1 Da̱wuda canaa ta̱ A̱sulazuva ishipa i nda a mantsa ma na A̱sulazuva a wawa niyi e ekere a n'yuwatan ma̱ yi suru, na̱ diga e ekere Shawulu. 2 U damma,

<<A̱sulazuva a ɗa aatali o upa'atan u va̱,

ugeshete u va̱ na̱ za vi iwawi i va̱.

3 A̱sula̱ a̱ va̱, a̱yi ɗa aatali o upa'atan u va̱.

Uba̱ta̱ wa̱ wu u ɗa ma pa'asan.

A̱a̱ra̱ga̱ a̱ va̱, na̱ za vi iwawi yu ucira i va̱,

nu uɓaɓu wu ucira u va̱, nu ugeshete u va̱,

za vi iwawi i va̱, za na tsu wawa mu e ekere a aza a na a̱ 'ya̱susa̱n ugbozu.

4 N ta̱ ɗesu A̱sulazuva, za na rawai a na a yuwaan yi ica,

waru u wawa mu ta̱ e ekere a n'yuwatan n va̱.

5 <<Adama a na ikeɗu i mini tsu ukwisa̱ a̱ ka̱nda̱ruwa̱ mu ta̱,

waru u shi ta̱ o soɗu mu na̱ meyene ma̱ mini ma̱ yi.

6 Amunga o uba̱ta̱ wu nden wa̱ a̱kwa̱kwa̱ u ka̱nda̱ruwa̱ numu ta̱ kpakpa,

maza mo ukwisa̱ waru ma̱ ta̱wa̱ mu ta̱.

7 <<A̱tsuma̱ a̱ a̱tsuma̱lima̱ a̱ va̱ n ɗe ta̱ A̱sulazuva,

a̱vu n sala n ɗe a̱ tyo uba̱tu wa̱ A̱sula̱ a̱ va̱.

A̱tsuma̱ o uba̱ta̱ wu nden wa̱ a̱yi ɗe zuva a̱vu wu uwwa uɗyo u va̱.

Ipati i va̱ a rawa ta̱ waru a atsuvu a̱yi.

8 <<Uvaɗi u lumgbatsa ta̱ a̱vu u jinga̱ɗa̱,

a̱vu ikyun yu usaa wa zuva u jinga̱ɗa̱,

a̱ jinga̱ɗa̱ ta̱ lon adama a na u yuwain upan.

9 Mikyon mo uta̱ ta̱ diga a̱ vunu va̱ yi,

akina a malyuwa o uta̱ ta̱ diga o una̱ wa̱ yi,

akinkina a madala o uta̱ ta̱ diga 'ya̱wa̱ a̱ yi.

10 A̱vu u kpa̱tu'wa̱ zuva reve u cipa̱,

ne eleshe a̱ lima̱ da̱n za̱la̱ va̱ ana a̱yi.

11 Reve u kumba zuva nan kerobi a̱vu wu 'yawan zuva,

u wala ta̱ o upepu wu ucira.

12 A̱vu u ɓa̱ru aciya̱yi ni irumbu,

ne ɗa fo ne eleshe a̱ lima̱ a̱ mini ma zuva.

13 Diga a̱tsuma̱ e ekan i na i ri elime a̱yi,

imaɗatsu yu uta̱i.

14 <<A̱sulazuva a yuwan ta̱ adanshi tsa tsata diga zuva,

a̱vu a uwwa uɗyo u Mogono ma̱ A̱sula̱ diga zuva.

15 A̱vu u tewin iliya ya̱ yi,

a̱vu u bete'we n'yuwatan ma̱ yi,

a̱vu u lyungu ni imaɗatsu i na i zuwa nle ilaɗi.

16 A̱vu ikyun yu usaa yu uvaɗi yo o'wo a alanga eteshe,

a̱vu mini ma mala mo o uta̱,

na̱ tsuɓari tsa̱ A̱sulazuva,

a̱vu wivuwun wu ucira wu uta̱ diga a̱ vunu va̱ yi.

17 Diga zuva A̱sulazuva a canana ta̱ ukere wa̱ yi,

reve u 'ya̱sa̱n mu zuva.

Diga a̱ mini ma̱ a̱ru'un,

u papa numu.

18 A̱vu u wawa mu e ekere a n'yuwatan n va̱ mu ucira,

ne e ekere a aza a na a 'yuwan numu,

a na a la'a numu ucira.

19 A̱ riya̱a̱ mu ta̱ a̱tsuma̱ o urana wa̱ a̱tsuma̱lima̱ a̱ va̱,

reve A̱sulazuva a kamba mu.

20 A̱vu wu uta̱a̱ mu a̱ meleshe,

u wawa mu adama a na u ta̱ ma̱za̱nga̱ na̱ a̱mu.

21 <<A̱sulazuva a tsupa mu ta̱ adama a̱ɓula̱ a̱ va̱,

u ca mu ta̱ iliyinkapa adama a na ekere a̱ va̱ a̱ri nu unusu shi.

22 Adama a na n yuwan ta̱ tsutoni nu ure wa̱ A̱sulazuva,

agba n lyawa A̱sula̱ a̱ va̱ a̱vu n yuwan iwiya shi.

23 N yuwan ta̱ tsutoni na̱ wila̱ wa̱ yi suru,

agba n lyawa ili i na u zuwai a na a̱a̱ kuru shi.

24 N da̱na̱ ta̱ babu unusu a̱ ma̱ka̱nka̱ ma̱ yi,

n tawa ta̱ aciya̱va̱ diga o ure u na maa yuwan unusu.

25 A̱sulazuva a tsupa mu ta̱ adama a̱ɓula̱ a̱ va̱,

adama a na u reve ta̱ a̱mu za vu unusu ɗa shi e esu a̱ yi.

26 <<A̱sulazuva vu tsu roco ta̱ a̱ɓula̱ e ekere aza a na a̱ri na̱ a̱ɓula̱.

Za na ri babu unusu, vu tsu roco ta̱ a̱vu za vu unusu ɗa shi.

27 Ee ekere a za na ri cece,

vu tsu roco ta̱ aciya̱wu cece.

Agba e ekere a za vi iwuya,

vu tsu roco yi ta̱ tsushu'un.

28 Vu tsu wawa ta̱ aza a na a̱ ka̱ɗa̱toi aci e le,

amma esu a̱ wu a̱ ta̱ uba̱ta̱ wa aza a na a̱ri na aciyogbamu,

adama vu ka̱ɗa̱to le.

29 <<A̱vu ɗa ekan a̱ va̱, A̱sulazuva.

A̱sulazuva a̱vu ɗa vi i ikanai irumbu i va̱.

30 Adama a na ni ikambi ya̱ wu i ɗa ma̱ riya̱a̱ a̱soja o uvon,

ni ikambi ya̱ A̱sula̱ a̱ va̱ a ɗa maa pasa ukari u lyuci.

31 <<A̱sula̱ gba, re va̱ yi mejege ma ɗa!

Adanshi a̱ A̱sulazuva waru amayun a ɗa!

A̱ra̱ga̱ a ɗa e ekere a aza na suru a zamiyi upa'atan ya̱'a̱ yi.*

32 Za ne ɗa A̱sula̱,

babu na̱ A̱sulazuva?

Zane ɗa waru aatali o upa'atan,

babu na̱ a̱vu A̱sula̱ a̱ tsu?

33 A̱sula̱ a ɗa upa'atan wu ucira u va̱,

waru u zuwa ta̱ re va̱ vo o'wo babu unusu.

34 U zuwa ta̱ ana a̱ va̱ e reme iɗa tsa mere'on,

a̱vu u zuwa mu mi isawan ciga̱ zuva vu nsasan.

35 U rito ta̱ ekere a̱ va̱ a na aa yuwan uvon,

na̱ cine ekere a̱ va̱ aa gura ni'wa̱n utan wu rumushili.

36 <<Agba vu ca mu ta̱ a̱a̱ra̱ga̱ a̱ wu za na wawa numu,

ikambi ya̱a̱ wu waru i zuwa mu ta̱ mo o'wo zagbain.

37 Vu lyawa n'yuwatan n va̱ n reme mu shi,

agba n riya̱ a mantsa mo o uvon shi.

38 M gbagba ta̱ n'yuwatan n va̱, a̱vu n kototo le,

mi isawan shi she na n lyuwai aci e le suru.

39 N kototo le ta̱ suru suru, hali a̱ kuɗa̱ 'yon,

a̱vu a̱ riya̱ za̱la̱ va ana a̱ va̱.

40 Vu ca mu ta̱ ucira adama n yuwan uvon,

vu zuwa ta̱ n'yuwatan n va̱ za̱la̱ va ana a̱ va̱.

41 Agba vu zuwa ta̱ n'yuwatan n va̱ a vadala reve a sumaa mu,

a̱vu n kototo aza a na a 'yuwan numu.

42 Asala ta̱ adama a kamba le,

agba babu lo za na a wawa le,

a̱vu a salaa a̱ A̱sulazuva,

agba u usu le shi.

43 N luɓa̱tsa̱ le ta̱, hali wo o tsa̱ ma̱buta̱ me iɗa,

a̱vu n kula̱ le, mu dasa le tso olo'o e re.

44 <<Vu wawa mu ta̱ e ekere a ama e iwuya a̱ va̱,

vu shuwa̱ mu ta̱ mo o'wo zagbain vu nɗa.

Ama a na n revei shi,

o o'wo ta̱ agbashi a̱ va̱.

45 Omoci a̱ ta̱wa̱ ta̱ elime a̱ va̱ na̱ meje'en ma̱ lipu,

a̱ kingyo a casu mu tsugbain,

ele aa uwwa adama a ɗa a̱ va̱,

a tsu yuwaan mu ta̱ tsutoni.

46 Omocin a kuɗa ta̱ okolo le.

Na̱ meje'en ma̱ lipu,

ma ɗa a̱ tsu uta̱ diga uba̱ta̱ u na a̱ ri upa'un.

47 <<A̱sulazuva za na ri wuma ɗa!

Ica a̱ tyo uba̱ta̱ wa Aatali o upa'atan u va̱!

Tsugbain za va̱ A̱sula̱ ɗa, Aatali, zamawawa ma̱ a̱ va̱!

48 A̱sula̱ a ɗa a tsupaa numu aciya a n'yuwatan n va̱,

a̱yi ɗa u zuwai nɗa za̱la̱ tsugono tsa̱ a̱ va̱.

49 A̱yi ɗa za na wawa numu e ekere a n'yuwatan n va̱.

U tsu ca mu ta̱ ulyuwu wa aci e ekere a aza a na a 'yuwan numu,

a̱vu u papa mu e ekere a ama a vama.

50 <<Adama o ndolo n ta ca wu ica, a̱vu A̱sulazuva, a̱tsuma̱ a nɗa,

n ta cana ishipa yi ica a̱ tyo a ala a̱ wu.*

51 A̱yi atsura e iwawi i ɗa nu ulyuwu wa aci e ekere a̱ va̱ mogono,

u tsu roco ta̱ icigi i na i tsu vadala shi ekere a za na u tsuwa̱a̱n yi mani'in,

a̱ tyo ya̱ Da̱wuda na̱ limatan va̱ yi hali hali.>>