1 Mantsa ma na lyushi rawai, a na ngono n tsu ꞌya̱wa̱ uba̱ta̱ o uvon, a̱vu Da̱wuda lyungu Yowab oɓolo na̱ azagbain a̱ yi na̱ a̱soja a Isra'ila suru a̱ ꞌya̱wa̱ uvon. O kototo ta̱ aza a Amon, a̱vu a̱ ka̱nda̱ruwa̱ lyuci va Raba nu uvon. Amma Da̱wuda gba da̱na̱ ta̱ a̱tsuma̱ a̱ Urishelima.✝

2 Urana u ro nu ulivu, Da̱wuda 'yon ta̱ a̱ a̱ga̱da̱ a̱ yi, a̱vu u ka̱ra̱ a mmalu zuva vu ukwa̱'a̱ wu ukobu u tsugono, a̱yi ɗe zuva, a̱vu we ene ka ro o usumbu. Waru ka'a u tu ulobonu wa'ashi. 3 A̱vu u lyungu a̱ 'ya̱wa̱ e revee yi ko ka ne ɗa. Reve vuma'a u damma, <<Ashe a̱yi nda Bashaba ɗa shi, usheli wa Eliyam ka va Uriya vuma va Hitiya shi?>> 4 A̱vu Da̱wuda lyungu nlingata a̱ ta̱wa̱a̱ yi na̱ kaꞌa. Cina gba u koto usumbu wa̱ a̱shinda̱ wa̱ yi adama wo o'wo cece, a na u ta̱wa̱i ya̱'a̱ yi reve u von na̱ a̱yi. A̱vu ka'a u ka̱ra̱ a̱ ka̱mba̱ o uꞌwa. 5 Reve ka'a u tara a̱a̱tsuma̱ reve u lyunguwa̱a̱ Da̱wuda na adanshi a na, <<N ta̱ na̱ a̱a̱tsuma̱.>>

6 Reve Da̱wuda lyunguwa̱a̱ Yowab nu udammu u damma, <<Lyunguwa̱a̱ mu Uriya vuma va Hitiya.>> Reve Yowab lyunguwa̱a̱ yi na̱ Uriya. 7 Ana u rawai, reve we ece yi ko Yowab na̱ a̱soja a̱ ta̱ ɗe gbaga, na̱ cine uvoꞌon u ri ɗe a mmalu. 8 Reve Da̱wuda damma yi, <<Wala a̱ tyo o u'wa wa̱ wu vu sa'a ana a̱ wu reve vi ivuwan.>> Ana Uriya lyawai ukobu u mogono, ɗaɗa mogono ma̱ lyunguwa̱a̱ niyi nu une'e. 9 Uriya gba u tyo o u'wa shi. O una̱ntsu wu ukobu u mogono u ɗa wa asai oɓolo na̱ a̱za̱ e ipiri i mogono.

10 Ana Da̱wuda uwwai a na Uriya tyo o u'wa wa̱ yi shi, ɗaɗa we ece niyi, <<Nye i zuwai vu ꞌya̱wa̱i o uꞌwa yon shi, a̱vu ɗa nda vu shi pa shi?>>

11 Reve Uriya usu yi, <<Akpati a Nzuwulai na̱ a̱soja a Isra'ila na aza a Yahuda a̱ ta̱ ɗe nden o ogodo. Waru Yowab yali ya̱ a̱soja na̱ azagbain a̱ ta̱ ɗe uva̱lu uba̱ta̱ o uvon a agalaci. Cine tsa ɗa ma̱a̱ ꞌya̱wa̱ o uꞌwa, n lyuwa n sowo, a̱vu n von na̱ ka va̱? N kucina ta̱ na̱ a̱vu, maa yuwan cuꞌun vi ili i ndolo shi!>>

12 A̱vu Da̱wuda damma Uriya, <<Na̱ ne ɗa, she va asisa pa hali nfaꞌan. Reve vu ka̱ra̱ a̱ ka̱mba̱.>> Ɗaɗa Uriya isawain a̱tsuma̱ a̱ Urishelima hali usana u ro u tawa. 13 Ana usana u tawai a̱vu Da̱wuda banu yi alya waru u sowo oɓolo na̱ a̱yi hali wo o'woto yi usowu. Suru na̱ ne na ayin o ndolo Uriya ꞌya̱wa̱ o uꞌwa wa̱ yi shi. Reve wa asisa a aavalu a̱ yi o ukobu u mogono oɓolo na̱ a̱za̱ e ipiri i mogono.

14 Ana usana u tawai, reve Da̱wuda ɗanaa Yowab mepepelime, a̱vu u ca Uriya ꞌya̱wa̱a̱ yi. 15 E mepepelimeꞌe, u ɗana ta̱ pe, <<Vu zuwa Uriya elime o uvon, uba̱ta̱ u na u la'ai usuɗuwu, reve i rono na̱ a̱ca̱pa̱, i lyawa yi tsa̱ra̱ a̱ ga̱la̱ yi o una yi.>>

16 Reve a mantsa ma na Yowab ka̱nda̱ruwa̱i lyuci'i nu uvon, reve u ca̱co Uriya uba̱ta̱ u na u revei aza a na a gurai uvon a̱ ri. 17 Ana a̱soja a̱ lyuci'i o uta̱i a yuwain uvon na̱ Yowab, o una ta̱ azagbain a̱ Da̱wuda o ro. Waru Uriya vuma va Hitiya da̱na̱ ta̱ pe a̱tsuma̱ a aza a na o unai.

18 Ɗaɗa Yowab lyunguwa̱yi Da̱wuda na alabari o uvo'on suru. 19 A̱vu Yowab damma malingata'a: <<Na̱ vu koto a dansaa mogono alabari o uvo'on suru, 20 n na̱ a̱tsuma̱ a̱ la̱nga̱ mogono'o, reve we ece wu, <Nye i zuwai i 'ya̱wa̱i uvon zuzu na̱ lyuci'i? A̱ɗu i reve a na ee tewin iliya diga o ukari u na u ka̱nda̱ruwa̱i lyuci'i shi? 21 Agba i gura cuwan ni ili i na i cinai Abimele ulobo wa Yerubeshe* shi? A̱tsuma̱ a Tebe ka ɗa variyi aakiri a yira diga o ukari u lyuci'i, reve gba aakiri'i a̱ riya̱a̱ yi a aaci, a̱vu wu una yi shi? Nye i zuwai i rawai zuzu nu ukari'i?> Na̱ we ece ne, reve vu damma yi, <Uriya aagbashi a̱ wu vuma va Hitiya fo u kuwa̱ ta̱.> >>✝

22 Reve malingata'a u ka̱ra̱. Ana u rawai reve u damma mogono Da̱wuda ili i na suru Yowab damma niyi u damma. 23 A̱vu malingata'a u damma mogono, <<Nu ufaru n'yuwatan n tsu n shi ta̱ n la'a ucira u tsu, o uta̱ ta̱ a agalaci tsa̱ra̱ a yuwan uvon na̱ a̱tsu, amma tsu gba̱ra̱ le ta̱ a̱ ka̱mba̱ o u'uwata wu una̱ntsu u lyuci'i. 24 Reve ali o uvon a na a̱ da̱na̱i na̱ tan na aya e tewin iliya diga o ukari u lyuci'i, reve o una akapi a azagbain o mogono. Waru aagbashi a̱ wu Uriya vuma va Hitiya fo u kuwa̱ ta̱.>>

25 Reve Da̱wuda damma malingata'a, <<Ka̱mba̱ vu damma Yowab, <She a̱yi ndolo ɓa̱li wu wan. Matsun me pe'eni ma tsu ɗangula za na woo una shi. Da̱shi dakanuyi o uvon na̱ lyuci'i, hali she ni i lyuwa yi nu uvon.> Vu damma ne Yowab tsa̱ra̱ u da̱shi tsura̱ ucira.>>

26 Ana Bashaba ka va Uriya uwwai vali va̱ yi kuwa̱ ta̱ uba̱ta̱ o uvon, u yuwan ta̱ nden n wirota̱ adama a̱ yi. 27 Ana mantsa ma̱ nden n wirota̱ mo kotoi, a̱vu Da̱wuda zuwa a̱ ta̱wa̱ na̱ ka'a o u'wa wa̱ yi, reve wo oꞌwo ka va̱ yi. A̱vu u matsaan yi mawun mo ulobo, agba A̱sulazuva a uwwa uyoꞌo wi iwuya i na Da̱wuda yuwain shi.