1 Di sɛlanle loo osiɛ kamɛ alɛɛ afosi-anyɔ lɛnɔɔle kamɛ, di lɛlɛɛ nwu kasɔ kakyekɔ kamɛ, di kɔwɛntɛ nwu dii fosile suoto, di okpoo kplɛ nwu labiɛ ni sɛmaa, di lefosi lɛlɛɛ naafa kamɛ- dii nwu nkpo kale suoto, SAATE nwu kɔnɛɛ latika mi di suoto, ni aakpaa mi aasifiko nfa nɛ. 2 Di Yaa odiki otuo kamɛ yi, aakpaa mi aasifiko Israel kasɔ suoto, ni aayɔ mi aalaatika di kobokote ko niataka ni nwaa, di ayo lawɛ ni di kobokote nwu kalakasɔ lɛkyɛ, diate ni fɛle okpoo kplɛ. 3 Aakpaa mi aasifiko nfa, ni lanya osuɔtɔ onwii di letembi nɔɔ late ni fɛle lɛbɔɔsaa sɛɛle; layila di osuku kayoko aaklee dibula fɛnɛnɛɛ okũ ku lɛklapoosaa kawesee di kɔnɛɛ nɔɔ. 4 Ni di osuɔtɔ nwu latɔkɔ mi alɛ, "Otii obi, nyu ku anu lɛfɔ, faanu ku atoko lɛfɔ, faakyɔɔ kafɔɔ lɛsaa biala le kamatuo fɔ ni atoko, diekye nni oso bɛɛkpaa fɔ bɛɛwako nfũ nɛ. Tɔkɔ Israel batii lɛsaa biala fɛɛnya ni."

5 Ni lanya oyoyiɛ onwii lamana olekatakɔ nwu lɛkyɛ kuakyi nɛ. Lɛklapoosaa kawesee nwu di osuɔtɔ nwu kɔnɛɛ lɛkaana labla nkpaa lefosi, di dibiala lɛkaana labla ni kɔkpaa kunwii ku ɔfã. Aaklapoosa ni oyoyiɛ nwu; opĩ ninwu labla lɛklapoosaa kawesee nwu kanwii ku kawesee nwu kanwii lɛtaka.

6 Ninfɛ aasifi kayoko ka niakyɔɔ ni kufĩkatunkɔ anu nɛ. Ni aakata oyoyiɛ nwu nkatakɔ aalaaklapoosa kayoko nwu anu nɛ; lekyofo nika labla nkpaa lefosi. 7 Koyoe ko niakaa ni di kayoko nwu sɛlɔɔkɔ kuɔta ni banyuntɛ lɛkaana labla nkpaa lefosi, lɛblɛfɛ kafɔɔ labla nkpaa lefosi, seyoyiɛ se baatofo siakyɔɔ ni di koyoe nwu sebo opĩ labla nkpaa nnɛ. Kamɛ kayoko ka niatɛɛtɛɛ ni lɛkpata nwu niakyɔɔ ni olekatakɔ nwu anu lekyofo labla nkpaa lefosi.

8 Ninfɛ aaklapoosa lɛkpata nwu kayoko nɛ; 9 lekyofo nika labla lefosi nkpaa ntiɛ, obo wɔ niate ni kafɔɔ opĩ labla nkpaa ntiɛ. Kayoko nwu lɛkpata lakyɔɔ anu olekatakɔ nwu.

10 Koyoe kutiɛ lawɛ di kufĩkatunkɔ kayoko nwu ɔfankyi biala; atiɛ nwu lɛklapoo lale ninwii, seyoyiɛ se niakyɔɔ ni di ɔfankyi biala kafɔɔ lɛklapoo lale ninwii. 11 Ninfɛ aaklapoosa nfũ manfe mambuo ni kayoko nwu lɛblɛfɛ nɛ; lɛblɛfɛ nini labla lefosi nkpaa nkuɛnsĩ, lɛkaana kafɔɔ labla afosi-anyɔ nkpaa nnyɔ. 12 Di kayoe biala anu yi, oyoyiɛ layila di lɛtaka ninwu labla ni kɔkpaa kunwii ku ɔfã, koyoe nwu kafɔɔ labla nkpaa lefosi di ɔfankyi biala. 13 Ninfɛ aaklapoosa kayoko nwu diayɔ ni di kayoe kanwii osi dialaase ni di kayoe nyɔɔfa osi; obo wɔ niate ni diayɔ ni di kayokontũ kanwii dialaase ni di kanyɔɔfa labla afosi-ana nkpaa nnyɔ. 14 Aaklapoosa lɛkpata nwu anu amuu niafe ni di kamɛ kayoko nwu- diabla nkpaa kɔlafa. Aaklapoosa aalaadu lɛkpata le niakyɔɔ ni kaflɔnkɔ nwu anu. 15 Obo wɔ niate, diayɔ ni di kayoko kanya dialaadu ni lɛkpata nwu kayɛntɛlekɔ labla afosi-anɛ nkpaa nna. 16 Basɛfle lamana koyoe nwu ku seyoyiɛ se simuu baatofo baakyɔɔsa ni di kayoko nwu kamɛ baakyi, fɛ mmle di lɛkpata nwu late nii; basɛfle nwu bamuu niamana baakyi ni lakyɔɔ anu kamɛ. Baabla awɔsɔ baatika di seyoyiɛ se baatofo baakyɔɔsa ni anu amuu.

17 Ninfɛ aakpaa mi aawako kaflɔnkɔ ka niawɛ ni di kayi lɛkyɛ nɛ. Ni lanya koyoe kowo ku kafenkɔ afuɔ ya baatɛ baakyisa ni kaflɔnkɔ nwu kamuu ninfa nɛ; koyoe afosi-atiɛ niayila di kafenkɔ afuɔ ya baatɛ baakyisa ni anu. 18 Baatɛ afuɔ di n-yoko nwu sɛlɔɔkɔ, aablɛfɛ aakaatɛɛ kafɔɔ di lɛkaana nwu kanya; nle mmle niale kafenkɔ afuɔ ya baatɛ ni di kalɔ lɛkyɛ nɛ. 19 Ninfɛ aaklapoosa obo wɔ niate ni, diayɔ ni di kalɔ kayoko kamɛ aawako kayi di kaflɔnkɔ ka kaamɛ nɛ; diabla kɔlafa afosi-akuɔ nkpaa nnɛ di kufĩkatunkɔ lɛkyɛ ku katookasɔ lɛkyɛ.

20 Ninfɛ aaklapoosa kayoko ka niakyɔɔ ni anu katookasɔ, lɛkaana ku lɛblɛfɛ, diofe ni kaflɔnkɔ ka niawɛ ni di kayi lɛkyɛ nɛ. 21 Koyoe kutiɛ niawɛ di ɔfankyi biala, seyoyiɛ se baatofo baakyɔɔsa ni ku lɛkpata nini lakaatɛɛ ku kayoko kasale kale. Lɛkaana labla afosi-anɛ nkpaa nna, lɛblɛfɛ kafɔɔ labla afosi-ana nkpaa nnyɔ. 22 Basɛfle nini, akpata nini ku awɔsɔ ya baabla baatika ni lɛklapoo lakaatɛɛ ku kayoko ka niakyɔɔ ni kufĩkatunkɔ anu kale. Nkatakɔ nkuɔ niawɛ mankata manaadu ni osi nini, di lɛkpata lakyɔɔ ma ni anu. 23 Kayoko lawɛ kaasifi kaflɔnkɔ ka kaamɛ, kaakyɔɔ anu katookasɔ kayoko, fɛ mmle okle kaate ni di kufĩkatunkɔ. Aaklapoosa diayɔ ni di kayoko kanwii dialaadu ni nka niakyɔɔ ka ni anu; diabla kɔlafa afosi-akuɔ nkpaa nnɛ.

24 Ninfɛ aakpaa mi aasifiko kalakasɔ lɛkyɛ, ni lanya kayoko lakyɔɔ anu kalakasɔ nɛ. Aaklapoosa seyoyiɛ se nintɛɛ ku akpata nini lakaatɛɛ fɛ abule. 25 Basɛfle lawɛ di kayoko nwu ku akpata nwu amuu baakyi, fɛle basɛfle bule bale. Lɛkaana nini labla afosi-anɛ nkpaa nna, lɛblɛfɛ nini kafɔɔ labla afosi-ana nkpaa nnyɔ. 26 Nkatakɔ nkuɛnsĩ niawɛ mankata manaadu ni osi nini, di akpata nini lawɛ aakyɔɔ ma ni anu; baabla awɔsɔ baatika di seyoyiɛ se baatofo baakyɔɔsa ni anu di ɔfankyi biala. 27 Kaflɔnkɔ ka kaamɛ kafɔɔ lawɛ kayoko kanwii niakyɔɔ ni anu kalakasɔ, ni aaklapoosa diayɔ ni di kayoko ka mmle aalaadu kayoko ka di kayi di kalakasɔ lɛkyɛ nɛ; diabla kɔlafa afosi-akuɔ nkpaa nnɛ.

28 Ninfɛ aakpaa mi aafenko di kalakasɔ kayoko aawako kaflɔnkɔ ka kaamɛ, ni aaklapoosa kalakasɔ kayoko nwu nɛ; lɛklapoo nika lakaatɛɛ ku abule. 29 Koyoe nini, seyoyiɛ se baatofo baakyɔɔ ni ku lɛkpata nini lakaatɛɛ ku abule. Basɛfle lamana kayoko nwu ku lɛkpata nimuu diakyi. Lɛkaana nini labla afosi-anɛ nkpaa nna lɛblɛfɛ kafɔɔ labla afosi-ana nkpaa nnyɔ. 30 (Akpata nwu n-yoko be niamana kaflɔnkɔ ka kaamɛ diakyi ni lɛkaana labla afosi-ana nkpaa nnyɔ, lɛblɛfɛ kafɔɔ labla nkpaa nnɛ.) 31 Lɛkpata nini lakyɔɔ anu kaflɔnkɔ ka di kayi; baabla awɔsɔ baatika di ntɛɛntɛɛ seyoyiɛ nwu suoto, nkatakɔ nnɛ kafɔɔ niawɛ diofe ni osi nini.

32 Ninfɛ aakpaa mi aawako kaflɔnkɔ ka kaamɛ, di kufĩkatunkɔ lɛkyɛ, ni aaklapoosa kayoko nwu nɛ, diakaatɛɛ ku abule. 33 Koyoe nini, seyoyiɛ se baatofo baakyɔɔsa ni ku lɛkpata nini lakaatɛɛ ku abule. Kayoko nwu ku lɛkpata nini lawɛ basɛfle baakyisa amuu. Lɛkaana nini labla afosi-anɛ nkpaa nna, lɛblɛfɛ nini kafɔɔ labla afosi-ana nkpaa nnyɔ. 34 Lɛkpata nini lakyɔɔ anu kaflɔnkɔ ka niawɛ ni di kayi; baabla awɔsɔ baatika di ntɛɛntɛɛ seyoyiɛ nwu di ɛfankyi nwu ɛnyɔ suoto, nkatakɔ nnɛ kafɔɔ niawɛ diasifi ni osi nini.

35 Ninfɛ aakpaa mi aawako katookasɔ kayoko nwu, ni aaklapoosa ka nɛ. Diakaatɛɛ ku abule. 36 Fɛ mmle di koyoe nini, seyoyiɛ se baatofo baakyɔɔsa ni ku lɛkpata nini late nii, diawɛ basɛfle kafɔɔ baakyisa amuu. Lɛkaana nini labla afosi-anɛ nkpaa nna, lɛblɛfɛ nini kafɔɔ labla afosi-ana nkpaa nnyɔ. 37 Lɛkpata nini lakyɔɔ anu kaflɔnkɔ ka niawɛ ni di kayi; baabla awɔsɔ baatika di ntɛɛntɛɛ seyoyiɛ nwu di ɛfankyi nwu ɛnyɔ suoto, nkatakɔ nnɛ kafɔɔ niawɛ diasifi ni osi nini.

38 Leyo ninwii lawɛ ku kokloo di lɛkpata nwu di n-yoko nwu kaamɛ biala kamɛ, nfa manfoto ofiɛ asaaɔta sina nɛ. 39 Di kayoko nwu lɛkpata kamɛ yi, epunu ɛnyɔ layila di ɔfankyi biala, nsĩ suoto manlo ofiɛ asaaɔta, okpile asaaɔta ku lɛpɔɔ okpi asaaɔta babɔkɛɛ nɛ. 40 Di oyoyiɛ wɔ ninkpe ni di kayoko nwu lɛkpata kaayi, diakaako ni nkatakɔ be di katookasɔ kayoko lɛkyɛ yi, epunu ɛnyɔ layila, epunu ɛnyɔ kafɔɔ layila di nkatakɔ nwu kakyɛ nyɔɔfa lɛkyɛ. 41 Nioso epunu ɛna niayila di kayoko nwu kakyɛ kanwii, ɛna kafɔɔ layila di kakyɛ nyɔɔfa- epunu nwu emuu labla ɛnɛ- epunu nwu suoto manlo oleɔta babɔkɛɛ nɛ. 42 Ɛpunu ɛna be baawola ni ku afuɔ baata ni ofiɛ asaaɔta kafɔɔ layila ninfa, obiala lɛkaana labla anɛɛkpa afosi-atiɛ, lɛblɛfɛ labla anɛɛkpa afosi-atiɛ, lɛtaka kafɔɔ labla lefosi anɛɛkpa anɛ. Nsĩ suoto mantika mpamii be manlo ni ofiɛ asaaɔta babɔkɛɛ ku seleɔta bamba nɛ. 43 Baakakaasa amufũsaa nnya nnyɔ di oyoyiɛ omuu suoto baafenko, dibiala lɛkaana labla kɔnɛɛ lɛblɛfɛ. Sipunu nwu layila siata asaaɔta sina.

44 Di kayoko ka kaamɛ kayi lɛkyɛ, di kaflɔnkɔ ka kaamɛ kamɛ yi, ayo anyɔ lawɛ, ninwii lawɛ di katookasɔ kayoko lɛkyɛ diakyɔɔ anu kalakasɔ, lɛnyɔɔfa kafɔɔ lawɛ di kalakasɔ lɛkyɛ diakyɔɔ anu katookasɔ. 45 Ni aatɔkɔ mi alɛ, "Leyo le niɛkyɔɔ ni anu kalakasɔ ninle olebatatɛ ba nin-yɛ ni di olekatakɔ kanya lele nɛ. 46 Leyo le kafɔɔ niɛkyɔɔ ni anu katookasɔ ninle olebatatɛ ba nin-yɛ ni di oleɔta akyikye kanya lele nɛ. Mba mmle ninle Sadok babisuɔtɔbi ba lete ninle ni Lewi batii ba ninkpe ni osuku mantɛɛtɛɛ ni SAATE nwu alɛ baabla ni kasumu sɛsaabla di anu nɔɔ nɛ."

47 Ninfɛ aaklapoosa kaflɔnkɔ nwu nɛ: Nimuu lakyɛkyɛ- Lɛkaana nini labla kɔlafa afosi-akuɔ nkpaa nnɛ, lɛblɛfɛ nini kafɔɔ labla kɔlafa afosi-akuɔ nkpaa nnɛ. Oleɔta akyikye kafɔɔ lawɛ di olekatakɔ nwu anu.

48 Ninfɛ aakpaa mi aawako olekatakɔ nwu lɛkpata, ni aaklapoosa lɛkpata nwu ntɛɛntɛɛ seyoyiɛ nɛ; lɛblɛfɛ nisĩ labla nkpaa nnɛ di ɛfankyi nwu ɛnyɔ. Kayoko nwu lɛblɛfɛ labla afosi-anyɔ nkpaa nna, seyoyiɛ se baatofo baakyɔɔsa ni kafɔɔ lɛblɛfɛ labla nkpaa nnɔɔ di ɛfankyi nwu ɛnyɔ. 49 Lɛkpata nwu lɛblɛfɛ labla afosi-atiɛ nkpaa nna, diayɔ ni di sitũ diawa ni sɛmaa labla nkpaa afosi-anyɔ. Nkatakɔ lawɛ mankata manaadu ni nfa, akpaka kafɔɔ layila di ntɛɛntɛɛ oyoyiɛ biala ɔlɔɔkɔ.