1 Ninfɛ di osuɔtɔ nwu lakpaa mi aasifiko kaflɔnkɔ nwu kayi lɛkyɛ katookasɔ, ni aakpaa mi aawako ayo nwu niakyɔɔ ni anu olekatakɔ nwu kaflɔnkɔ ku oyoyiɛ wɔ di kayi katookasɔ lɛkyɛ nɛ. 2 Leyo le kokloo niakyɔɔ ni anu katookasɔ lɛkyɛ lɛkaana labla kɔlafa-afosi-akuɔ nkpaa nnɛ, lɛblɛfɛ kafɔɔ labla afosi-anɛ nkpaa nna. 3 Aakya baawo di kaflɔnkɔ ka niale ni afosi-atiɛ nkpaa nna diayɔ ni di kaflɔnkɔ ka kaamɛ diakyɔɔ ni anu kafɔɔ di kaflɔnkɔ kafenkɔ ka baatɛ ni afuɔ kaasɔ di kayi lɛkyɛ, sebombo late siakyɔɔ bawo anu di ayo ya beetofo ni di sitika sitiɛ kamɛ. 4 Osuku late kaamɛ di ayo nwu anu, lɛblɛfɛ ninwu labla lefosi nkpaa nkuɛnsĩ, lɛkaana kafɔɔ labla kɔlafa-afosi-akuɔ nkpaa nnɛ. Akloo lɛma lawɛ di katookasɔ lɛkyɛ. 5 Nioso yi, koyoe ko niatika ni di osi lamaamaa, diekye sebombo nwu lafũ obo kpinwu sialenkee koyoe ko niawɛ ni di kalɔ ku ayo nwu ntɛɛntɛɛ ale. 6 Koyoe ko niatika ni di ditika tiɛfa suoto ditawɛ akpaka, fɛ mmle di nflɔnkɔ nwu lawɛ nii; nioso n-ya niatika ni di osi labiibii aalenkee n-ya niawɛ ni di kalɔ ku ntɛɛntɛɛ. 7 Oyoyiɛ onwii lakyɔɔ anu koyoe nwu kaflɔnkɔ ka niawɛ ni di kayi lɛkyɛ; lɛkaana ninwu labla afosi-anɛ nkpaa nna dialaadu ayo nwu anu. 8 Diekye di koyoe ko niayila ni di lɛkyɛ le niakaako ni kaflɔnkɔ ka di kayi lɛkyɛ labla afosi-anyɔ nkpaa nna, n-ya kafɔɔ niatɛ aayila aakaako ni kakleklekɔ nwu lɛkaana labla kɔlafa-afosi-akuɔ nkpaa nna. 9 Kalɔ koyoe nwu lawɛ kayoko di kufĩkatunkɔ lɛkyɛ di otii nkye ni kaflɔnkɔ ka di kayi lɛkyɛ ambuo nya ni kamɛ.

10 Di kalakasɔ lɛkyɛ diofe ni kaflɔnkɔ ka di kayi lɛkyɛ, diakya ni di olekatakɔ kaflɔnkɔ nwu niakyɔɔ ni anu oyoyiɛ wɔ di kayi lɛkyɛ yi, ayo lawɛ 11 di nfenkɔ late di anu lɛma. N-ya mmle late fɛle ayo ya niawɛ ni di katookasɔ lɛkyɛ; lɛkaana ku lɛblɛfɛ lɛnya lale ninwii, n-yoko ku n-yokontũ lɛma lale ni okle onwii. Fɛ mmle di n-yokontũ okle onwii late ni di katookasɔ yi, 12 nkpo kafɔɔ di n-yokontũ late di kalakasɔ ayo nwu nɛ. Kayokontũ lawɛ di osuku nwu kasɔkakyekɔ kuakaa di oyoyiɛ wɔ niakyɔɔ ni anu kufĩkatunkɔ, di otii nfe ambuo ni ayo nwu kamɛ.

13 Ninfɛ aatɔkɔ mi alɛ, "Katookasɔ ku kalakasɔ ayo ya niɛkyɔɔ ni anu olekatakɔ kaflɔnkɔ nwu nle olebatatɛ ale, lɛba le di olebatatɛ ba nintɛɛtɛɛ ni SAATE nwu kamale asaaɔta ya niɛtɛ eeklekle alenke ni nɛ. Nfa babatɛ asaaɔta ya niɛtɛ eeklekle alenke ni nɛ- alesaa asaaɔta, okpile asaaɔta ku lɛpɔɔ okpi asaaɔta- diekye lɛba nwu leklekle. 14 Nse olebatatɛ nwu lɛnya beebuo kakleklekɔ nwu yi, dinaa alɛ beedie bɛɛwa kaflɔnkɔ ka di kayi lɛkyɛ diɛlaase di obe wɔ beediki ni akpeele ya kamɛ basi bɔɔbla ni kasumu ɔkpɛ bɛɛtɛ nii, diekye asaa klekle ale. Akpeele bamba dikpeni beekpee fiɛ bɛɛtɛɛtɛɛ aba ya ninle ni batii ale."

15 Aaloo ni olekatakɔ nwu kamɛ ɔklapoosa yi, aakpaa mi aafenko di kufĩkatunkɔ kayoko aadieko, ni aaklapoosa olekatakɔ kayi lɛkyɛ kamuu aafenko nɛ: 16 Aaklapoosa kufĩkatunkɔ lɛkyɛ ku lɛklapoosaa kawesee nwu; diabla nkpaa alafa-anɛ-afosi-ana. 17 Aaklapoosa katookasɔ lɛkyɛ; diabla nkpaa alafa-anɛ-afosi-ana di lɛklapoosaa kawesee nwu. 18 Aaklapoosa kalakasɔ lɛkyɛ; diabla nkpaa alafa-anɛ-afosi-ana di lɛklapoosaa kawesee nwu. 19 Ninfɛ aamunikĩi aafe kufĩkamɛɛkɔ lɛkyɛ, aalaaklapoosa nɛ; diabla nkpaa alafa-anɛ-afosi-ana di lɛklapoosaa kawesee nwu. 20 Nioso aaklapoosa nkyɛ nwu nna mmuu. Olekatakɔ nwu lawɛ oyoyiɛ kuakyisa nwu, lɛkaana labla nkpaa alafa-anɛ-afosi-ana, lɛblɛfɛ kafɔɔ labla nkpaa alafa-anɛ-afosi-ana, alɛ diablasa asaa ya nieklekle ni di n-ya ninanklekle ni suoto.