1 "Otii obi, buɛ ɔlaa fatɛ di Israel abokote suoto, faabuɛ falɛ, ‘Oo Israel abokote, binu SAATE nwu ɔlaa. 2 Nnya ɔlaa wɔ di SAATE Kplɛ nwu kobuɛ ni alɛ: Lo nwu labuɛ di suoto lɛfɔ alɛ, "Ɛhɛɛ! Saa abokote takale nwu ntokple ale wo." ’ 3 Nkpo oso buɛ ɔlaa fatɛ faabuɛ falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Ta baawɔɔsa ye baadiki ni di ɔfankyi biala biabakple ni nnle nwu bule bale, biale ni kafɔɔ lɛkakatɛ nyakatãa ku ditiilalaasa biata ni batii nwu oso yi, 4 nioso, Oo Israel abokote, binu SAATE Kplɛ nwu ɔlaa: Nnya ɔlaa wɔ di SAATE Kplɛ nwu kobuɛ antɔkɔ ni abokote ku akpenkpe, sekle ku sɛtaata, ku aba ya niebibiɛ ate ni ku sekpoo se kakpɛ kamɛ asaa baalɛ ni, baale ni kafɔɔ lɛmansaa baata ni nnle nwu bule niɛmana fɔ beekyi ni. 5 Nnya ɔlaa wɔ di SAATE Kplɛ nwu kobuɛ ni alɛ: Di lɛblɔfiɛ nii niatɔɔfiɛ mi ni kamɛ lakakatɛ di nnle nwu bule suoto, ku Edom omuu suoto, diekye suoto lɛyɔɔ ku katiikyidi ka niasiɛ ni di situ lɛma kamɛ baayɔ kasɔ nii baabla ni mma bamu kale, di mmle kanya baafũ ni sɛfa kaweekɔ kasɔ nika.’ 6 Nkpo oso buɛ ɔlaa fatɛ fata Israel kasɔ, faabuɛ fatɔkɔ abokote ku akpenkpe, sekle ku sɛtaata nwu falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Lɛkakatɛ di sɛsɔfɔwo nii ɔkpɛ lɛblɔfiɛ yakayaka kamɛ, ta dibuo le kamɛ biafe ni di nnle nwu atufa kamɛ. 7 Nkpo oso nnya ɔlaa wɔ di SAATE Kplɛ nwu kobuɛ ni alɛ: Lekplesa kɔnɛɛ katoo lɛka ntam nlɛ, nnle be niɛmana ye beekyi ni kafɔɔ kamafũ atufa.

8 " ‘Kafɔɔ aye, Oo Israel abokote, bibadie sɛla mintika kafɔɔ abi minta batii nii Israel, diekye babawa kafa di obe kakui kamɛ. 9 Lɛyɔ nwu ole di suoto lee, kamale ye sibualɛ kafɔɔ; babakpɛ afe di suoto lee, mampɛ asaa kafɔɔ di suoto lee. 10 Kamata batii nlɛɛsa di lɛpɔ kamɛ di suoto lee, bia Israel batii bamuu. Batii kamawɛ di sekpoo nwu, manse kafɔɔ sekpoo se niɛwɔɔ site ni dibudi. 11 Kamata batii ku babɔkɛɛ nkpɛ di lɛpɔ kamɛ, di suoto lee, babatika abi, mamapɔ kpinwu. Kamata batii nsiɛ ye di suoto fɛ mmle diate ni saa, ninta lɛlɛ nlɛ ye ninlenkee mmle diate ni kofokofoko. Ninfɛ bibatofo bilɛ ami ninle SAATE nwu nɛ. 12 Kamata batii, batii nii Israel, mankyɛ di suoto lee. Babafũ ye, aye kafɔɔ bibale ma atesaa; bilɔbasinta babi lɛma bakpi diidii.

13 " ‘Nnya ɔlaa wɔ di SAATE Kplɛ nwu kobuɛ ni alɛ: Ta batii mbuɛ mantɔkɔ fɔ ni alɛ, "Fanwee ni batii, fanta kafɔɔ kale lɛfɔ babi nkpi ni oso yi," 14 nkpo oso flɔbasinwee batii ee fata kale lɛfɔ babi bakpi, SAATE Kplɛ nwu niebuɛ. 15 Namasinta fɔ fanu nnle nwu sɛtɔkɔlaa, flɔbasinfe di batii nwu atufa kamɛ ee nta kale lɛfɔ kapɛ kaasɔ, SAATE Kplɛ nwu niebuɛ.’ "

16 Ni di SAATE nwu ɔlaa lakple kuawa kuatɛɛ alɛ: 17 "Otii obi, di Israel batii lasiɛ ni di kasɔ lɛma kamu suoto yi, baakpɔnɔfɔsa ka ku lɛkyɛmbi lɛma ku sɛsaabla lɛma. Lɛkyɛmbi lɛma late fɛle mmle di ɔsanko mpɛ ni kɔkpaa kaasɔ kɔwɛntɛ biala di anu nii. 18 Nioso lanyɛɛnɛ ɔblɔ yakayaka nii lakpete ma di suoto ta baawii ni ntɔ kaasɔ, baakpɔnɔfɔsa ni kasɔ nwu kafɔɔ ku afiɔ lɛma oso. 19 Latɔɔ ma lakpee di nnle kamɛ, ni baasasami baabuo di nsɔ nwu mmuu kamɛ nɛ; lakanko ma di lɛkyɛmbi lɛma ku sɛsaabla lɛma kanya. 20 Kakɔlele kafɔɔ baakyɛ di nnle nwu kamɛ yi, baakpɔnɔfɔsa leyooto nii klekle nwu, diekye baabuɛ di suoto lɛma alɛ, ‘Batii ba mmle ninle Yaa batii nɛ, kafɔɔ diabawa alɛ dikpeni beedie di kasɔ nɔɔ suoto.’ 21 Lɛyɔ nwu ole lɛta leyooto nii klekle, leyooto le di Israel batii lakpɔnɔfɔsa ni di nnle nwu kamɛ di nfũ baakyɛ nii.

22 "Nkpo oso yi, tɔkɔ Israel batii falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Oo Israel batii, diele aye oso kɔwa asaa ya mmle ɔbabla, kafɔɔ ta leyooto nii klekle oso, leyooto le biakpɔnɔfɔsa ni di nnle nwu kamɛ di nfũ biakyɛ ni. 23 Kamadiki leyooto kplɛ nii leklekle ntuo, leyooto le biakpɔnɔfɔsa ni di nnle nwu kamɛ, leyooto le biakpɔnɔfɔsa ni di kamɛ lɛma. Nse lediki leklekle nii letuo diefe ni di suoto lee di anu lɛma yi, ninfɛ di nnle nwu kamatofo alɛ ami ninle SAATE nwu nɛ, SAATE Kplɛ nwu niebuɛ.

24 " ‘Diekye kamakpaa ye ndieko di nnle nwu kamɛ; kamasiisa ye nkyeko nsɔ nwu suoto nkplesa ye n-wako aye bamu kasɔ suoto. 25 Kamanwanwanyi ntu klenkle di suoto lee, n-se bitɔɔbla klekle; kamafoto ye ndiki di ɔtanklekle lee omuu ku afiɔ lee amuu kamɛ. 26 Kamata ye otu fɔle, n-yɔ kafɔɔ ninwuna fɔle nkpee ye; kamadiki difuɔ otu lee nwu, ninta ye sina lɛbɔtɔ otu. 27 Kamayɔ Ninwuna nii nkpee di kamɛ lee, ninta ye kafɔɔ minkyɛ di sisuku nii suoto, minlolaa afiofa nii kafɔɔ minle. 28 Bibasiɛ di kasɔ ka lata ni bawa lee; bibale batii nii, ami kafɔɔ kamale Yaa lee. 29 Kamadiki ye nkyeko ɔtanklekle lee omuu kamɛ. Kamata alesaa nlɛ, nta nya kafɔɔ ampɔ kpinwu, nɔmata kafɔɔ kɔka ɔkpɛ kuwa di suoto lee. 30 Kamata awosobi ntika di awoso suoto ampɔɔsa, nta alesaa kafɔɔ nlɛ nwaa di afe, di mmle okle flɔbasinfe ni di sinunsɔ kamɛ di nnle nwu kamɛ ta kɔka ɔkpɛ oso. 31 Ninfɛ bibanyuma sisuku kpile lee ku asiensiesaa lee ablasaa, suoto lee nkpɛ ye oyududu di sikpile lee ku ayududusaa lee sɛsaabla suoto nɛ. 32 Komiɛ nlɛ bitofo bilɛ diele aye oso kɔbla nle mmle, SAATE Kplɛ nwu niebuɛ. Oo Israel batii, sinunsɔ sikpɛ ye, biekpee anu kaasɔ ta lɛkyɛmbi lee oso!

33 " ‘Nnya ɔlaa wɔ di SAATE Kplɛ nwu kobuɛ ni alɛ: Di dii le suoto kamakleklesa ye ni di sikpile lee simuu kamɛ yi, kamata batii nnaase disiɛ di sekpoo lee nwu kamɛ, manse kafɔɔ sekpoo biɛle nwu dibudi. 34 Babakpɛ kasɔ ka ninte ni kafukuti, di mmle kanasinte ni kafukuti di batii ba bamuu ninfe ka ni di suoto anu. 35 Bababuɛ alɛ, "Kasɔ ka baalalaasa baatɛ ni nintookple kate fɛle Eden kɔba nɛ; sekpoo kplɛ se niabiɛ ni, siate ni sifukuti, siawɔɔ ni kafɔɔ nfɛ ninle sekpoo siene ku batii nsiɛkɔ." 36 Ninfɛ di nnle be niebu diɛmana fɔ diekyi ni kamatofo alɛ ami SAATE nwu niese sekpoo se baawɔɔsa ni lese dibudi, lese kafɔɔ asaa lɛsɔ di kasɔ ka niate ni kafukuti suoto nɛ. Ami SAATE nwu niɛkakatɛ, kamabla ni kafɔɔ.’

37 "Nnya ɔlaa wɔ di SAATE Kplɛ nwu kobuɛ ni alɛ: Kamakple nnu Israel batii lekoto otikiti, nimbla nle mmle nta ma: Kamata batii lɛma mpɔ kpinwu fɛ bafoso, 38 mampɔ kpinwu fɛ babɔkɛɛ ba manaata ni asaaɔta di Yerusalem di ayi finle nɔɔ olebee kamɛ. Nkpo di sekpoo kplɛ se niabiɛ siate ni kamayii ku batii kpinwu nɛ. Ninfɛ babatofo alɛ ami ninle SAATE nwu nɛ."