1 Ni di SAATE nwu ɔlaa lawa kuatɛɛ alɛ: 2 "Otii obi, yɔ anu lɛfɔ fakyɔɔ Gog, di Magog kasɔ nwu ɔka kplɛ Mesek ku Tubal suoto; buɛ ɔlaa fatɛ di suoto nɔɔ, 3 faabuɛ falɛ: Nnya ɔlaa wɔ di SAATE Kplɛ nwu kobuɛ ni alɛ: Oo Gog, ɔka kplɛ Mesek ku Tubal, lɛtaka n-yɛ fɔ di suoto. 4 Kamamumunikĩisa fɔ nkyiko, nin-yɔ badaduwa nkpee di n-yɛɛ lɛfɔ, ndiki fɔ n-wako ku bakpɛtɛ lɛfɔ bamuu- bapɔnkɔ lɛfɔ, bapɔnkɔ basiɛtɛ lɛfɔ ba ninkle ni akpɛsaa lɛma amuu, ku batii ɔlambu kplɛ ba ninkle ni kubiafunsaa akplɛ ku abiibii, di bamuu lɛma kɔnwanyi ni mpamii lɛma. 5 Persia, Etiopia ku Put kamawɛ ku mma, di bamuu lɛma nkle ni kubiafunsaa ku abɔɔsaa akoto. 6 Gomer kafɔɔ ku bakpɛtɛ nɔɔ bamuu, ku Bet-Togarma wɔ niekye ni katookasɔ fanfa ku bakpɛtɛ nɔɔ bamuu- nnle kpinwu be ninkpe ni ku afɔ.

7 " ‘Ta anu lɛfɔ ate kɛsɛkɛsɛ; faalolaa suoto, afɔ ku batii ɔlambu nwu bamuu ba niesi ni di suoto lɛfɔ, faayila ma kaanya. 8 Di ayi kpinwu sɛmaa yi, babalɛɛ ye kakpɛ. Di alɛɛ ya ninkɔwa ni kamɛ yi, bibataka di kasɔ ka nintoodie ni di kakpɛ kamɛ suoto, mba batii baasiisa baakyeko ni nnle kpinwu kamɛ baawako ni Israel abokote ya niate ni afukuti kofokofoko suoto. Batɔɔkpaa ma beedieko di nnle nwu kamɛ, ni di kanunua bamuu lɛma nfɛ basi di atoko ɔkyɛ ole kamɛ nɛ. 9 Afɔ ku bakpɛtɛ akudi lɛfɔ ku nnle kpinwu be ninkpe ni ku afɔ kamakata minkyɛ, bibakyɛ fɛle afɛɛfɔ siene; bibate fɛle alokonkyɛ nietĩi ni kasɔ.

10 " ‘Nnya ɔlaa wɔ di SAATE Kplɛ nwu kobuɛ ni alɛ: Di dii nwu nkpo suoto yi, sɛlaa kpinwu kamawa fɔ diisi, fankũ kanwumbe kpile kafɔɔ. 11 Fababuɛ falɛ: "Kamataka di kasɔ ka manantofo seyoyiɛ bakyisa ni sekpoenyii suoto; kamadieko batii ba ninsi ni di atoko ɔkyɛ ole kamɛ, mononyu osuku kafɔɔ bata ni lɛsalɛsaa- di bamuu lɛma basi banaa ni seyoyiɛ ku n-yoko ku abɔɔsaa. 12 Kamadieko ma, nlɛ ma asaa nimmunikĩisa kafɔɔ kɔnɛɛ nii nkyɔɔ di batii ba nfɛ ninsi ni di nsɔ be baawɔɔsa ni suoto ku batii ba baasiisa baakyeko ni nnle nwu kamɛ, baawɛ ni babɔkɛɛ sele ku asaa, basi ni di kasɔ nwu ntɛɛntɛɛ." 13 Seba ku Dedan ku Tarsis asaa basunsũtɛ ku sekpoenyii nɔɔ simuu kamakaalɛ fɔ alɛ, "Kakpɛ kamɛ asaa fɛɛwa ɔlɛ? Osiisa feesiisa batii ɔlambu lɛfɔ falɛ fɔɔbayu, fantuka koto fututu ku koto sɛɛle, fanfũ babɔkɛɛ sele ku asaa, fan-yɔ kafɔɔ kakpɛ kamɛ asaa kpinwu fansifiko?" ’

14 "Nkpo oso, otii obi, buɛ ɔlaa fatɛ, faatɔkɔ Gog falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Di dii nwu nkpo kale, nse batii nii Israel nsi di atoko ɔkyɛ ole kamɛ, flɔbatofo nwu ole? 15 Fabakye kasiɛkɔ lɛfɔ di katookasɔ fanfa fanwa, afɔ ku nnle kpinwu be nimawɛ ni ku afɔ, di bamuu lɛma kamasiɛ ni di bapɔnkɔ suoto, batii ɔlambu kplɛ ku bakpɛtɛ siene babale. 16 Fabatu fambuo di batii nii Israel suoto fɛle alokonkyɛ ya nietĩi ni kasɔ. Oo Gog, di ayi ya nikɔwa ni kamɛ, kamata fɔ fantaka di kasɔ nii suoto, di mmle di nnle kamatofo mi ni nse lediki suoto nii leklekle letuo, diefe ni di suoto lɛfɔ di anu lɛma.

17 " ‘Nnya ɔlaa wɔ di SAATE Kplɛ nwu kobuɛ ni alɛ: Diele afɔ suoto lakakatɛ di ayi ya nintɔbafe ni kamɛ, diafe ni di bakpɛmblatɛ nii Israel ɔlaababuɛtɛtɛ suoto? Di obe nwu kamɛ baabuɛ ɔlaa baatɛ di alɛɛ kpinwu kamɛ alɛ kamakpaa fɔ fantaka di suoto lɛma.

18 Nnya lɛsaa le nimawa ni di dii nwu nkpo suoto: Nse Gog ledieko Israel kasɔ nwu yi, ɔblɔ yakayaka nii kamataka, SAATE Kplɛ nwu niebuɛ. 19 Di sɛsɔfɔwo nii ɔkpɛ ku lɛblɔfiɛ yakayaka nii kamɛ, labuɛ di obe nwu kamɛ nlɛ kasɔ kamatukũ osie kanya di Israel kasɔ suoto. 20 Lekpo kamɛ kɔkpaku, bakansiɛ di kɔfɛɛfɔ kamɛ, lepoo kamɛ babɔkɛɛ, lɛsaa biala ninkpɔkɔ ni di kasɔ suoto, ku batii bamuu di kasɔ nwu suoto kamatũtũkũ kpakpakpa di anu nii. Abokote kamakyi anfuu, aba takale kamabibiɛ, oyoyiɛ biala kafɔɔ kamabiɛ kunte kaasɔ. 21 Kamadiki kapamii nkpee Gog di abokote nii amuu suoto, SAATE Kplɛ nwu niebuɛ. Otii biala kamayɔ kapamii di obilɛma suoto. 22 Kamayɔ ofiɛ kpile ku ntɔ owii kaasɔ nkanko nwɔ; kamata kanto kplɛ, atubakani ku amã ya nikofiɛ ni ku ɔtɔ nnɔɔ fɛ kanto ankpete nwɔ, manko bakpɛtɛ nɔɔ ku nnle be kpinwu ninkpe ni ku nnwɔɔ suoto. 23 Nkpo kamatuo nimuɔ nii ku leklekle nii nɛ, ninta kafɔɔ mantofo mi di nnle kpinwu anu. Ninfɛ babatofo alɛ ami ninle SAATE nwu nɛ.’