1 A̱vu a damma Yowab, <<Mogono ma̱ ta̱ mesun na̱ nden n wiruta̱ adama a Absalom.>> 2 Ulyuwu wa aci a na a̱soja suru a yuwain a̱tsuma̱ o urana u ndolo a̱vu u ka̱mba̱ le a̱tsumola̱ngu, adama a na urana u ndolo a̱soja'a a uwwa ta̱ a na a dammai, <<Mogono ma ta̱ mesun na̱ nden n wiruta̱ adama o ulobo wa̱ yi.>> 3 A̱vu a̱soja a uwa a̱tsuma̱ a̱ lyuci va Mahanayim urana u ndolo usokowu, cine a̱soja a tsu suma diga uba̱ta̱ o uvon, a̱vu a uwa a̱tsuma̱ a̱ lyuci'i usokowu na̱ wono. 4 A̱vu mogono ma̱ ɓa̱ru urewesu wa̱ yi a yisaali nu ucira u damma, <<O'o ulobo u va̱ Absalom! O'o ulobo u va̱, O'o ulobo u va̱!>>

5 A̱vu Yowab uwa a̱tsuma̱ o u'wa u mogono a̱vu u damma yi, <<Ana'an nda vu ca ta̱ a̱soja a̱ wu wono suru, aza a na a wawai wuma wa̱ wu, na̱ wuma u muwun ma̱ wu olobo ne esheli na̱ a̱ma̱ci a̱ wu na̱ a̱ma̱ci a̱ nge'en a̱ wu fo. 6 Vu ciga ta̱ n'yuwatan ma̱ wu a̱vu vu 'yuwan aza a na a ciga nuwu. Vu roco ta̱ a alanga eteshe na a amayun ana'an nan yali ya̱ a̱soja na̱ a̱soja e le a̱ ri ili i ro ya̱'a̱ wu shi. Me ene ta̱ vu ta uwwa uyo'o a̱ shi a damma Absalom ta̱ lo wuma ana'an a̱vu a̱tsu suru tsu kuwa̱. 7 Gogo, vu uta̱ vu ca ama a̱ wu adanshi. N kucina ta̱ na̱ A̱sulazuva n na̱ vu uta̱ a alanga shi, babu vuma na a̱ da̱nu oɓolo na̱ a̱vu a̱tsuma̱ a ayin a nda. A̱yi nda u ta la'aa wu usa̱n lon na̱ a̱tsuma̱lima̱ a na vu sowoi a mantsa ma na vu da̱na̱i o tsulolobo tsa̱ wu hali a cina ana'an.>>

8 A̱vu mogono ma̱ 'yon ma̱ ka̱ra̱ a̱ 'ya̱wa̱ o una̱ntsu u lyuci, a̱vu u da̱nu. A mantsa ma na alabari a rawai uba̱ta̱ wa̱ a̱soja'a suru, <<Ana mogono ma̱ ta̱ ɗe nden uba̱ta̱ wa̱ yi o una̱ntsu u lyuci,>> reve vuma suru u ta̱wa̱ uba̱ta̱ wa̱ yi.

Ele lo, reve ama a Isra'ila aza a na a̱ shi o toni yi Absalom a sumusa a̱ ka̱mba̱ a 'wa le. 9 A̱tsuma̱ o gundo va Isra'ila suru a uwa ta̱ a yuwusan mawasan va̱ni le a dansa, <<Mogono Da̱wuda ɗa wawa ntsu diga e ekere a n'yuwatan n tsu, a̱yi ɗa waru u wawa ntsu diga e ekere a aza a Filistiya. Amma gogo gba a̱yi ɗa nda u sumai u lyawai iɗa'a adama u la'a e ekere a Absalom. 10 Absalom na tsu tsuwa̱n yi mani'in adama wo o'wo mogono ma̱ tsu ma̱ kuwa̱ ta̱ a̱tsuma̱ o uvon. Gogo adama a̱ nye a ɗa babu za na a yuwusan adanshi a na a̱a̱ ka̱mbuwa̱ mogono Dawuda?>>

11 Ana mogono Da̱wuda uwwai alabari a adanshi a na ama a Isra'ila aa dansa, a̱vu u lyungu ni ikaka uba̱ta̱ wa Saduku na̱ Abiyata nan ganu a̱vu u damma le, <<Ecee numu mbara ma Yahuda, <Adama a̱ nye a ɗa wo o'wo a̱za̱ o ukosu a na ya̱a̱ ka̱mba̱to mogono o ukobu u tsugono tsa̱ yi, adama a na ili i na a dammai suru a̱tsuma̱ a Isra'ila u rawa ta̱ o ukobu atsuvu o mogono. 12 A̱ɗu muwun ma̱ a̱na̱wun n va̱ n ɗa, lipu va̱ na̱ mpasa n va̱. Adama a̱ nye yoo o'wo a̱za̱ o ukosu a na ya̱a̱ ka̱mba̱to mu mogono?> 13 A̱vu waru i damma Amasa, <Ashe a̱vu lipu va̱ na̱ mpasa n va̱ n ɗa shi? Lyawa A̱sula̱ a ca mu a̱tsuma̱lima̱ lon na̱ vo o'wo yali ya̱ a̱soja a̱ va̱ o una̱ wa Yowab diga gogo hali acina ukosu u wuma wa̱ wu shi.> >>

14 A̱vu Da̱wuda pura̱ okolo a ama a Yahuda suru she damma vuma ta̱. A̱vu a̱ lyunguwa̱a̱ mogono ni ikaka, <<Vu ka̱mba̱ a̱vu na̱ a̱soja a̱ wu suru.>>

15 A̱vu mogono me reme ure adama u ka̱mba̱ Urishelima. Kafu u rawa Uɗolu wa̱ Urudu, ɗaɗa a ama a Yahuda a̱ ta̱wa̱i Gilga adama a ga'aton yi a pasa Uɗolu wa̱ Urudu oɓolo na̱ yi. 16 Shimeyi ulobo wa Gera vuma va Banyami diga a̱ lyuci va Bahurim jika̱ ta̱ ucipa̱ o Uɗolu wa̱ Urudu oɓolo na ama a Yahuda adama u ga'aton Mogono Da̱wuda.* 17 Shimeyi ta̱wa̱ ta̱ oɓolo na ali a Banyami ukpakukupa (1,000) na̱ Ziba aagbashi a Shawulu oɓolo no olobo a̱yi gendu na̱ agbashi ushin. A̱vu suru a̱ jika̱ a̱ 'ya̱wa̱ o Uɗolu wa̱ Urudu adama a na a ga'asan na̱ mogono. 18 A̱vu a pasa nu upasata wu uɗolu'u adama a̱ ka̱ra̱ a̱ ka̱mba̱to mogono nu u'wa wa̱ yi, waru a yuwan ili i na u cigai.

A mantsa ma na mogono mo foɓoi a na waa pasa, a̱vu Shimeyi ulobo wa Gera ta̱wa̱ u von ma̱kpa̱ɓa̱ e iɗa elime a̱yi. 19 A̱vu u damma mogono, <<N ta patishi wu zagbain va̱ mogono she vu ɓana unusu u va̱ a̱tsuma̱ o okolo a̱ wu wan. She vu cuwan nu unusu u na n yuwusaan nuwu a mantsa ma na vu sumai diga Urishelima wan. She vu zuwa yi o okolo wan ko ke'en. 20 Adama a na a̱mu aagbashi a̱ wu n reve ta̱ a na n yuwaan nuwu unusu. Agba apa a̱mu nda ana'an n ta̱wa̱i za vu ufaru vu u'wa wa̱ Isuhu na akapi a ama a Isra'ila adama n ga'an na̱ zagbain va̱ mogono.>>

21 A̱vu Abishai ulobo wa Zeruya usu u damma, <<Wuntsa ta̱ o una Shimeyi adama a na u yuwan wu ta̱ una̱ a̱vu na A̱sulazuva a̱ tsuwa̱a̱n yi mani'in.>>

22 Amma a̱vu Da̱wuda usu, <<Nye i bura nɗu na̱ a̱mu, a̱ɗu olobo a Zeruya? I ciga ta̱ a na yo o'o n'yuwatan n va̱ ana'an? Gogo n reve ta̱ a na a̱mu ɗa mogono ma Isra'ila, waru babu vuma va Isra'ila n na o una ana'an.>>

23 A̱vu mogono ma damma Shimeyi, <<N kucina wu ta̱ o una wu shi.>>

24 Mefiboshe mawun ma tsukaya ma Shawulu fo cipa̱ ta̱ adama u ga'an na̱ mogono Da̱wuda. Mefiboshe shi u sa'a ana a̱yi shi, waru u shi u puna ntsuka̱ ma̱ yi shi, ko wu za̱'wa̱ a̱tugu a̱yi shi, diga urana u na mogono ma sumai hali mantsa ma na u ka̱mba̱i na asuvu nden.* 25 A mantsa ma na u rawai diga Urishelima adama u ga'aton mogono, a̱vu mogono me ece yi, <<Mefiboshe, adama a̱ nye vu 'yuwain a̱ kuru mu?>>

26 A̱vu u usu, <<Zagbain va̱ mogono, a̱mu a̱kutsuma̱ a ɗa. Aagbashi a̱ va̱ Ziba ɗa luluma̱ na̱ mu, adama a na n damma ta̱, <Foɓo mu mololi adama a na mo toni mogono,> amma a̱vu a̱yi u tara mololi u ka̱ra̱ u lyawa mu. 27 Amma u lungusa̱ ta̱ ala a aagbashi a̱ wu e ekere a zagbain va̱ mogono. Zagbain va̱ ta̱ tsa malingata ma̱ A̱sula̱, adama o ndolo vu yuwan na̱ a̱mu ili i na ve enei u lobono nuwu. 28 Amma na amayun ama o u'wa dada va̱ suru, wu ntsa ta̱ a̱ kuwa̱ diga e ekere a zagbain va̱ mogono, agba a̱vu vu ca ta̱ aagbashi a̱ wu uba̱ta̱ oɓolo na aza a na aa lyuwusa a apada a̱ wu. Adama o ndolo ucira u ne n ri na̱ a̱yi a na ma̱a̱ da̱shi yuwan ipati a̱ tyo e ekere o mogono?>>

29 A̱vu mogono ma usu yi, <<Adama a̱ nye va̱a̱ da̱shi yuwan adanshi waru? N damma ta̱ ɗe a̱vu na̱ Ziba i ne'eshen iɗa'a.>>

30 A̱vu Mefiboshe usu mogono, <<Lyawa Ziba o'wo ni ili biti, a na wo o'woi zagbain va̱ mogono ma rawai o u'wa na asuvu nden.>>

31 Reve fo Bazilai vuma va Giliyadu cipa̱ diga Rogelim adama u shewun mogono a pasa Uɗolu wa̱ Urudu.* 32 Bazilai gba aabara a ɗa lon, vuma ɗa na da̱na̱i na a'wan kupakunla̱. U kamba ta̱ mogono na̱ a̱soja a̱yi ni ilyalya a mantsa ma na a̱ da̱na̱i Mahanayim na̱ nden, adama a na u shi ta̱ nu utsuru lon. 33 A̱vu mogono ma damma Bazilai, <<Pasa oɓolo na̱ a̱mu a̱ tyo Urishelima, n ta̱ gba a kamba a̱ wu ni ili i na vu cigai ɗe.>>

34 Amma a̱vu Bazilai usu yi u damma, <<A'wan a yan a ɗa a buwa numu a wuma u va̱ a na maa gawan oɓolo na̱ mogono a̱ tyo Urishelima? 35 Gogo a̱mu ɗa nda a'wan kupakunla̱. N ta gura reve ili i na i ri ulobonu ni ili i na i ri ulobonu shi? Aagbashi a̱ wu a ta gura reve uyo'o wi ili i na u lyuwai ni ili i na u sowoi? N ta̱ da̱shi gura uwwa uɗyo wa ashipi wa ama ali na̱ a̱ma̱ci? Adama a̱ nye aagbashi a̱ wu oo o'wo uda̱shiyi wa addama e ekere a zagbain va̱ mogono? 36 Mogono, aagbashi a̱ wu a ta pasa Uɗolu wa̱ Urudu oɓolo na̱ a̱vu, reve n da̱shi dasu wa wu wa'a. Amma nye zuwai mogono ma tsupa mu na̱ cu'un va atsupu a nda? 37 Yuwan ankuri lyawa aagbashi a̱ wu a̱ ka̱mba̱ adama n kuwa̱ a̱ lyuci va̱ zuzu na aason wa a mma va̱ na̱ dada va̱. Agba apa aagbashi a̱ wu Kimham lyawa u pasa u ka̱ra̱ oɓolo na̱ zagbain va̱ mogono. Waru vu yuwan na̱ a̱yi ili i na ve enei u lobono nuwu.>>

38 A̱vu mogono ma damma, <<Kimham ta pasa oɓolo na̱ a̱mu, waru n ta yuwaan yi ili i na suru vu cigai. Waru ili i na suru vu cigai e ekere a̱ va̱ n ta yuwaan wu.>>

39 Ɗaɗa Da̱wuda oɓolo na ama'a suru a pasai Uɗolu wa̱ Urudu. Reve mogono ma katala Bazilai a̱vu u zuwaa yi aba'un, a̱vu Bazilai ka̱mba̱ o u'wa wa̱ yi.

40 A matsan ma na mogono ma pasai, waru a̱soja a Yahuda na akapi a̱soja a Isra'ila a̱ shewun yi ta̱, reve Da̱wuda ka̱ra̱ a̱ tyo Gilga, waru Kimham ka̱ra̱ ta̱ oɓolo na̱ a̱yi.

41 A̱vu ama a Isra'ila suru a̱ ta̱wusa̱ uba̱ta̱ u mogono a̱vu a damma yi, <<Wuma wa̱ wu ujima, adama a̱ nye a̱za̱ a̱ tsu, ama a Yahuda e iva̱ na̱ wu, reve apasa oɓolo na̱ a̱vu, nu u'wa wa̱ wu, oɓolo na ama a̱ wu a̱ tyo wu upasu u mavada mo Uɗolu wa̱ Urudu?>>

42 A̱vu ama a Yahuda suru a̱ usu ama a Isra'ila, <<Ili i na i zuwai tsu yuwain ne a̱ yi ɗa, adama a na mogono imaci i zuzu i tsu i ɗa. Adama a̱ nye i ri o upan adama o ndolo? Tsu lyuwa ta̱ ili i ro a̱tsuma̱ e ilyalya i mogono? Ko u ca tsu ta̱ une'e u ro?>>

43 A̱vu ama a Isra'ila a̱ usu ama a Yahuda, <<Tsu ta̱ na̱ gundo kupa a̱tsuma̱ a Isra'ila, waru a̱ɗu za ta̱ ɗa. Adama o ndolo tsu ta̱ nu ucira ba̱ta̱ kupa a na tsa damma Da̱wuda mogono ma̱ tsu ma ɗa, a na a̱ɗu ya damma ne. To, adama a̱ nye ya̱ ka̱lyuwusa̱ tsu ne esu a vama? Tsu reve ta̱ na amayun a̱tsu ɗa tsu fara yuwain adanshi a na tsa̱a̱ ka̱mba̱to mogono Da̱wuda a̱tsuma̱ a̱ Urishelima a na wo o'wiso mogono ma̱ a̱tsu.>>

Agba ama a Yahuda a̱ usu ta̱ nu usuɗuwu u na u la'ai akapi o gundo wa aza a Isra'ila.