32 Diekye nin-nya suoto lɛyɔɔ di otii kuonwii kukpi kamɛ, SAATE Kplɛ nwu niebuɛ alɛ. Bikyi, biesiɛ nkpa!

21 "Kafɔɔ nse kpiletɛ lekyi di sikpile se simuu atɔɔbla ni suoto, eemufũ sɛsaabla nii simuu eeklee, ɛɛbla kafɔɔ lɛsaa le ninlɛ ku lɛsaa le niesiɛko ni yi, nwaako abasiɛ nkpa; ɔlɔbakpi.

1 SAATE nwu ɔlaa lawa kuatɛɛ alɛ: 2 "Obe oso mintɔɔpɛ lɛkpa le mmle di Israel kasɔ suoto bilɛ:

" ‘Babibate n-le awosobi ya niɛkplakpla nii,

kafɔɔ babi anyɛɛ ninkpakpaa’?

3 "Nwaako lɛnya nkpe ni nkpa, SAATE Kplɛ nwu niebuɛ alɛ, bilɔbasimpɛ lɛkpa le mmle di Israel. 4 Diekye ɔkla biala ninkpe ni nkpa nle mi ole, obi ote ku obi nɔɔ- akyuu lɛma nwu anyɔ bale mi bale. Ɔkla wɔ nimbla ni okpile ninle nwɔ nimakpi nii.

5 "Nse loo otii owo nkpe ate tinini,

ambla ni lɛsaa le ninlɛ ni ku nle niesiɛko ni,

6 ananle alesaa di kobokote nfiofa

ee asumu Israel batii afiɔ.

Anntenko owo nɔɔ ɔsɔfɔ

ee atenko ɔsanko di obe wɔ kamɛ ɛɛpɛ ni kɔkpaa kaasɔ.

7 Annyinka otii kuonwii,

kafɔɔ ankplesa lɛsaa le eefũ ɛɛtɛ ni fiɛ ɛɛfɛnsa koto ɛɛta ni anta.

Ammbla kayu asaa,

kafɔɔ an-yɔ alesaa nɔɔ anta otii wɔ di kɔka nkle nii,

anta kafɔɔ mba ninkyɛ ni akyɔtɔ akpeele.

8 Annfɛnsa koto aata otii alɛ ɔɔwɛ lɛsaa ankyakaa,

ee atikasa lɛsaa kpinwu di osi.

Ankpukutisa kɔnɛɛ nɔɔ di ɔtanlolaa ɔbla suoto,

anlolaa kafɔɔ lɛka anka di otii ku otii ntɛɛ.

9 Antikanko sɛsaabla nii,

anklee kafɔɔ afiofa nii di onukwale kanya.

Otii nwu nkpo nte tinini;

nwaako abasiɛ nkpa,

SAATE Kplɛ nwu niebuɛ.

10 "Nse loo akpe obisuɔtɔbi wɔ ninkpee ni kudu, an-wii ni ntɔ kaasɔ ee ambla ni asaa ya mmle bamba lele, 11 (kuntɛ ote diɛbla kuninwii ninya):

"Anle alesaa di kobokote nfiofa.

Antenko owo nɔɔ ɔsɔfɔ.

12 An-nyinka bapiitɛ ku mba diefĩ nii.

Ambla kayu asaa.

Annkplesa lɛsaa le eefũ ɛɛtɛ ni fiɛ ɛɛfɛnsa koto ɛɛta ni aata.

Afiɔ ansumu.

Ayududusaa ambla.

13 Anfɛnsa koto anta otii anwɛ lɛsaa ankyakaa, antikasa kafɔɔ lɛsaa kpinwu di osi.

Otii wɔ mmle okle kaasiɛ nkpa? Alaasiɛ! Ta ayududusaa ya mmle amuu atɔɔbla ni oso yi, nwaako babalo nwɔ, ntɔ nɔɔ kafɔɔ kamatika di nnwɔɔ omu nɔɔ disi.

14 "Kafɔɔ nse loo obisuɔtɔbi wɔ mmle nkpe obisuɔtɔbi wɔ nin-nya ni sikpile se simuu di ote kɔbla nii, kuntɛ ɔɔnya nya yi, nnwɔɔ ambla asaa nwu okle:

15 "Annle alesaa di kobokote nfiofa,

ee asumu Israel leyo afiɔ.

Anntenko owo nɔɔ ɔsɔfɔ.

16 Annyinka otii kuonwii

ee afũ lɛsaa atɛ fiɛ aafɛnsa koto aata otii.

Ammbla kayu asaa

kafɔɔ an-yɔ alesaa nɔɔ anta otii wɔ di kɔka nkle nii

anta kafɔɔ batii ba ninkyɛ ni akyɔtɔ akpeele.

17 Ankpukutisa kɔnɛɛ nɔɔ di okpile suoto

Anntikasa koto aata otii alɛ ɔɔwɛ lɛsaa ankyakaa, ee atikasa lɛsaa kpinwu di osi atɔɔ.

Am-mufũ afiofa nii anklee, antikanko kafɔɔ sɛsaabla nii.

Ɔlɔbakpi ata ote okpile; nwaako abasiɛ nkpa. 18 Kafɔɔ ote kamakpi anta nnwɔɔ omu nɔɔ okpile, diekye aabla katafaa asaa, aayu obilɛma, aabla kafɔɔ lɛsaa le ninanlɛ ni di batii nɔɔ kamɛ.

19 "Kafɔɔ biɔkaalɛ bilɛ, ‘Obe oso ninamabuo obi di ote lɛpɔɔ okpi suoto?’ Di obe wɔ di obi nwu lɛbla ni lɛsaa le ninlɛ ku lɛsaa le niesiɛko nii, eelolaa ni kafɔɔ sɛsaabla nii eeklee ni yi, nwaako abasiɛ nkpa. 20 Ɔkla wɔ niɛbla ni okpile ninle nnwɔ nimakpi ni nɛ. Dilɔbabuo obi di ote lɛpɔɔ okpi suoto, ee ote akpi di obi lɛpɔɔ okpi suoto. Babayɔ otii tinini ɔsaabla tinini mantɔɔ, siensientɛ kafɔɔ asiensiesaa kamatika nwɔ di suoto.

21 "Kafɔɔ nse kpiletɛ lekyi di sikpile se simuu atɔɔbla ni suoto, eemufũ sɛsaabla nii simuu eeklee, ɛɛbla kafɔɔ lɛsaa le ninlɛ ku lɛsaa le niesiɛko ni yi, nwaako abasiɛ nkpa; ɔlɔbakpi. 22 Blɔbanyuma ɔtanlolaa ɔbla wɔ aabla ni kuonwii di suoto nɔɔ. Ta asaa tinini ya aabla ni oso yi, abasiɛ nkpa. 23 Ninnya suoto lɛyɔɔ kuninwii di kpiletɛ kukpi kamɛ, SAATE Kplɛ nwu niebuɛ. Kafɔɔ suoto nin-yɔɔ mi nse beekyi di sisuku lɛma bɛɛwɛ nkpa.

24 "Kafɔɔ nse tininitɛ lekyi di ɔsaabla tinini nɔɔ suoto ɛɛbla okpile, ɛɛbla kafɔɔ ayududusaa ya okle di kpiletɛ mbla nii, ɔlɔbasiɛ nkpa. Blɔbanyuma asaa tinini ya aabla ni kuninwii. Abakpi ta onukwale ɔtanle wɔ suoto eekpi ni lɛpɔɔ ku sikpile se ɛɛbla ni oso.

25 "Kafɔɔ biobuɛ bilɛ, ‘SAATE nwu osuku diete tinini.’ Oo Israel leyo, binu: Osuku nii diete tinini? Diele sisuku lee ninante tinini? 26 Nse tininitɛ lekyi di ɔsaabla tinini nɔɔ suoto, ɛɛlaabla okpile yi, abakpi di okpile nwu suoto; abakpi ta okpile wɔ ɛɛbla ni oso. 27 Kafɔɔ nse kpiletɛ lekyi di akpilesaa ya aabla ni suoto, ɛɛbla lɛsaa le ninlɛ ni ku lɛsaa le niesiɛko ni yi, abadiki nkpa nɔɔ. 28 Ta eebu ni disi di ɔtanlolaa ɔbla wɔ omuu aabla ni, eediɛ nya ni ɔbla oso yi, nwaako abasiɛ nkpa; ɔlɔbakpi. 29 Kafɔɔ Israel batii mbuɛ alɛ, ‘SAATE nwu osuku diete tinini.’ Oo Israel batii, sisuku nii diete tinini? Diele sisuku lee ninante tinini?

30 "Nkpo oso, Oo Israel batii, kamakanko ye, otii biala di sisuku nɔɔ kanya, SAATE Kplɛ nwu niebuɛ. Bikyi! Bikyi di ɔtanlolaa ɔbla lee omuu suoto; ni okpile dilɔbapɛ ye kaasɔ. 31 Bidiki suoto lee di ɔtanlolaa ɔbla lee omuu biabla kamɛ, biɛwɛ otu fɔle ku ninwuna fɔle. Oo Israel batii, obe oso bibakpi? 32 Diekye nin-nya suoto lɛyɔɔ di otii kuonwii kukpi kamɛ, SAATE Kplɛ nwu niebuɛ alɛ. Bikyi, biesiɛ nkpa!

7 Ta amumu otii nwu akyi di osuku nɔɔ nwu

di otii kpile nwu kafɔɔ adiɛ disibu nɔɔ.

22 Ntɔɔyɛɛsa ɔtanlolaa ɔbla lɛfɔ fɛ alokonkyɛ,

Sikpile lɛfɔ fɛle oblokyi.

Kple fawa ɔkyɛ nii,

diekye ntoodiki fɔ."

14 nse batii nii ba manlɛɛ ni ku leyooto nii, kamawakosa suoto lɛma kasɔ mampɛ ɔlaa kafɔɔ manwolaa anu nii, mankyi di asiosie sisuku lɛma nwu yi, ni kamanu nkyeko osi, n-yɔ kafɔɔ sikpile lɛma nkyɛ ma, n-yɔɔsa kafɔɔ kasɔ lɛma nwu ofiɛ.

1 Hesekia lata Israel ku Yuda omuu kanya, ni aakpana akũ kafɔɔ aata Efraim ku Manase, aalɛɛ ma alɛ bawa SAATE nwu olekatakɔ di Yerusalem baabale Okpi Diisi Ofe Dii bata SAATE Israel Yaa nwu nɛ. 2 Ɔka ku banɔɔfotii nɔɔ ku kasikɔ nwu kamuu di Yerusalem latɛ alɛ babale Okpi Diisi Ofe dii nwu di Yuda batii kɔwɛntɛ nyɔɔfa kamɛ. 3 Batafuo dii nwu ole di obe ninwu kamɛ, diekye olebatatɛ ba niakleklesa ni suoto lɛma ditapɔ, batii nwu kafɔɔ ditasi di Yerusalem. 4 Mmle baatitika ni lakyɛkyɛ diata ɔka ku kasikɔ nwu kamuu, akyuu nwu anyɔ. 5 Ni baatɛ alɛ booyie lɛkya manfenko di Israel omuu, diayɔ ni di Beer-Seba dialaadu ni Dan, baatɔɔlɛɛ batii nwu alɛ bawa Yerusalem baabale Okpi Diisi Ofe Dii nwu bata SAATE Israel Yaa nwu nɛ. Badisinle dii nwu di lɛpɔ kplɛ kamɛ di mmle baakpana baatɛ ni kanya.

6 Ni di batɔkyɛntɛ nwu laklee akũ ya niakye ni ɔka ku banɔɔfotii nɔɔ nfũ baafenko di Israel ku Yuda omuu, di ɔka kufiofa kanya, kuabuɛ alɛ:

"Israel batii, bipɛbikple biwa SAATE nwu nfũ, Abraham, Isak ku Israel Yaa ɔkyɛ, alɛ aapɛankple anwa aye ba niebu ni, biatoso biadie ni di Asiria baka nnɛɛ ɔkyɛ. 7 Bitante fɛ bate lee ku babilee ba nitale onukwale baata ni SAATE nwu, bate lɛma Yaa nwu, diata alɛ aabla ma baate fɛle lɛyɛkɛsaa, fɛ mmle biɔnya nii. 8 Bitanle batokopĩtɛ, fɛ mmle di bate lee late nii; biyɔ suoto lee bita SAATE nwu. Biwa kakleklekɔ ka atookleklesa ni dinaa ni kaloo. Bisumu SAATE Yaa lee nwu, mmle di ɔblɔ yakayaka nɔɔ kamunikĩi kunkyɛ ye ni di suoto. 9 Nse biɛpɛbiekple biɛwa SAATE nwu ɔkyɛ yi, ni babilee-suɔtɔbi ku babi lee bamufũtɛ kamanya ma nyaami mampɛmankple manwa kafɔɔ kasɔ ka mmle, diekye SAATE Yaa lɛfɔ nkpe sifutulɛ, an-nya kafɔɔ nyaami. Ɔlɔbakyisa anu nɔɔ di suoto lee nse biɛpɛbiekple biɛwa ɔkyɛ nɔɔ."

10 Batɔkyɛntɛ nwu ladie baakyɛ okpoo biala di Efraim ku Manase, dialaadu bia Sebulon. Kafɔɔ batii nwu lama ma baanyu ma kafɔɔ nyakatãa. 11 Kafɔɔ yi, Aser, Manase ku Sebulon batii bawo lawakosa suoto lɛma kasɔ ni baadie baakyɛ Yerusalem nɛ. 12 Di Yuda kafɔɔ yi, Yaa kɔnɛɛ latika di batii nwu suoto diata alɛ disibu lɛma labla ninwii baayɔ baabla ɔkpɛ wɔ di ɔka ku banɔɔfotii nɔɔ lakpee ma ni ɔbla, di SAATE nwu ɔlaa kanya.

13 Batii ɔlambu kplɛkplɛ lasi di Yerusalem alɛ boole Bloblo wɔ Ninantaka ni Dii di Yuda batii kɔwɛntɛ nyɔɔfa kamɛ. 14 Baakpakpaa oleɔta akyikye ya niayila ni di Yerusalem, baalɛ kafɔɔ olufui oleɔta akyikye baalaawii di Kidron Ɔtaata.

15 Ni baalo Okpi Diisi Ofe lefosobi nwu di lefosi dii naafa di Yuda batii kɔwɛntɛ nyɔɔfa nwu suoto nɛ. Sinunsɔ lakpɛ olebatatɛ ku Lewi batii nwu ni baakleklesa suoto lɛma baayɔ ofiɛ asaaɔta baawako SAATE nwu olekatakɔ nɛ. 16 Ninfɛ baayila di n-yilakɔ lɛma fɛ mmle bɛɛtɛ ni di Yaa otii nwu Mose Kufiofa kamɛ nɛ. Ninfɛ di olebatatɛ lanwanwanyi ntɔ be di Lewi batii layɔ baata ma ni nɛ. 17 Di batii kpinwu di ɔlambu nwu kamɛ diikleklesa ni suoto lɛma oso yi, Lewi batii nialo Okpi Diisi Ofe afosobi baata batii ba bamuu nitaklekle nii, batafuo ni afosobi lɛma okleklesa ɔta ni SAATE nwu. 18 Nu di batii dudu di batii kpinwu ba niakye ni Efraim, Manase, Isakar ku Sebulon baawa ni ditakleklesa ni suoto lɛma, kafɔɔ baale ni Okpi Diisi Ofe Dii nwu yi, baayila di lɛsaa le bɛɛkpana bɛɛtɛ ni suoto. Kafɔɔ Hesekia lapɛ ɔlaa aata ma, aabuɛ alɛ, "SAATE nwu, nnwɔ ninlɛ ni, ayɔ akyɛ otii biala 19 wɔ niɛyɔ ni otu nɔɔ ɛɛtɛ ɛɛta ni Yaa owolaa- SAATE nwu, bate nɔɔ Yaa- bia nse aaklekle di kakleklekɔ nwu afiofa kanya." 20 Ni di SAATE nwu lanu aata Hesekia, ni aayɔɔsa batii nwu ofiɛ nɛ.

21 Israel batii ba niawɛ ni di Yerusalem lale Bloblo wɔ Ninantaka ni dii ayi akuɛnsĩ ku suoto lɛyɔɔ kplɛ ɔnya, obe wɔ di Lewi batii ku olebatatɛ nwu latɔɔsa ni sinu baatɔɔta ni SAATE nwu dii biala, di SAATE nwu katansa asansaa lakyakaa nii.

22 Ninfɛ di Hesekia lakakatɛ osie okpee sɛlaa aata Lewi batii bamuu, mba niawɛ ni lɛsɔnu nwaa di SAATE nwu ɔkpɛ ɔbla suoto nɛ. Ayi akuɛnsĩ amu baale nlekɔ lɛma be baata ma nii, baata atoko ɔkyɛ ole asaaɔta, baatansa SAATE, bate lɛma Yaa nwu.

23 Ni di kasikɔ nwu kamuu latuna alɛ boole dii nwu ayi akuɛnsĩ mankyakaa nɛ; nioso baale dii nwu ayi akuɛnsĩ bamba ku suoto lɛyɔɔ. 24 Yuda ɔka Hesekia lata kasikɔ nwu banankyue-suɔtɔ kakpe, bafoso ku batie nkpe nkuɛnsĩ, aata banɔɔfotii nwu kafɔɔ banankyue-suɔtɔ kakpe, bafoso ku batie nkpe lefosi. Olebatatɛ di lɛpɔ kpinwu kamɛ lakleklesa suoto lɛma. 25 Yuda kasikɔ nwu kamuu lanya suoto lɛyɔɔ, diakyakaa ni di olebatatɛ ku Lewi batii ku mba bamuu niakye Israel baabasi ni, dikyakaa ni di bafɔɔ ba niakye ni Israel ku mba niasiɛ ni di Yuda. 26 Suoto lɛyɔɔ kplɛ lawɛ di Yerusalem, diekye diayɔ ni di Israel ɔka Dawid obisuɔtɔbi Solomon obe kamɛ yi, lɛsalɛsaa kuninwii diiwɛ di Yerusalem fɛle nle mmle okle. 27 Ni di Olebatatɛ ku Lewi batii layila baata batii nwu lɛtɔtrɔ, ni di Yaa lanu aata ma nɛ. Diekye ɔlaa ɔpɛ lɛma ladu osi, di kasiɛkɔ klekle nɔɔ.