1 Nu udammu wa̱ A̱sulazuva vuma va̱ A̱sula̱ uta̱ ta̱ diga Betel u ta̱wa̱ Yahuda, a mantsa ma na Yerobowam da̱na̱i lo mishin zuzu na̱ masa'a adama u yuwan kucci. 2 Reve u 'ya̱sa̱n uɗyo wa̱ yi u damma adanshi a̱ A̱sulazuva a aci a masa'a, u damma, <<Masa'a, masa'a! Apa nda ili i na A̱sulazuva a dammai: <A ta matsan ulobo u na a̱ tsu ɗe Josaya o u'wa wa̱ Da̱wuda. U ta yuwan kucci na̱ nan ganu a na aa yuwusan kucci uba̱ta̱ wa̱ a̱ga̱nda̱, waru a̱ ta̱ kula̱to etele a ama zuva va̱ wu.> >> 3 A̱tsuma̱ o uranu u ndolo waru vuma va̱ A̱sula̱ ca ta̱ iroci, u damma: <<Apa iroci i na A̱sulazuva a dammai: A ta karalai masa'a reve o oco okomo a na a̱ ri zuva va̱ yi.>> 4 Ana Mogono Yerobowam ma uwwai ili i na vuma va̱ A̱sula̱ saalai a aci a masa'a a̱tsuma̱ a Betel, u canana ta̱ ukere wa̱ yi diga a masa'a a̱vu u damma, <<Reme niyi!>> Agba reve ukere u na u cananai'i u sowo, hali na u gura ka̱mbuwa̱ yi shi. 5 Reve waru a kara masa'a'a a̱vu o oco okomo a̱ yi cine iroci i na vuma va̱ A̱sula̱ dammai nu udammu wa̱ A̱sulazuva. 6 Reve mogono ma damma vuma va̱ A̱sula̱, <<Vu patiya mu A̱sulazuva A̱sula̱ a̱ wu, a̱vu vu yuwaan mu avasa adama u ka̱mba̱to ukere u va̱ gbaga.>> Ɗaɗa vuma va̱ A̱sula̱ patiyi A̱sulazuva adama a̱ yi, reve gba a̱ ka̱mba̱to ukere u mogono gbaga, a̱vu u ka̱mba̱ cine u shi. 7 Reve mogono ma damma vuma va̱ A̱sula̱, << Ta̱wa̱ tsu 'ya̱wa̱ o u'wa oɓolo na̱ a̱mu adama vu tsura̱ ili i na vaa lyuwa, a̱vu n ca wu une'e. >> 8 Amma vuma va̱ A̱sula̱ usu ta̱ mogono u damma, <<Ko na a damma vu shi ta̱ a ca mu uɓatsulai wi ili ya̱ wu, ma̱a̱ 'ya̱wa̱ oɓolo na̱ a̱vu shi, ko gba n lyuwa ilyalya ko n sowo mini pa shi. 9 Adama a na adanshi a̱ A̱sulazuva a damma mu ta̱, <She vu lyuwa ilyalya ko vu sowo mini ko vu ka̱mba̱ nu ure u na vu ta̱wa̱yi wan.> >> 10 Adama o ndolo reve u toni nu ure u ro, u ka̱mba̱ nu ure u na u kuruyi a̱ ta̱wa̱ Betel shi.

11 A mantsa mo ndolo a yuwan ta̱ akuci a vumava̱sula̱ ro na shi na̱ nden a̱tsuma̱ Betel. Reve olobo a̱ yi a̱ ta̱wa̱ a damma yi ili i na vuma va̱ A̱sula̱ yuwain ɗe urana u ndolo suru. Waru a damma ta̱ dada le ili i na u dammai mogono. 12 Reve dada le ece le, <<Ure u ne u ɗa u toniyi?>> Reve olobo a̱ yi a̱ roco yi ure u na vuma va̱ A̱sula̱ diga Yahuda kuruyi a mantsa ma na u lyawai Betel. 13 Ɗaɗa u dammai olobo a̱ yi, <<Zuwaa numu mololi urutsu.>> Reve ana a zuwaa niyi mololi urutsu, a̱vu u kumba. 14 Reve u kuru vuma va̱ A̱sula̱'a̱. A̱vu u cina yi nden e ikyun yu uɗanga u gbain, a̱vu we ece yi, <<A̱vu ɗa vuma va̱ A̱sula̱ na u uta̱i diga Yahuda'a?>> A̱vu u usu, <<A̱mu ɗaɗa.>>

15 Reve vumava̱sula̱'a̱ u dammai, <<Ta̱wa̱ tsu 'ya̱wa̱ o u'wa vu lyuwa ilyalya.>>

16 Amma a̱vu vuma va̱ A̱sula̱ damma, <<Maa vadala n ka̱mba̱ oɓolo na̱ a̱vu shi, waru maa lyuwa ilyalya ko n sowo mini oɓolo na̱ a̱vu uba̱ta̱ u nda shi. 17 Adama a na adanshi a̱ A̱sulazuva a damma mu ta̱: <She vu lyuwa ilyalya ko vu sowo mini ɗe wan ko vu ka̱mba̱a̱ nu ure u na vu ta̱wa̱yi wan.> >> 18 A̱vu akuci a vumava̱sula̱'a̱ u damma, << A̱mu fo vuma va̱ A̱sula̱ ɗa, tsa̱ wu. Reve malingata ma̱ A̱sula̱ ma damma mu adanshi A̱sulazuva, <Ta̱wa̱ oɓolo na̱ yi o u'wa wa̱ wu adama u lyuwa a̱vu u sowo mini.> >> Agba epen a ɗa u yuwan ni yi. 19 Avu vuma va̱ A̱sula̱ u ka̱mba̱ oɓolo na̱ yi a̱vu u lyuwa u sowo o u'wa wa̱ yi.

20 Ele nden alya, a̱vu adanshi A̱sulazuva a̱ ta̱wa̱ uba̱ta̱ wa akuci a vumava̱sula̱ za na ka̱mba̱i na̱ yi. 21 Reve u 'ya̱sa̱n uɗyo wa̱ yi u damma vuma va̱ A̱sula̱ na ta̱wa̱i diga Yahuda, << Nda ili i na A̱sulazuva a dammai: < Vu yuwan ta̱ ulambu wa̱ a̱ɓula̱ na adanshi A̱sulazuva agba vu yuwan tsutoni na̱ wila̱ u na A̱sulazuva a̱ A̱sula̱ a̱ wu a ca nu wu shi. 22 Vu ka̱mba̱ ta̱ a̱vu vu lyuwa vu sowo mini uba̱ta̱ una u damma nuwu she vu lyuwa ko vu sowo mini wan. Adama ndolo a̱ ciɗo lipu va̱ wu oso nkaya ma̱ wu shi.> >>

23 Ana vuma va̱ A̱sula̱ diga Yahuda kotoi alya na̱ oso, a̱vu akuci a vumava̱sula̱ na ta̱wa̱i na̱ yi foɓo yi mololi ma̱ yi. 24 Ana u ka̱ra̱i, a̱vu uga'an na̱ kamu o ure reve wu unai, a̱vu a vari lipu va̱ yi lo o ure, na̱ mololi na̱ kamu mishin e ege'en ya̱ yi. 25 Aza a na a̱ da̱na̱i mmalu ene ta̱ lipu va̱ yi u vari yi lo, oɓolo na̱ kamu mishin ege'en n lipu va̱ yi, a̱vu a̱ 'ya̱wa̱ adamma a̱tsuma̱ a̱ lyuci na akuci a vumava̱sula̱ a̱ ri.

26 Ana akuci a vumava̱sula̱ za na ta̱wa̱i na̱ yi wu uwwai, reve u damma, << Vuma va̱ A̱sula̱ ɗa za na yuwain ulambu wa̱ a̱ɓula̱ na adanshi A̱sulazuva. Ɗaɗa A̱sulazuva a ca niyi ekere a kamu, za na kakara ni yi a̱vu wu unai, cine adanshi A̱sulazuva a damma ni yi. >>

27 A̱vu vumava̱sula̱ damma olobo a̱ yi, << Foɓo numu mololi, >> A̱vu a yuwan ne. 28 Reve u 'ya̱wa̱ ucina lipuꞌu u vari o ure, na̱ mololi na̱ kamu mishin ege'en ma̱ yi. Agba kamu u tama lipu'u shi ko wu kara mololi'i shi. 29 A̱vu akuci vumava̱sula̱'a̱ u tara lipu vuma va̱ A̱sula̱'a̱, a̱vu u zuwai a̱ mololi, reve u ka̱mba̱ na̱ yi a̱ lyuci va̱ yi a Betel a̱vu u yuwan a̱tsuma̱la̱ngu adama a̱yi a̱vu u ciɗo yi. 30 A̱vu u ciɗo yi oso ana u suwayi aciya̱ yi, a̱vu ayuwan yi a̱tsuma̱la̱ngu adamma, <<O, mawun ma a̱na̱wun ma̱ va̱!>>

31 Ana a̱ ciɗo ni yi, a̱vu u damma olobo a̱ yi, <<Nnu n kuwa̱, i ciɗo mu oso a na a ciɗo yi vuma va̱ A̱sula̱, i zuwa etele a̱ va̱ zuzu na̱ etele a̱yi. 32 Adama a na ikaka i na u cayi adama adanshi A̱sulazuva a masa'a ma na ma̱ ri ɗe Betel na̱ waru suru uba̱ta̱ wa̱ a̱ga̱nda̱ e ilyuci ya Samariya oto o amayun. >> 33 Ana a̱ yi ndolo kotoi, Yerobowam ka̱mba̱ o ure u mejege shi, amma a̱vu u da̱shi ɗangula nan ganu adama a̱ ba̱ta̱ va̱ a̱ga̱nda̱ diga ama suru. Za na suru cigai wo o ganu a̱vu u tawai adama wo o ganu vu ba̱ta̱ va̱ a̱ga̱nda̱. 34 Ili yo ndolo wo o'wo ta̱ unusu ekere o u'wa wa Yerobowam, a na a ta'asai waru o kototo a̱ yi diga o urewesu wu uvaɗi.