1 Ninfɛ lanu SAATE nwu lalɛɛ ku sɛlɔ osie kanya alɛ, "Kpaa okpoo kplɛ nwu banyuntɛ fawako ninfũ, di obiala aklee lɛkpɛsaa di kɔnɛɛ nɔɔ." 2 Ni lanya basuɔtɔ bakuɔ lakye kayoko ka katoo niakyɔɔ ni katookasɔ lɛkyɛ anu baatɔɔwa nɛ, obiala laklee lɛkpɛsaa siene di kɔnɛɛ nɔɔ. Osuɔtɔ onwii niakpee ni akpeele fɛnɛnɛɛ lawɛ ku mma, di lɛsaa le mankpana ni asaa lasaka ni di ɔfankyi nɔɔ. Ni baawa baabayila di lɛbɔɔsaa sɛɛle oleɔta akyikye ɔlɔɔkɔ nɛ.

3 Ninfɛ di Israel Yaa nwu leklekle ladie di bakerubi nwu suoto di nfũ aayila ni aasifi osi, ni aakyɛ aasifi olekatakɔ nwu kayoko kanya nɛ. Ninfɛ di SAATE nwu lalɛɛ osuɔtɔ nwu niakpee ni akpeele fɛnɛnɛɛ, di lɛsaa le mankpana ni asaa lasaka ni di ɔfankyi nɔɔ nɛ. 4 Ni aatɔkɔ nwɔ alɛ, "Kyɛ faalaakyi Yerusalem okpoo kplɛ nwu faatɛ mba nikowi ni sɛnyaami ku sikududu nsũ di ntũ lɛma, di ayududusaa ya amuu bɔɔbla ni di okpoo kplɛ nwu kamɛ."

5 Lakyɔɔ atoko, ni aatɔkɔ babule alɛ, "Bitikanko nwɔ biekyi okpoo kplɛ nwu, bieloloo batii, bitan-nya nyaami ee baakpɛ ye nyaami. 6 Bilo basuɔtɔ nɔɔfo, bakosopo ku bakpeele, basanko ku babisɔ, kafɔɔ bitankpanko nnwɔ di nsũ ntika ni kuonwii. Bikyekasɔ di kakleklekɔ nii." Nioso baakye kasɔ ku banɔɔfo ba niawɛ ni di olekatakɔ nwu anu.

7 Ninfɛ aatɔkɔ ma alɛ, "Bikpɔnɔfɔsa olekatakɔ nwu biɛyɔ bakpi nwu bitɛtɛɛ di nflɔnkɔ nwu. Bitɔɔkyɛ!" Nioso baadie baasifi baalaakyekasɔ baatoolo batii di okpoo kplɛ nwu kamɛ. 8 Obe wɔ baatoolo ni batii, diabu ni lete nii yi, lafuusa anu kaasɔ, latoowi osie kanya nlɛ, "Ao, SAATE Kplɛ! Fɔɔwa Israel batii ba bamuu niebu basi ni nkpa ɔwɔɔsa di lɛblɔfiɛ yakayaka lɛfɔ le mmle foosoosa ni di Yerusalem suoto?"

9 Ni aatɔkɔ mi alɛ, "Israel ku Yuda batii sikpile ntoosii ɔpɔ; kasɔ nwu ntooyii ku ntɔ owii, okpoo kplɛ nwu kafɔɔ ntooyii ku onukwale ɔtanle. Boobuɛ alɛ, ‘SAATE nwu ntoosĩ kasɔ nwu; SAATE nwu dilɔɔnya.’ 10 Nioso namanya ma nyaami ee n-yɔ nkyɛ ma, kafɔɔ kamasoosa lɛsaa le bɛɛbla ni ntika di mma bamu nsintɛɛ."

11 Ninfɛ di osuɔtɔ nwu niakpee ni akpeele fɛnɛnɛɛ, di lɛsaa le mankpana ni asaa lasaka ni di ɔfankyi nɔɔ lakplesa kanya aawako, aabuɛ alɛ, "Ntɔɔbla fɛ mmle faabuɛ nii."