1 Ni di SAATE nwu ɔlaa lawa kuatɛɛ alɛ: 2 "Otii obi, tũ oku, faapɛ kafɔɔ Israel leyo lɛkpa. 3 Tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Klikpo kplɛ onwii ku afoko kplɛ ku selonkoo kaanale siapɛpɛɛ ni kafɔɔ ku afa ateate di suoto lawa Lebanon. Ni aabamufũ sedar kowoso kunwii nsintɛɛ, 4 aafee ɔnyaɔnya nikũ, aayɔ nwu aasifiko asaa basunsũtɛ kasɔ kanwii suoto, ni aayɔ nwu aalaasɔ di asaabayatɛ okpoo kplɛ kamɛ nɛ.

5 " ‘Ni aayɔ kasɔ lɛfɔ lewosobi lewo aalaapɛ di kasɔ ka ninsi ni lɛla suoto nɛ. Aapɛ ni fɛle pamplo di nfũ di ntu nte ni kpinwu, 6 ni diakɔntɔ diabakple nta kowoso kuafukiti kuatĩi kasɔ nɛ. Sɛla nikũ lamunikĩi siakyɔɔ nwɔ anu, kafɔɔ sidu nikũ laka di kalɔ nikũ. Nioso kuabakple nta kowoso, ni di sɛla latataa siadie kafɔɔ afata nɛ.

7 " ‘Kafɔɔ klikpo kplɛ bamba wɔ niawɛ ni afoko kplɛ ku selonkoo kpinwu di suoto lawɛ. Kanunua yi, nta kowoso nwu lakɛnsa sidu nikũ di lɛba le baasɔ kũ ni siakyɔɔ nwɔ anu, ni siananfi sɛla nikũ siakyɔɔ alɛ okpete kũ ntu nɛ. 8 Kasɔ biene suoto baasɔ kũ di ntu kpinwu kotoko di mmle kuatataa ni sɛla, kuntika abi kunkple ni kafɔɔ nta kowoso nwaa.’

9 "Tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Kubawɛ nkpa? Blɔbapɔ kũ bakpakpaa kafɔɔ awosobi ninya alɛ kuyɔɔ? Sɛla nikũ fɔle simuu kamayɔɔ. Diele kɔnɛɛ siene ee batii kpinwu babayɔ mampɔ kũ ku sidu nikũ. 10 Nse bia beesifi kũ bɛɛlase lɛsɔ, kubawɛ nkpa? Kulɔbayɔɔ fɛɛ, nse kufĩkatunkɔ afɛɛfɔ lɛfɛ kũ- kulɔbakpi di kasɔ ka suoto bɛɛsɔ kũ ni?’ "

11 Ninfɛ di SAATE nwu ɔlaa lawa kuatɛɛ alɛ: 12 "Kaalɛ batokopĩtɛ leyo le mmle falɛ, ‘Bienu asaa ya mmle kasɔ?’ Tɔkɔ ma falɛ: ‘Babel ɔka lakyɛ Yerusalem aalamufũ ɔka nɔɔ ku banɔɔfotii nɔɔ finle, aakpaa ma aawako Babel. 13 Ninfɛ aadiki otii onwii di ɔka leyo kamɛ aabla kanya ninii ku nnwɔɔ, ni aayɔ nwɔ aakpee di ntam kalɔ nɛ. Aakpaa kafɔɔ kasɔ nwu batunletɛ aasifiko, 14 di mmle di sɛka kalekɔ nwu kawa ni kasɔ, alɛ kalaasinfuo ni okple ɔtaka, alɛ sɛka kalekɔ nwu kaayila di kanya ninii nɔɔ nwu omufũ okle lete suoto. 15 Kafɔɔ ɔka nwu lataka aayila nwɔ di suoto, ni aakpee batii nɔɔ baakyɛ Egipte baalaakpaa bapɔnkɔ ku bakpɛtɛ kpinwu baawako nɛ. Dibalɛ ɔkyɛ nintɔɔ? Otii wɔ nimbla ni asaa ya mmle kamafuo otoso osifi? Abafukuti kanya ninii nwu, antoso kafɔɔ ansifi?

16 " ‘Nwaako lɛnya nkpe ni nkpa yi, SAATE Kplɛ nwu niebuɛ alɛ, ɔɔwa ɔbakpi di Babel, di ɔka wɔ niesiɛsa nwɔ ni di lɛkakpomii suoto kasɔ, nnwɔ ntam aanyu ni nyakatãa ku nnwɔ kanya ninii aafukuti nii. 17 Nse bɛɛpɛ atii beetofo kafɔɔ seyoyiɛ beekyisa alɛ bɔɔwɔɔsa batii kpinwu yi, Farao ku bakpɛtɛ siene nɔɔ ku batii ɔlambu dilɔbafuo nwɔ ɔkyakaako di kakpɛ kamɛ. 18 Aanyu ntam nwu nyakatãa di kanya ninii le aafukuti ni suoto. Ta aakpee ni kɔnɛɛ nɔɔ di ɔlaa wɔ aabuɛ aatɛ ni kamɛ, aabla ni asaa ya mmle amuu kafɔɔ oso yi, ɔlɔbafuo otoso osifi.

19 " ‘Nkpo oso, nnya ɔlaa wɔ di SAATE Kplɛ nwu kobuɛ ni alɛ: Nwaako lɛnya nkpe ni nkpa, kamasoosa ntam nii be eenyu ni nyakatãa ku kanya ninii nii le eefukuti ni ntika nwɔ di nsintɛɛ. 20 Kamafukuti asawu nii ntɛ nwɔ, dikyĩ nii kafɔɔ kamamufũ nwɔ. Kamakpaa nwɔ n-wako Babel nimakanko nwu ninfa, diekye atale onukwale aatɛɛ. 21 Bakpɛtɛ nɔɔ akudi ya amuu nikotoso ni kamanɔɔ di kapamii kanya, babasamiisa mba kafɔɔ nimawɛ ni nkpa mankpee di afɛɛfɔ kamɛ. Ninfɛ bibatofo bilɛ ami SAATE nwu niakakatɛ nɛ.’"

22 " ‘Nnya ɔlaa wɔ di SAATE Kplɛ nwu kobuɛ ni alɛ: Ami omu nii kamafee sedar kowoso nsintɛɛ ɔnya ninaasɔ nwu; kamafee kayereyerekɔ nkyeko nsintɛɛ ninwu ɔla yɛntɛle suoto ninaasɔ nwu di kobokote takale ko ninte ni kyookyoo suoto. 23 Kamasɔ kũ di Israel kobokote ko niɛtaka kulenke ni suoto; kubatataa sɛla kuntika abi kumakple kafɔɔ sedar kowoso ko nikɔlɛ ni onyu nwaa. Bakansiɛ ateate biala kamabla ayo ninkũ kamɛ; babawɛ kasiɛkɔ di sɛla ninkũ oyududu kamɛ. 24 Awoso nwu amuu di lepoo kamɛ kamatofo alɛ ami SAATE nwu ninwakosa kowoso takale kasɔ, nta kafɔɔ kowoso ko niɛwa ni kasɔ ntaka nɛ. Ami ninta kowoso kɔnle nkoso, nta kafɔɔ kowoso kosole nfukuti.

" ‘Ami SAATE nwu niɛkakatɛ, kamabla ni kafɔɔ.’ "