1 Da̱wuda ɓoloto ta̱ a̱soja a na a̱ ri oɓolo na̱ a̱yi, reve u zuwa le nan yali a na a̱ shi aci o oɓolo oɓolo a̱ a̱soja, na̱ nan yali vu ukpakukupa na̱ a̱za̱ o ukpaku. 2 A̱vu Da̱wuda lyungu a̱soja oɓolo a ta'atsu. Oɓolo a̱ ta̱ za̱la̱ tsugbain tsa̱ Yowab. Oɓolo a̱ ta̱ waru za̱la̱ tsugbain tsa Abishai mawun ma̱ a̱na̱wun ma̱ Yowab ulobo wa Zeruya. Za ta̱ waru za̱la̱ tsugbain tsa Itai vuma va Gat. Ɗaɗa mogono ma dammai o oɓolo a̱soja'a, <<A̱mu na aciya̱va̱ n ta̱ 'ya̱wa̱ oɓolo na̱ a̱ɗu uba̱ta̱ wu uvo'on.>>

3 Reve o oɓolo a̱soja'a a damma, <<Voo uta̱ ɗe shi! Adama a na ko na̱ shi tsu suma diga uba̱ta̱ wu uvo'on, ili ya̱ ɓa̱li yaa ama a Absalom shi. Ko na̱ shi uɓatsulai u tsu u kuwa̱ wa̱a̱ ɓa̱la̱ le shi. Amma a̱vu vu rawa ta̱ o una̱ wa ama ukpakukupa kupa u tsu (10,000). Adama o ndolo u ta la'a vu da̱nu a̱ lyuci vu lyunguwa̱ tsu ni ikambi.>>

4 Ɗaɗa mogono ma̱ usu yi, <<N ta yuwan suru cine ye enei u lobonoi.>> Reve mogono me e isawan zuzu nu una̱ntsu u lyuci mantsa ma na o oɓolo a̱soja suru a̱ ri a̱ ma̱ka̱ra̱ vu ukpakukupa na̱ ukpaku. 5 A̱vu mogono ma damma Yowab na̱ Abishai na̱ Itai, <<I kuru ben na̱ molobo mo ndolo Absalom adama a̱ va̱.>> Waru suru a̱soja a uwwa ta̱ mantsa ma na mogono ma dammai nan yali yo oɓolo a a̱soja'a, adama a Absalom.

6 A̱vu a̱soja a̱ Da̱wuda o uta̱ a̱ tyo a agalaci reve a yuwan uvon na̱ a̱soja a Isra'ila. A yuwan ta̱ uvo'on a̱ a̱a̱rumbu a Ifiramu. 7 Ɗe ɗa a̱soja a̱ Da̱wuda a lyuwai a̱soja a Isra'ila nu uvon, a lamba ta̱ ama na̱ a̱bunda̱ lon. O una ta̱ ama ukpakukupa ushin (20,000) o urana u ndolo. 8 Uvon u baza ta̱ uba̱ta̱ suru upasu wi iɗa'a. Ama a na a̱a̱rumbu'u a lyuwai a la'a ta̱ aza a na o unai na̱ matsun me pe'eni.

9 Babu ufaru reve Absalom ga'an na̱ a̱soja a̱ Da̱wuda. Absalom gba u da̱na̱ ta̱ e ilaɗi o mololi mo do va̱ a̱yi, reve mololi mo do'o ma uwa za̱la̱ ve eten o uɗanga u gbain a̱vu ete'en u reme a̱nji a Absalom, amma mololi mo do ma na u da̱na̱i ukumbu u ka̱ra̱ ta̱, reve u lyawa yi lo a̱ wuta̱lyuwusa̱.

10 Ana za ta̱ a̱tsuma̱ a̱ a̱soja a̱ Da̱wuda enei Absalom, a̱vu u damma Yowab, <<Me ene ta̱ Absalom a̱ wuta̱lyuwusa̱ zuva ve eten o uɗanga u gbain.>>

11 Reve Yowab damma vuma'a, <<Ana ve ne niyi, nye i putsaa nuwu a na vo o unai? N shi ta̱ a ca wu ikebe azurufa kupa na̱ gbakala tsugbain.>>

12 Amma vuma'a u usu yi ta̱ u damma, <<Ko na adama ikebe i azurufa ukpakukupa (1,000) u ɗa vaa ca mu ma̱a̱ 'ya̱sa̱n ukere u va̱ n ju'wa̱n ulobo u mogono shi. Adama a na a atsuvu a̱ tsu a ɗa mogono ma damma nuwu na̱ Abishai na̱ Itai, u damma, <I yuwaan molobo mo ndolo Absalom mapari adama a̱ va̱.> 13 Na̱ shi a damma n tara ta̱ alaki hali mu una yi, babu cine a shi a yuwan mogono me e reve shi. Waru a̱vu na aciya̱wu vu shi ta̱ a wasan mu.>>

14 A̱vu Yowab damma, <<Ma̱a̱ lungusa̱ mantsa tsunda na̱ a̱vu shi.>> Reve u tara mbata aza a ta'atsu ne ekere a̱yi reve u sapa le a̱ ma̱ka̱ka̱n ma Absalom hali a̱ tyo o okolo a mantsa mo ndolo a̱yi ubuwu wuma a̱ wuta̱lyuwusa̱ zuva ve eten o uɗanga u gbain. 15 A̱vu olobo kupa aza a na a guzusa̱a̱ Yowab itana yu uvon a̱ ka̱nda̱ruwa̱ Absalom, reve o koso unai hali u kuwa̱.

16 A̱vu Yowab ivula̱ aavana, a̱vu oɓolo a̱ a̱soja a̱yi suru a lyawa a gbagbusa aza a Isra'ila, adama a na Yowab ɗe nle e isawan. 17 Reve a tara lipu va Absalom, a̱vu a vari yi pe a̱ a̱ka̱ri a̱ a̱ru'un a̱ a̱a̱rumbu, a̱vu a̱ pura̱ atali a̱ a̱bunda̱ a̱ ciɗo yi ne ele. Avu aza a Isra'ila suru a suma a̱ ka̱mba̱ a 'wa le.

18 A mantsa ma na Absalom da̱na̱i wuma u shuwa̱a̱ ta̱ aciya̱yi aatsura o Uka̱ri u Mogono a na a̱ ri n cuwusan na̱ a̱yi ɗe, adama a na u ta a majiyan, <<N ri nu ulobo u na a cuwan na aala a̱ va̱ shi.>> Ɗaɗa u cayi atsura'a aala a̱yi. Adama o ndolo a ɗa ee ɗesu yi Aatsura o Ucuwusan na̱ Absalom hali a cina ana'an.

19 Reve Ahima'az ulobo wa Saduku damma, <<Lyawa n suma n 'ya̱wa̱ n damma mogono alabari a nda, ana A̱sulazuva a wawa yi ta̱ diga e ekere a n'yuwatan ma̱ yi.>>

20 Reve Yowab damma yi, <<A̱vu ɗa va̱ a̱ 'ya̱wa̱ vu damma mogono a na ulobo wa̱ a̱yi ukuwa̱i shi. Vu ta 'ya̱wa̱a̱ yi nu udammu urana u ro, amma gba ana'an shi.>>

21 Ɗaɗa Yowab dammai vuma va̱ Kush, <<'Ya̱wa̱ vu damma mogono ili i na ve enei.>> Ɗaɗa za va Kush'i u kingyo yi nu urewesu wa̱ yi a̱tyo we e iɗa, reve u 'yon u ka̱ra̱ ni ilaɗi.

22 Reve Ahima'az ulobo wa Saduku da̱shi dammisa Yowab, <<Ko nye i ɗa yaa fara, lyawa mu n kuru a̱ca̱pa̱ a vuma va Kush'i.>>

A̱vu Yowab usu yi, <<Adama a̱ nye vu cigai vu 'ya̱wa̱, ulobo u va̱? Ka̱lyuwa̱ va̱ tsura̱ atsupu a̱tsuma̱ a alabari a nda shi.>>

23 Reve Ahima'az dammisa, <<Ko nye i ɗa yaa fara, n ta suma n kuru yi.>>

A̱vu Yowab usu yi, <<To, she vu suma!>> Reve Ahima'az suma u kuru ure u ro u na u ri o Uka̱ri wu Uɗolu wa̱ Urudu hali u la'asa za va Kush'i.

24 Da̱wuda gba u da̱na̱ ta̱ nden e memmere mo una̱ntsu wa̱ a̱tsuma̱ na̱ za va alanga. Ana za na a yuwusan ipiri zuva vu ukwa̱'a̱ wu una̱ntsu u lyuci ka̱ra̱i a rawa zuzu nu uɓaɓu u lyuci'i u 'ya̱sa̱in urewesu wa̱ yi, reve we ene vuma e ilaɗi a̱yi a̱ nde'en a̱ ta̱wa̱ le. 25 A̱vu za vi ipiri'i u ɗe mogono reve u cuɗuwa yi.

Reve mogono ma̱ usu, <<Na̱ a̱yi ɗa u ri a̱ ta̱wa̱ a̱ nde'en, alabari a ɗa wa̱a̱ ta̱wa̱a̱.>> Reve vuma'a u ka̱ra̱ a rawusa zuzu lon. 26 A̱vu za vi ipiri'i we enishe vuma ro e ilaɗi, a̱vu u ɗe za na ri uba̱ta̱ o una̱ntsu reve u damma yi, <<Ka̱lyuwa̱ vuma ro e ilaɗi a̱ ta̱wa̱!>>

A̱vu mogono ma damma,

<<A̱yi nda fo alabari a ɗa wa̱a̱ ta̱wa̱a̱.>>

27 A̱vu za na a yuwusan ipiri zuva vu ukwa̱'a̱ wu una̱ntsu u lyuci'i u damma, <<N ta majiyan za vu ufaru nda'a she damma ilaɗi ya̱ Ahima'az ulobo wa Saduku u ɗa.>>

A̱vu mogono ma damma, <<Vuma va̱ a̱ɓula̱ ɗa, alabari a̱ sa'ani a ɗa wa̱a̱ ta̱wa̱a̱.>>

28 Reve Ahima'az 'ya̱sa̱n uɗyo u damma mogono, <<Ili suru i ta̱ gbaga.>> Reve u kingyo u ka̱ɗa̱to urewesu wa̱ yi e iɗa a̱ ma̱ka̱ka̱n mo mogono, a̱vu u damma, <<Za va aba'un ɗa A̱sulazuva A̱sula̱ a̱ wu, za na wawa nuwu diga e ekere a aza a na a̱a̱ 'ya̱susa̱a̱n zagbain va̱ mogono aci.>>

29 Reve mogono me ece yi, <<N damma molobo'o Absalom u ta̱ gbaga?>>

A̱vu Ahima'az usu u damma, <<A mantsa ma na Yowab lyunguyi aagbashi o mogono oɓolo na̱ a̱mu, me ene ta̱ urupulu u gbain, amma n reve ko nye i ɗa shi.>>

30 Reve mogono ma damma, <<Ka̱mba̱ a̱ nge'en vu isawan pa nda.>> Ɗaɗa u ka̱mba̱i a̱ nge'en reve wi isawan kuci.

31 Ɗaɗa gba vuma va̱ Kush'i rawa shi a̱vu u damma, <<Lyawa zagbain va̱ mogono ma̱ da̱na̱ nu urevu u na A̱sulazuva a wawa nuwu ana'an e ekere a aza a na a̱a̱ 'ya̱sa̱a̱n nuwu a aci suru!>>

32 Reve mogono me ecishe vuma va̱ Kush'i, <<N damma Absalom molobo'o u ta̱ gbaga?>>

Reve vuma va̱ Kush'i u usu yi, <<Lyawa A̱sula̱ a zuwa n'yuwatan mu zagbain va̱ mogono na aza a na a̱a̱ 'ya̱sa̱a̱n nuwu aci na aa yuwaan nuwu iwuya suru a̱ kuwa̱ tso molobo mo ndolo.>>

33 Reve okolo o mogono a̱ riya̱. Reve u kumba zuva a̱ tyo a aasula a na a̱ ri zuva vu una̱ntsu u lyuci, nu u shoyin a manlu a dansa, <<O'o ulobo u va̱ Absalom! O'o ulobo u va̱! O'o ulobo u va̱! Na̱ a̱ shi ma a damma a̱mu ɗa n kuwa̱i o una̱ wa̱ wu. O'o ulobo u va̱ Absalom! Ulobo u va̱!>>