1 Ana a̱yi ndolo kotoi ɗaɗa Nahash mogono ma aza a Amon ma̱ kuwa̱i, reve Hanun ulobo wa̱ yi mo o'wo mogono o una̱ wa̱ yi. 2 Reve Da̱wuda damma, <<N to roco Hanun ulobo wa Nahash isa'ani ya amayun, cine dada va̱ yi roco numu isa'ani ya amayun.>> Reve Da̱wuda lyungu nlingata a̱ 'ya̱wa̱ a̱ ca̱sa̱ yi na̱ wirota̱ adama o ukwa̱ wa dada va̱ yi.

Ana nlingata'a n rawai a̱tsuma̱ e iɗa ya Amon, 3 a̱vu azagbain a Amon a damma Hanun mogono me le, <<Vu ta majiyan Da̱wuda ta casu dada va̱ wu tsugbain a na u lyunguwa̱ nuwu aza a na a̱ ca̱sa̱ wu na̱ wirota̱? Ashe ugbozu u ɗa u yuwain nda'a tsura̱ e idana lyuci tsu, waru a tawa yi utyo, na we e reve ucira u tsu adama a lyuwa tsu nu uvon shi?>> 4 Ɗaɗa Hanun remei nlingata ma̱ Da̱wuda'a a̱vu u puna le ntsuka̱ upasu u ta̱ a̱vu wu paɗa le a̱tugu o ugundo. Reve u lyawa le a̱ ka̱ra̱.

5 Ana a dammai Da̱wuda mogono aɗa a nda, reve u lyungu nlingata a cina ama'a, adama a na a zuwa le ta̱ a uwwa wono lon. Mogono ma damma ta̱, <<Yi isawan Jeriko hali ntsuka̱ n ɗu n kungwa, reve i ka̱mba̱ a̱ wa̱ta̱.>>

6 Ana aza a Amon e revei o'wo ta̱ ili yu upan e ekere a̱ Da̱wuda adama e ili i na a yuwain, reve a tara okopu a̱ a̱soja a Suriya ukpakukupa ushin (20,000), diga Bet Reho na̱ Zoba, oɓolo na̱ mogono ma Ma'aka na̱ a̱soja ukpakukupa (1,000) na ama ukpakukupa kupa nu ukpakukupa ure (12,000) diga Tob.

7 Ana Da̱wuda uwwai ne a̱vu u lyungu Yowab na̱ a̱soja a na a gurai uvon suru adama a yuwan uvon ne ele. 8 Reve aza a Amon o uta̱ a dara adama o uvon o una̱ntsu u lyuci gbain le, a̱vu fo aza a Suriya diga Zoba na̱ Reho na̱ a̱soja a Tob na̱ Ma'aka a dara a agalaci ko'o.

9 Ana Yowab enei u ta yuwan uvon elime na̱ a̱ca̱pa̱, reve u ɗangula a̱soja o ro aza a na a la'a gurai uvon diga a̱tsuma̱ a ali a Isra'ila adama a yuwan uvon na aza a Suriya. 10 A̱vu u zuwa akapi a̱ a̱soja za̱la̱ tsugbain tsa Abishai zawa'a va̱ yi adama u rono le aaɗanga, avu Abishai dara le adama a yuwan uvon na aza a Amon. 11 A̱vu Yowab damma Abishai, <<Na aza a Suriya a la'a ucira u va̱ vu ta̱wa̱ vu kamba mu, amma n na ama a Amon a la'a ta̱ ucira wa̱ wu, n ta̱ ta̱wa̱ n kamba wu. 12 Tsu kaɓa asuvu, tsu yuwan nla̱ngi nu ucira adama a ama a̱ tsu, na̱ lyuci va̱ A̱sula̱ a̱ tsu. Lyawa A̱sulazuva a yuwan ili i na i lobono niyi.>>

13 Ana Yowab na̱ a̱soja a̱ yi a̱ zura̱i zuzu adama e teme uvon, reve gba a̱soja a Suriya a suma. 14 Ana aza a Amon enei aza a Suriya e ilaɗi, reve ele fo a suma a̱ ma̱ka̱ka̱n ma Abishai reve a uwa a̱tsuma̱ a̱ lyuci. Ɗaɗa Yowab ka̱mba̱i Urishelima diga uba̱ta̱ o uvon na aza a Amon.

15 Ana a̱soja a Suriya enei a̱soja a Isra'ila a lyuwa le ta̱ nu uvon, reve o ɓoloto aciyele. 16 Hadadeza mogono lyungu ta̱ a̱soja a̱ ta̱wa̱ na aza a Suriya a na a̱ ri mavada mo Uɗolu wa̱ Yufireti. Reve a rawa a̱ lyuci va Helam na̱ Shoba yali ya̱ a̱soja a Hadadeza elime e le.

17 Ana a dammai Da̱wuda aɗa a nda, reve u ɓoloto a̱soja a Isra'ila suru uba̱ta̱ u ta̱, reve a pasalai Uɗolu wa̱ Urudu a̱ tyo Helam. Reve a̱soja a Suriya a dara aciyele, a̱vu e reme uvon na̱ Da̱wuda. 18 Amma a̱soja a Suriya a sumaa ta̱ a̱soja a Isra'ila. A̱vu Da̱wuda una a̱soja a Suriya akumbi e ikeke yi ido ukpakucindere (700) na̱ a̱soja akumbi e ido ukpakukupa amunga (40,000). Reve a amaton Shoba yali ya̱ a̱soja a Suriya, hali u kuwa̱ lo.

19 Ana ngono n na n ri za̱la̱ tsugono tsa Hadadeza suru enei aza a Isra'ila a lyuwa ta̱ aci e le nu uvon, reve a zami nden ma alafiya na aza a Isra'ila, a̱vu o'wo agbashi e le. Ɗaɗa aza a Suriya a uwwai wovon u na a̱a̱ da̱shi kamba aza a Amon.