1 A̱sulazuva a̱ lyungu ta̱ Natan vumava̱sula̱ uba̱ta̱ wa̱ Da̱wuda u damma yi alabari a nda. Ana u rawai uba̱ta̱ wa̱ yi reve u damma yi, <<A yuwan ta̱ ama e re a̱tsuma̱ a̱ lyuci ro. Za ta̱ za vu utsuru za ta̱ waru za vu ulambu. 2 Za vu utsuru'u u ta̱ na̱ mgbele ni inan ya̱ a̱bunda̱ lon. 3 Amma za vu ulambuꞌu gba u ri ni ili shi, she a̱na̱wun o mokyokyon ma̱ ta̱ ma na u tsulai. U ca yi ta̱ ilyalya ulobonu hali u kungwa oɓolo na̱ a̱yi na̱ muwun ma̱ yi. U tsu ca yi ta̱ ilyalya i na a̱yi a aciya̱yi u tsu lyuwa, waru u tsu sowo ta̱ mini a yanda yo oso a̱ mini ma̱ yi, waru u tsu von ta̱ a̱ ma̱ka̱ka̱n ma̱ yi. Wo oꞌwo ta̱ tsu usheli wa̱ yi.

4 <<Urana u ro, reve za vu utsuru'u u yuwan mocin o u'wa wa̱ yi. Agba u ciga u tara megbele ma̱ ta̱ a̱tsuma̱ a̱ mgbele ko inan ya̱ yi u paɗaa mocin va̱ yi shi. Ɗaɗa u remei a̱na̱wun o mokyokyon ma̱ za vu ulambuꞌu, reve u paɗaa mocin va̱ yi.>>

5 Da̱wuda uwwa ta̱ upan wu za vu utsuru'u lon, a̱vu u damma Natan, <<N kucina ta̱ na̱ A̱sulazuva a̱ wuma, vuma na yuwain ili i nda u rawa ta̱ o una yi! 6 Reve waru a na we enei iliyali yi za vu ulambu u ndolo shi, u tsupa ikebe ya̱ a̱na̱wun o mokyokyon mo ndolo toto una̱shi.>>

7 Reve Natan damma Da̱wuda, <<A̱vu ɗa vuma'a! Waru nda ili i na A̱sulazuva A̱sula̱ a aza a Isra'ila a dammai: <N tsuwa̱n wu ta̱ mani'in vo oꞌwo mogono ma aza a Israꞌila, waru n wawa wu ta̱ e ekere a Shawulu. 8 N ca wu ta̱ u'wa wu zagbain va̱ wu, hali na̱ a̱ma̱ci a̱ yi. Reve waru n ca wu u'wa wa aza a Isra'ila na̱ Yahuda. Waru ne ele ndolo a̱ shi a rawa wu shi, n shi ta̱ a̱ da̱shi wu ili i na i la'ai ndolo. 9 Nye i zuwai vu goroi adanshi a̱ A̱sulazuva, reve vu yuwan ili i wuya a̱ ma̱ka̱ka̱n ma̱ yi? Vu zuwa ta̱ o una Uriya vuma va Hitiya a̱tsuma̱ o uvon a na vu zuwai aza a Amon o una niyi na̱ matsun me pe'eni, a̱vu vu tara ka va̱ yi wo o'wo ka va̱ wu. 10 To, gogo adama o ndolo matsun me pe'eni maa kasa nu u'wa wa̱ wu shi hali hali. Adama a na vu goro numu, reve vu tara ka va Uriya vuma va Hitiya wo o'wo ka va̱ wu.>

11 <<Apa ili i na A̱sulazuva a dammai, <Adama e ili i na vu yuwain, n ta zuwa za ro diga o u'wa wa̱ wu u 'ya̱sa̱a̱n wu aci. Waru e esu a̱ wu a ɗa maa usa a̱ma̱ci a̱ wu reve n ca moron ma̱ nden ma̱ wu, waru vuma'a u to von na̱ a̱ma̱ci a̱ wu nu urana kpasa kpasa.* 12 Vu yuwan ta̱ ili i nda usokowu, amma a̱mu n ta yuwaan wu ili i nda nu urana kpasa kpasa a̱ ma̱ka̱ka̱n ma aza a Isra'ila suru.> >>

13 A̱vu Da̱wuda damma Natan, <<N yuwaan ta̱ A̱sulazuva unusu.>>

Reve Natan usu yi u damma, <<A̱sulazuva a tawa ta̱ unusu wa̱ wu. Va̱a̱ kuwa̱ shi. 14 Amma adama a adanshi a vama a na vu yuwain, vu zuwa ta̱ nꞌyuwatan ma̱ A̱sulazuva n rono yi e iɗa. Adama o ndolo ulobo u na a matsaan nuwu u ta̱ kuwa̱.>>

15 A̱vu Natan ka̱ra̱ a̱ tyo o u'wa. Reve A̱sulazuva a faba ulobo u na ka va Uriya matsayin Da̱wuda'a na̱ mɓa̱la̱. 16 Da̱wuda pati ta̱ A̱sula̱ o una̱ u mawu'un. Reve u yuwan akuli u uwa a aasula a̱ yi, a̱vu u shon adama a̱ yi reve u von e iɗa ayin ma̱ɓula̱. 17 A̱vu mbara mu u'wa wa̱ yi n ta̱wa̱ uba̱ta̱ wa̱ yi adama e le'eshe yi u yon pe e iɗa'a, agba u 'yuwan ta̱, reve fo u 'yuwan a lyuwa ilyalya oɓolo ne ele.

18 Ele lo o urana we cindere, a̱vu mawu'un ma̱ kuwa̱. A̱vu mbara'a a uwwa wovon u na aa damma yi a na mawu'un ma̱ kuwa̱i. A̱vu agagulai va̱ni le, <<Mantsa ma na mawu'un ma̱ da̱na̱i wuma tsu ca yi ta̱ adanshi agba wu uwwa tsu shi. Cine tsa ɗa tsaa damma yi mawu'un ma̱ kuwa̱ ta̱? Na amayun u ta gura amaton aciya̱yi.>>

19 Ana Da̱wuda enei mbara'a e yemenu va̱ ni le, a̱vu u reve a na mawu'un ma̱ kuwa̱ ta̱, ɗaɗa we ece nle, <<Mawu'un ma̱ kuwa̱ ta̱?>>

A̱vu a̱ usu, <<Ee u kuwa̱ ta̱.>>

20 Reve Da̱wuda 'yon e iɗa'a. Ana u sumba̱i, reve u sukuma mani'in, a̱vu wo oto itana i ro, a̱vu u 'ya̱wa̱ o u'wa wa̱ A̱sulazuva u yuwan a̱ga̱nda̱. Ɗaɗa u ka̱mba̱i o u'wa wa̱ yi reve u damma agbashi a̱ yi a ca yi ilyalya, ɗaɗa u lyuwai.

21 A̱vu mbara ma̱ yi me ece yi, <<Nye i zuwai vu yuwain ne? Mantsa ma na mawu'un ma̱ da̱na̱i wuma, vu yuwan ta̱ akuli na̱ mesun, agba a̱yi ɗa nda ana u kuwa̱i vu 'yon ta̱ vu lyuwa ilyalya!>>

22 Reve u usu le, <<Mantsa ma na ulobo'o u da̱na̱i wuma, n yuwan ta̱ akuli na̱ mesun, adama a na n yuwan ta̱ majiyan n damma, <Zane revei ko A̱sulazuva o to roco mu isa'ani u lyawa mawu'un wuma?> 23 Amma a na wo o'woi gogo nda u kuwa̱i, nye yaa zuwa mu n yuwan akuli? Waru n ta gura ka̱mba̱to yi? Uranu u ro n ta̱ 'ya̱wa̱ uba̱ta̱ wa̱ yi, amma a̱yi u ri n yuwan u ka̱mba̱ uba̱ta̱ u va̱ shi.>>

24 A̱vu Da̱wuda le'eshe Bashaba ka va̱ yi, a̱vu u von na̱ a̱yi. Reve u yuwan a̱tsuma̱ a̱vu u matsaan yi ulobo, reve a ca yi aala Sulemanu. A̱sulazuva a ciga ta̱ mawu'un, 25 reve A̱sulazuva a̱ lyungu Natan vumava̱sula̱ u ca mawu'un aala Yedidaya,* adama a na A̱sulazuva a ciga yi ta̱.

26 Ana a tarai mantsa Yowab 'ya̱wa̱a̱ ta̱ lyuci gbain va Raba vi iɗa ya Amon nu uvon, a̱yi a zama u usa lyuci'i, 27 reve u lyungu nlingata uba̱ta̱ wa̱ Da̱wuda a damma yi, <<N yuwan ta̱ uvon na̱ Raba waru n reme ta̱ uba̱ta̱ u na lyuci'i va̱a̱ tsura̱sa̱ mini. 28 Gogo vu ɓoloto akapi a̱ a̱soja reve vu ka̱nda̱ruwa̱ yi nu uvon vu reme lyuci'i. N na̱ ne ɗa shi, n ta̱ gba a usa lyuci'i na aciya ya̱ va̱, reve waru e ɗe yi na ala a̱ va̱.>>

29 Ɗaɗa Da̱wuda ɓolotoi a̱soja a̱ yi suru, reve a̱ 'ya̱wa̱ Raba. A̱vu u yuwan uvon na̱ lyuci'i hali u usa yi. 30 A̱vu u foɗo okokolo o tsugono a aaci o mogono me le. Waru ume wa̱ yi u rawa ta̱ ume u kilo u zinariya mata'atsu na̱ a̱za̱ a̱ na̱shi, waru u ta̱ pe na atali e ikebe ya̱ a̱bunda̱ a̱tsuma̱ a̱ yi. Reve Da̱wuda oto okokolo'o a aaci a̱ yi. A̱vu u pura̱ itana ya̱ a̱bunda̱ i lyuci'i. 31 A̱vu Da̱wuda uta̱a̱ ama a̱ lyuci'i, reve u zuwa le a yuwan ulinga na̱ n'inutsu nu ucira, na̱ nshe'en m ma̱ka̱pa̱ na aɓau. Avu waru u zuwa le a yuwan iponu i ci'in. Ne ɗa Da̱wuda yuwain ni ilyuci ya aza a Amon suru. Reve Da̱wuda na̱ a̱soja a̱ yi suru a̱ ka̱mba̱ Urishelima.