1 U'wa wa Shawulu nu u'wa wa̱ Da̱wuda a jima ta̱ a yuwusan uvon. U'wa wa̱ Da̱wuda u da̱shishi ta̱ ucira amma u'wa wa Shawulu u jibusa ta̱ ucira.

2 A matsaan ta̱ Da̱wuda muwun mo olobo a̱tsuma̱ a̱ Heburon. Aala o ulobo wu ufaru wa̱ yi a̱yi ɗa Amnon ulobo wa Ahinowam va Yezireyel. 3 Za ve ire a̱yi ɗa Kileyab ulobo wa Abigel ma̱runa̱ ma Nabal za va Kame. Za va ta'atsu a̱yi ɗa Absalom ulobo wa Ma'aka usheli wa Talmai mogono ma̱ Geshu.* 4 Za va̱ na̱shi a̱yi ɗa Adonija ulobo wa Hagit. Ulobo wa tawun waru a̱yi ɗa Shefatiya ulobo wa Abital. 5 Za va̱ ta̱li a̱yi ɗa Itireyam za na Egila matsaan niyi. Ele nda ɗa a matsayin Da̱wuda ɗe Heburon.

6 Mantsa ma na uvon u da̱na̱i a lyuwusa elime e ekere o u'wa wa Shawulu nu u'wa wa̱ Da̱wuda, tsugbain tsa Abna tsa̱ da̱shishi ta̱ ucira o u'wa wa Shawulu. 7 Shawulu da̱na̱ ta̱ na̱ ka vu nge'en ro za na a̱ tsu ɗe Rizfa usheli wa A'iya. A̱vu Ishboshe ece Abna, <<Nye i zuwai vu voyin na̱ ka vu nge'en va dada va̱?>>

8 A̱vu Abna yuwan upan lon adama a adanshi a na Ishboshe damma niyi reve u damma, <<Vu ta a majiyan a̱mu musa̱n ma ɗa ma na maa yuwusaan aza a Yahuda ulinga? Diga ɗe acina ana'an n to rocosu u'wa wa Shawulu dada va̱ wu icigi ya amayun, na̱ a̱za̱ a̱ yi, oɓolo na̱ n'utsa̱ ma̱ yi. Agba n ca ɗu e ekere a̱ Da̱wuda shi. Amma na̱ ne suru a̱vu ve ene unusu u va̱ adama a ka nda! 9 Lyawa A̱sula̱ a ca mu a̱tsuma̱lima̱ lon, nna̱ n kamba Da̱wuda tsura̱ ili i na A̱sulazuva a taraa niyi akucunu shi. 10 Adama a na A̱sulazuva a damma ta̱, u ta tara tsugono diga o u'wa wa Shawulu a̱vu u shuwa̱ ootogu o tsugono tsa̱ Da̱wuda a aci a Isra'ila na̱ e ekere a Yahuda, diga upasu wu ugana u lyuci va Dan a̱ tyo upasu wu uyagi u lyuci va Biyasheba.>>* 11 Agba Ishboshe kawan damma ili i ro waru shi, adama a na u ta uwwusa wovon wa Abna.

12 Reve Abna lyungu nlingata o una̱ wa̱ yi a damma Da̱wuda, <<Iɗa ya zane i ɗa? Yuwaan mu nzuwulai, a̱mu waru n ta kamba wu, n zuwa aza a Isra'ila suru a̱ kuru wu.>>

13 Reve Da̱wuda damma, <<U lobono ta̱! N ta yuwan nzuwulai na̱ a̱vu. Amma n ta pati wu ili i ta̱. She vu ta̱wa̱ a̱ ma̱ka̱ka̱n ma̱ va̱ wan she na̱ va̱a̱ ta̱wa̱ na̱ Mikal, usheli wa Shawulu mantsa ma na va̱a̱ ta̱wa̱ uba̱ta̱ u va̱.>> 14 A̱vu Da̱wuda lyunguwa̱ Ishboshe nlingata, ulobo wa Shawulu, adansa, <<Ca mu ka va̱ Mikal, za na n tsupai ili i tsutoto na̱ kwan vu ryumbu ukpaku (100) va aza a Filistiya.>>*

15 Reve Ishboshe lyungu a tara Mikal diga uba̱ta̱ u vali va̱ yi Palti ulobo wa Layish. 16 Amma vali va̱ yi kuru yi ta̱ ucina̱, e mesun hali a̱ tyo lyuci va Bahurim. A̱vu Abna damma yi, <<Ka̱mba̱ o u'wa!>> Ɗaɗa gba u ka̱mba̱i o u'wa.

17 Abna shi ta̱ ɗe yuwan adanshi na̱ mbara ma Isra'ila, a̱vu u damma, <<A na wo o'woi ɗe i zamishi ta̱ Da̱wuda o'wo mogono ma̱ ɗu, 18 gogo she i yuwan ne! Adama a na A̱sulazuva a yuwaan ta̱ Da̱wuda nzuwulai, u damma, <E ekere a aagbashi a̱ va̱ Da̱wuda a ɗa maa wawa ama a̱ va̱ aza a Isra'ila diga e ekere a aza a Filistiya na̱ diga e ekere a akapi a n'yuwatan n le suru.> >>

19 Abna yuwan ta̱ waru adanshi na ama o ugundo wa Banyami. Reve u 'ya̱wa̱ Heburon u damma Da̱wuda ili i na suru ugundo wa Banyami na akapi a ama a Isra'ila suru a cigai a yuwan. 20 Ana Abna ta̱wa̱i na ali ushin a̱tsuma̱ a ali a̱ yi uba̱ta̱ wa̱ Da̱wuda ɗe Heburon, Da̱wuda foɓo ta̱ a̱buki adama a Abna na ali a̱ yi. 21 Reve Abna damma Da̱wuda, <<Lyawa mu n ka̱ra̱ m ɓolotowo zagbain va̱ mogono aza a Isra'ila suru, adama a yuwan akucunu na̱ a̱vu vo o'wo mogono ma̱ le, waru vu yuwan tsugono tsu uba̱ta̱ u na okolo a̱ wu a cigai suru.>> Ɗaɗa Da̱wuda lyawai Abna ka̱ra̱i na asuvu nden.

22 Reve gba ali o uvon a̱ Da̱wuda a rawushi oɓolo na̱ Yowab diga uba̱ta̱ u na a̱ 'ya̱wa̱ a̱ riya̱yi nu uvon, a̱ ta̱wa̱ ta̱ ni itana ya̱ a̱bunda̱ aza a na a̱ pura̱i uba̱ta̱ o uvon. Amma Abna da̱na̱ oɓolo na̱ Da̱wuda ɗe Heburon shi, adama a na Da̱wuda lyawa yi ta̱ ɗe u ka̱ra̱, waru u ka̱ra̱ ta̱ na asuvu nden. 23 Ana Yowab oɓolo na̱ a̱soja a na a̱ ri oɓolo na̱ a̱yi suru a rawai, avu a damma yi, <<Abna ulobo wa Ner ta̱wa̱ ta̱ ɗe uba̱ta̱ u mogono, waru mogono ma lyawa yi ta̱ ɗe, a̱vu u ka̱ra̱ na asuvu nden.>>

24 Reve Yowab 'ya̱wa̱ uba̱ta̱ u mogono reve u damma yi, <<Nye i ɗa vu yuwain tsunda? Ka̱lyuwa̱, a̱yi ɗa nda, Abna ta̱wa̱i ya̱'a̱ wu. Nye i zuwai vu lyawa niyi u la'ai? 25 Vu reve ta̱ Abna ulobo wa Ner ta̱wa̱ ta̱ wu luma̱ wu, tsa̱ra̱ u reve wutu wa̱ wu nu uka̱mbu wa̱ wu, waru u reve ili i na vaa yuwusan suru.>>

26 Ana Yowab uta̱i diga a̱ ma̱ka̱ka̱n ma̱ Da̱wuda, reve u lyungu nlingata a̱ kuru ucina̱ wa Abna, a̱vu a cina yi ooko'o a Sira reve a̱ ka̱mba̱ na̱ yi. Amma Da̱wuda reve aɗa a nda shi. 27 Ana Abna ka̱mba̱i Heburon, Yowab tara yi ta̱ a̱ tyo e memere mo una̱ntsu wu uwata u lyuci, ngashi u ciga ta̱ u yuwan adanshi na̱ a̱yi a̱ nde'en, lo ɗa u sapa niyi a̱ a̱a̱tsuma̱ hali u kuwa̱, adama u tsupaa mpasa m mawun ma̱ a̱na̱wun ma̱ yi Asahe.

28 Na̱ a̱ca̱pa̱ a na Da̱wuda uwwai adama a nda, a̱vu u damma, <<A̱mu na̱ tsugono tsa va̱ tsu ri nu unusu a̱ ma̱ka̱ka̱n ma̱ A̱sulazuva adama a mpasa ma Abna ulobo wa̱ Ner shi hali hali. 29 Lyawa mpasa ma Abna n da̱na̱ a aci a̱ Yowab nu u'wa wa dada va̱ yi suru! Lyawa u'wa wa̱ Yowab u lamba za na a̱ ɗa̱wusa̱ lipu wan ko za na ri na̱ mɓa̱la̱ mu ukwan u lipu wan ko za na tsu wala na aaɗanga shi ko za na o una na̱ matsun me pe'eni ko a yuwan ambulu shi!>>

30 Ne ɗa Yowab na̱ mawun ma̱ a̱na̱wun ma̱ yi Abishai o unai Abna, adama a na wu una ta̱ zawa'a le Asahe uba̱ta̱ o uvon u na a yuwain ɗe Gibiyon.

31 A̱vu Da̱wuda damma Yowab na ama a na a̱ ri oɓolo na̱ a̱yi suru, <<Kakarai a̱tugu a̱ ɗu, reve yo oto akashamuna a̱ a̱tsumola̱ngu a̱vu i yuwan nden n wirota̱ elime a Abna.>> Mogono Da̱wuda kuru ta̱ a̱ca̱pa̱ a aza a na a tanuyi lipuꞌu. 32 Reve a̱ ciɗo Abna a̱tsuma̱ a̱ Heburon, a̱vu mogono mo oruwo u sala lon a aason a Abna. Ama'a suru fo a̱ shon ta̱.

33 Reve mogono ma canaa Abna ishipa ya̱ a̱tsumola̱ngu, u damma,

<<Nye i zuwai Abna kuwa̱i cine olo a̱ tsu kuwa̱?

34 Ekere a̱ wu a̱ shi wunlu shi,

ana a̱ wu waru a̱ da̱na̱ wunlu na akani shi.

Tsu za na aza awuya o unai.>>

A̱vu ama'a suru a̱ da̱shi shon adama a̱ yi.

35 Reve ama'a suru a̱ ta̱wa̱ uba̱ta̱ wa̱ Da̱wuda a damaton yi adama u lyuwa ilyalya babu na urana u kotoi. Amma Da̱wuda kucina ta̱ a dansa, <<Lyawa A̱sula̱ a ca mu a̱tsuma̱lima̱ lon, na̱ n peɗe ilyalya ko ili i ro babu na urana u riya̱i!>>

36 A̱vu ama'a suru e petelyuwe ili'i, reve a uwwa uyo'o ni ili i na mogono ma yuwain suru, ama'a a uwwa ta̱ uyo'o wa̱ yi. 37 Adama o ndolo o urana u ɗaɗa oɓolo a̱ a̱soja a̱ Da̱wuda na aza a Isra'ila suru e revei a na mogono ma̱ ri pe nu ukere a̱ mona ma Abna ulobo wa Ner shi.

38 A̱vu mogono ma damma ali a̱ yi, <<I reve a na yali i gbain i ɗa kuwa̱i ana'an a̱tsuma̱ a Isra'ila shi? 39 Waru ana'an nda ko na wo o'woi a̱mu ɗa mogono ma na a̱ tsuwa̱yin mani'in, mo o'wo ta̱ babu ucira, olobo a Zeruya a la'a mu ta̱ ucira. Lyawa A̱sulazuva a tsupa za vi iwuya ni iwuya i na u yuwain!>>