1 Gundo va Isra'ila suru a̱ ta̱wa̱ ta̱ uba̱ta̱ wa̱ Da̱wuda a̱tsuma̱ a̱ Heburon reve a damma, <<A̱tsu lipu va̱ wu ɗa na̱ mpasa ma̱ wu. 2 Ɗe na̱ a̱ca̱pa̱, ana Shawulu yuwusain tsugono tsa̱ tsu, a̱vu ɗa za na ronusoi aza a Isra'ila aɗanga uba̱ta̱ o uvon. Waru A̱sulazuva a damma wu ta̱, <A̱vu ɗa voo o'wo za va aguɓa va ama a̱ va̱ aza a Isra'ila, waru vu to o'wo le zagbain.> >>

3 Ana mbara ma Isra'ila suru n ta̱wa̱i uba̱ta̱ u mogono Da̱wuda a̱tsuma̱ a̱ Heburon, a̱vu u yuwan nzuwulai ne ele a̱ ma̱ka̱ka̱n ma̱ A̱sulazuva ɗe Heburon, ɗaɗa a̱ tsuwa̱yin Da̱wuda mani'in wo o'wo mogono ma Isra'ila. 4 Da̱wuda da̱na̱ ta̱ na a'wan mata'atsu a na wo o'woi mogono, reve u yuwan tsugono aꞌwan amunga.* 5 A̱tsuma̱ a̱ Heburon u yuwan ta̱ tsugono tsa Yahuda a'wan e cindere na̱ woto ta̱li, a̱vu fo u yuwan tsugono tsa Isra'ila suru na aza a Yahuda a̱tsuma̱ a̱ Urishelima a'wan mata'atsu na aza a ta'atsu.

6 Mogono Da̱wuda oɓolo na ali o uvon a̱ yi a̱ tyo ta̱ Urishelima adama a̱ riya̱a̱ aza a Jebusiya a na a̱ da̱na̱i ɗe na̱ nden nu uvon. A̱vu aza a Jebusiya a damma Da̱wuda, <<Vaa uwa pa shi, ko nrumba̱ na̱ a̱kutsuma̱ a rawa ta̱ o lo wu.>> A jiyan ta̱, <<Da̱wuda aa gura uwa pa shi.>>* 7 Ko na̱ ne, Da̱wuda lyuwa ta̱ lyuci na ri uka̱nda̱ruwu nu ukari wa̱ Sihiyona nu uvon, za na a̱ tsu ɗe gogo Lyuci va̱ Da̱wuda.

8 O urana u ndolo, Da̱wuda damma ta̱ ali a̱ yi, <<Za na suru cigai lyuwa aza a Jebusiya nu uvon u ciga u 'yuwan u kuru nu uyene u mini. Ne ɗa ya̱ riya̱a̱ <nrumba̱ na̱ a̱kutsuma̱,> a̱soja a na o o'woi n'yuwatan ma̱ Da̱wuda.>> A̱yi ɗa i zuwai a tsu damma, <<A̱kutsuma̱ na̱ nrumba̱ aa uwa o ukobu u mogono shi.>>

9 Da̱wuda gba lyuwa ta̱ lyuci vu uɓaɓu wu ucira reve u da̱nu pe, a̱vu u ca yi aala Lyuci va̱ Da̱wuda. A̱vu u yuwisan yisuwishi u da̱shi uɓaɓu'u suru ucira a̱ka̱nda̱ruwa̱. U teme ta̱ diga upasu wa aagaɗi a alanga a uwa pe a̱tsuma̱. 10 A̱vu Da̱wuda da̱shishi ucira lon, adama a na A̱sulazuva A̱sula̱ o oɓolo a̱ a̱soja a zuva a̱ da̱na̱ ta̱ oɓolo na̱ a̱yi.

11 Reve Hiram mogono ma Taya ma̱a̱ lyunguwa̱a̱ Da̱wuda nlingata, na akpata a ɗanga va sida, na̱ a̱za̱ o ulinga wa akpata, na̱ a̱za̱ o usaa na atali, a̱vu a suwaa Da̱wuda ukobu u tsugono. 12 A̱vu Da̱wuda reve a na A̱sulazuva a ɗa a̱ shuwa̱i tsugono tsa̱ yi e ekere a aza a Isra'ila, waru u ca ta̱ tsugono tsa̱ yi tsugbain adama a ama a̱ yi aza a Isra'ila.

13 Ana Da̱wuda lyawai Heburon u ka̱ra̱i a̱ tyo Urishelima na̱ nden, u zuwisa ta̱ a̱ma̱ci a̱vu u tarisa a̱ma̱ci a̱ nge'en, a̱vu a̱ da̱shi matsaan yi muwun mo olobo ne esheli. 14 Nda ala o olobo a na a matsayin Da̱wuda ɗe Urishelima: Shamuwa na̱ Shoba na̱ Natan na̱ Sulemanu 15 na̱ Ibha na̱ Elishuwa na̱ Nefe na̱ Yafiya 16 na̱ Elishama na̱ Eliyada na̱ Elifele.

17 Mantsa ma na aza a Filistiya a uwwai a na a̱ tsuwa̱a̱n ta̱ Da̱wuda mani'in wo o'wo mogono ma Isra'ila, a̱vu a̱soja a Filistiya suru o uta̱ a gawan nu ucira e izami ya̱ Da̱wuda. Agba a na Da̱wuda uwwai, a̱vu u ka̱ra̱ a̱ tyo a̱ lyuci vu uɓaɓu wu ucira'a. 18 Aza a Filistiya gba a̱ ta̱wa̱ ta̱ a baza aciyele o Uka̱ri wa aza a Refaya. 19 Reve Da̱wuda ece A̱sulazuva, <<N 'ya̱wa̱ n yuwan uvon na aza a Filistiya? Vu ta ca le o ukere u va̱?>>

Reve A̱sulazuva a̱ usu yi, <<'Ya̱wa̱, n ta ca aza a Filistiya e ekere a̱ wu na amayun.>>

20 A̱vu Da̱wuda 'ya̱wa̱ Ba'al Ferazim, ɗe ɗa u lyuwai aci a aza a Filistiya. Reve u damma, <<Cine mini mo tsu ɓoso, ne ɗa A̱sulazuva o ɓosoi a aci a n'yuwatan n va̱ e esu a̱ va̱.>> Adama o ndolo a ɗa a̱ ɗeyi uba̱ta̱'a̱ Ba'al Perazim*. 21 A̱vu aza a Filistiya a suma a lyawa a̱ma̱li e le, ɗaɗa Da̱wuda na ali a̱ yi a̱ pura̱ nle.

22 Reve aza a Filistiya a̱ da̱shi gawan a̱vu a baza o Uka̱ri wa aza a Refaya. 23 Reve Da̱wuda ece A̱sulazuva, reve u usu yi, <<She vu 'ya̱wa̱ uba̱ta̱ u le mejege wan, amma vu ka̱nda̱ruwa̱ le nu ucina̱ a̱vu vu riya̱a̱ le nu uvon elime a ɗanga vu jan. 24 Waru mantsa ma na vu uwwai ilama yi mmalu zuva ve eten vu ɗanga vu jan, a̱vu vu jika̱ mmalu, adama a na a̱yi ndolo u to rocosu A̱sulazuva a̱ ta̱ 'ya̱wa̱ elime a̱ wu adama wu ga̱la̱ oɓolo a̱ a̱soja a aza a Filistiya.>> 25 Reve Da̱wuda yuwan cine A̱sulazuva a damma niyi, a̱vu wu ga̱la̱ aza a Filistiya diga Geba a̱ tyo Geza.