1 Ana a̱yi ndolo kotoi, reve Amnon ulobo u ta̱ a̱tsuma̱ o olobo a̱ Da̱wuda uwa icigi ya Tamar usheli wu ulobonu zawa'a va Absalom ulobo wa̱ Da̱wuda.

2 Reve Amnon damaton aciya̱yi hali u banakan adama a Tamar zawa'a va̱ yi vu usheli a na koto u revei vali shi, waru we ene ta̱ waa gura yuwan ili i ro na̱ a̱yi shi.

3 Amma Amnon da̱na̱ ta̱ ni i'utsa̱ za na a̱ tsu ɗe Yonadab ulobo wa Shimeya* mawun ma̱ a̱na̱wun ma̱ Da̱wuda. Waru Yonadab ta̱ nu ugbozu lon. 4 Reve we ece Amnon, <<Nye i zuwai a̱vu ulobo u mogono vu tsu da̱na̱ urewesu wa̱ wu ulukutu usana suru, agba vu damma mu ili shi?>>

Ɗaɗa Amnon damma niyi, <<N te icigi ya Tamar zawa'a va Absalom mawun ma̱ a̱sha̱wu ma̱ va̱.>>

5 Reve Yonadab damma yi, <<'Ya̱wa̱ vu von a̱ a̱a̱ga̱da̱ a̱ wu, vu yuwan she damma vu tu ubanakun. Na̱ dada va̱ wu ta̱wa̱ u ka̱lyuwa̱ wu a̱vu vu damma yi, <N te ipati ya̱ wu vu lyawa zawa'a va̱ Tamar ta̱wa̱ u yuwaan mu ilyalya adama n lyuwa, u foɓoo mu ilyalya'a a̱ ma̱ka̱ka̱n ma̱ va̱, adama me ene cine waa yuwan a̱vu u towu mu ne ekere a̱ yi.> >>

6 Ɗaɗa Amnon voyin she damma u tu ubanakun. Ana mogono ma ta̱wa̱i ma̱ ka̱lyuwa̱ yi, reve Amnon damma yi, <<N te ipati ya̱ wu vu lyawa zawa'a va̱ Tamar ta̱wa̱ u yuwaan mu emeshen a̱ ma̱ka̱ka̱n ma̱ va̱, adama u towu mu ne ekere a̱ yi.>>

7 Reve Da̱wuda lyunguwa̱a̱ Tamar diga o ukobu u tsugono u damma, <<Yuwan ankuri vu 'ya̱wa̱ o u'wa wu zakpara va̱ wu Amnon vu yuwaan yi ilyalya.>> 8 Reve Tamar 'ya̱wa̱ o u'wa wu zakpara va̱ yi, uba̱ta̱ u na u ri nven. A̱vu u tara yira u lapa, reve u yuwaan yi emeshen a̱ ma̱ka̱ka̱n ma̱ yi.

9 A̱vu u tara aakwanu reve u tsuwa̱n yi pe u delyo yi, amma a̱vu u 'yuwan a tama. A̱vu Amnon gba̱ra̱ aza a na a yuwusaan yi a̱ga̱nda̱ suru o uta̱, a̱vu suru nle o uta̱ a lyawa yi. 10 Ɗaɗa Amnon dammai Tamar, <<Ta̱wa̱a̱ mu ne emeshe'en a aasula e nven n va̱ adama vu towu mu ne ekere a̱ wu n tama.>> Reve Tamar tara emeshen a na u kangalai'i a̱vu u 'ya̱wa̱a̱ a aasula e nven ma Amnon zakpara va̱ yi. 11 Ana u rawai ne ele zuzu adama u tama, reve u moɗo yi a̱vu u damma yi, <<Zawa'a va̱ ta̱wa̱ von na̱ a̱mu.>>

12 Reve u usu yi, <<O'o, zakpara va̱, she vu von na̱ a̱mu babu ucigu wan. She cu'un vi ili i nda i fara a̱tsuma̱ a Isra'ila wan! She vu yuwan ili i wono i nda wan. 13 A̱mu gba a̱ te ɗa maa uwa ni ili i wono i va̱ i nda? A̱vu gba waru? Vu to o'wo she damma vuma vama va amayun a̱tsuma̱ a Isra'ila. Adama o ndolo n ta patishi wu vu yuwan adanshi na̱ mogono, waa putsa wu vu zuwa mu shi.>> 14 Amma Amnon 'yuwan ta̱ a zuwaa yi atsuvu, reve u tsugba yi u von na̱ a̱yi babu ucigu wa̱ yi, adama a na u la'a niyi ucira.

15 Reve Amnon ima̱ yi lon, hali u la'a cine u shi u ciga niyi. A̱vu Amnon damma yi, <<'Yon vu ka̱ra̱!>>

16 A̱vu u damma yi, <<O'o, ma̱gba̱ra̱ ma̱ va̱ u to o'wo ili yu uwuyanu i na i la'ai ili i na vu yuwaan numu ɗe.>>

Amma Amnon 'yuwan ta̱ a uwwa ili i na u damma niyi. 17 Reve u ɗe ulobo u na waa yuwusaan yi a̱ga̱nda̱ a̱vu u damma yi, <<Uta̱a̱ ka nda a alanga a̱ ma̱ka̱ka̱n ma̱ va̱, reve vu katsu una̱ntsu!>> 18 Reve za na aa yuwusaan yi a̱ga̱nda̱'a̱ uta̱a̱ yi a alanga reve u katsu una̱ntsu'u.

Tamar da̱na̱ ta̱ nu utugu wu ugaɗi wotowu adama a na ne ɗa esheli o mogono a na o koto e revei vali shi a̱ tsu da̱na̱. 19 Reve Tamar tsun okomo a aaci a̱ yi adama a̱ a̱tsumola̱ngu, reve fo wu kara utugu wu ugaɗi u na u da̱na̱i wotowu na̱ a̱yi. A̱vu u koro aaci u reme mmalu, e mesun na̱ wu uta̱yi uɗyo.

20 Ana Absalom zakpara va̱ yi ece niyi, <<Zakpara va̱ wu Amnon ɗa voyin na̱ a̱vu? Gogo she vu rungwa̱ vawun va̱, a̱yi zakpara va̱ wu ɗa. Waru she vu zuwa ili i nda o okolo a̱ wu wan.>> Ɗaɗa Tamar yuwain nden ma̱ nde'en ma̱ a̱tsumola̱ngu o u'wa wu zakpara va̱ yi Absalom.

21 Ana Da̱wuda mogono ma uwai ili i nda suru, a̱vu u yuwan upan lon. 22 Agba Absalom damma Amnon ko adanshi shi, ko isa'ani ko iwuya shi. U ima̱yi ta̱ Amnon adama a na u von ta̱ na̱ Tamar babu ucigu nu ucira mawun ma̱ a̱na̱wun mo usheli ma̱ yi.

23 Ana a yuwain a'wan e re reve Absalom zuwa a puna ikyon ya̱ yi aza a na a̱ ri Ba'al Hazo na ri zuzu na̱ lyuci va Ifiramu, reve Absalom banu muwun mo olobo m mogono suru adama a̱ a̱buki alya no oso. 24 A̱vu Absalom 'ya̱wa̱ uba̱ta̱ u mogono, reve u damma yi, <<Wuma wa̱ wu u jima! A̱yi ɗa nda a̱za̱ e ipuna yi ikyon a̱ ta̱wa̱a̱ mu ta̱ ulinga. Ko u ta̱ yo'ono mogono na azagbain a̱ wu a̱ ta̱wa̱ oɓolo na aagbashi a̱ wu.>>

25 Reve mogono ma̱ usu yi, <<O'o ulobo u va̱, tsa̱a̱ ta̱wa̱ suru shi adama a na tsu to o'wo wu itana lon.>> Reve Absalom damaton yi, agba Da̱wuda 'yuwan ta̱. Amma u zuwaa yi ta̱ aba'un.

26 Reve Absalom damma, <<Na̱ va̱a̱ ta̱wa̱ shi, vu yuwan ankuri vu zuwa zawa'a va̱ Amnon ta̱wa̱ oɓolo na̱ a̱tsu.>>

A̱vu mogono me ece yi, <<Nye i zuwai wa̱a̱ 'ya̱wa̱ oɓolo na̱ a̱vu?>> 27 Amma Absalom lyuwa ta̱ elime nu udamatosun wa̱ yi hali u usu na Amnon na akapi a̱ muwun mo olobo m mogono'o a̱ 'ya̱wa̱ oɓolo na̱ a̱yi.

28 Reve Absalom damma agbashi a na a yuwusaan niyi a̱ga̱nda̱, <<I ka̱lyuwusa̱! Mantsa ma na Amnon uwwai uyo'o u masayan ma̱ ina̱bi, waru na̱ n damma ɗu, <Ga̱la̱i Amnon,> reve yu una yi. Yu uwwa wovon wan, a̱mu ɗa n zuwa nɗu. Yi isawan nu ucira nu ukadu.>> 29 A̱vu agbashi a na a yuwusaan Absalom a̱ga̱nda̱'a̱ a yuwan na̱ Amnon cine Absalom damma nle. A̱vu akapi o olobo o mogono a̱ 'yon ni ilaɗi a kumba nloli mi ido i le a suma.

30 Mantsa ma na a̱ da̱na̱i o ure a̱ ka̱mba̱, reve udammu u ta̱wa̱ uba̱ta̱ wa̱ Da̱wuda, <<Absalom una ta̱ olobo o mogono'o suru babu za na buwai.>> 31 A̱vu mogono ma̱ 'yon wu kara a̱tugu a̱ yi, reve u von e iɗa. A̱vu azagbain a̱ yi fo suru aza a na a̱ da̱na̱i lo mishin a kara a̱tugu e le.

32 Amma Yonadab ulobo wa Shimeya mawun ma̱ a̱na̱wun ma̱ Da̱wuda ma damma ta̱, <<Wuma wa̱ wu u jima zagbain va̱! She vu tara o una ta̱ olobo a̱ wu suru wan, Amnon ɗa goon o unai. Adama a na Absalom foɓo ta̱ ne diga urana u na Amnon voyin na̱ vawun ma̱ yi Tamar nu ucira babu ucigu wa̱ yi. 33 Gogo zagbain va̱ mogono she vu dama adama o udammu wu ukwa̱ wa̱ olobo o mogono suru wan, Amnon ɗa goon kuwa̱i.>>

34 Absalom gba suma ta̱.

A̱vu soja na aa yuwusan ipiri a mantsa'a u ka̱lyuwa̱ a̱vu we ene ama a̱bunda̱ a̱ca̱pusa̱ diga o upasu u masasan diga o ure u lyuci wa Horonayim.

35 A̱vu Yonadab damma Da̱wuda mogono, <<Ka̱lyuwa̱, olobo o mogono a ɗa nda a̱ ta̱wa̱i, cine aagbashi a̱ wu a dammai. Ne ɗa gba u shiwain.>>

36 A̱yi o mokotoo ma adanshi, a̱vu olobo o mogono a uwa, reve o ɓosho na̱ mesun. A̱vu fo mogono na azagbain a̱ yi o ɓosho fo na̱ mesun babu uyo'o. 37 Absalom suma ta̱ a̱ tyo uba̱ta̱ u mogono Talmai ulobo wa Amihu vu upasu wa Geshu. Amma Da̱wuda mogono ma tara ta̱ mantsa a yuwusan nden n wirota̱ adama o ulobo wa̱ yi Amnon.*

38 Ana Absalom sumai a̱ tyo Geshu u da̱nu ta̱ ɗe hali a'wan a ta'atsu. 39 A̱vu okolo o mogono Da̱wuda a̱ ka̱mba̱ uba̱ta̱ wa Absalom, adama a na u sowo ta̱ mini mo uta̱nu a na wo o'woi Amnon kuwa̱ ta̱ ɗe.