1 Ele lo reve Yowab za na mma va̱ yi ɗa Zeruya gura reve a na okolo o mogono a̱ ka̱mba̱ ta̱ uba̱ta̱ wa Absalom. 2 Ɗaɗa Yowab lyunguyi nanza a̱ tyo a̱ lyuci va̱ Tekowa a̱ ta̱wa̱a̱ yi na̱ ka na ri nu ugbozu. Ana u rawai a̱vu a damma yi, <<Yuwan she damma vu ta̱ a yuwusan nden n wiruta̱ a̱vu vo oto itana i wiruta̱. She vu sukuma aciya̱wu mani'in wan, a̱vu vu yuwan she damma vu yuwan ta̱ rana a̱bunda̱ a yuwusan nden n wiruta̱ adama a za ro na kuwa̱i. 3 Reve vu 'ya̱wa̱ uba̱ta̱ u mogono vu damma yi adanshi a nda.>> A̱vu Yowab damma yi ili i na waa damma.

4 Ana ka va̱ Tekowa'a u rawai uba̱ta̱ u mogono a̱vu u kingyo u ka̱ɗa̱to urewesu wa̱ yi e tyo e iɗa, reve u damma, <<O'o mogono, wawa mu!>>

5 Reve mogono me ece yi, <<Ili i ne i ɗa ya̱a̱ ɓa̱la̱ wu?>>

Reve u usu yi, <<Amayun a̱mu ma̱runa̱ ma ɗa, vali va̱ kuwa̱ ta̱ ɗe. 6 A̱mu aagbashi a̱ wu n ta̱ no olobo e re. A yuwan ta̱ nla̱ngi va̱ni le a aatsusa. Waru babu vuma na aa kakasa le. A̱vu za ta̱ ga̱la̱ za ta̱ hali wu una yi. 7 Gogo tsunda umatsun suru u ta̱ nla̱ngi na aagbashi a̱ wu, a̱vu a damma, <Ta̱wa̱yi na̱ za na unai mawun ma̱ a̱na̱wun ma̱ yi, tsa̱ra̱ tsu una yi o una̱ u wuma u mawun ma̱ a̱na̱wun ma̱ yi ma na wu unai, ko na̱ shi tsu ta̱ o una za na aa lyuwa agadu ɗaɗa.> N na a yuwan ne maa buwa ni ili i ro shi, waru aala a vali va̱ na̱ limatan va̱ yi a̱ ta̱ puwa̱n diga o urewesu wu uvaɗi.>>

8 A̱vu mogono ma damma ka'a, <<Ka̱ra̱ a̱ tyo o u'wa wa̱ wu, n ta damma ili i na aa yuwan adama a̱ wu.>>

9 Amma ka'a u damma ta̱ mogono, <<Zagbain va̱ mogono, lyawa unusu u da̱na̱ a aci a̱ va̱ nu u'wa wa dada va̱. Amma lyawa mogono no ootogu o tsugono tso o'wo babu unusu.>>

10 A̱vu mogono ma damma yi, <<Na̱ za ro damma wu ili i ro, vu ta̱wa̱ na̱ a̱yi uba̱ta̱ u va̱, wa̱a̱ da̱shi damaton wu waru shi.>>

11 A̱vu ka'a u da̱shi dammisa yi, <<Wuma wa̱ wu u jima! N ta patishi wu vu cuwan na̱ A̱sulazuva A̱sula̱ a̱ wu. She vu lyawa za na oo tonishi u tsupa mpasa mu ulobo u va̱ u da̱shi ta̱wa̱a̱ nu ukototosu wan, adama she ulobo u va̱ u na u buwai lo wuma u kuwa̱ wan.>>

Reve mogono Da̱wuda damma, <<N kucina ta̱ na̱ A̱sulazuva a na a̱ ri wuma, ko a̱nji a̱ ta̱ o ulobo wa̱ wu a̱a̱ riya̱ e iɗa shi.>>

12 A̱vu ka'a u dammisa, <<Yuwan ankuri lyawa aagbashi a̱ wu a̱a̱ da̱shi yuwisan adanshi a̱ tyo uba̱ta̱ wu zagbain va̱ mogono.>>

A̱vu mogono ma̱ usu yi, <<Damma.>>

13 Reve ka'a u damma, <<Nye i zuwai vu yuwayin ama a̱ A̱sula̱ ili i ro cine a yuwaan numu? Adama o uge'etosu wa̱ wu, ashe vu ge'eto aciya̱wu shi? Ana vu 'yuwain a̱ ka̱mba̱to ulobo wa̱ wu u na a̱ gba̱ra̱i. 14 Tsu ciga tsu 'yuwan tsu kuwa̱i, tsa̱ mini ma na mo ocoi e iɗa, waru babu cine a gura purisa̱ yi. Amma A̱sula̱ a tsu tara wuma tsundolo shi, amma u tsu zami ta̱ ure u na wa̱a̱ ka̱mba̱to aza a na a̱ gba̱ra̱i uba̱ta̱ wa̱ yi. 15 Gogo n ta̱wa̱ ta̱ n damma ili i nda uba̱ta̱ wu zagbain va̱ mogono adama a na ama a zuwa mu ta̱ mu uwwa wovon. Ɗaɗa aagbashi a̱ wu a yuwain majiyan a̱vu u damma, <N ta n yuwan adanshi na̱ mogono, u ta gura wo o'wo u ta̱ usu mu u yuwan ili i na m patiyi. 16 U ta gura wo o'wo mogono ma̱ ta̱ usu u wawa aagbashi a̱ yi e ekere a vuma na cigai wu una mu oɓolo nu ulobo u va̱, a̱vu wu kasa tsu na agadu a na A̱sula̱ a ca ntsu.>

17 <<Waru gogo aagbashi a̱ wu a damma ta̱, <Lyawa adanshi a zagbain va̱ mogono ma̱ ta̱wa̱a̱ mu na̱ wivuwun, adama a na zagbain va̱ mogono ma̱ ta̱ tsa malingata ma̱ A̱sula̱ ma na maa gura kakasa isa'ani ni iwuya. Lyawa A̱sulazuva A̱sula̱ a̱ wu a̱ da̱na̱ oɓolo na̱ a̱vu.> >>*

18 Ɗaɗa mogono ma dammai ka'a, <<Yuwan ankuri she vu soko mu ko ili i ta̱ a̱tsuma̱ e ili i na mee ece wu wan.>>

A̱vu ka'a u damma, <<Lyawa zagbain va̱ mogono ma yuwan adanshi.>>

19 Ɗaɗa we ece niyi, <<Ko ukere wa Yowab u ta̱ pe a̱tsuma̱ a adanshi a̱ wu a nda suru?>>

A̱vu ka'a u usu, <<N kucina ta̱ na̱ a̱vu, ununa vu dammai ne ɗaɗa zagbain va̱ mogono. Ee, aagbashi a̱ wu Yowab ɗa zuwa numu n yuwain ne. A̱yi ɗa waru u zuwai idanshi i nda o una̱ wa aagbashi a̱ wu. 20 Aagbashi a̱ wu Yowab yuwan ta̱ ne tsa̱ra̱ u vadala ili i na yaa farasa gogo. Zagbain va̱ ta̱ nu ugbozu tsa malingata ma̱ A̱sula̱, waru u ta̱ nu urevu wi ili i na yaa farasa suru a̱tsuma̱ e iɗa i nda.>>

21 Ɗaɗa mogono ma dammai Yowab, <<To, n usu ta̱, wala vu 'ya̱wa̱ vu ta̱wa̱ na̱ molobo mo ndolo Absalom.>>

22 A̱vu Yowab kingyo u ka̱ɗa̱to nu urewesu wa̱ yi e tyo e iɗa, reve u zuwaa mogono aba'un. A̱vu waru Yowab dammisa, <<Ana'an aagbashi a̱ wu a̱ tsura̱ ta̱ isa'ani uba̱ta̱ wa̱ wu zagbain va̱ mogono, adama a na vu usu ta̱ ipati ya aagbashi a̱ wu.>>

23 Reve Yowab ka̱ra̱ a̱ tyo Geshu a̱vu u ta̱wa̱to Absalom Urishelima. 24 Amma a̱vu mogono ma damma, <<Lyawa u ka̱ra̱ a̱ tyo o u'wa wa̱ yi, she u ta̱wa̱ a̱ ma̱ka̱ka̱n ma̱ va̱ wan.>> Ɗaɗa Absalom ka̱ra̱i a̱ tyo o u'wa wa̱ yi agba we ene urewesu u mogono shi.

25 A̱tsuma̱ a Isra'ila suru babu za na aa cuwusa ulobonu tsa Absalom. Diga a apata a ana a̱ tyo a aaci babu ili i na ee isulaa yi. 26 Mantsa ma na suru u yuwain ipuna, adama a na o ukosu wa aa'wan suru u tsu puna̱ ta̱ aaci a̱ yi adama a na a̱nji'i a tsu yuwan yi ta̱ ume, reve u rito ume wa̱ a̱nji'i, ume wa̱ a̱nji'i u tsu la'a ta̱ kilo re o uritowu u tsugono.

27 Absalom matsan ta̱ olobo a ta'atsu nu usheli u ta̱ za na a̱ tsu ɗe Tamar, u da̱na̱ ta̱ ulobonu lon.

28 Absalom yuwan ta̱ a'wan e re a̱tsuma̱ a̱ Urishelima, agba we ene urewesu u mogono shi. 29 Avu Absalom lyungu e ɗe Yowab, adama u lyungu yi uba̱ta̱ u mogono, amma Yowab 'yuwan ta̱ a̱ ta̱wa̱ uba̱ta̱ wa̱ yi. A̱vu u lyunguwisa̱ mantsa me ire, amma Yowab 'yuwan ta̱ a̱ ta̱wa̱. 30 Reve u damma agbashi a̱ yi, <<Ka̱lyuwa̱i, uɗuma̱ wa Yowab u ta̱ zuzu na̱ za va̱, u ta̱ na̱ yitabo ɗe 'ya̱wa̱i i daɓa yi akina.>> Reve agbashi a Absalom a̱ 'ya̱wa̱ a daɓa uɗuma̱'a̱ akina.

31 A̱vu Yowab 'ya̱wa̱ o u'wa wa Absalom reve we ece yi, <<Nye i zuwai agbashi a̱ wu a daɓai uɗuma̱ u va̱ akina?>>

32 Reve Absalom usu yi, <<Adama a na n lyunguwa̱ wu ta̱ na adanshi, <Ta̱wa̱, tsa̱ra̱ n lyungu wu uba̱ta̱ u mogono, ve ece, <<Nye i zuwai n ta̱wa̱i diga Geshu? U shi ta̱ a la'aa mu n da̱na̱ ɗe.>> Gogo lyawa n 'ya̱wa̱ a̱ ma̱ka̱ka̱n mo mogono, na̱ n ri nu unusu wi ili i ro, wu una mu.> >>

33 Ɗaɗa Yowab 'ya̱wa̱i uba̱ta̱ u mogono reve u damma yi ili i na Absalom dammai. Reve mogono ma̱ lyungu e ɗe Absalom, a̱vu u ta̱wa̱ u kingyo u ka̱ɗa̱to urewesu wa̱ yi a̱ tyo e iɗa a̱ ma̱ka̱ka̱n mo mogono. Ɗaɗa mogono ma katalai Absalom.