1 Ana a̱yi ndolo kotoi, reve Absalom zamiya aciya̱yi keke vi ido ni ido oɓolo na̱ a̱soja kupoton aza a na a̱a̱ ka̱ra̱ elime a̱ yi. 2 Absalom tsu 'yon ta̱ na̱ wasasa a̱vu wi isawan o ure u na wee tyo o una̱ntsu u lyuci. Mantsa ma na za ro ta̱wa̱yi ni ili i na ya̱a̱ ɓa̱la̱ yi, waru u ta̱ na adanshi a na wa̱a̱ 'ya̱wa̱a̱ mogono adama o uge'etosu, Absalom tsu ɗe ta̱ vuma'a reve we ece yi, <<A̱ lyuci ne ɗa vu uta̱i?>> Nu u usu yi, <<Aagbashi a̱ wu o uta̱ ta̱ a̱tsuma̱ o ugundo u ro wa aza a Isra'ila,>> 3 reve Absalom damma yi, <<Ka̱lyuwa̱, adanshi a̱ wu a̱ tu ulobonu na̱ mejege, amma mogono ma zuwa lo za na aa zuwaa wu atsuvu shi.>> 4 Absalom tsu da̱shi ta̱ damma, <<A damma a katala mu ta̱ mo o'wo za vu uge'etosu e iɗa i nda, n na̱ za na ri ni ili i na ya̱a̱ ɓa̱la̱ yi suru ta̱wa̱ uba̱ta̱ u va̱, n ta yuwaan yi uge'etosu wa amayun.>>

5 Waru mantsa ma na suru za ro rawai a̱ ma̱ka̱ka̱n ma̱ yi u kingyoi, reve u canana ukere wa̱ yi u 'ya̱sa̱n yi a̱vu u katala yi. 6 Tsundolo tsa ɗa Absalom yuwusayin aza a Isra'ila suru a na a̱ ta̱wa̱i uba̱ta̱ u mogono adama o uge'etosu. Ne ɗa Absalom pura̱i ugbozu wa aza a Isra'ila suru.

7 Ana a yuwain a'wan a̱ na̱shi, reve Absalom damma mogono, <<N te ipati ya̱ wu vu lyawa mu n 'ya̱wa̱ Heburon adama n shiton akucunu a na n yuwain na̱ A̱sulazuva. 8 A mantsa ma na aagbashi a̱ wu a̱ da̱na̱i Geshu e iɗa ya Suriya, n yuwan ta̱ akucunu n damma, <N na̱ A̱sulazuva a̱ ka̱mbuwa̱ mu Urishelima, n ta yuwaan yi a̱ga̱nda̱.> >>

9 Reve mogono ma damma yi, <<To, ka̱ra̱ na asuvu nden.>> A̱vu Absalom 'yon u ka̱ra̱ a̱ tyo Heburon.

10 A̱vu Absalom lyungu nlingata usokowu a̱ tyo uba̱ta̱ o gundo va Isra'ila suru, a dansa, <<A mantsa ma na yu uwwai wivulu wa aavana, a̱vu i damma, <Absalom wo o'wo ta̱ mogono ma Isra'ila a̱tsuma̱ a̱ lyuci va̱ Heburon!> >> 11 A mantsa ma na Absalom uta̱i diga Urishelima a̱ tyo Heburon, ama ukpakure (200) ɗa o toni ni yi. U banu le ta̱ reve a̱ kuru yi agba na amayun e reve ili i na Absalom ri e ifoɓi i mayan shi. 12 A mantsa ma na Absalom aa ca kucci, reve u lyungu a̱ tyo a̱ lyuci va̱ Gilo a̱ ta̱wa̱a̱ yi na̱ Ahitofe vuma va̱ Gilo za na tsu casu Da̱wuda mogono a̱sa̱la̱. Ne ɗa ifoɓi yu u'ya̱sun wa aaci'i u yuwain ucira, reve aza a na oo tono Absalom a̱ ka̱ra̱ a̱ da̱shishi a̱bunda̱.

13 Reve malingata ma ta̱wa̱ u damma Da̱wuda, <<Okolo a ama a Isra'ila a̱ ka̱mba̱ ta̱ uba̱ta̱ wa Absalom.>>

14 A̱vu Da̱wuda damma azagbain a̱yi a na a̱ ri oɓolo na̱ yi pe Urishelima suru, <<'Yoyin, tsu sumai! Na̱ ne ɗa shi ko za a la'a e ekere a Absalom shi. Tsu ciga tsu 'yuwan tsu ga̱da̱ra̱ tsu sumai, ta̱wa̱ Absalom ta̱wa̱ gogo u cina tsu pa u yuwan tsu ulungusu wan, waru wu una lyuci'i na̱ matsun me pe'eni wan.>>

15 Reve azagbain o mogono a̱ usu a damma, <<Amayun, agbashi a̱ wu a̱ tu ufoɓu a yuwan ili i na zagbain mogono ma dammai suru.>>

16 Ɗaɗa mogono mo uta̱i na ama o u'wa wa̱ yi suru o tonoi, amma u lyawa ta̱ pe a̱ma̱ci a̱ nge'en kupa a̱tsuma̱ a̱ma̱ci nge'e'en aza na a̱a̱ ka̱lyuwa̱ ukobu na akapi a linga vu u'wa'a.

17 Ana mogono oɓolo na a ama a̱yi suru e remei ure u na a lyawa lyuci'i, reve e isawan o u'wa wu ukosu. 18 A̱vu azagbain a̱yi a uwa elime a̱yi suru, na aza a Keretiya na aza a Feletiya suru, na ama ukpakuta̱li (600) aza a na o toni niyi diga Gat suru, a̱vu a uwa elime o mogono.

19 Reve mogono ma damma Itai vuma va Gat, <<Adama a̱ nye a̱vu fo voo tono tsu? Ka̱mba̱ vu da̱nu na̱ mogono Absalom mogono ma sa'avu. Adama a na a̱vu mocin ɗa za na a tarai diga uba̱ta̱ o uvon e iɗa ya̱ a̱ wu. 20 Yon yon nda ɗa vu ta̱wa̱i. To cine tsa ɗa maa zuwa wu vu reme igaru oɓolo na̱ a̱tsu ana'an ana'an, agba a̱mu n reve uba̱ta̱ u na ma̱a̱ tyo shi? Ka̱mba̱ vu gere oɓolo na̱ a̱soja a̱ lyuci va̱ wu. Lyawa A̱sulazuva o roco wu icigi ya amayun ni isa'ani.>>

21 Amma reve Itai usu mogono'o, <<N kucina ta̱ na̱ A̱sulazuva a na a̱ ri wuma, na̱ wuma wa̱ wu, zagbain va̱ mogono, uba̱ta̱ u na zagbain va̱ mogono ma̱ 'ya̱wa̱ ko a̱ kuwa̱ ko a yuwan wuma ɗe, ɗe ɗa fo aagbashi a̱ wu a̱a̱ tyo.>>

22 Reve Da̱wuda damma Itai, <<Wala vu uwa elime.>> Ɗaɗa Itai vuma va Gat uwai elime na ama a̱yi suru oɓolo na aza na a̱ ri oɓolo n a̱yi.

23 Reve ama e iɗa'a suru o ɓosho na̱ yorori lon a mantsa ma na mogono oɓolo na ama a̱yi a̱ ri a̱ ma̱ka̱ra̱. Mogono oɓolo na ama a̱yi a pasa ta̱ Uka̱ri wa̱ Kidron, suru nle a saɓa ta̱ a̱ tyo o upasu wu ure wa̱ a̱tsumona a na e memere ma Urishelima nu Uɗolu wa̱ Urudu.

24 Saduku da̱na̱ ta̱ lo fo, waru suru nan Levi a na a̱ da̱na̱i oɓolo na̱ a̱yi a̱ da̱na̱ ta̱ utanuwu na Akpati a Nzuwulai a̱ A̱sula̱. Reve a cu'wan akpati'i e iɗa, reve Abiyata ganu ca kucci, hali she na ama'a o kotoi mota̱ diga a̱tsuma̱ a̱ lyuci'i suru.

25 A̱vu mogono ma damma Saduku, <<Tara Akpati a Nzuwulai a̱ A̱sula̱'a̱ a̱ ka̱mba̱ a̱tsuma̱ a̱ lyuci. Na̱ n tsura̱ isa'ani uba̱ta̱ wa̱ A̱sulazuva, u ta̱ ka̱mba̱to mu a̱vu u lyawa me ene yi, nu uba̱ta̱ wu nden ma̱ yi. 26 Amma nu u damma, <Mu uwwa uyo'o wa̱ wu shi,> to, n tu ufoɓu, lyawa u yuwan na̱ a̱mu ili i na i lobono niyi.>>

27 Reve mogono ma lyuwa elime na adanshi na̱ Saduku ganu, <<A̱vu za yindi ɗa shi? Ka̱mba̱ a̱tsuma̱ a̱ lyuci na asuvu nden, oɓolo na̱ Ahima'az ulobo wa̱ wu, oɓolo na̱ Abiyata nu ulobo wa̱ yi Jonata. 28 Agba a̱mu n to puro ɗu o upasata wu Uɗolu wa̱ Urudu a̱tsumona, hali she na̱ n tsura̱ ikaka diga ya̱'a̱ a̱ ɗu.>> 29 Reve Saduku na̱ Abiyata a̱ ka̱mba̱to Akpati a Nzuwulai a̱ A̱sula̱ a̱ Urishelima reve a̱ da̱nu ɗe.

30 Amma Da̱wuda kumba ta̱ Masasan ma̱ Zetun, nu u shosuyin a̱yi a makumba agawan a mmalu babu atan, aaci a̱yi waru wupalu adama a̱tsumola̱ngu. A̱vu ama a na a̱ da̱na̱i oɓolo na̱ a̱yi a pala fo aci e le, a̱vu a̱ ka̱ra̱ a makumba, e mesun ele a kumbusa. 31 A̱vu a damma Da̱wuda, <<Ahitofe fo ta̱ pe a̱tsuma̱ aza a na oo ɓoloso aci na̱ Absalom.>> Ɗaɗa Da̱wuda yuwain avasa, <<A̱sulazuva n pati wu ta̱ vu ka̱mbuwa̱ a̱sa̱la̱ a Ahitofe ili i tsulo.>>

32 Ana Da̱wuda kumbai a̱ ncilecile, uba̱ta̱ u na ama a tsu yuwusaan A̱sula̱ a̱ga̱nda̱, she gba nlo Hushai vuma va Arki ta̱wa̱ u ga'aton yi na akari a̱ a̱tugu na̱ ma̱buta̱ a aaci a̱yi adama a̱tsumola̱ngu. 33 A̱vu Da̱wuda damma yi, <<Na̱ vu kuru mu vu to o'wo mu itana. 34 Amma na̱ vu ka̱mba̱ a̱ lyuci vu damma Absalom, <Mogono n to o'wo aagbashi a̱ wu, a̱mu aagbashi a dada va̱ wu ɗa n da̱na̱i nu ufaru, amma gogo n to o'wo aagbashi a̱ wu.> Na̱ vu yuwan tsundolo vu ta kamba mu vu lungusa̱ a̱sa̱la̱ a Ahitofe. 35 Ashe nan ganu o ndolo Saduku na̱ Abiyata e ɗe na̱ a̱vu shi? To, vu damma le suru ili i na vu uwwai o ukobu u tsugono'o. 36 A̱yi ɗa nda olobo e re e le o to oɓolo ne ele ɗe, Ahima'az ulobo wa̱ Saduku, na̱ Jonata ulobo wa Abiyata. Suru ili i na vu uwwai, vu lyungu le a̱ ta̱wa̱ a damma mu.>> 37 Ne ɗa Hushai i'utsa̱ ya̱ Da̱wuda ka̱mba̱i Urishelima a mantsa ma na Absalom ri a ma'uwaa ma̱ lyuci'i.