HESEKIEL 15

Lɛkpa Ɔpɛ Di Nta Kowoso Suoto

1 Ni di SAATE nwu ɔlaa lawa kuatɛɛ alɛ: 2 "Otii obi, lɛ di nta kowoso katɔɔni nlɛ kalenke owosola lele di awoso ya di lepoo kamɛ? 3 Man-yɔ owoso ninwu mambla lɛsaa biene lewo? Man-yɔ owoso ninwu mambla ayee alɛ baasaka asaa ninwu suoto? 4 Nse bɛɛyɔ owoso nwu beekpee di ɔtɔ kamɛ fɛ katɔɔni, di ɔtɔ nwu kafɔɔ lefiɛ asi nwu anyɔ di ntɛɛntɛɛ kafɔɔ lɛpɛpɛɛ ɔtɔ sɛmaa, keekple kalɛ kɛɛta lɛsaa lewo ɔblako? 5 Nse katabla lɛsaa biene kata lɛsalɛsaa di obe wɔ kaale ni kamu, ni lɛ nfɛ kabalɛ ɔyɔ ɔblako lɛsaa le ninle ni dibiene di obe wɔ di ɔtɔ ntɔɔfiɛ ka kɛɛpɛpɛɛ ni kafɔɔ ɔtɔ?

6 "Nkpo oso nnya ɔlaa wɔ di SAATE Kplɛ nwu kobuɛ ni alɛ: Fɛ mmle ntɔɔyɔ nta kowoso di lepoo awoso kamɛ lɛta ni fɛ ntɔɔni diɛta ni ɔtɔ yi, nkpo kamabla batii ba ninsi ni di Yerusalem nɛ. 7 Kamadiki anu nii ntika ma di suoto. Kuntɛ batoodie di ɔtɔ kamɛ yi, ɔtɔ nwu kamafiɛ ma. Ni nse lediki anu nii kafɔɔ letika ma di suoto yi, ni bibatofo bilɛ ami ninle SAATE nwu nɛ. 8 Ta batale onukwale baatɛɛ ni oso yi, kamabla kasɔ nwu kante kafukuti, SAATE Kplɛ nwu niebuɛ."