗe upa'awun a̱a̱bunu ko uba̱ta̱ u ro. Na̱ waa fara riya̱a̱ ama a̱ ɗu nu uvon, a̱vu a̱za̱ ro a̱ kuwa̱ za na uwwa niyi suru ta damma, <O una ta̱ a̱za̱ o uvon a na oo tono Absalom na̱ a̱bunda̱.> 10 Ili i nda i ta zuwa soja na ri nu ukadu za na ri no okolo cu'un vu kamu wu da'wan lon. Adama a na vuma suru a̱tsuma̱ a Isra'ila u reve ta̱ a na dada va̱ wu vali vu ucira ɗa na gurai uvon lon, waru a̱soja a na a̱ ri oɓolo na̱ a̱yi a̱ ta̱ nu ukadu.

11 <<Adama o ndolo, n ta casu a̱sa̱la̱. Lyawa o ɓoloto aza a Isra'ila suru, diga upasu wu ugana u lyuci wa Dan a̱ tyo upasu wu uyagi u lyuci wa Biyasheba a̱bunda̱ ele a̱ ta̱ da̱na̱ cine vu revei wuyun ma̱ nge'en m mala. A̱vu, a̱vu na aciya̱wu vu rono le aaɗanga uba̱ta̱ wu uvo'on. 12 Tsu ta̱ riya̱a̱ Da̱wuda nu uvon uba̱ta̱ u na tsu cina niyi suru, a̱vu tsu riya̱a̱ yi nu uvon ba̱ta̱ biti cine vu revei a'iza a̱ tsu kpa̱to iɗa. Ko a̱yi ko za na ri oɓolo na̱ a̱yi babu za na tsaa lyawa wuma. 13 Nu u suma a uwa a̱tsuma̱ a̱ lyuci na ri uka̱nda̱ruwu nu ukari, a̱soja a Isra'ila suru a̱ ta̱ ta̱wa̱ na amunga, o to rono atali o uɓaɓu suru a̱ tyo a̱tsuma̱ o uka̱ri, babu matali ma na aa lyawa zuva vu za va̱ yi.>>

14 Absalom na ama a Isra'ila suru a damma ta̱, <<A̱sa̱la̱ a Hushai za va Arki la'a ta̱ za na Ahitofe ta̱wa̱yi.>> Adama a na A̱sulazuva o foɓo ta̱ u lungusa̱ a̱sa̱la̱ a sa'ani a Ahitofe adama u ta̱wa̱a̱ Absalom na addama.

15 Hushai damma ta̱ Saduku na̱ Abiyata nan ganu, <<Apa cu'un va̱ a̱sa̱la̱ a na Ahitofe cayi Absalom na̱ mbara ma a Isra'ila. Amma a̱mu gba apa cu'un va̱ a̱sa̱la̱ a na n cayi. 16 I jika̱ i lyunguwa̱a̱ Da̱wuda mogono i damma yi, <She vaa asa o upasata wu Uɗolu wa̱ Urudu wa̱ a̱tsumona wan, amma ko cine vaa yuwan vu jika̱ vu pasa. Na̱ vu yuwan ne shi a̱ ta̱ reme wu a̱vu o una wu oɓolo na aza a na a̱ ri oɓolo na̱ a̱vu suru.> >>

17 Jonata oɓolo na̱ Ahima'az a̱ da̱na̱ ta̱ e ipiri a̱ lyusu mini wa̱ En Roge. A̱ tsu lyungu ta̱ aagbashi ka ro adama u damma le ili i na yaa farasa, reve ele a̱ 'ya̱wa̱ a damma Da̱wuda mogono ili i na i ri a mmalu, adama ta̱wa̱ e ene le a ma'uwaa ma̱ lyuci'i wan. 18 Amma ulobo u ro we ene ta̱ Jonata oɓolo na̱ Ahima'az, ɗaɗa u dammai Absalom. Adama o ndolo reve Ahima'az na̱ Jonata a̱ jika̱ a̱ 'yon a̱ 'ya̱wa̱ a uwa o u'wa u vuma ro a̱ lyuci va Bahurim. Vuma'a gba u ta̱ no oko'o a agalaci o u'wa wa̱ yi, reve a uwa pe a pa'an. 19 A̱vu ka vuma'a tara ikpa̱ta̱tsu u kpa̱to una̱ wo oko'o'o. Reve u ta̱wa̱ ni ishina u 'yetsu ɗe. Reve u kacara uba̱ta̱ suru cine za a gura jiyan ili i ro i ta̱ pe shi.

20 Ana a̱soja a Absalom a̱ ta̱wa̱i a̱tsuma̱ o u'wa uba̱ta̱ wu ka'a, reve e ece yi, <<Te ɗa Ahima'az na̱ Jonata?>>

Reve ka u usu le, <<A pasa ta̱ uka̱ri a̱ ka̱ra̱.>>

A̱soja'a a zami le ta̱ agba a̱ tsura̱ le shi, ɗaɗa a̱ ka̱mba̱i a̱tsuma̱ a̱ Urishelima.

21 Ana a̱soja a Absalom a̱ ka̱ra̱i, ɗaɗa Ahima'az na̱ Jonata o uta̱i a̱tsuma̱ o oko'o'o reve a̱ ka̱ra̱ a̱ tyo uba̱ta̱ u na mogono Da̱wuda ri. Reve a damma yi, <<Jika̱ vu pasa Uɗolu wa̱ Urudu'u. Adama a na apa cu'un va̱ a̱sa̱la̱ a na Ahitofe cayi a aci a̱ wu.>> 22 Adama o ndolo a̱vu Da̱wuda na ama a̱yi a̱ 'yon a fara a pasasa Uɗolu wa̱ Urudu suru. Kafu usana u tawa babu vuma na buwai babu na u pasai uɗolu u ndolo.

23 Ana Ahitofe revei a 'yuwan ta̱ a̱ kuru a̱sa̱la̱ a̱yi, reve u foɓo mololi ma̱ yi u kumba, u ka̱mba̱ o u'wa wa̱ yi a̱ lyuci va̱ a̱yi. Ana u foɓoi u'wa wa̱ yi reve wu nla̱ aciya̱yi zuva hali u kuwa̱. Reve a̱ ciɗo yi a aason a dada va̱ yi.

24 A̱vu Da̱wuda ka̱ra̱ a̱tyo a lyuci va Mahanayim. Reve Absalom pasa Uɗolu wa̱ Urudu oɓolo na̱ a̱soja a Isra'ila suru. 25 Absalom zuwa ta̱ Amasa wo o'wo yali ya̱ a̱ a̱soja o una̱ wa Yowab. Amasa ulobo wa Itara* u ɗa vuma va Isra'ila za na zuwai Abigel usheli wa Nahash za na mawun ma̱ a̱na̱wun ma̱ a̱yi ma ɗa Zeruya mma va Yowab. 26 Aza a Isra'ila na̱ Absalom a̱ va̱la̱ ta̱ e iɗa ya Giliyadu.

27 A mantsa ma na Da̱wuda rawai Mahanayim reve Shobi ulobo wa Nahash vuma va Raba vi iɗa ya Amon na̱ Maki ulobo wa Amiyel va̱ Lodeba na̱ Bazilai vu upasu wa Giliyadu vuma va Rogelim, 28 a̱ ta̱wa̱a̱ ni itana i nda: A̱ga̱da̱ na akwanu na̱ mpondo na̱ oroci a yitabo na̱ yitabo ni yira na̱ ishina yu uzuwun na aluba na aluba e nre'on, 29 waru a̱ ta̱wa̱ ta̱ ni ishiki na̱ maani ma̱ a̱ga̱ɓa̱ ni mgbele na̱ wara vi inan adama Da̱wuda na̱ a̱soja a̱yi a tama. Adama a na a damma ta̱, <<A̱soja'a a uwa ta̱ ambulu na akuli nu ukunu a̱ a̱tsumona.>>