1 "Otii obi, nunua yi, yɔ kɔtɛ lɛkpanafuɔ fatɛ di anu lɛfɔ faatá Yerusalem okpoo kplɛ nwu fatika niini suoto. 2 Faamana nwu fakyi: faatofo ayo banyuntɛ ntakalekɔ ninwu suoto, faapɛ ditii falaadunko nwu, bla bakpɛtɛ nsiɛkɔ ninwu suoto, faatɛ kafɔɔ oyoyiɛ abiɛsaa fakyisa nwu. 3 Di afɔ kafɔɔ yi, faayɔ abɔɔsaa bɛɛsi fase fɛ abɔɔsaa oyoyiɛ di afɔ ku okpoo kplɛ nwu ntɛɛ, faamunikĩisa anu lɛfɔ fakyɔɔ okpoo nwu. Kubasiɛ di ɔmana okyi nwu kalɔ, ni afɔ fabamana nwu fankyi. Nle mmle nimale nsũlɛtɛsaa ninta Israel kale nɛ.

4 "Ni faate di ɔmɛntukyɛ lɛfɔ, faayɔ Israel kale letokonanfi fatika di suoto lɛfɔ. Ayi ya lɛpɔ kanya fabate ni di ɔfankyi lɛfɔ nwu suoto fabatuka letoko nanfi lɛma nwu nɛ. 5 Lɛyɔ ayi lɛpɔ nwu okle fɛ sikpile lɛma alɛɛ lɛta fɔ. Nioso di ayi alafa atiɛ-afosi-anaasĩ fabatuka Israel kale sikpile.

6 "Nse fatooloo nle mmle yi, faakple faklɛfate, kafɔɔ di obe wɔ mmle yi, te di koletanɛɛkyɛ lɛfɔ, faatuka Yuda kale letoko nanfi. Lɛta fɔ ayi afosi-ana, dii ninwii diɛta lɛlɛɛ biala. 7 Munikĩisa anu lɛfɔ fakyɔɔ Yerusalem wɔ bɛɛmana beekyi ni, faabuɛ ɔlaa ninwu suoto fatɛ ku kɔnɛɛ lɛfɔ fukuti. 8 Kamanii fɔ ku sikũ alɛ flɔbafuo omunikĩi di ɔfankyi onwii fafe ɔfankyi bamba ninaase di obe wɔ feeloo ni ɔmana okyi lɛfɔ ayi nwu.

9 "Ni afɔ yi, yɔ akpaa ku kamɔɔ, ayii ku aketeku, atitabi ku akaafɔbi; fakuɔ fakpete di dibukii ninwii kamɛ fase, faayɔ fafiɛ bloblo fata suoto lɛfɔ. Ayi alafa atiɛ-afosi-anaasĩ kamɛ fabale bloblo nwu, di obe wɔ fate ni di ɔfankyi lɛfɔ suoto. 10 Klapoosa alesaa ya fabale ni dii biala dibla kilo onwii ɔfã-dikuu nɔɔ. Le alesaa nwu kafɔɔ di obe wɔ bɛɛtɛ ni kanya. 11 Klapoosa kafɔɔ ntu abo anyɔ, faanyi mi dii biala di obe wɔ bɛɛtɛ ni kanya. 12 Le alesaa nwu fɛ mmle fabale ni eyo; wa mi di batii nwu anu, faayɔ batii mbi fabla ntɔɔni." 13 Ninfɛ di SAATE nwu labuɛ alɛ, "Nkpo di Israel batii kamale alesaa ya ninanklekle ni di nnle be kamɛ kamatɔɔ ma nkpee ni nɛ."

14 Ninfɛ labuɛ nlɛ, "SAATE Kplɛ, Kuote nkpo! Ninkpɔnɔfɔsa suoto nii diidii. Diayɔ ni di sekosopo nii obe diɛbadu ni nua, diidii ninle lɛsalɛsaa kuninwii niekpi dite ni, ee nnwɔ di lepoo kamɛ babɔkɛɛ lɛbɛbɛɛ nii. Diidii sina se ninanklekle ni kusinwii diikyɛ mi kanya."

15 Ni aabuɛ alɛ, "Diɛtɛ dilɛ, kamata fɔ fan-wa alesaa lɛfɔ di banankyue mbi suoto, dilɔbasinle ni di batii mbi suoto."

16 Ninfɛ aatɔkɔ mi alɛ: "Otii obi, kamata alesaa ndiɛ Yerusalem ɔkyɛ. Batii nwu kamale alesaa ya bɛɛklapoosa ni di lɛyɛkɛ kamɛ, man-nyi kafɔɔ ntu be bɛɛklapoosa ni di nnɛɛ lefee kamɛ, 17 diekye alesaa ku ntu ɔlaa kamawɛ osie. Dibabla ma ɔkpɛ di bawo lɛma anu man-wɔɔ kafɔɔ ta sikpile lɛma oso.