HESEKIEL 35

Yaa Lananfi Edom Kootoko

1 Ni di SAATE nwu ɔlaa lawa kuatɛɛ alɛ: 2 "Otii obi, yɔ anu lɛfɔ fakyɔɔ Seir Kobokote; faabuɛ ɔlaa fatɛ ninkũ suoto. 3 Buɛ falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Seir Kobokote, lɛtaka n-yɛ fɔ di suoto, kamananfi kɔnɛɛ nii kafɔɔ nkyɔɔ di suoto lɛfɔ, nimbla fɔ fanlalaa fante kufukuti. 4 Kamata sekpoo lɛfɔ mbibiɛ, fante kafɔɔ ofukuti. Ninfɛ fabatofo falɛ ami ninle SAATE nwu nɛ.

5 " ‘Ta katiikyidi ka niawɛ fɔ ni, diayɔ ni saa, faayɔ Israel batii faata baalo ni ku kapamii, di obe wɔ kamɛ di ɔlaa kpile latũ ma ni, di letokonanfi lɛma nwu ladu ni kayɛntɛlekɔ nini oso yi, 6 nkpo oso nwaako lɛnya nkpe ni nkpa, SAATE Kplɛ nwu niebuɛ alɛ, kamayɔ fɔ nta ntɔ owii kaasɔ, dibatikanko fɔ kafɔɔ. Di obe wɔ fanankyidi ni ntɔ owii oso yi, ntɔ owii nwu kamatikanko fɔ. 7 Kamata Seir Kobokote nlalaa kunte kufukuti, nin-wɔɔsa kafɔɔ batii ba bamuu ninkyɛ, mankple ni ndiki ninkũ suoto. 8 Kamata abokote lɛfɔ n-yii ku bakpi; mba beelo ni ku kapamii kamanɔɔ mante di akpenkpe lɛfɔ suoto ku sɛtaata lɛfɔ ku kɔwɛ lɛfɔ amuu kamɛ. 9 Kamata fɔ fante ofukuti dinaa ni kaloo; batii dilɔbawɛ di sekpoo lɛfɔ nwu kamɛ. Ninfɛ fabatofo falɛ ami ninle SAATE nwu nɛ.

10 " ‘Diekye faabuɛ falɛ, "Nnle be mmle nwu nnyɔ ku nsɔ be kamale wo n-le, bubafũ mi ni kafɔɔ," nu di ami SAATE nwu lawɛ ninfa, 11 nkpo oso nwaako lɛnya nkpe ni nkpa yi, SAATE Kplɛ nwu niebuɛ alɛ, kamabla ye di mmle kanya biadiki ɔblɔ ku sɛsɔfɔwo ɔkpɛ biatuo ni di okyidi lee wɔ biakyidi ma ni kamɛ, ni ami kafɔɔ kamadiki suoto nii ntuo di kamɛ lɛma nse lɛkanko fɔ. 12 Ninfɛ bibatofo bilɛ ami SAATE nwu ntoonu sɛlaakuu se biabuɛ ni di Israel abokote nwu suoto. Biabuɛ bilɛ, "Batɔɔlalaasa nya bɛɛtɛ nii, ni bɛɛyɔ nya bɛɛta wo alɛ buabɛbɛɛ nɛ." 13 Biabla akantasaa di suoto nii, biakakatɛ kafɔɔ di suoto nii biawaalɛsa, kafɔɔ lanu sĩ. 14 Nnya ɔlaa wɔ di SAATE Kplɛ nwu kobuɛ ni alɛ: Di obe wɔ di kasɔ nwu kamuu kɔnya ni suoto lɛyɔɔ, kamata fɔ fante ofukuti. 15 Ta faanya ni suoto lɛyɔɔ di obe wɔ di Israel batii atesaa late ni afukuti oso yi, nkpo okle kamabla fɔ nɛ. Fabate ofukuti, Ao Seir Kobokote, afɔ ku Edom omuu. Ninfɛ babatofo alɛ ami ninle SAATE nwu nɛ.’ "