1 Ana a̱yi ndolo kotoi, Da̱wuda ece ta̱ A̱sulazuva, <<N ka̱ra̱ a gawan a̱ 'ya̱wa̱ a̱tsuma̱ a̱ lyuci ta̱ vi ilyuci ya Yahuda?>>

Reve A̱sulazuva a damma yi, <<Gawan a̱ 'ya̱wa̱.>>

Reve we ecishe, <<A zane mee tyo?>>

A̱vu A̱sulazuva a̱ usu yi, <<Ka̱ra̱ a̱ tyo Heburon.>>

2 Ɗaɗa Da̱wuda ka̱ra̱i a gawan ɗe na̱ a̱ma̱ci e re a̱ yi, Ahinowam va Yezireyel, oɓolo na̱ Abigel ma̱runa̱ ma Nabal va Kame. 3 Waru Da̱wuda tara ta̱ ali a na a̱ ri oɓolo na̱ a̱yi, za suru nu u'wa wa̱ yi, reve a̱ va̱la̱ a̱tsuma̱ e ilyuci zuzu na̱ Heburon. 4 Reve ama a Yahuda a̱ ta̱wa̱ ɗe Heburon, reve a̱ tsuwa̱n Da̱wuda mani'in wo o'wo mogono ma aza a Yahuda.

Ana Da̱wuda uwwai a na ama a Jabe Giliyadu a ɗa a̱ ciɗoi Shawulu,* 5 a̱vu u lyunguwa̱ ama a Jabe Giliyadu nlingata a damma le, <<Lyawa A̱sulazuva a zuwaa ɗu aba'un adama a na i roco ta̱ Shawulu zagbain ɗu icigi ni isa'ani ana i ciɗo niyi. 6 Gogo lyawa A̱sulazuva o roco ɗu icigi ni isa'ani na̱ a̱ɓula̱. Waru a̱mu fo n ta yuwaan ɗu isa'ani adama a na i yuwain ili i nda. 7 Gogo yi isawan nu ucira i yuwan ukadu, adama a na Shawulu zagbain ɗu kuwa̱i, a̱vu u'wa wa Yahuda u tsuwa̱n mu mani'in mo o'wo mogono a aci e le.>>

8 Amma Abna ulobo wa Ner, yali ya̱ a̱soja a Shawulu, u tara ta̱ Ishboshe ulobo wa Shawulu a̱vu u pasa Uɗolu wa̱ Urudu na̱ a̱yi a̱ tyo a̱ lyuci va Mahanayim. 9 Reve u zuwa yi wo o'wo mogono mo upasu wa Giliyadu, na aza a Ashuri nu upasu wa Yezireyel na̱ Ifiramu na̱ Banyami, mogono ma aza a Isra'ila suru.

10 Ishboshe ulobo wa Shawulu da̱na̱ ta̱ na a'wan amunga ana wo o'woi mogono ma Isra'ila, waru u yuwan ta̱ tsugono a'wan e re. Agba ugundo wa Yahuda u yuwan ta̱ tsutoni na̱ Da̱wuda. 11 Da̱wuda yuwan ta̱ tsugono tsu ugundo wa Yahuda a̱tsuma̱ a Heburon a'wan e cindere na̱ woto ta̱li.

12 Urana u ro Abna ulobo wa Ner, oɓolo na ali o uvon a Ishboshe ulobo wa Shawulu, a lyawa ta̱ Mahanayim a̱vu a̱ tyo Gibiyon. 13 A̱vu Yowab za na mma va̱ yi ɗa Zeruya oɓolo na ali o uvon a̱ Da̱wuda o uta̱ a̱vu a cina le oko'o a gbain a Gibiyon. Reve oɓolo a̱ ta̱ a̱ da̱nu upasu u ta̱ wo oko'o'o, a̱vu oɓolo a̱ ta̱ a̱ da̱nu upasu u ta̱ wo oko'o'o a na a buwai.

14 Ɗaɗa Abna canana yi Yowab una̱ u damma, <<Lyawa olobo a̱ 'yon a yuwan nla̱ngi elime a̱ tsu.>>

Reve Yowab damma, <<Lyawa le a yuwan.>>

15 Reve a̱ 'yon reve e kece ama kupa ne ejere adama o upasu wa Banyami a na o rono ama a Ishboshe ulobo wa Shawulu aɗanga, kupa ne ejere waru o una̱ wa̱ Da̱wuda. 16 A̱vu koyan reme moron ma̱ nla̱ngi ma̱ yi aaci, reve a sapalai na̱ matsun me pe'eni e eeɓele a̱ ta̱. Ne ɗa a̱ riya̱i ele ra reve a̱ kuwa̱. Adama o ndolo a ɗa a cayi uba̱ta̱'a̱ aala *Helka Hazurim, za na ri a̱tsuma̱ a Gibiyon.

17 Reve e teme uvon wu usuɗuwu urana'a, reve ama a̱ Da̱wuda a lyuwa Abna na ama a Isra'ila nu uvon.

18 Olobo a ta'atsu a ka ndolo Zeruya a̱ da̱na̱ ta̱ ɗe, ele ɗa Yowab na̱ Abishai oɓolo na̱ Asahe. Agba Asahel gura ta̱ ilaɗi lon tsa̱ mere'on ma atsusa. 19 A̱vu u gbagba Abna ni ilaɗi o tono yi agba u vadala usa'ani ko ugula̱ shi. 20 Ana Abna vadaluwai a̱vu we ece, <<A̱vu ɗaɗa, Asahe shi?>>

A̱vu u usu yi, <<Ee a̱mu ɗa.>>

21 Reve Abna damma yi, <<Lyawa magbagba ma̱ va̱ a̱vu vu vadala ukere usa'ani ko ugula̱ wa̱ wu, a̱vu vu reme ulobo u ta̱ reve vu usa yi itana yu uvon.>> Amma Asahe lyawa magbagba ma̱ yi shi.

22 Reve Abna da̱shi ɓarisa Asahe, <<Lyawa a gbagbusa mu! She vu zuwa mu mu una wu wan. Nna̱ ne ɗa shi cine tsa ɗa maa gura ka̱lyuwa̱ urewesu u mawun ma̱ a̱na̱wun ma̱ wu Yowab?>>

23 Amma Asahel lyawa o tono yi shi, a̱vu Abna sapa yi a̱ a̱a̱tsuma̱ nu ugundo wi ibata ya̱ yi hali ibata'a yu uta̱la̱i nu ucina̱. Reve Asahe riya̱ lo a̱vu u kuwa̱ uba̱ta̱ u na u shi. Reve za na suru ta̱wa̱i uba̱ta̱ u na Asahel riya̱i a̱vu u kuwa̱, u tsi isawan ta̱ kuci kuci.

24 Amma a̱vu Yowab na̱ Abishai a saɓa Abna. Urana a̱ ma̱riya̱a̱ reve a rawa a aagaɗi a Amma, za na ri elime a Giya o ure a̱ tyo A̱tsumona a Gibiyon. 25 A̱vu ama o ugundo wa Banyami o ɓolo aciyele a̱ kuru Abna a̱vu o o'wo oɓolo a̱ ta̱, reve e isawan zuva va aagaɗi.

26 Ɗaɗa Abna ɗeyi Yowab a̱vu u damma, <<Matsun me pe'eni ma ta lyuwa elime na̱ mona babu ukotu? Vu reve a na ukosu woo o'wo okono shi? Mantsa ma̱ ne ma ɗa vaa damma ali a̱ wu a lyawa a saɓusa a̱za̱ e le aza a Isra'ila?>>

27 Reve Yowab usu yi, <<N kucina ta̱ na̱ A̱sula̱ a na a̱ ri wuma, na̱ vu shi vu yuwan adanshi shi, tsa̱ shi ta̱ a lyuwa elime na̱ magbagba ma̱ ɗu hali she usana.>>

28 Reve Yowab ivula̱ aavana, a̱vu oɓolo a ali'i suru e isawan, a̱ da̱shi gbagba aza a Isra'ila shi. Waru babu za na da̱shi yuwisain uvon.

29 A̱vu Abna na ama a̱yi a̱ kuru a̱ tyo o Uka̱ri wa Araba ayin ma̱ɓula̱. Reve a pasa Uɗolu wa̱ Urudu, a̱vu e teme mmalu diga usana acina urana aci hali she na a rawai Mahanayim.

30 Ana Yowab lyawai magbagba ma Abna, ɗaɗa u ɓolotoi ali o uvon a̱yi suru u kece le. Babu na̱ Asahe, a lamba ta̱ ali a̱ Da̱wuda kupa na̱ kucci. 31 Amma ali a̱ Da̱wuda o una ta̱ ama ukpakuta'atsu na̱ kupota̱li (360) a̱tsuma̱ o ugundo wa Banyami aza na a̱ da̱na̱i oɓolo na̱ Abna. 32 A̱vu Yowab oɓolo na ali o uvon a̱ yi a tara lipu va Asahe reve a̱ 'ya̱wa̱ a̱ ciɗo yi a aason a dada va̱ yi ɗe Batalami. A̱vu Yowab na ali a̱ yi a yuwan mmalu ayin ma̱ɓula̱, a̱vu a rawa Heburon nu usana.