1 Da̱wuda da̱shi ta̱ ɓolotowiso ali o uvon a Isra'ila, ukpakukupa mata'atsu (30,000) a na u ɗangulai. 2 A̱vu Da̱wuda 'yon u ka̱ra̱ oɓolo na ali a na a̱ ri oɓolo na̱ a̱yi diga Ba'ala va Yahuda na a̱ tsu ɗe Kiriyat Jeyarim, adama u ta̱wa̱a̱ na Akpati a̱ A̱sula̱, za na a̱ tsu ɗe na aala A̱sulazuva o oɓolo a̱ a̱soja a zuva, za na ri nden e memere me ikerobobi i na i ri zuva va Akpati'i. 3 Reve a zuwa Akpati a̱ A̱sula̱'a̱ e keke sa'avu vi inan* reve a ta̱wa̱ na̱ a̱yi diga o u'wa wa Abinada, za na ri a aagaɗi. 4 Oɓolo na Akpati a nzuwulai a̱ A̱sula̱, a̱vu Ahiyo wala elime. 5 Reve Da̱wuda nu u'wa wa aza a Isra'ila suru a yuwusan uje'en nu ucira u lipu u le a̱ ma̱ka̱ka̱n ma̱ A̱sulazuva, avu a̱ da̱na̱ e ishipa na a wa'asai cu'un vi itana yi wa'ashi aza a na a yuwain na̱ ɗanga fir vi ikumburu ni igaraya na̱ muganga ni iwakacau na̱ mupalu m malapa.

6 Ana a rawai o osoroto a Nakon, reve ina'an a̱ ta̱ɗa̱tsa̱, a̱vu Uza canana ukere wa̱ yi u reme Akpati a̱ A̱sula̱'a̱. 7 A̱vu A̱sulazuva a yuwan upan na̱ Uza lon, adama o unusu o ndolo a ɗa A̱sula̱ a̱ ga̱la̱ niyi a̱vu u kuwa̱ lo zuzu na Akpati a̱ A̱sula̱'a̱.*

8 Reve Da̱wuda yuwan upan adama a na upan wa̱ A̱sulazuva a̱ riya̱i a aci a Uza. Hali a cina ana'an a̱ tsu ɗe ta̱ uba̱ta̱'a̱ Pere Uza.*

9 A̱vu Da̱wuda uwwa wovon wa̱ A̱sulazuva o urana u ndolo, a̱vu u damma, <<Cine tsa ɗa maa zuwa Akpati a̱ A̱sulazuva uba̱ta̱ u va̱?>> 10 Adama o ndolo Da̱wuda usu u tara Akpati a̱ A̱sulazuva oɓolo na̱ a̱yi a̱ tyo a̱tsuma̱ a̱ Lyuci va̱ Da̱wuda shi. Amma a̱vu u tara yi a̱ tyo o u'wa wa̱ Obed Edom vuma va Gat. 11 Reve Akpati a̱ A̱sulazuva o o'wo o u'wa wa̱ Obed Edom vuma va Gat hali woto taꞌatsu, a̱vu A̱sulazuva a zuwaa Obed Edom aba'un oɓolo nu u'wa wa̱ yi suru.*

12 Reve a damma Da̱wuda mogono, <<A̱sulazuva a zuwaa ta̱ u'wa wa̱ Obed Edom ni ili i na u ri na̱ a̱yi suru aba'un, adama a Akpati a̱ A̱sula̱.>> Ɗaɗa Da̱wuda 'ya̱wa̱i u tarai Akpati a̱ A̱sula̱ diga o u'wa wa̱ Obed Edom a̱ tyo Lyuci va̱ Da̱wuda na̱ ma̱za̱nga̱. 13 Mantsa ma na aza a na a tanuyi Akpati a̱ A̱sulazuva a yuwain udasuwu u ta̱li reve e isawan, ɗaɗa Da̱wuda cayi kucci vo ogono a nan na̱ ma̱dindim ma̱ lipu. 14 Da̱wuda wotowu na̱ ma̱tugu ma̱ epo vo okoro, reve u yuwan uje'en nu ucira wa̱ yi suru a̱ ma̱ka̱ka̱n ma̱ A̱sulazuva. 15 Ne ɗa Da̱wuda nu u'wa wa Isra'ila suru a̱ ta̱wa̱i na Akpati a̱ A̱sulazuva na̱ yisali i ma̱za̱nga̱ na̱ wivulu wa avana.

16 Akpati a̱ A̱sulazuva a ma'uwaa a̱ Lyuci va̱ Da̱wuda, reve Mikal usheli wa Shawulu, u ka̱lyuwa̱ nu uba̱ta̱ wu usowoto wu upepu reve we ene Da̱wuda mogono a tsu'yan nu uje'en a̱ ma̱ka̱ka̱n ma̱ A̱sulazuva, a̱vu u goro yi o okolo a̱ yi.

17 A̱vu a̱ ta̱wa̱a̱ na Akpati a̱ A̱sulazuva'a a̱vu a zuwa yi uba̱ta̱ wa̱ yi, a̱tsuma̱ o oogodo a na Da̱wuda foɓoo niyi. Reve Da̱wuda ca ikucci yu ukula̱tosu na̱ kucci muwwulai a̱ tyo e ekere a̱ A̱sulazuva. 18 Mantsa ma na Da̱wuda kotoi ucasu u kucci vu ukula̱tosu na̱ kucci muwwulai'i, reve u zuwaa ama'a aba'un na ala a̱ A̱sulazuva o oɓolo a̱ a̱soja a zuva. 19 A̱vu u ne'eshen iɓolo ya ama a Isra'ila na akpatali o opopofu, na apaɗi a nama no ogbodolu a̱ muwun n ina̱bi o u'yewu za va Isra'ila suru ali na̱ a̱ma̱ci. Reve ama suru e bete'we a̱ ka̱mba̱ a 'wa le.

20 Ana Da̱wuda ka̱mba̱i o u'wa adama u zuwaa u'wa wa̱ yi aba'un, reve Mikal usheli wa Shawulu wu uta̱ u cina yi, reve u damma yi, <<Cine mogono ma Isra'ila ma cayi aciya̱yi tsugbain ana'an, a na u lyawai aciya̱yi ataɓu a̱ ma̱ka̱ka̱n ma agbashi e esheli agbashi a̱ yi, cine vu revei za na lambai wono!>>

21 Reve Da̱wuda usu Mikal u damma, <<A̱ ma̱ka̱ka̱n ma̱ A̱sulazuva ma ɗa n je'ein, za na ɗangwa numu zagbain va ama a̱ A̱sulazuva a aza a Isra'ila o una̱ wa dada va̱ wu nu u'wa wa̱ yi suru. N ta yuwan mere a̱ ma̱ka̱ka̱n ma̱ A̱sulazuva. 22 N ta̱ ka̱mbuwa̱ aciya̱va̱ ili i wono i na i la'ai ili i nda, waru n to o'wo ili i pere e ekere a̱ ɗu. Amma adama a ɗa a agbashi e esheli a na vu yuwain adanshi a aci e le, a ta ca mu tsugbain.>>

23 Adama o ndolo gba Mikal usheli wa Shawulu u tsura̱ limatan shi hali ukwisa̱ wa̱ yi.