1 Apa nda a adanshi o ukosu wi ishipa ya̱ Da̱wuda a na u ɗanai:

<<Ikaka ya̱ Da̱wuda ulobo wa̱ Yese,

ikaka i vuma na Mogono ma̱ A̱sulazuva ma cayi tsugbain,

vuma na A̱sula̱ a Yakubu a̱ tsuwa̱a̱n yi mani'in a na wo o mogono,

ma̱dobiya me ishipa yu uyo'o ma Isra'ila.

2 <<Ruhu va̱ A̱sulazuva yuwan ta̱ adanshi o una̱ u va̱,

adanshi a̱yi a̱ ta̱ e elentsu a̱ va̱.

3 A̱sula̱ a Isra'ila a yuwan ta̱ adanshi,

Aatali o upa'atan wa Isra'ila a damma mu ta̱,

<Mantsa ma na vuma ri a yuwusan tsugbain tsa ama a̱tsuma̱ a̱ a̱ɓula̱,

na̱ waa yuwusan tsugbain a̱tsuma̱ o wovon wa̱ A̱sula̱,

4 u ta̱ tse ekan yu urana a̱ mota̱a̱,

tse ekan yu usana babu eleshe,

tse ekan a mantsa ma na o kotoi iro'i,

na tsu zuwa anlya o uta̱ e iɗa.>

5 <<Na amayun, u'wa u va̱ u ri na aba'un A̱sula̱ shi?

Adama a na u yuwaan mu ta̱ akucunu a na a̱ ri nu ukosu shi,

ekere e ili biti na̱ mapari uba̱ta̱ suru.

Na amayun ili i ro yi lo shi u ta zuwa mu n tsura̱ ulyuwu we elime,

reve waru u ca mu ili i na n cigai suru.

6 Amma a ama a vama suru a tawa le ta̱ tsa̱a̱ awanda,

aza a na a̱ tsu ɓoloto ne e ekere shi.

7 Amma suru za na a̱ ju'wa̱n awanda,

u tsu yuwan ta̱ ulinga na̱ sheburu ko ibata,

a̱ tsu kula̱to le ta̱ uba̱ta̱ u na a̱ ri nven.>>

8 Apa ala a nan a̱soja a̱ Da̱wuda a na a la'a gurai uvon, Yoshe Bashebe vuma va Takemon, a̱yi ɗa u shi yali ya̱ a̱soja a ta'atsu, u 'ya̱sa̱n ta̱ ibata ya̱ yi wu una ama ukpakukunla̱ (800) a mantsa ma̱ ta̱.

9 Za va ire a̱tsuma̱ a na nan yali ya̱ a̱soja a ta'atsu o ndolo a̱yi ɗa Eliyaza ulobo wa̱ Dodo va Ahohi. U da̱na̱ ta̱ oɓolo na̱ Da̱wuda a̱tsuma̱ aza a na a yuwusan yi aza a Filistiya ulamu a mantsa ma na o ɓolotoi a̱tsuma̱ a Pas Damim adama o uvon. A̱vu ama a Isra'ila a suma. 10 Amma wi isawan ta̱ nu ukadu a̱vu wu ga̱la̱ aza a Filistiya hali she na ukere wa̱ yi u kaɓai a matsun me pe'eni ma̱ yi. A̱sulazuva a̱ ta̱wa̱a̱ ta̱ nu ulyuwu wa aci lon o urana u ndolo. Oɓolo a̱ a̱soja a Isra'ila a vadala ta̱ a̱ tyo ya Eliyaza, adama a̱ pura̱ itana ya a aza na o unai.

11 Za va ta'atsu a̱tsuma̱ a na nan yali ya̱ a̱soja a ta'atsu o ndolo a̱yi ɗa Shama ulobo wa Age vuma va Harari. Mantsa ma na aza a Filistiya o ɓolotoi uba̱ta̱ uta̱ a̱tsuma̱ a̱ lyuci va Lehi o uɗuma̱ u na u ri na aluba e nre'on, a̱vu a̱soja a Isra'ila a sumaa le. 12 Amma Shama isawan ta̱ nu ukadu o uɗuma̱'a̱. U geshe yi ta̱ a̱vu wu una aza a Filistiya. A̱sulazuva gba a ca le ta̱ ulyuwu wa aci u gbain.

13 Urana u ro a mantsa me ikani, ama a ta'atsu diga a̱tsuma̱ a̱soja mata'atsu a̱ Da̱wuda a̱ 'ya̱wa̱ ta̱ uba̱ta̱ wa̱ yi a̱tsuma̱ a̱ a̱ba̱nu a Adulam. Oɓolo a̱soja aza a Filistiya a gba a̱ va̱la̱ ta̱ o Uka̱ri wa aza a Refaya. 14 A mantsa mo ndolo Da̱wuda da̱na̱ ta̱ pe uba̱ta̱ o upa'atan. Oɓolo a̱ a̱soja a Filistiya waru a̱ da̱na̱ ta̱ ɗe Batalami. 15 A̱vu Da̱wuda uwwa akuli a̱ mini a̱vu u damma, <<O'o, a damma nanza ta̱ tsura̱a̱ mu mini mo oso diga o oko'o a na a̱ ri zuzu nu una̱ntsu wa Batalami!>> 16 Adama o ndolo a̱vu a̱soja a ta'atsu o ndolo a ɓatsa a̱tsuma̱ o oɓolo a̱soja a Filistiya. A̱vu e kene mini a̱tsuma̱ o oko'o a na a̱ ri zuzu nu una̱ntsu wa Batalami a̱vu a tanu yi e tewe Da̱wuda. Amma a̱vu u 'yuwan o sowo mini'i, a̱vu wo oco yi e iɗa tsa̱ kucci e ekere A̱sulazuva. 17 A̱vu u damma, <<A̱sulazuva a paraa mu a na mo sowo ili yaa nda! Mpasa ma aza a na a̱ 'ya̱wa̱i o una̱ u meleshe u wuma u le u ɗa shi?>> Adama o ndolo a̱vu Da̱wuda 'yuwan o sowo mini'i.

Ili i ndolo ɗa a̱soja a ta'atsu o ndolo a yuwain.

18 Abishai gba mawun ma̱ a̱na̱wun ma Yowab za na mma le ɗa Zeruya, ɗa da̱na̱i yali ya̱ a̱soja mata'atsu.* U ya̱sa̱n ta̱ ibata ya̱ yi a̱vu wu una a̱soja ukpakuta'atsu (300). Adama o ndolo a̱vu e reve na̱ a̱yi tsa ama a ta'atsu o ndolo. 19 U la'a ta̱ ama a ta'atsu o ndolo tsugbain. A̱vu wo o'wo yali i le, ko na o ɓolo niyi a̱tsuma̱ e le shi.

20 Benaya ulobo wa Jehoyida vuma ɗa na gurai uvon lon diga a̱ lyuci va Kabuzeye, u yuwan ta̱ linga gbagbain. Wu una ta̱ ama a Mowa ejere aza a na a gurai uvon lon. Urana u ro a mantsa mo uta̱nu* a̱vu u cipa̱ a̱ a̱a̱ka̱ri o ro wu una kamu. 21 Wu una ta̱ vuma ro va Masar na da̱na̱i mgbain. Agba vuma va Masar'm u da̱na̱ ta̱ uɓa̱nu ni ibata o ukere wa̱ yi. Amma Benaya zura̱ yi ta̱ na aɗanga. A̱vu u usa ibata'a o ukere u vuma va Masar'm a̱vu wu una yi na̱ a̱yi. 22 Ele nda ele ɗa ili i na Benaya ulobo wa Jehoyida yuwain, a̱yi fo e reve ta̱ na̱ a̱yi tsa nan yali ya̱ a̱soja a ta'atsu o ndolo. 23 U tsura̱ ta̱ tsugbain tsa na tsa la'ai a̱soja mata'atsu o ndolo, ko na o ɓolo niyi a̱tsuma̱ a̱soja a ta'atsu'u shi. A̱vu Da̱wuda zuwa yi wo o'wo zagbain va̱ a̱za̱ e ipiri ya̱ yi.

24 Ama a nda a̱ da̱na̱ ta̱ a̱tsuma̱ a̱soja mata'atsu a̱ Da̱wuda:

Asahe mawun ma̱ a̱na̱wun ma̱ Yowab

na̱ Elhanan ulobo wa̱ Dodo va Batalami

25 na̱ Shama va Haro

na̱ Elika va Haro

26 na̱ Helez va Palti

na̱ Ira ulobo wa Ikesh va Tekowa

27 na̱ Abiyeza va Anato

na̱ Mebunai va Husha

28 na̱ Zalumo va Ahohi

na̱ Maharai va Netofa

29 na̱ Hele ulobo wa Ba'ana va Netofa

na̱ Itai ulobo wa Ribai za va Gibiya a̱tsuma̱ o gundo wa Banyami

30 na̱ Benaya va Piraton

na̱ Hidai na uta̱i diga a̱ ka̱ri va Ga'ash

31 na̱ Abiyalbon va Arba

na̱ Azimawe va Bahurim

32,33 na̱ Eliyabu va Sha'albon

na̱ olobo a Yashen

na̱ Jonata ulobo wa Shama va Harari

na̱ Ahiya ulobo wa Shara va Harari

34 na̱ Elifele ulobo wa Ahasbai va Ma'aka

na̱ Eliyam ulobo wa Ahitofe va̱ Gilo

35 na̱ Hezro va Kame

na̱ Pa'arai va Arba

36 na̱ Iga ulobo wa Natan va̱ Zoba

na̱ Bani va Gadu

37 na̱ Zele va Amon

na̱ Naharai va Biyaro, za na tsu guzusa̱a̱ Yowab ulobo wa Zeruya itana yu uvon

38 na̱ Ira na̱ Gare ama a Itiri

39 na̱ Uriya vuma va Hitiya.

Ele nda ele ɗa a̱soja mata'atsu na̱ a̱za̱ e cindere suru suru.