1 Uranu u ro reve Da̱wuda yuwan yeci u damma, <<Ko nanza buwa ta̱ a̱tsuma̱ o u'wa wa Shawulu za na moo roco isa'ani ya amayun adama a̱ Jonata?>>*

2 A mantsa'a aagbashi o ro a̱ shi ta̱ lo za na aa yuwusan ulinga u tsugbashi o u'wa wa Shawulu za na a̱ tsu ɗe Ziba. Reve e ɗe yi u ta̱wa̱ uba̱ta̱ u mogono Da̱wuda, a̱vu mogono me ece yi, <<A̱vu ɗaɗa Ziba?>>

Reve u usu, <<Wuma wa̱ wu u jima, a̱mu ɗaɗa aagbashi a̱ wu, mogono.>>

3 A̱vu mogono me ece yi, <<Babu za ro na buwai a̱tsuma̱ o u'wa wa Shawulu za na moo roco isa'ani ya amayun cine A̱sula̱ a tsu yuwan?>>

Reve Ziba usu mogono, <<Ulobo wa Jonata za na ri a̱kutsuma̱ ana ra ra ra ta̱ lo.*>>

4 Reve mogono me ece yi, <<Te ɗa u ri?>>

A̱vu Ziba usu mogono, <<U ta̱ ɗe o u'wa wa Maki ulobo wa Amiyel a̱ lyuci va Lodeba.>>

5 Ɗaɗa mogono Da̱wuda ma̱ lyunguyi a̱ ta̱wa̱ na̱ a̱yi diga Lodeba, diga o u'wa wa Maki ulobo wa Amiyel.

6 Ana Mefiboshe ulobo wa Jonata, mawun ma tsukaya ma Shawulu ma rawai uba̱ta̱ wa̱ Da̱wuda, reve u kingyo u ka̱ɗa̱to urewesu wa̱ yi e iɗa. Reve Da̱wuda damma, <<Mefiboshe!>>

Reve Mefiboshe usu yi, <<Wuma wa̱ wu u jima, apa aagbashi a̱ wu.>>

7 Reve Da̱wuda damma yi, <<She vu uwwa wovon wan, adama a na n to roco wu isa'ani ya amayun adama a dada va̱ wu Jonata. Waru n ta̱ ka̱mbuwa̱a̱ wu iɗa i na suru yo o'woi za va kaka va̱ wu Shawulu ɗa, waru vu ta̱ da̱na̱ a lyuwusa ilyalya oɓolo na̱ a̱mu a apada a̱ va̱ kuci.>>

8 A̱vu Mefiboshe kingyowisa̱ nu urewesu wa̱ yi she e iɗa, a̱vu u damma, <<Hali nye i ɗa aagbashi a̱ wu, a na vaa tara yi ili i ro? A̱mu aagbashi a̱ wu a ɗa a na a la'ai a̱a̱kwa̱kwa̱ a̱ musa̱n shi.>>

9 Ɗaɗa mogono ma̱ ɗeyi Ziba aagbashi a Shawulu, reve u damma yi, <<N ca ta̱ mawun ma tsukaya ma zagbain va̱ wu Shawulu, suru ili i na yo o'woi za va Shawulu nu u'wa wa̱ yi.* 10 Waru a̱vu no olobo a̱ wu na agbashi a̱ wu i ta̱ da̱na̱ a yuwusaan u'wa wa Shawulu cimba, waru i ta̱wa̱a̱ le ni itana yu uɗuma̱ adama a̱ tsura̱ ilyalya. Amma Mefiboshe mawun ma tsukaya ma zagbain va̱ wu ma̱ ta̱ da̱na̱ a lyuwusa ilyalya oɓolo na̱ a̱mu a apada a̱ va̱ kuci.>> Ziba gba u ta̱ na̱ olobo gendu na agbashi ushin.

11 Reve Ziba usu mogono'o, <<Aagbashi a̱ wu a ta yuwan ili i na suru zagbain va̱ mogono ma damma niyi u yuwan.>> Ɗaɗa Mefiboshe lyuwai elime a lyuwusa ilyalya a apada o mogono Da̱wuda tsa akapi o olobo o mogono.

12 Mefiboshe gba da̱na̱ ta̱ nu ulobo u ke'en za na a̱ tsu ɗe Mika. Reve vuma suru o u'wa wa Ziba wo o'wo agbashi a Mefiboshe. 13 A̱vu Mefiboshe da̱nu Urishelima, adama a na mantsa suru u ta lyuwusa a apada o mogono kuci. A̱yi gba a̱kutsuma̱ a ɗa ana a̱ yi ra ra ra.