1 Apa ili i na i farai a mantsa ma na mogono Shawulu kuwa̱i. Reve Da̱wuda na ama a̱ yi a lyuwa ama a Amaleka nu uvon, a̱vu a̱ ka̱mba̱ Ziklag, a̱vu a̱ da̱nu ɗe hali rana re. 2 O urana wa taꞌatsu, a̱vu vuma ro ta̱wa̱ diga o uva̱la̱ta̱ wu uvon wa Shawulu, itana ya̱ yi wukaru waru na̱ ma̱buta̱ a aaci a̱ yi. Ana u rawai uba̱ta̱ wa̱ Da̱wuda, a̱vu u kingyo u ka̱ɗa̱to urewesu wa̱ yi e iɗa.

3 A̱vu Da̱wuda ece yi u damma, <<A̱ te ɗa vu uta̱i?>>

Reve u damma yi, <<N la'a ta̱ diga o uva̱la̱ta̱ wu uvon wa aza a Isra'ila.>>

4 A̱vu Da̱wuda ece yi, <<Nye i ɗa i farai? Damma mu!>>

Reve vuma'a u usu yi, <<A̱soja a suma ta̱ diga uba̱ta̱ wu uvon, waru na̱ a̱bunda̱ a̱ kuwa̱ ta̱. Shawulu nu ulobo wa̱ yi Jonata fo a̱ kuwa̱ ta̱.>>

5 Reve Da̱wuda damma ulobo u na u ta̱wa̱a̱ niyi nu udammu'u, <<Cine tsa ɗa vu revei a na Shawulu nu ulobo wa̱ yi Jonata a̱ kuwa̱i?>>

6 Reve ulobo'o u usu, <<N shi ta̱ n tsura̱ n kumba ɗe a Masasan ma Gilbowa, reve me ene zagbain Shawulu ugbasatowu e ibata ya̱ yi, ikeke yi ido yu uvon na akumbi e ido yi n'yuwatan n da̱na̱ ta̱ a rawusa zuzu na̱ a̱yi.* 7 Ana u vadaluwai we ene numu, reve u salaa mu, a̱vu n damma, <Mpa mu.>

8 <<Reve we ece mu, <A̱vu ɗa zane?>

<<Reve n usu yi, <A̱mu za va Amaleka ɗa.>

9 <<Reve u damma mu, <Rawa zuzu na̱ a̱mu vu yuwan ankuri vu una mu! Adama a na n ta̱ pe a̱tsuma̱lima̱ lon, agba m buwa ta̱ e ivuwusan.>

10 <<Ɗaɗa n rawai zuzu na̱ a̱yi a̱vu mu una yi, adama a na n reve ta̱ mantsa ma na u riya̱i waa la'a shi.* N foɗo ta̱ okokolo a na a̱ ri a aaci a̱ yi, waru n foɗo ta̱ shingi vu ukere wa̱ yi, a̱vu n ta̱wa̱ ne ele pa nda uba̱ta̱ wa̱ wu zagbain va̱.>>

11 A̱vu Da̱wuda reme itana ya̱ yi reve wu kara le, ne ɗa ama a na a̱ da̱na̱i oɓolo na̱ a̱yi fo suru a yuwain. 12 A̱vu a yuwan nden n wiruta̱ na̱ mesun na akuli hali ulivu adama a Shawulu na̱ Jonata ulobo wa̱ yi, na adama a̱ a̱soja a̱ A̱sulazuva, na adama o u'wa wa Isra'ila, adama a na o una le ta̱ na̱ matsun me pe'eni.

13 Da̱wuda ece ta̱ ulobo u na u ta̱wa̱a̱ niyi nu udammu'u, <<Te ɗa vu uta̱i?>>

Reve u usu, <<A̱mu mawun ma mocin ro ma ɗa, na ri na̱ nden e iɗa i ɗu za va Amaleka.>>

14 Reve Da̱wuda ece yi, <<Nye i ɗa i zuwai vu uwwai wovon u na va̱a̱ 'ya̱sa̱n ukere wa̱ wu vu unai vuma na A̱sulazuva a̱ tsuwa̱yin mani'in shi?>>

15 Ɗaɗa Da̱wuda ɗeyi vuma ta̱ a̱tsuma̱ a ali o uvon a̱ yi a̱vu u damma yi, <<'Ya̱wa̱ vu una yi!>> A̱vu u ga̱la̱ yi hali u kuwa̱. 16 Reve Da̱wuda damma yi, <<Ume wu mpasa ma̱ wu u ta a aaci a̱ wu. Adama a na nu una̱ wa̱ wu u ɗa vu dammai, <A̱mu ɗa mu unai za na A̱sulazuva a̱ tsuwa̱yin mani'in.> >>

17 Reve Da̱wuda cana ishipa ya̱ a̱tsumola̱ngu adama a Shawulu nu ulobo wa̱ yi Jonata. 18 Reve u zuwa o rito ama a Yahuda ishipa ya̱ a̱tsumola̱ngu'u yu utan. A ɗana yi ta̱ a Aatagada a Yasha.*

19 <<Tsugbain tsa̱ wu, a̱vu Isra'ila, o una ta̱ azagbain a̱ wu zuva masasan.

Ama o ucira a̱ wu a̱ riya̱ ta̱!

20 She a ca udammu ɗe lyuci va Gat,

ko e re va Ashikelon wan,

ta̱wa̱ esheli a Filistiya a yuwan ma̱za̱nga̱ wan,

she esheli a aza a na a paɗai uryumbu shi a yuwan mere wan.

21 <<A̱ɗu nsasan ma̱ Gilbowa,

she i da̱shi tsura̱ a'iza ko iro'i wan,

ko a̱ɗuma̱ a̱ ɗu a matsan ishina adama o ucasu wan.

Adama a na ɗe ɗa a̱ lungusa̱i a̱a̱ra̱ga̱ a̱ a̱za̱ o ucira,

a buwa a̱ da̱shi sukuma a̱a̱ra̱ga̱ a Shawulu mani'in shi.

22 <<Diga a mpasa ma aza a na a paɗai,

diga a̱ lipu va̱ a̱za̱ o ucira,

utan wa Jonata u ka̱mba̱ a̱ca̱pa̱ shi,

matsun me pe'eni ma Shawulu ma̱ ka̱mba̱ lya̱nga̱ shi.

23 Shawulu na̱ Jonata

a wuma a ciga le ta̱, waru o roco le ta̱ isa'ani,

waru o ukwisa̱ a kasa shi.

A la'a ta̱ a̱a̱kuru ilaɗi,

waru a la'a ta̱ ikamu ucira.

24 <<A̱ɗu esheli a Isra'ila,

shoyin adama a Shawulu,

za na yuwaan ɗu itana i shili yi ikebe,

za na yuwayin itana i ɗu yikalishi i zinariya.

25 <<Ama o ucira a̱ riya̱ ta̱!

Jonata ta̱ nven ukwa̱ ɗe zuva masasan ma̱ wu.

26 U ɓa̱li mu ta̱ lon adama a̱ wu, mawun ma̱ a̱na̱wun ma̱ va̱ Jonata,

vu da̱na̱ ta̱ zuzu na̱ a̱mu lon.

Icigi ya̱ wu e ekere a̱ va̱ u da̱na̱ ta̱ a̱bunda̱ lon,

u la'a ta̱ icigi yi ka.

27 <<Ama o ucira a̱ riya̱ ta̱!

Itana yu uvon i le waru i la̱nga̱ ta̱!>>