1 A̱vu A̱sulazuva a̱ da̱shi yuwan upan na aza a Isra'ila lon, hali u linga na̱ Da̱wuda adama u ta̱wa̱a̱ le na addama, u damma, <<'Ya̱wa̱ adama vu kece ama a Isra'ila na̱ aza a Yahuda.>>

2 A̱vu mogono ma damma Yowab yali ya̱ a̱soja a̱yi, <<Ka̱ra̱ a̱ tyo o gundo va aza a Isra'ila suru, diga upasu wu ugana u lyuci wa Dan a̱ tyo upasu wu uyagi u lyuci wa Biyasheba. A̱vu vu kece suru aza a na a rawai yuwan uvon, n ciga ta̱ n reve a̱bunda̱ e le.>>

3 Amma Yowab usu ta̱ mogono, <<Lyawa A̱sulazuva A̱sula̱ a̱ wu a̱ da̱shi o oɓolo a̱za̱ o uvon ukpaku udoɓonuwu, waru lyawa esu a zagbain va̱ mogono ene. Amma nye i zuwai zagbain va̱ mogono maa cigai ma yuwan cu'un vi ili i nda?>>

4 Suru na̱ ne adanshi o mogono ma la'a ta̱ za va Yowab na̱ a̱soja o uvon. Adama o ndolo a̱vu a̱ ka̱ra̱ a lyawa mogono adama e kece suru aza a na a rawai yuwain uvon a̱tsuma̱ a Isra'ila.

5 Ana a pasai Uɗolu wa̱ Urudu, a̱vu a̱ va̱la̱ zuzu na̱ Arowa, uyagi na̱ lyuci o ukari'i. Diga lo a̱vu a̱ ka̱ra̱ a̱ tyo upasu wa Gadu a cina lyuci va Jaza. 6 A̱vu a̱ ka̱ra̱ a̱ tyo Giliyadu na̱ iɗa ya Tatim Hodshi, a̱vu a̱ ka̱ra̱ tyo a̱ lyuci va Dan Ja'an a̱ ka̱nda̱ruwa̱ a cina upasu wa Sidon. 7 A̱vu a̱ ka̱ra̱ a̱ tyo e ilyuci ya Taya i na i ri uka̱nda̱ruwu nu ukari ni ilyuci ya aza a Hiviya na aza a Ka'ana suru. O ukosu waru, a̱vu a̱ ka̱ra̱ a̱ tyo Biyasheba a̱tsuma̱ o upasu we Nege va Yahuda.

8 Ana a̱ kuruyi iɗa'a suru, a̱vu a̱ ka̱mba̱ a̱tsuma̱ a̱ Urishelima o ukosu u woto u kuci na̱ rana ushin.

9 A̱vu Yowab damma mogono a̱bunda̱ a̱ a̱soja'a. A̱tsuma̱ a aza a Isra'ila a rawa ta̱ ukpakukupa ukpaku kunla̱ (800,000), aza a na aa gura ɓana matsun me pe'eni ulobonu, a̱tsuma̱ a Yahuda waru ukpakukupa ukpaku uton (500,000).

10 Reve ili'i i ka̱ra̱ a damatosun Da̱wuda lon a mantsa ma na o kotoi mekece ma aza a na a rawai yuwain uvo'on, a̱vu okolo a̱yi a̱ la̱nga̱. A̱vu u damma A̱sulazuva, <<N yuwan ta̱ unusu lon adama a na n yuwain mekece ma nda. Gogo gba, A̱sulazuva, n te ipati ya̱ wu, vu yuwaan aagbashi a̱ wu gafura. Adama a na n yuwan ta̱ tsulo lon.>>

11 Kafu Da̱wuda 'yon nu usana, A̱sulazuva a yuwan ta̱ adanshi na̱ Gadu vumava̱sula̱, za na a yuwusaan Da̱wuda yindi, ana, 12 <<Ka̱ra̱ vu damma Da̱wuda, <Apa ili i na A̱sulazuva a dammai, n ta ca su wu aɗangulu a ta'atsu. Ɗangula za ta̱ a̱tsuma̱ oforo a nda, waru n ta yuwain aci a̱ wu.> >>

13 A̱vu Gadu ta̱wa̱ uba̱ta̱ wa̱ Da̱wuda a̱vu u damma yi, <<Vu ciga ta̱ a yuwan ambulu a'wan a ta'atsu a̱tsuma̱ e iɗa ya̱ wu? Ko waru n'yuwatan ma̱ wu n da̱na̱ a saɓusa wu reve vu da̱na̱ e ilaɗi elime hali woto ta'atsu? Ko gba shi vu ciga ta̱ a yuwan mɓa̱la̱ rana ta'atsu e iɗa ya̱ wu? Gogo vu yuwan majiyan ma̱ yi, a̱vu vu ca mu u'usuwu u na ma̱a̱ usu wa̱ A̱sulazuva za na lyungu numu.>>

14 A̱vu Da̱wuda usu Gadu, <<N uwa ta̱ uta'atsu. Lyawa tsu riya̱ e ekere a̱ A̱sulazuva, adama a na iliyali ya̱ yi i ta̱ mgbain. Amma she vu lyawa mu n riya̱ e ekere a ama a wan.>>

15 Adama o ndolo a̱vu A̱sulazuva a̱ lyunguwa̱a̱ aza a Isra'ila na̱ mɓa̱la̱ a cina ukosu u mantsa ma na a zuwai, a̱vu ama ukpakukupa kupocindere (70,000) diga upasu wu ugana u lyuci wa Dan a̱ tyo upasu wu uyagi u lyuci wa Biyasheba a̱ kuwa̱. 16 A mantsa ma na malingata ma̱ A̱sulazuva ma̱ da̱na̱i e ifoɓi i na woo kototo Urishelima, reve A̱sulazuva a vadala okolo a̱yi a̱vu u damma malingata mo kototosu'u, <<U rawa ta̱! Vu tawa ukere wa̱ wu!>> A mantsa mo ndolo malingata ma̱ A̱sulazuva'a ma̱ da̱na̱ ta̱ lo osoroto Aruna vuma va Jebusiya.

17 A mantsa ma na Da̱wuda enei malingata ma̱ A̱sulazuva ma na ma̱ ri o ukototosu wa ama'a, a̱vu u damma A̱sulazuva, <<A̱mu ɗa za na yuwain ulambu wa̱ a̱ɓula̱ nu unusu. Ele ama a nda a ta̱ cine vu revei ikyon. Nye i ɗa a yuwain? Lyawa ukere wa̱ wu u cipa̱ e ekere va̱ nu u'wa u va̱.>>

18 A̱tsuma̱ o uranu u ndolo a̱vu Gadu ka̱ra̱ a̱ tyo ya̱ Da̱wuda a̱vu u damma yi, <<Vu ka̱ra̱ a gawan adama vu suwaa A̱sulazuva masa'a osoroto Aruna vuma va Jebusiya.>> 19 A̱vu Da̱wuda ka̱ra̱ a gawan, cine A̱sulazuva a dammai o una̱ wa Gadu. 20 Ana Aruna ka̱lyuwa̱i a̱vu we ene mogono na azagbain a̱yi a̱ ta̱wa̱ ya̱'a̱ yi, a̱vu wu uta̱ u kingyo u ka̱ɗa̱to urewesu wa̱ yi a̱ tyo e iɗa a̱ ma̱ka̱ka̱n mo mogono.

21 A̱vu Aruna damma, <<Nye i ɗa i tarai zagbain va̱ mogono a na wa̱a̱ ta̱wa̱ uba̱ta̱ wa aagbashi a̱ yi?>>

A̱vu Da̱wuda usu yi, <<N ta̱wa̱ ta̱ adama n tsula osoroto a̱ wu adama n suwaa A̱sulazuva masa'a, adama a tawa mɓa̱la̱ n na n ri e ekere a ama.>>

22 A̱vu Aruna damma Da̱wuda, <<Lyawa zagbain va̱ mogono ma tara suru ili i na i lobono niyi u ca kucci na̱ a̱yi. Apa nda ogono e inan adama a̱ kucci vu ukula̱tosu, apa nda waru aɗanga na ma fabusa ishina na̱ adama a ɗanga kucci. 23 Mogono, a̱mu n ca wu ta̱ suru ili i nda.>> A̱vu Aruna da̱shi damma yi, <<Lyawa A̱sulazuva A̱sula̱ a̱ wu a̱ ushi wu.>>

24 Amma a̱vu mogono ma̱ usu yi u damma, <<O'o, n ta tsupa wu. Maa ca A̱sulazuva A̱sula̱ a̱ va̱ kucci vu ukula̱tosu za na n kuɗa̱i o una ili i ro shi.>> A̱vu Da̱wuda tsula osoroto'o oɓolo no ogono e ina'an ni ikebe i azurufa kupoton. 25 Reve Da̱wuda suwaa A̱sulazuva masa'a lo, a̱vu u ca kucci vu ukula̱tosu na̱ kucci muwwulai. Reve A̱sulazuva a̱ usu avasa o una̱ wi iɗa'a, ɗaɗa a tawayi Isra'ila mɓa̱la'a̱.