1 Lanyu nii, ni lanya lɛkakpomii ninwii di lɛsaa le manlɛɛ ni safir difuɔ letembi kamɛ di obo wɔ niate ni di bakerubi nwu nsintɛɛ nɛ. 2 Ni di SAATE nwu latɔkɔ osuɔtɔ nwu niekpee ni akpeele fɛnɛnɛɛ alɛ, "Buo di nkpaa be ninsi ni di bakerubi nwu kalɔ kamɛ. Kusii atɔkɔnii fakyeko bakerubi nwu kamɛ fayiisa nnɛɛ lɛfɔ, faasamiisa nya fakpete di okpoo kplɛ nwu kamɛ." Ni lanyɔɔ aabuo kaamɛ nɛ.

3 Ni di bakerubi nwu layila di olekatakɔ nwu kalakasɔ lɛkyɛ di obe wɔ di osuɔtɔ nwu labuo ni kaamɛ, ni di lelokonkyɛ layii kaflɔnkɔ nwu kaamɛ nɛ. 4 Ninfɛ di SAATE nwu leklekle lataka di bakerubi nwu osi baasifi olekatakɔ nwu kayokontũ nɛ. Ni di lelokonkyɛ nwu layii olekatakɔ nwu, ni di SAATE nwu leklekle lɛkpa layii kaflɔnkɔ nwu pɔ nɛ. 5 Baatoonu bakerubi nwu afoko sɛlɔ fanfã dialaadu kaflɔnkɔ nwu kayi lɛkyɛ, fɛle Yaa wɔ Ninlenke ni sɛlɔ, nse ɔɔkakatɛ.

6 Obe wɔ di SAATE nwu ladiki ni osuɔtɔ nwu niakpee ni akpeele fɛnɛnɛɛ kanya alɛ, "Diki ɔtɔ fakyeko keke nkpaa kamɛ di bakerubi nwu kamɛ," ni di osuɔtɔ nwu labuo kaamɛ aalaayila di kɔkpaa kunwii ɔlɔɔkɔ nɛ. 7 Ninfɛ di bakerubi nwu onwii lananfi kɔnɛɛ nɔɔ aakyɔɔ ɔtɔ wɔ niasiɛ ni di kamɛ lɛma nɛ. Ni aadiki atɔkɔnii nwu awo aakpee di osuɔtɔ nwu niakpee ni akpeele fɛnɛnɛɛ nnɛɛ, ni aafũ ɔtɔ nwu aadie aasifi nɛ. 8 (Baatɔɔnya lɛsaa le niate ni fɛle otii nnɛɛ di bakerubi nwu afoko kalɔ.)

9 Lanyu nii, ni lanya nkpaa nna di bakerubi nwu ɔlɔɔkɔ, kunwii lawɛ di kerubi biala ɔlɔɔkɔ; nkpaa nwu latɔɔkpa fɛle afuɔ ya manlɛɛ ni krisolite. 10 Nkpaa nwu nna letembi ladie bawo; kubiala late fɛle kɔkpaa nsi di kowo nɔɔ kamɛ. 11 Nse nkpaa nwu nkyɛ yi, nin-fuo ɔkyɛ di ɛfankyi ɛna nwu lele di bakerubi nwu lɛkyɔɔ ni anu suoto; bakeke nwu ninkyi nse bakerubi nwu nkyɛ. Bakerubi nwu nfe di kakɔ lele di disi nwu lɛkyɔɔ anu, alɛ dilaakyi nse dikyɛ nii. 12 Suoto lɛma simuu, di mmaa lɛma nkyakaa nii, nnɛɛ ku afoko lɛma layii ku anumbi, fɛ mmle di nkpaa nna lɛma nwu late nii. 13 Ni lanu baalɛɛ nkpaa nwu alɛ, "Kakitikɔ nkpaa." 14 Kerubi nwu biala lawɛ anu ana: ɔkasale lale kerubi anu, ɔnyɔɔfa lale otii anu, otiɛfa lale kyata anu, ɔnaafa kafɔɔ lale klikpo anu.

15 Ninfɛ di bakerubi nwu lataka baafe katoo lɛkyɛ nɛ. N-ya mmle niale asaa ya ninkpe ni nkpa lanya ni di Kebar Okle kotoko nɛ. 16 Nse bakerubi nwu nkyɛ yi, nkpaa be di ɔlɔɔkɔ lɛma nkyɛ; nse bakerubi nwu lefukuti afoko lɛma kafɔɔ alɛ bɔɔflɛlɛtɛ mantaka kaasɔ yi, nkpaa nwu ninkpukuti di ɔlɔɔkɔ lɛma. 17 Nse bakerubi nwu leyila kloklo, nkpaa nwu kafɔɔ n-yila kloklo; nse bakerubi nwu kafɔɔ lɛflɛlɛtɛ kafɔɔ yi, nkpaa nwu ntaka ku mma, diekye asaa ya ninkpe ni nkpa ninwuna lasiɛ ma kaamɛ.

18 Ninfɛ di SAATE nwu leklekle lataka di olekatakɔ nwu kayokontũ ni dialayila di bakerubi nwu osi nɛ. 19 Obe wɔ lanyu ni yi, bakerubi nwu lafukuti afoko lɛma baaflɛlɛtɛ baataka kaasɔ. Nse bakyɛ, nkpaa nwu kafɔɔ nkyɛ ku mma. Ni baayila di kayokontũ ka nikofe ni SAATE nwu leyo kufĩ katunkɔ kayoko nɛ. Ni di Israel Yaa leklekle nwu lawɛ ma di osi nɛ.

20 N-ya mmle niale asaa ya ninkpe ni nkpa lanya ni di Israel Yaa nwu kalɔ di Kebar Okle kotoko, ninfɛ latofo nlɛ bakerubi baale nɛ. 21 Dibiala lawɛ anu ana ku afoko ana, lɛsaa ninwii kafɔɔ late fɛle otii nnɛɛ di afoko lɛma kalɔ. 22 Anu lɛma lawɛ letembi ninwii fɛ n-ya lanya ni di Kebar Okle kotoko. Dibiala lakyɛ tinini.