1 Ninfɛ di osuɔtɔ nwu lakpaa mi aawako kakleklekɔ ka niawɛ ni di kayi lɛkyɛ, ni aaklapoosa ntɛɛntɛɛ seyoyiɛ nwu nɛ; ntɛɛntɛɛ seyoyiɛ nwu lɛblɛfɛ labla nkpaa lefosi di ɔfankyi biala. 2 Kayokontũ nwu lɛblɛfɛ labla lefosi nkpaa nkuɛnsĩ, seyoyiɛ se baatofo baakyɔɔsa ni kafɔɔ lɛblɛfɛ labla nkpaa nnɛ di ɔfankyi biala. Aaklapoosa kafɔɔ kakleklekɔ nwu kayi lɛkyɛ; lɛkaana nini labla afosi-akuɔ nkpaa nnɛ, lɛblɛfɛ kafɔɔ labla afosi-atiɛ nkpaa nna.

3 Ninfɛ aabuo di kakleklekɔ ka kaamɛ ni aaklapoosa kayokontũ nwu ntɛɛntɛɛ seyoyiɛ nɛ; dibiala lɛblɛfɛ labla nkpaa ntiɛ. Kayokontũ nwu lɛblɛfɛ labla nkpaa lefosi, seyoyiɛ se baatofo baakyɔɔsa ni di ɔfankyi biala kafɔɔ lɛblɛfɛ labla lefosi nkpaa nnyɔ. 4 Ni aaklapoosa kakleklekɔ ka kaamɛ lɛkaana nɛ; diabla afosi-atiɛ nkpaa nna, lɛblɛfɛ nini kafɔɔ labla afosi-atiɛ nkpaa nna dialaadu kakleklekɔ ka di kayi lɛkyɛ kayɛntɛlekɔ. Ni aatɔkɔ mi alɛ, "Nfũ mmle ninle Kakleklekɔ kaamɛ Kakleklekɔ nɛ."

5 Ninfɛ aaklapoosa olekatakɔ nwu oyoyiɛ nɛ; opĩ nini labla nkpaa lefosi, leyo biala kafɔɔ niakaa ni di olekatakɔ nwu aakyi ni lɛblɛfɛ labla nkpaa nkuɛnsĩ. 6 Sɛlɔɔkɔ ayo ya baatofo baakaasa ni labla sitika sitiɛ, ninwii di lɛbamba suoto, ayo afosi-atiɛ niatika di ditika biala suoto. Baatofo asunsaa baakyisa di olekatakɔ nwu seyoyiɛ alɛ aamufũ sɛlɔɔkɔ ayo nwu anklee, alɛ dilaale olekatakɔ nwu seyoyiɛ nikamufũ nya anklee nii. 7 Sɛlɔɔkɔ ayo nwu niamana ni olekatakɔ nwu aakyi ni amuu latɔɔblɛfɛ aatɔɔkyakaa di otofo ditika biala suoto. Baatofo ayo ya niamana olekatakɔ nwu aakyi ni alɛ osi ale latɔɔblɛfɛ aatɔkyakaa, nioso otofo ditika biala mblɛfɛ ninlenkee kalɔ lele, fɔɔkata fankyɛ ni di osi lɛkyɛ. Kakatakɔ layɔ di kalɔ ayo, kaafe di ntɛɛntɛɛ ayo, kaakata kaasifi ayo ya di osi.

8 Lanya kafɔɔ nlɛ baanii olekatakɔ nwu kalɔ nimuu baakyisa, diale lɛsɔse diata ayo nwu baatofo ni di sɛlɔɔkɔ. Diale lɛklapoosaa kawesee nkpaa lefosi lɛkaana. 9 Sɛlɔɔkɔ ayo nwu di kayi lɛkyɛ opĩ labla nkpaa nnɛ. Obo wɔ niate ni di olekatakɔ nwu sɛlɔɔkɔ ayo 10 ku olebatatɛ ayo ntɛɛ lɛblɛfɛ labla afosi-atiɛ nkpaa nna diakyi olekatakɔ nwu nimuu. 11 N-yoko lawɛ manfe ni di sɛlɔɔkɔ ayo nwu di obo wɔ niate ni nintɛɛ, kanwii lawɛ di katookasɔ lɛkyɛ kabamba kafɔɔ lawɛ di kalakasɔ lɛkyɛ; obo wɔ niate ni lɛblɛfɛ labla nkpaa nnɛ diakyi nimuu.

12 Leyo le niakyɔɔ ni anu olekatakɔ nwu kaflɔnkɔ di kufĩkamɛɛkɔ lɛkyɛ lɛblɛfɛ labla kɔlafa- lefosi nkpaa nkuɔ. Leyo nwu oyoyiɛ opĩ labla nkpaa nnɛ, lɛkaana nini kafɔɔ labla nkpaa kɔlafa-afosi-anɔɔ.

13 Ninfɛ aaklapoosa olekatakɔ nwu nɛ; lɛkaana nini labla kɔlafa-afosi-akuɔ nkpaa nnɛ, olekatakɔ kaflɔnkɔ ku leyo ku seyoyiɛ nini kafɔɔ lɛkaana labla kɔlafa-afosi-akuɔ nkpaa nnɛ. 14 Olekatakɔ kaflɔnkɔ nwu lɛblɛfɛ di kufĩkatunkɔ, diakyakaa ni di olekatakɔ nwu anu, labla kɔlafa-afosi-akuɔ nkpaa nnɛ.

15 Ninfɛ aaklapoosa leyo le niakyɔɔ ni anu kaflɔnkɔ ka niawɛ ni di olekatakɔ nwu sɛmaa, diakyakaa ni di sebombo nini di ɔfankyi biala; diabla kɔlafa-afosi-akuɔ nkpaa nnɛ.

Kakleklekɔ kayi lɛkyɛ ku kakleklekɔ ka kaamɛ ku lɛkpata le niakyɔɔ ni anu kaflɔnkɔ nwu, 16 diakyakaa ni di n-yokontũ basɛfle biibii nwu ku sebombo se niamana ni atiɛ lɛma nwu siakyi nii- baatĩtĩi dibiala ku sewoso, diakyakaa ni di n-yokontũ nwu. Baatĩtĩi kayosɔ ku oyoyiɛ dialaadu basɛfle nwu. 17 Di obo wɔ niate ni di kayoko nwu nsintɛɛ di kayi lɛkyɛ diasifi ni kakleklekɔ nwu kamɛ ku seyoyiɛ nwu suoto di sebo se simuu niate siakyi ni kakleklekɔ nwu kayi ku kamɛ, 18 baabla bakerubi ku awɔsɔ atembi baatika. Awɔsɔ lasisiɛ di bakerubi nwu sebo. Kerubi biala lawɛ anu anyɔ: 19 Anu ya niale ni otii anu lakyɔɔ anu ɔwɔsɔ di kakyɛ kanwii, anu ya niale ni kyata anu kafɔɔ lakyɔɔ anu ɔwɔsɔ di kakyɛ nyɔɔfa. Baabla nya amuu baatika di olekatakɔ nwu kamuu baakyisa. 20 Diayɔ ni di kayosɔ dialaadu ni di obo wɔ di kayoko nsintɛɛ yi, baabla bakerubi ku awɔsɔ baatika di kakleklekɔ kayi seyoyiɛ suoto.

21 Olekatakɔ kayi lɛkyɛ nyokontũ sewoso lawɛ akɔ ana, n-se kafɔɔ niawɛ ni di Kakleklekɔ Kaamɛ Kakleklekɔ anu ladie nsinkpo. 22 Oleɔta akyikye ya baabla ni ku kowoso lɛtaka ninya labla nkpaa nnɔɔ, lɛkaana kafɔɔ labla nkpaa ntiɛ di akɔ nwu ana; akɔ ninya, nkpaa ninya ku sɛlɔɔkɔ ninya lale kowoso. Ni di osuɔtɔ nwu latɔkɔ mi alɛ, "Nnya opunu wɔ nin-yɛ ni di SAATE nwu anu."

23 Kakleklekɔ kayi lɛkyɛ ku Kakleklekɔ Kaamɛ Kakleklekɔ lawɛ akloo ya mansɛkɛtɛ ni akyuu nwu anyɔ. 24 Kokloo biala lawɛ nkyɛ nnyɔ- nkɔnii nnyɔ diata ni kokloo kakyɛ biala. 25 Baabla kafɔɔ bakerubi ku awɔsɔ baatika di kakleklekɔ kayi lɛkyɛ akloo nwu fɛle n-ya baabla baatika ni di seyoyiɛ nwu suoto. Ni baayɔ kafɔɔ owoso baapɛ akpanta baasakasa di lɛkpata nwu anu nɛ. 26 Basɛfle maamaa baabla awɔsɔ baatika ni di ɔfankyi biala lawɛ di lɛkpata seyoyiɛ nwu sɛlɔɔkɔ. Olekatakɔ nwu sɛlɔɔkɔ ayo kafɔɔ lawɛ akpanta.