1 Ni di SAATE nwu ɔlaa lawa kuatɛɛ alɛ: 2 "Otii obi, nnya ɔlaa wɔ di SAATE Kplɛ nwu kobuɛ antɔkɔ ni Israel kasɔ alɛ: Kalookɔ! Kalookɔ ntɔɔwa di kasɔ akɔ ana nwu suoto. 3 Kalookɔ nwu nfɛ ntika ye di suoto, kamanyɛɛnɛ ni ɔblɔ nii kafɔɔ nkpete ni di suoto lee. Kamakanko ye di ɔsaabla lee kanya, ninta ye letota kafɔɔ di ayududusaa lee sɛsaabla suoto. 4 Namanya ye nyaami ee n-yɔ nkyɛ ye; nwaako kamata ye koto di ɔsaabla ku ayududusaa ablasaa lee ya ninsi ye ni kaamɛ. Ni bibatofo bilɛ ami ninle SAATE nwu nɛ.

5 "Nnya ɔlaa wɔ di SAATE nwu kobuɛ ni alɛ: Ɔlaa otũ kɔwa! Ɔlaa otũ wɔ minadinu ni kɔwa. 6 Kalookɔ ntɔɔwa! Kalookɔ ntɔɔwa! Katɔɔtakatɛsa suoto nika katoo di suoto lee. Kalookɔ ntɔɔwa! 7 Kawɔɔ ntɔɔwa di suoto lee- aye ba ninsi ni di kasɔ nwu suoto. Obe nwu ntoowo, dii nwu ntɔɔtɛɛtɛɛ; difu nfɛ nkpe, diele suoto lɛyɔɔ di abokote nwu suoto. 8 Nfɛ kamanyɛɛnɛ ɔblɔ yakayaka nii nkpete ye di suoto, ninsoosa kafɔɔ lɛblɔfiɛ nii di suoto lee; kamakanko ye di ɔsaabla lee kanya, nta ye koto kafɔɔ di ayududusaa ablasaa lee amuu suoto. 9 Namanya ye nyaami ee n-yɔ nkyɛ ye; kamata ye koto di mmle di ɔsaabla lee nte ni kanya ku ayududusaa ablasaa ya ninsi ye ni kaamɛ. Ninfɛ bibatofo bilɛ ami SAATE nwu ninta letoko nanfi nɛ.

10 "Nyu lo, dii nwu ntoowo! Ditɔɔwa! Kawɔɔ lee ntɔɔtɛɛtɛɛ, kawesee nwu ntoodie afata, lɛkanta ntookpee atoto! 11 Amumu ɔbla ntoomuɔ eekple kawesee kɛɛta alɛ baananfi asiensiesaa kootoko; batii kubanwii dilɔbabu, dikudi kuninwii dilɔbabu- lɛsaawɛ kuninwii dilɔbawɛ, lɛsaa le niefũ ni kɔya kuninwii dilɔbawɛ. 12 Obe nwu ntoowo, dii nwu ntɔɔbabuo. Tanta asaayatɛ lapɔ ee asaasunsũtɛ labuo sɛnyaami, diekye lɛblɔfiɛ yakayaka nfɛ ntika di batii dikudi nwu nimuu suoto. 13 Asaasunsũtɛ dilɔbakple afũ kasɔ ka aasunsũ ni di obe wɔ di akyuu lɛma nwu anyɔ basi ni nkpa. Diekye blɔbasinkplesa odiki otuo wɔ bɛɛnya ni di batii dikudi nwu nimuu suoto. Ta sikpile lɛma oso yi, kuonwii lɛma dilɔbafuo nkpa nɔɔ ofũ. 14 Kuntɛ bɛɛfɛ dikyikyoo beelolaa kafɔɔ lɛsaa biala bɛɛtɛ yi, kuonwii dilɔbakyɛ kakpɛ, diekye lɛblɔfiɛ yakayaka nii nfɛ ntika di batii dikudi nwu nimuu suoto.

15 "Kapamii nkpe di kɔba sɛɛmaa, ofiɛ kpile ku kɔka nsi di kamɛ; mba ninsi ni di lepoo kamɛ kamakpi di kapamii kanya, ofiɛ kpile ku kɔka kafɔɔ kamabɛbɛɛ mba ninsi ni di okpoo kplɛ kamɛ. 16 Mba bamuu niɛwɛ ni nkpa beetoso ni kamawɛ di abokote. Obiala mantootũuni fɛle sɛtaata kamɛ alaapɔɔ, ta obiala sikpile nɔɔ oso. 17 Kɔnɛɛ biala kamakpɔnɔɔ, dikunkyi biala kafɔɔ kamate kpiɛkpiɛ fɛ ntu. 18 Babanyukũ aboko mansiɛ kafɔɔ di lɛyɛkɛ kamɛ. Babatĩi anu lɛma ku sinunsɔ, mankpaasu asi lɛma kafɔɔ. 19 Babafuki koto fututu lɛma mantɛ di akpaka, koto sɛɛle lɛma kafɔɔ kamale lɛsaa le ninanklekle nii. Koto sɛɛle ku koto fututu lɛma dilɔbafuo ma odiki di SAATE nwu lɛblɔfiɛ yakayaka dii nwu suoto. Blɔbayɔ bakya kɔka lɛma ee bayiisa nfutu lɛma ku nni, diekye nni niata ma baatuula baabuo di okpile kamɛ nɛ. 20 Baakanta di anyɛnɛ lɛma ya niatɔɔlɛ ni onyu suoto, ni baayɔ nya baabla diyududusaa afiɔtii ku atɛmbi nyakatãa ninya nɛ. Nkpo oso kamamunikĩisa nya mbla lɛsaa le ninanklekle ni nta ma. 21 Kamayɔ ni nimuu nkpee di bafɔɔ nnɛɛ fɛ kakpɛ kamɛ lɛsaa, fɛ diyusaa kafɔɔ nta bakpiletɛ di kasɔ suoto, nkpɔnɔfɔsa ni. 22 Kamakyisa anu nii di suoto lɛma, mankpɔnɔfɔsa lɛba nii le niefũ ni kɔya kafɔɔ; bayu kamabuo ni kamɛ mankpɔnɔfɔsa ni.

23 "Bla sɛkpɛnkyɛ, diekye kasɔ nwu ntooyii ku ntɔ owii, okpoo kplɛ nwu kafɔɔ ntooyii ku amumu ɔbla. 24 Kamakpaa nnle be niɛtɛ bakpe ni amumu balenke ni n-wako mammafũ ayo lɛma; kamayɔ sientɛ nwu suoto katoo ɔtakatɛ n-wako kalookɔ, mankpɔnɔfɔsa kafɔɔ nkleklekɔ lɛma nwu. 25 Nse difu lɛwa, babamiɛ atoko ɔkyɛ ole, kafɔɔ kuninwii dilɔbawɛ. 26 Anyanyasaa di anyanyasaa suoto kamawa, ku alɛ, alɛ di alɛ, alɛ suoto. Babamiɛ alɛ baawɛ odiki otuo mankyeko ɔlaabuɛtɛtɛ nfũ; olebatatɛ kufiofa asaa otuo kamayu, nkpo kafɔɔ di banɔɔfo kɔkà kamayu nɛ. 27 Ɔka nwu kamawi, ninta nnɛɛ nfee ɔnɔɔfotii nwu, batii nnɛɛ di kasɔ nwu kafɔɔ kamatũtũkũ. Kamablako suoto lɛma ɔkpɛ di ɔsaabla lɛma kanya, kamakanko ma kafɔɔ di n-yilakɔ lɛma mmu kanya. Ninfɛ babatofo alɛ ami ninle SAATE nwu nɛ."