1 Di lɛlɛɛ kuɛnsinle kamɛ, di Israel batii kɔwɛntɛ nɔnle dii fosile suoto yi, Israel banɔɔfo bawo lawa baabawolaa asaa kamɛ baakyeko SAATE nwu nfũ, ni baasiɛ kaasɔ di anu nii nɛ.

2 Ninfɛ di SAATE nwu ɔlaa lawa kuatɛɛ alɛ: 3 "Otii obi, kakatɛko Israel banɔɔfo, faatɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Ami biɛwa ɔlaa ɔkaalɛ? Nwaako lɛnya nkpe ni nkpa yi, nɔmata ye bikaalɛ mi ɔlaa, SAATE Kplɛ nwu niebuɛ.’

4 "Fabakanko ma? Otii obi, fabakanko ma? Ni ta ma batofo bate lɛma ayududusaa sɛsaabla nwu, 5 faatɔkɔ ma kafɔɔ falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Di dii le ladiki ni Israel, latakatɛ kɔnɛɛ nii katoo laka ntam lata Yakob leyo banantii, ladiki kafɔɔ suoto nii latuo ma di Egipte. Latakatɛ kɔnɛɛ nii katoo latɔkɔ ma nlɛ, "Ami ninle SAATE Yaa lee nɛ." 6 Laka ntam lata ma di dii nwu suoto nlɛ kamakpaa ma ndieko di Egipte n-wako kasɔ ka lamiɛ lata ma ni suoto, kasɔ ka di nnyɛɛntu ku bablɔ kobiɛ ninfe ka ni di suoto, kasɔ ka ninlɛ kalenke ni nsɔ nwu mmuu. 7 Ni latɔkɔ ma nlɛ, "Obiala lee, afuki atembi nyakatãa nɔɔ nwu eediki anumbi nɔɔ eetika ni ayu, bitankpɔnɔfɔsa suoto lee kafɔɔ ku Egipte afiɔ. Ami ninle SAATE Yaa lee nɛ."

8 " ‘Kafɔɔ baataka baayila mi di suoto, ni batakyɔɔ mi atoko nɛ; batayɔ atembi nyakatãa lɛma nwu baadiki anu lɛma baatika ni bayu, ee basĩ Egipte afiɔ. Nioso labuɛ nlɛ kamasoosa ɔblɔ yakayaka nii nkpete ma di suoto, nimblako kafɔɔ ɔblɔ nii ɔkpɛ di suoto lɛma di Egipte. 9 Kafɔɔ ta leyooto nii oso, labla lɛsaa le ninamata ni dikpɔnɔfɔ ni di nnle be kamɛ basi ni anu, ku mba anu ladiki suoto nii latuo ni Israel batii, di obe wɔ lakpaa ma ladieko ni di Egipte. 10 Nkpo oso laleko ma katũ ladieko di Egipte, ni lakpaa ma lawako ɔfaafuu kamɛ nɛ. 11 Lata ma sɛsaabla nii, ni lata ma baatofo afiofa nii nɛ. Diekye otii wɔ niɛkyɔɔ nya ni atoko kamasiɛ nkpa ninnya suoto. 12 Lata ma kafɔɔ Anyɛɛtɛyi nii fɛ nsũ lɛtɛsaa le ninsi wo ni nintɛɛ, di mmle baatofo ni alɛ ami SAATE nwu niɛbla ma ni klekle.

13 " ‘Kafɔɔ Israel batii lataka baayila mi di suoto di ɔfaafuu nwu kamɛ. Batatikanko sɛsaabla nii, kafɔɔ baasĩ afiofa nii- nu di otii wɔ niɛkyɔɔ nya ni atoko kamasiɛ nkpa ninnya suoto yi- baakpɔnɔfɔsa Anyɛɛtɛyi nii. Nioso labuɛ nlɛ kamanyɛɛnɛ ɔblɔ yakayaka nii nkpete ma di suoto, nin-wɔɔsa ma kafɔɔ di ɔfaafuu nwu suoto. 14 Kafɔɔ ta leyooto nii oso yi, labla lɛsaa le ninamata ni dikpɔnɔfɔ ni di nnle nwu anu, di batii ba anu lakpaa ma ladieko nii. 15 Latakatɛ kafɔɔ kɔnɛɛ katoo laka ntam lata ma di ɔfaafuu nwu kamɛ nlɛ, nɔmakpaa ma n-wako kasɔ ka lata ma nii- kasɔ ka di nnyɛɛntu ku bablɔ kobiɛ ninfe ka ni di suoto, kasɔ ka ninlɛ kalenke ni nsɔ nwu mmuu- 16 ta baasĩ ni afiofa nii, batatikanko ni sɛsaabla nii ku Anyɛɛtɛyi nii ya baakpɔnɔfɔsa ni oso. Diekye baayɔ situ lɛma baatika di afiɔ lɛma suoto. 17 Kafɔɔ lanya ma nyaami, ni nintawɔɔsa ma ee nta kalookɔ lɛma kawa di ɔfaafuu nwu kamɛ nɛ. 18 Ni latɔkɔ babi lɛma di ɔfaafuu nwu kamɛ nlɛ, "Bitantikanko bate lee nnafukpaa ee biale afiofa lɛma ee biakpɔnɔfɔsa suoto lee ku afiɔ lɛma nwu nɛ. 19 Ami ninle SAATE Yaa lee nɛ; bitikanko sɛsaabla nii, bielolaa kafɔɔ binyu bilɛ bieklee afiofa nii. 20 Bibla Anyɛɛtɛyi nii klekle, alɛ aale nsũ lɛtɛsaa le ninsi wo ni nintɛɛ. Ninfɛ bibatofo bilɛ ami ninle SAATE Yaa lee nɛ."

21 " ‘Kafɔɔ babi nwu lataka baayila mi di suoto: Batatikanko sɛsaabla nii, batalolaa afiofa nii baaklee. Nu di otii wɔ niɛkyɔɔ nya ni atoko kamasiɛ nkpa ninnya suoto yi- baakpɔnɔfɔsa Anyɛɛtɛyi nii. Nioso labuɛ nlɛ kamasoosa ɔblɔ yakayaka nii nkpete ma di suoto, nimablako kafɔɔ ɔblɔ nii ɔkpɛ di suoto lɛma di ɔfaafuu nwu. 22 Kafɔɔ lakplesa kɔnɛɛ nii, ta leyooto nii kafɔɔ oso yi, labla lɛsaa le ninɔmata ni dikpɔnɔfɔ ni di nnle nwu anu, di batii ba anu lakpaa ma ladieko nii. 23 Latakatɛ kafɔɔ kɔnɛɛ katoo laka ntam lata ma di ɔfaafuu kamɛ, nlɛ kamatososa ma nkpete di nnle nwu kamɛ, ninsamiisa ma kafɔɔ nfenko di nsɔ nwu suoto. 24 Diekye batale afiofa nii, kafɔɔ baasĩ sɛsaabla nii, baakpɔnɔfɔsa Anyɛɛtɛyi nii, ni di anu lɛma kafɔɔ latika di bate lɛma afiɔ suoto nɛ. 25 Ni di ami kafɔɔ layɔ ma lata sɛsaabla kpile se ninanlɛ ni ku afiofa ya suoto manamafuo ni nkpa osiɛ ɔta nɛ; 26 Lata ma baakpɔnɔfɔ, diafe ni di asaa ɔta lɛma suoto- lelofo kasale biala ɔyɔ ɔta ole- alɛ kata difu n-yii ma kamɛ di mmle baatofo ni alɛ, ami ninle ni SAATE nwu nɛ.’

27 "Nkpo oso, otii obi, kakatɛ fata Israel batii, faatɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Di nle mmle kamɛ kafɔɔ, bate lee lakpɔnɔfɔsa mi, di osĩ wɔ baasĩ mi ni kamɛ: 28 Obe wɔ lakpaa ma lawako ni kasɔ ka laka ntam nlɛ kamayɔ nta ma ni suoto, baanya ni lekpenkpe takale lele ee kowoso kɔnle lele yi, baata seleɔta lɛma ninfa, baata asaaɔta ya niata ɔblɔ lafiɛ mi ni osie kanya. Baawako olufui kɔnɔnkɔnɔ lɛma, baanyɛɛnɛ kafɔɔ nta asaaɔta lɛma ninfa. 29 Ninfɛ lakaalɛ ma nlɛ: Kamɛntakalekɔ ninle nka mmle biɔkyɛ ni?’ " (Manlɛɛ ka Bama* diɛbase di mmiɛ dii le mmle.)

30 "Nkpo oso tɔkɔ Israel batii falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Bibakpɔnɔfɔsa suoto lee fɛ mmle di bate lee labla ni, min-yɔ kafɔɔ anu lee mintika di atembi nyakatãa lɛma nwu suoto? 31 Di obe wɔ biɔta ni akyɛsaa lee- babisuɔtɔbi lee nwu min-yɔ minta ni ole di ɔtɔ kamɛ- minkple mintɔɔkpɔnɔfɔsa ni suoto lee ku afiɔ lee amuu diɛbase di miɛ dii le mmle. Oo Israel batii, nta ye osuku biewolaa asaa kamɛ bekyeko ɔkyɛ nii? Nwaako, lɛnya nkpe ni nkpa yi, SAATE Kplɛ nwu niebuɛ alɛ, nɔmata ye osuku biwolaa asaa kamɛ bikyeko ɔkyɛ nii.

32 " ‘Mimbuɛ bilɛ, "Buomiɛ bulɛ bute fɛle nnle nwu, fɛle kayi ka mmle batii, mba nintɔ ni awoso ku afuɔ." Kafɔɔ disibu le bikle ni dilɔbawa kaanya diidii.

33 Nwaako lɛnya nkpe ni nkpa yi, SAATE Kplɛ nwu niebuɛ alɛ, kamale sɛka di suoto lee ku kɔnɛɛ siene ku kɔnɛɛ lɛnanfi ku ɔblɔ yakayaka ɔnya. 34 Kamakpaa ye nkyeko nnle kamɛ, nsiisa ye kafɔɔ nkyeko nsɔ be kamɛ bɛɛsasamisa ye beekpete nii- ku kɔnɛɛ siene ku kɔnɛɛ lɛnanfi ku ɔblɔ yakayaka ɔnya. 35 Kamakpaa ye n-wako nnle nwu ɔfaafuu kamɛ, nfa kafɔɔ kamakanko ye anu ku anu nɛ. 36 Fɛ mmle lakanko ni bate lee di ɔfaafuu kamɛ di Egipte kasɔ suoto yi, nkpo kamakanko ye nɛ, SAATE Kplɛ nwu niebuɛ. 37 Kamanyu nlɛ biefe di owoso nii kalɔ, nkpaa ye kafɔɔ nkpee di kanya ninii ntam nwu kamɛ. 38 Kamadidiki aye ba ninkpe ni otokopĩ ku mba niɛtaka bayɛ mi ni di suoto di kamɛ lee. Kuntɛ kamakpaa ma ndieko di kasɔ ka suoto basi ni yi, kafɔɔ blɔbabuo Israel kasɔ nwu suoto. Ninfɛ bibatofo bilɛ ami ninle SAATE nwu nɛ.

39 " ‘Kafɔɔ aye, Oo Israel batii, nnya ɔlaa wɔ di SAATE Kplɛ nwu kobuɛ ni alɛ: Obiala lee atɔɔkyɛ biɛlaatɔ afiɔ lee! Kafɔɔ nle mmle kamaa yi, nwaako bibakyɔɔ mi atoko, minɔmasinkpɔnɔfɔsa ni kafɔɔ Leyooto nii klekle ku akyɛsaa ku afiɔ lee nwu. 40 Diekye di kobokote klekle nii suoto, Israel kobokote takale nwu, SAATE Kplɛ nwu niebuɛ alɛ, nfa di kasɔ nwu suoto di Israel batii bamuu kamasumu mi, nfa kafɔɔ kamafũ ma nɛ. Nfa kamakaalɛ asaaɔta lee ku akyɛsaa biene lee, diɛkyakaa ni di seleɔta klekle lee simuu nɛ. 41 Kamafũ ye fɛle olufui wɔ nikɔpɛ ni ɔkɔnɔ nse lɛkpaa ye ledieko di nnle nwu kamɛ, lesiisa ye kafɔɔ lekyeko nsɔ nwu di aba ya baasamiisa ye baakpete nii. Ni kamadiki suoto nii klekle ntuo di kamɛ lee di nnle nwu anu. 42 Nse lɛkpaa ye lɛwako Israel kasɔ nwu suoto, kasɔ ka latakatɛ kɔnɛɛ nii katoo laka ntam nlɛ kamayɔ nta ni bate lee yi, ninfɛ bibatofo bilɛ ami ninle SAATE nwu nɛ. 43 Nfa bibanyuma nkpa be biasiɛ ni ku sisuku se biafe biakpɔnɔfɔsa ni suoto lee nɛ, suoto lee kafɔɔ kamakpɛ ye oyududu di akpilesaa ya amuu biabla ni suoto. 44 Ni bibatofo bilɛ ami ninle SAATE nwu, nse lɛblako ye suoto ɔkpɛ ta leyooto nii oso, ninanle ni kafɔɔ di akpilesaa sisuku lee ku kalalaa sɛsaabla lee kanya. Oo Israel batii, SAATE Kplɛ nwu niebuɛ.’ "

45 Ni di SAATE nwu ɔlaa lawa kuatɛɛ alɛ: 46 "Otii obi, yɔ anu lɛfɔ fakyɔɔ kalakasɔ; yie lɛkya di kalakasɔ suoto faabuɛ kafɔɔ ɔlaa fatɛ kuoyila di kalakasɔ lepoo suoto. 47 Buɛ fatɔkɔ kalakasɔ lepoo falɛ: ‘Nu SAATE nwu ɔlaa. Nnya ɔlaa wɔ di SAATE Kplɛ nwu kobuɛ ni alɛ: Nfɛ kɔwa fɔ ɔtɔ ɔbakpee, kubafiɛ awoso lɛfɔ amuu, akɔnle ku akosole, akyuu nwu anyɔ. Ɔtɔ bembe nwu dilɔbanii, kubafiɛ kafɔɔ otii biala diɛyɔ ni di kalakasɔ diɛlaadu katookasɔ. 48 Otii biala kamanya alɛ ami SAATE nwu niakɛsɛɛsa nwu; blɔbaniisa nwu.’ "

49 Ninfɛ labuɛ nlɛ, "Ao, SAATE Kplɛ! Boobuɛ di suoto nii alɛ, ‘Diele akpá lete ɔɔpɛ?’ "