1 Ninfɛ di Ninwuna latakatɛ mi katoo, ni aakpaa mi aawako SAATE nwu leyo kayoko ka niakyɔɔ ni kufĩ katunkɔ anu nɛ. Basuɔtɔ afosi-anyɔ-banɔɔ lawɛ ninfa di kayoko nwu kayokontũ, ni lanya Asur obisuɔtɔbi Yaasania ku Benaia obisuɔtɔbi Pelatia, batii nwu batunletɛ di kamɛ lɛma nɛ. 2 Ni di SAATE nwu latɔkɔ mi alɛ, "Otii obi, nnya mba mmle ninle ni batii ba nikokũ ni kanwumbe, bɔɔta ni kafɔɔ disibu kpile di okpoo kplɛ wɔ mmle kamɛ nɛ. 3 Mambuɛ ni alɛ, ‘Obe diiwo alɛ baatofo ni ayo. Okpoo kplɛ wɔ mmle nle ɔkakutu, ni di awoo bule sina nɛ.’ 4 Nkpo oso buɛ ɔlaa fatɛ di suoto lɛma; otii obi, buɛ ɔlaa fatɛ."

5 Ninfɛ di SAATE nwu Ninwuna labuo mi di suoto nɛ, ni aatɔkɔ mi alɛ mbuɛ nlɛ: "Nnya ɔlaa wɔ di SAATE nwu kobuɛ ni alɛ: Oo Israel leyo, nkpo biobuɛ nɛ, kafɔɔ n-ye lɛsaa le nikofe ni di disibu lee kamɛ. 6 Bitoolo batii nii kpinwu di okpoo kplɛ wɔ mmle kamɛ, biɛta kafɔɔ sisuku ninwu leyii ku bakpi pɔ.

7 "Nkpo oso nnya ɔlaa wɔ di SAATE Kplɛ nwu kobuɛ ni alɛ: Bakpi nwu biefuki biɛtɛ ni ninfa nle sina, okpoo kplɛ wɔ mmle kafɔɔ ninle ɔkakutu, kafɔɔ kamatososa ye ndiki ninwu kamɛ. 8 Min-yɛkɛ kapamii, kapamii nwu kafɔɔ ninle lɛsaa le kamayɔ n-wako ye ni di suoto nɛ, SAATE Kplɛ nwu niebuɛ. 9 Kamatososa ye ndiki di okpoo kplɛ nwu, nin-yɔ ye nkpee di bafɔɔ nnɛɛ, nin-yɔ letokonanfi kafɔɔ n-wako ye di suoto. 10 Bibanɔɔ di kapamii kanya, kamakanko ye kafɔɔ di Israel amɛ suoto. Ninfɛ bibatofo bilɛ ami ninle SAATE nwu nɛ. 11 Okpoo kplɛ wɔ mmle dilɔbale ɔkakutu kuta ye, ee bile sina ninwu kamɛ; kamakanko ye di Israel amɛ suoto. 12 Ni bibatofo bilɛ ami ninle SAATE nwu nɛ. Diekye bitatikanko sɛsaabla nii ee bile afiofa nii, kafɔɔ biabla di nnle be niɛmana ye diekyi ni afiofa kanya."

13 Di obe wɔ latoobuɛ ɔlaa latɔɔtɛ nii yi, Benaia obisuɔtɔbi Pelatia lakpi. Ninfɛ lafuusa anu kaasɔ, lawi kaku layiisa kudu osie kanya nlɛ, "Ao, SAATE Kplɛ! Fabawɔɔsa Israel batii ba niebu basi ni nkpa klekle?"

14 Ni di SAATE nwu ɔlaa lawa kuatɛɛ alɛ: 15 "Otii obi, babilee-suɔtɔbi- babilee-suɔtɔbi ba ninle ni ntɔ nnwii ku afɔ ku Israel leyo nimuu- nle mba suoto di Yerusalem batii labuɛ ni alɛ, ‘Batookyo di SAATE nwu suoto; kasɔ ka mmle baata wo fɛ kalewo nɛ.’

16 "Nkpo oso buɛ falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Nu latɔɔ ma lakpee fanfa di nnle nwu kamɛ, lasamiisa ma kafɔɔ lakpete di nnle nwu kamɛ yi, kafɔɔ di obe kakui kamɛ lale kakleklekɔ lata ma di nnle be kamɛ baasifi nii.’

17 "Nkpo oso buɛ falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Kamasiisa ye nkyeko nnle nwu kamɛ, nkplesa ye nkyeko nnle be kamɛ bɛɛsamiisa ye kafɔɔ beekpete ni nwako, ninkplesa kafɔɔ Israel kasɔ nwu nta ye.’

18 "Babapɛmankple manwa kasɔ nwu suoto mamakpakpaa kafɔɔ atembi nyakatãa ku afiɔ ayududusaa nwu amuu. 19 Kamata ma manwɛ otu onwii, n-yɔ kafɔɔ ninwuna fɔle nkpee ma kaamɛ; kamadiki difuɔ otu lɛma nwu, ninta ma sina lɛbɔtɔ otu. 20 Ni nfɛ babatikanko sɛsaabla nii, manlolaa afiofa nii manle kafɔɔ nɛ. Babale batii nii, ami kafɔɔ kamale ma Yaa. 21 Kafɔɔ mba niɛyɔ ni situ lɛma bɛɛta ni atembi nyakatãa ku afiɔ ayududusaa lɛma nwu yi, kamasoosa lɛsaa le baabla ni ntika di mma bamu asintɛɛ, SAATE Kplɛ nwu niebuɛ."

22 Ninfɛ di bakerubi nwu ku nkpaa nwu di ɔlɔɔkɔ lɛma lafukuti afoko lɛma, ni di Israel Yaa nwu leklekle latika di osi lɛma nɛ. 23 Ni di SAATE nwu leklekle ladie di okpoo kplɛ nwu kamɛ diasifi dialatika di kobokote osi di kufĩ katunkɔ lɛkyɛ nɛ. 24 Ni di Ninwuna nwu lakɛnkɛ mi aasifiko osi, ni aakpaa mi aawako balanle nwu ɔkyɛ di Babel, di odiki otuo wɔ di Yaa Ninwuna lata ni kamɛ nɛ.

Ninfɛ di odiki otuo nwu lanya ni layɛ di anu nii nɛ. 25 Ni latɔkɔ balanle nwu lɛsaa biala le di Yaa ladiki aatuo mi ni nɛ.