1 Ninfɛ di SAATE nwu ɔlaa lawa kuatɛɛ alɛ: 2 "Otii obi, batii ba ninkpe ni otokopĩ kamɛ fasi. Bakpe anumbi alɛ baanya kafɔɔ blɔɔnya, bakpe atoko alɛ baanu kafɔɔ bloonu, diekye batokopĩtɛ bale.

3 "Nkpo oso, otii obi, kpee atoo lɛfɔ fata sɛlanle kamɛ osifi di anu-nwaa kamɛ, di obe wɔ boonyu nii yi, die di lɛba le fakpe ni, faayefe osuku fasifi lɛba bamba. Nu bale batokopĩtɛ yi, loobia babanu kasɔ. 4 Di anu-nwaa kamɛ, di obe wɔ boonyu nii yi, dieko atoo lɛfɔ ya feekpee fɛɛta ni sɛlanle kamɛ osifi fawako kayi. Di kɔtɔɔfɔ obe kamɛ, di obe wɔ boonyu fɔ ni yi, faadie fasifi fɛle mba ninsifi ni sɛlanle kamɛ. 5 Dufu oyoyiɛ di obe wɔ boonyu fɔ ni, faadieko atoo lɛfɔ fafenko di oyoyiɛ nwu kamɛ. 6 Yɔ nya fatika di nimuusi lɛfɔ di obe wɔ boonyu fɔ ni, faatuka nya fadieko di obe di kayi nfɛ kɔwɔfɔ ni. Tĩi anu lɛfɔ di mmle flɔbanya ni kasɔ nwu. Diekye ntɔɔyɔ fɔ lɛbla dituosaa lɛta Israel batii."

7 Nioso labla fɛ mmle baatɔkɔ mi nii. Ladieko atoo nii ya lakpee lata ni sɛlanle kamɛ osifi di anu-nwaa lawako kayi. Ni di kɔtɔɔfɔ obe kamɛ ladufu oyoyiɛ nwu ku nnɛɛ nii nɛ. Ninfɛ ladieko atoo nii kayi di obe wɔ di kayi nfɛ kɔwɔfɔ nii, latika nya di amuusi nii di obe wɔ baatoonyu mi ni nɛ.

8 Ni di SAATE nwu ɔlaa lawa kuatɛɛ di olesɛ nwu alɛ: 9 "Otii obi, Israel batii batokopĩtɛ nwu diɛkaalɛ fɔ alɛ, ‘Obe lɛsaa fɔɔbla?’

10 "Tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Lɛkakatɛ le mmle lɛyɔ nwu ole di ɔka wɔ ninkpe ni di Yerusalem suoto ku Israel batii ba bamuu ninkpe ni ninfa.’ 11 Tɔkɔ ma falɛ, ‘Ami, Hesekiel nle dituosaa lɛta ye.’

"Fɛ mmle lɛbla ni yi, nkpo okle bababla ma nɛ. Babasifi sɛlanle kamɛ fɛ balanle.

12 "Ɔka wɔ ninsi ni di kamɛ lɛma kamayɔ atoo nɔɔ antika di nimuusi di obe wɔ di kayi kɔwɔfɔ ni aandie ansifi, babadufu kafɔɔ kutuɛ manfenko di oyoyiɛ mantɔɔ aanfe. Abatĩi anu nɔɔ alɛ ɔlɔbafuo kasɔ nwu ɔnya. 13 Kamafukuti asawu nii ntɛ nwɔ, ninta dikyĩ nii mmufũ nwɔ; kamakpaa nwɔ n-wako Babel, Kaldea batii kasɔ suoto, kafɔɔ ɔlɔbanya ka, ni nfa kafɔɔ abakpi nɛ. 14 Kamasamiisa batii ba bamuu niɛmana nwɔ beekyi ni nkpete di kɔfɛɛfɔ kamɛ- bakpɛntɛ nɔɔ ku bakpɛtɛ akudi nɔɔ amuu- kamananfi kafɔɔ kapamii ntikanko ma.

15 "Nse lɛsɛ ma lekpee di nnle nwu kamɛ, lɛsamiisa ma kafɔɔ lekpete di nsɔ nwu suoto yi, ni babatofo alɛ ami ninle SAATE nwu nɛ. 16 Kafɔɔ kamata batii lɛma basɛɛ ntoso di kapamii, kɔka ku ofiɛ kpile kanya, di mmle di nnle be kamɛ boofe ni katofo ni ayududusaa sɛsaabla lɛma nwu simuu. Ninfɛ babatofo alɛ ami ninle SAATE nwu nɛ."

17 Ni di SAATE nwu ɔlaa lawa kuatɛɛ alɛ: 18 "Otii obi, le alesaa lɛfɔ di ditũtũkũ kamɛ, nyi ntu lɛfɔ kafɔɔ ku nkyenkye di lɛyɛkɛ kanya. 19 Buɛ fatɔkɔ kasɔ nwu kamɛ batii falɛ: ‘Nnya ɔlaa wɔ di SAATE wɔ Ninlenke ni lebuɛ eekyeko ni batii ba ninsi ni di Yerusalem ku Israel batii kasɔ suoto alɛ: Babale alesaa lɛma di lɛyɛkɛ kamɛ man-nyi ntu lɛma kafɔɔ ku nkyenkye, diekye lɛsaa biala di kasɔ lɛma suoto kamawɔɔ ninwu kamɛ ta batii ba bamuu ninsi ni ninfa amumu oso. 20 Sekpoo se di batii nsi ni kamalalaa sinte, kasɔ nwu kafɔɔ kamate kafukuti. Ninfɛ bibatofo bilɛ ami ninle SAATE nwu nɛ.’ "

21 SAATE nwu ɔlaa lawa kuatɛɛ alɛ: 22 Otii obi, obe ninle lɛkpa le mmle mimbuɛ ni di Israel kasɔ suoto bilɛ: ‘Ayi nfe, odiki otuo biala kafɔɔ ninwa kaanya’? 23 Nioso tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Kamata lɛkpa le mmle obuɛ n-wa kaasekɔ, blɔbasimpɛ lɛkpa nwu kafɔɔ di Israel.’ Tɔkɔ ma falɛ, ‘Ayi ntɔɔtɛɛtɛɛ di odiki otuo biala kamawa ni kaanya. 24 Diekye sɛlaa ku afunu odiki otuo dilɔbasinwɛ, ee ɔnyamɛnɛfɛ asaa ɔnya diwɛ di Israel batii suoto. 25 Kafɔɔ ami SAATE nwu kamabuɛ ɔlaa wɔ kamabuɛ nii, dibawa kaanya kafɔɔ kunɔmakpi ni kamaa. Diekye aye batokopĩtɛ, di ayi lee kamɛ yi, kamabla di ɔlaa lele lebuɛ ni kanya, SAATE Kplɛ nwu niebuɛ.’ "

26 Ni di SAATE nwu ɔlaa lawa kuatɛɛ alɛ: 27 "Otii obi, Israel batii kobuɛ alɛ, ‘Odikiotuo wɔ annya ni kamawa di alɛɛ kpinwu ya nikɔwa ni sɛmaa, ambuɛ sɛlaa antɛ kafɔɔ di kayi kamaa ka niekyo ni suoto.’

28 "Nkpo oso tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Sɛlaa nii kusinwii dilɔbasinkpi kamaa diidii; ɔlaa lele lebuɛ kamawa kaanya, SAATE Kplɛ nwu niebuɛ.’ "