1 A yuwan ta̱ vuma vama ro a Gilga za na a tsu ɗe Sheba ulobo wa Bikiri o ugundo wa Banyami. A̱vu wi ivula̱ aavana ɗaɗa wo oruwoi u dammai,

<<Tsu ri na akunda uba̱ta̱ wa̱ Da̱wuda shi,

tsu ri na agadu e ekere o ulobo wa̱ Yese shi!

A̱ɗu aza a Isra'ila, lyawa tsu ka̱mba̱ yi o ogodo a̱tsu!>>*

2 A̱vu ama a Isra'ila suru a lyawa Da̱wuda, a̱vu a vadala o toni Sheba ulobo wa Bikiri. Amma a̱vu ama a Yahuda a kaɓa mogono me le a̱vu a̱ ka̱ra̱ oɓolo na̱ a̱yi diga o Uɗolu wa̱ Urudu hali a rawa Urishelima.

3 A mantsa ma na Da̱wuda rawai o ukobu wa̱ yi a̱tsuma̱ a̱ Urishelima, a̱vu u pura̱ a̱ma̱ci a̱ nge'en kupa aza a na u shi u lyawai a na a̱a̱ da̱na̱ e idanasa ukobu'u na akapi a linga vu u'wa'a. A̱vu u zuwa le a̱tsuma̱ o u'wa u ro, na aza a na a̱a̱ da̱na̱ a̱ pirishi le. A̱vu u lyuwa elime a kambusa le ni ili i i na a cigai, amma u da̱shi von ne ele waru shi. Ne ɗa a̱ da̱nuyi utakatsuwu hali ukwisa̱ u le, reve a̱ da̱nu tsu nruna̱.*

4 A̱vu mogono ma damma Amasa, <<Ɓoloto wo mu a ama a Yahuda a̱ ta̱wa̱ uba̱ta̱ u va̱ a̱tsuma̱ a rana ta'atsu, a̱vu fo vu ta̱wa̱ oɓolo ne ele.>> 5 Agba a na Amasa 'ya̱wa̱i u ɗe aza a Yahuda, u ka̱ra̱ ta̱ mantsa ma na mogono ma zuwaa niyi.

6 A̱vu Da̱wuda damma Abishai, <<Gogo Sheba ulobo wa Bikiri u ta̱ ta̱wa̱a̱ tsu na̱ a̱tsuma̱lima̱ za na la'ai za va Absalom. Tara a̱soja a̱ va̱ vu saɓa yi, adama ta̱wa̱ u suma a̱ tyo e ilyuci i na a̱ ka̱nda̱ruwa̱i na̱ kari vu ucira a̱vu u la'a tsu.>> 7 A̱vu a ama a̱ Yowab, na aza a Keretiya na aza a Feletiya a̱soja a na a yuwusan ipiri i mogono oɓolo na̱ a̱soja a na a gurai uvon suru a lyawa Urishelima, adama a saɓa Sheba ulobo wa Bikiri.

8 Ana a rawai a aatali a gbain a̱tsuma̱ a Gibiyon, a̱vu Amasa ga'aton le. Yowab gba da̱na̱ ta̱ wotowu ni itana yu uvon ya̱ a̱yi, na̱ gbakala wunlu e ikyun ya̱ yi na̱ matsun me pe'eni a̱tsuma̱ e ibici ya̱ yi. Ana u zura̱i a rawa reve matsun me pe'eni'i mo foɗo e ibici ya̱ yi.

9 A̱vu Yowab damma Amasa, <<Imaci i va̱, cine vu ri?>> A̱vu u reme ntsuka̱ ma Amasa nu ukere u sa'ani wa̱ yi n gashi u ta katala yi. 10 Amasa gba wi indana na̱ matsun me pe'eni ma na ma̱ da̱na̱i o ukere wu ugula̱ wa Yowab shi. Ne ɗa Yowab sapai Amasa na̱ matsun me pe'eni hali itana ya̱ a̱tsuma̱ ya̱ yi yo oco e iɗa. Amasa kuwa̱ ta̱ babu Yowab sapa yi ire.

A̱vu Yowab na̱ mawun ma̱ a̱na̱wun ma̱ yi Abishai a saɓa Sheba ulobo wa Bikiri.

11 Za ta̱ a̱tsuma̱ a̱ a̱soja a Yowab isawan ta̱ zuzu na̱ lipu va Amasa a̱vu u damma, <<Suru za na ri o ucina̱ wa Yowab na̱ Da̱wuda, lyawa u toni Yowab!>> 12 Lipu va Amasa gba da̱na̱ ta̱ nven ulakatu na̱ mpasa e memere mo ure. Reve gba a na vuma'a we enei cine ama a̱ ta̱ra̱nusu e isawusan a̱ka̱nla̱, reve u tawa yi e memere mo ure'e a̱ tyo a atsusa, a̱vu wu pala yi nu umuna. 13 Ana vuma'a u tawai lipu va Amasa diga o ure, ama suru a̱ kuru ta̱ Yowab a saɓa Sheba ulobo wa Bikiri.

14 Sheba kuru ta̱ gundo va aza a Isra'ila suru a̱ tyo a̱ lyuci va Abel Bet Ma'aka na̱ o utula̱i upasu wa aza a Beri suru, aza a na o ɓolotoi reve a̱ kuru yi. 15 A̱vu Yowab oɓolo na̱ a̱soja a̱ yi a̱ ta̱wa̱ a̱ ka̱nda̱ruwa̱ Sheba a̱tsuma̱ a Abel Bet Ma'aka nu uvon. Reve o ɓolotowo ukari'i a̱jili una̱ta̱ nu uga'an wa̱ yi adama a kumba adama o uvon. Waru a̱soja Yowab suru a̱ da̱na̱ ta̱ o mpolo wu uɓosu wu ukari u lyuci'i.

16 A̱vu ka ro za vu ugbozu pe a̱tsuma̱ a̱ lyuci'i u sala u damma, <<Uwai nda! Uwai nda! Dammai Yowab u ta̱wa̱, n ciga ta̱ n yuwan adanshi na̱ a̱yi.>> 17 A̱vu Yowab ta̱wa̱, a̱vu ka'a we ece yi, <<A̱vu ɗa Yowab?>>

A̱vu usu yi, <<A̱mu ɗa.>>

A̱vu ka'a u damma yi, <<Vu zuwa atsuvu vu uwwa ili i na aagbashi a̱ wu a damma.>>

A̱vu Yowab usu yi, <<N ta uwwusa wu.>>

18 A̱vu ka'a u damma, <<Ɗe nu ujumu ama a tsu damma ta̱, <A̱ 'ya̱wa̱ a̱ lyuci va Abel adama a na a zamiyi a̱sa̱la̱ a sa'ani adama e ili i na yaa damatosun le.> Ne ɗa waru adanshi'i u tsu koto. 19 Lyuci tsu lyuci gbain ɗa na a̱ ri a̱ nden lafiya na̱ a̱za̱ a̱ a̱ɓula̱ a̱tsuma̱ a Isra'ila. Nye i zuwai vu cigai a na voo kototo yi? Nye i zuwai vu cigai vu ta'asa agadu a̱ A̱sulazuva?>>

20 A̱vu Yowab usu u damma, <<A̱sulazuva a para a mu! Ko ke'en! Moo kototo yi ko n ta'asa lyuci ɗu shi! 21 Ifoɓi i tsu i ɗa o ndolo'o shi. Vuma na a̱ tsu ɗe Sheba ulobo wa Bikiri diga e iɗa ya agaɗi ya Ifiramu u 'ya̱sa̱a̱n ta̱ mogono Da̱wuda aci. Ta̱wa̱ na̱ vuma ta̱ nda'a, a̱mu gba n ta lyawa lyuci'i.>>

A̱vu ka'a u damma Yowab, <<To, a ta variya wu aaci a̱yi nu ukari u lyuci'i.>>

22 Reve ka'a u kuru ama a̱ lyuci'i suru na̱ a̱sa̱la̱ o ugbozu wa̱ yi, a̱vu o koɗo aaci a Sheba ulobo wa Bikiri reve a variya Yowab a̱yi. Ɗaɗa Yowab ivula̱i aavana, a̱vu a̱soja a̱yi e bete'we a lyawa lyuci'i, za suru ka̱mba̱ o u'wa wa̱ yi. Reve Yowab ka̱mba̱ uba̱ta̱ u mogono a̱tsuma̱ a̱ Urishelima.

23 Yowab ɗa da̱na̱i yali ya̱ a̱soja a Isra'ila suru. Benaya ulobo wa Jehoyida a̱yi ɗa u shi zagbain va̱ a̱soja aza a Keretiya na aza a Feletiya a̱za̱ e ipiri i mogono. 24 Adoniram ɗa za na ee idanasa a̱za̱ o ulinga u tsugbashi, Jehoshafa ulobo wa Ahilu a̱yi ɗa za na tsu ɗanasa ili i na i farai. 25 Shewa ɗa da̱na̱i za vi iɗana, Saduku na̱ Abiyata ɗa da̱na̱i nan ganu. 26 Ira vuma va Jayi da̱na̱ ta̱ ganu va Da̱wuda.