1 "Afɔ otii obi, buɛ ɔlaa fatɛ di Gog suoto faabuɛ falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Oo Gog, Mesek ku Tubal ɔka kplɛ, lɛtaka n-yɛ fɔ di suoto. 2 Kamamumunikĩisa fɔ nkyiko, ninanfi fɔ nkyɛnko sitũ. Kamakpaa fɔ nkyeko katookasɔ fanfa nwako, nintɔɔ fɔ nkpee Israel abokote suoto. 3 Ni kamataa kɔtaa lɛfɔ nkyeko kɔmɛntunɛɛ lɛfɔ, ninta akplɔ lɛfɔ kafɔɔ nkpakpaa di koletanɛɛ lɛfɔ. 4 Israel abokote osi fabanɔɔ, afɔ ku bakpɛtɛ lɛfɔ bamuu ku nnle be ninkpe ni ku afɔ. Kamayɔ fɔ nta alente ateate ku lepoo kamɛ babɔkɛɛ fɛ alesaa. 5 Fabakpi fante di lepoo kamɛ, diekye ami niɛkakatɛ, SAATE Kplɛ nwu niebuɛ. 6 Kamadiki ɔtɔ nkpee Magog ku mba ninsi ni di atoko ɔkyɛ ole kamɛ di lekpo kotoko nsɔ suoto, ni babatofo alɛ ami ninle SAATE nwu nɛ.

7 " ‘Kamata mantofo leyooto nii klekle nwu di batii nii Israel kamɛ. Nɔmasinta bakpɔnɔfɔsa leyooto nii klekle nwu. Ni di nnle nwu kafɔɔ kamatofo alɛ ami SAATE nwu ninle Klekletɛ nwu di Israel nɛ. 8 Nfɛ diɔwa! Nwaako dibawa kaanya, SAATE Kplɛ nwu niebuɛ. Nle mmle ninle dii le suoto lakakatɛ ni nɛ.

9 " ‘Nioso batii ba ninsi ni di Israel sekpoo kamɛ kamadie mankyɛ manaayɔ akpɛsaa mambla ntɔɔni manfiɛ- kubiafunsaa akplɛ ku abiibii, kɔtaa ku akplɔ, kakpɛ nwosoku ku akplɔ kaanale. Babayɔ nya mambla ntɔɔni alɛɛ akuɛnsĩ. 10 Dilɔbasinfĩ alɛ baalaabudi ntɔɔni mankyeko afe ee babudi mi bakyeko apoo kamɛ, diekye babayɔ akpɛsaa nwu mambla ntɔɔni. Babafũ kafɔɔ kakpɛ kamɛ asaa lɛma ya di batii ba niafũ ma ni ale nfũ. Man-yu kafɔɔ batii ba niayu ma ni ale, SAATE Kplɛ nwu niebuɛ.

11 " ‘Di dii nwu nkpo kale yi, kamata Gog batii kakookaakɔ di Israel, di ɔtaata wɔ di batii ba ninkyɛ ni osuku di kufĩkatunkɔ diofe ni Lekpo lɛkyɛ. Batii kakookaakɔ nwu kamasɛɛ osuku bakyɛntɛ osuku, diekye babakookaa Gog ku batii ɔlambu nɔɔ ninfa. Nioso babalɛɛ lɛba nwu alɛ Hamon Gog Ɔtaata.

12 " ‘Israel batii kamatookookaa ma awɛntɛ akuɛnsĩ amu, ta mmle baakleklesa ni kasɔ nwu oso. 13 Kasɔ nwu batii bamuu kamakookaa ma, di dii le kafɔɔ babakpee mi ni dibu kamale onyuma dii ninta ma, SAATE Kplɛ nwu niebuɛ.

14 " ‘Babafũ batii mantookleklesa kasɔ nwu obe lele. Bawo kamakyɛ manfe di kasɔ nwu kamuu suoto, diɛkyakaa ni ku mma kafɔɔ yi, babamba kamakookaa bakpi ba niebu bate ni kaasɔ. Di awɛntɛ akuɛnsĩ nwu kayɛntɛkɔ babakye okyi lɛma nwu kasɔ. 15 Nse bookyikyii kasɔ nwu, di onwii lɛma lɛnya otii dikufi lewo yi, abayɔ nsũ lɛtɛsaa antɛ di ɔlɔɔkɔ nini, ninaase di obe wɔ di ɔkya bakututɛ lekookaa ni dikufi nwu di Hamon Gog Ɔtaata nwu. 16 (Okpoo wɔ manlɛɛ ni Hamona kafɔɔ kamawɛ ninfa.) Nkpo babakleklesa kasɔ nwu nɛ.’

17 "Kafɔɔ afɔ Otii obi, nnya ɔlaa wɔ di SAATE Kplɛ nwu kobuɛ ni alɛ: Tɔkɔ bakansiɛ ateate biala ku lepoo kamɛ babɔkɛɛ bamuu falɛ: ‘Bisi, biekye kakɔ biala biwa oleɔta wɔ kɔbla nta ye ni, oleɔta kplɛ nwu di Israel abokote suoto. Nfa bibawee sina min-nyi ntɔ nɛ. 18 Bibawee basientɛ sina, min-nyi kafɔɔ kasɔ baka ntɔ, fɛ akunumuu ku bafoso, batie ku banankyue-suɔtɔ bale- di bamuu lɛma bale ni babɔkɛɛ ba ninsi ni lɛla beekye ni Basan. 19 Bibawee lɛla ninaase di obe wɔ biemiɛ nii, min-nyi ntɔ kafɔɔ ninaase ni di obe wɔ dibasiɛnsa ye ni di oleɔta wɔ kɔbla nta ye ni kalekɔ. 20 Bibawee bapɔnkɔ ku bapɔnkɔ basiɛtɛ, basientɛ ku bakpɛtɛ ateate sina mim-miɛ di opunu nii suoto,’ SAATE Kplɛ ni niebuɛ.

21 "Kamayɔ leklekle nii ntɛ di nnle nwu kamɛ, nnle nwu mmuu kafɔɔ kamanya letokonanfi le lɛnanfi ni ku kɔnɛɛ ko letika ni di suoto lɛma. 22 Diɛyɔ ni di dii nwu nkpo diesifi nii, Israel batii kamatofo alɛ ami ninle SAATE Yaa lɛma. 23 Ni di nnle nwu kamatofo alɛ Israel batii lasifi sɛlanle kamɛ ta sikpile lɛma oso nɛ, diekye batale onukwale baatɛɛ. Nioso lakyisa anu nii di suoto lɛma, ni layɔ ma lakpee di balo lɛma nnɛɛ, ni di bamuu lɛma baanɔɔ di kapamii kanya nɛ. 24 Lablako ma suoto ɔkpɛ di ɔtanklekle lɛma ku ɔtanlolaa ɔbla lɛma kanya, ni lakyisa anu nii di suoto lɛma nɛ.

25 "Nkpo oso nnya ɔlaa wɔ di SAATE Kplɛ nwu kobuɛ ni alɛ: Nfɛ kamakplesa Yakob nkyeko sɛlanle kamɛ n-wako, kamanya kafɔɔ Israel batii bamuu nyaami, kamakpɛ kafɔɔ sɛsɔfɔwo osie kanya nta leyooto nii klekle. 26 Babayee sinunsɔ lɛma ku onukwale ɔtanle lɛma wɔ baadiki baatuo mi ni omuu nse basi di atoko ɔkyɛ ole kamɛ di kasɔ lɛma suoto, di otii kuonwii nnaa abayɛkɛsa ma nii. 27 Nse lɛkpaa ma lekyeko nnle nwu kamɛ, lesiisa ma kafɔɔ lekyeko balo lɛma nsɔ nwu lɛwako yi, kamadiki suoto nii leklekle ntuo nfenko di suoto lɛma, di nnle kpinwu anu. 28 Ninfɛ babatofo alɛ ami ninle SAATE Yaa lɛma nɛ. Diekye, kuntɛ latɔɔ ma lakpee sɛlanle kamɛ di nnle nwu kamɛ yi, kamasiisa ma n-wako kasɔ lɛma kamu suoto, nɔmadiɛ kuonwii ntɛ. 29 Nɔmasinkyisa anu nii di suoto lɛma, diekye kamanyɛɛnɛ Ninwuna nii nkpete di Israel batii suoto, SAATE Kplɛ nwu niebuɛ."