1 Ni di SAATE nwu ɔlaa lawa kuatɛɛ alɛ: 2 "Otii obi, kakatɛ fata okpoo lɛfɔ batii, faatɔkɔ ma falɛ: ‘Nse lɛyɔ kapamii di kasɔ kawo suoto, di kasɔ nwu batii lediki otii lɛma onwii bɛɛbla nyuntɛ lɛma, 3 ɛɛnya kapamii nwu kɔwa di kasɔ nwu suoto, ɛɛfɛ dikyukyoo alɛ oosĩ ɔlaa anta batii nwu, 4 ni nse otii owo lenu dikyukyoo nwu kafɔɔ ananfũ ɔlaa osĩ ɔta nwu akpee, di kapamii nwu lɛwa kɛɛbalo nwɔ yi, ni ntɔ nɔɔ kamatika di nnwɔɔ omu nɔɔ disi. 5 Di obe wɔ aanu ni dikyukyoo nwu sɛlɔ kafɔɔ atayɔ ni ɔlaa osĩ ɔta nwu oso yi, ntɔ nɔɔ kamatika di nnwɔɔ omu nɔɔ disi. Nse fɛle an-yɔ nwu ole di ɔlaa osĩ ɔta nwu suoto yi, atabafũ suoto nɔɔ nkpa. 6 Kafɔɔ nse nyuntɛ nwu lɛnya kapamii nwu kɔwa ananfɛ dikyukyoo nwu alɛ aasĩ ɔlaa anta batii nwu di kapamii nwu lɛwa kɛɛbalo onwii lɛma yi, ni otii nwu kamakpi ta sikpile nɔɔ oso, kafɔɔ kamakaalɛ ntɔ nɔɔ nkyeko nyuntɛ nwu ɔkyɛ.’

7 "Nioso afɔ Otii obi, ntɔɔyɔ fɔ lɛbla nyuntɛ lɛta Israel batii; nkpo oso nu ɔlaa wɔ kamabuɛ ni, faasĩ ɔlaa fata ma fatɛɛ. 8 Nse lɛtɔkɔ kpiletɛ nlɛ, ‘Oo afɔ kpiletɛ, nwaako fabakpi,’ fanankakatɛ fasĩ ɔlaa fatɔɔ akyisa nkpa yi, ni otii kpile nwu kamakpi anta sikpile nɔɔ, kafɔɔ kamakaalɛ ntɔ nɔɔ nkyeko ɔkyɛ lɛfɔ. 9 Kafɔɔ nse nwaako, feesĩ ɔlaa fɛɛta kpiletɛ nwu falɛ akyi di sisuku nɔɔ suoto anambla nkpo yi, abakpi anta sikpile nɔɔ, kafɔɔ afɔ fabadiki nkpa lɛfɔ.

10 "Otii obi, tɔkɔ Israel batii falɛ, ‘Nnya ɔlaa wɔ biobuɛ ni bilɛ: "Ɔtanlolaa ɔbla ku sikpile loo nle atoo ɛɛta wo, ni buɔwɔɔ ta nnya oso nɛ. Ni lɛ nfɛ buafuo nkpa osiɛ?" ’ 11 Tɔkɔ ma falɛ, ‘Nwaako lɛnya nkpe ni nkpa, SAATE Kplɛ nwu niebuɛ alɛ, ninnya suoto lɛyɔɔ di kpiletɛ kukpi suoto, kafɔɔ alɛ baakyi di sisuku lɛma suoto mansiɛ nkpa. Bikyi! Bikyi di sisuku kpile lee suoto! Oo Israel batii, obe oso biakpi?’

12 "Nkpo oso yi, otii obi, tɔkɔ okpoo lɛfɔ batii falɛ, ‘Tininitɛ ɔsaabla tinini dilɔbadiki nwɔ nse ɛɛbla otokopĩ, kpiletɛ kafɔɔ akpilesaa ɔbla dilɔbatɔɔ anɔɔ nse eekyi eediɛ nya ɔbla. Nse tininitɛ lɛbla okpile yi, blɔbatɔɔ asiɛ nkpa ta sɛsaabla tinini se atɔɔbla ɛɛbafe ni oso.’ 13 Nse lɛtɔkɔ tininitɛ nlɛ nwaako fabasiɛ nkpa, kafɔɔ eetika disi di sɛsaabla tinini se aabla ni, ɛɛlaabla okpile yi, blɔbanyuma asaa tinini ya aabla ni kuninwii ninya; abakpi anta okpile wɔ ɛɛbla nii. 14 Ni nse lɛtɔkɔ kpiletɛ nlɛ, ‘Nwaako fabakpi,’ kafɔɔ nse nfɛ eekyi di sikpile nɔɔ suoto, ɛɛbla nle ninlɛ ni ku nle niesiɛko nii- 15 eekplesa lɛsaa le aafũ aase ni kamaa fiɛ aafɛnsa koto aata ni otii ɛɛta, eekplesa lɛsaa le aayu ni ɛɛta, eetikanko afiofa ya ninta ni nkpa, anambla kafɔɔ dikpilesaa kuninwii yi, nwaako abasiɛ nkpa; ɔlɔbakpi. 16 Blɔbanyuma sikpile se aabla ni kuonwii lɛma di suoto nɔɔ. Atɔɔbla nle ninlɛ ni ku nle niesiɛko nii; nwaako abasiɛ nkpa.

17 "Kafɔɔ okpoo lee batii alɛ, ‘SAATE nwu osuku diɛkyɛkyɛ. Kafɔɔ osuku lɛma ninankyɛkyɛ. 18 Nse tininitɛ lekyi di ɔsaabla tinini nɔɔ suoto ɛɛlaabla dikpile yi, abakpi anta ni. 19 Nse kpiletɛ kafɔɔ lekyi di akpilesaa nɔɔ ɔbla suoto, ɛɛbla lɛsaa le ninlɛ ni ku nle niesɛko ni yi, abasiɛ nkpa ta nninkpo ɔbla oso. 20 Ao Israel batii, kafɔɔ biobuɛ bilɛ, ‘SAATE nwu osuku diɛkyɛkyɛ.’ Kafɔɔ kamakanko obiala lee di nnwɔɔ omu nɔɔ sisuku kanya."

21 Di sɛlanle loo kamɛ osiɛ lefosi lɛlɛɛ nyɔɔfa kamɛ, di Israel batii kɔwɛntɛ fosile kamɛ, di dii nɔnle suoto yi, osuɔtɔ onwii niatoso aadie ni di Yerusalem lawa ɔkyɛ nii aabatɔkɔ mi alɛ, "Okpoo kplɛ nwu ntoobiɛ!" 22 Kafɔɔ kɔtɔɔfɔ nwu fiɛ di osuɔtɔ nwu lawa ni yi, SAATE nwu kɔnɛɛ latika mi di suoto, ni aabɛ kanya nii fiɛ di osuɔtɔ nwu lawa ɔkyɛ nii ku olesɛ nwu nɛ. Nioso aabɛ mi kanya, ni nintasinle omumu nɛ.

23 Ninfɛ di SAATE nwu ɔlaa lawa kuatɛɛ alɛ: 24 "Otii obi, batii ba ninsi ni di sekpoo se niɛbiɛ site ni di Israel kasɔ suoto kobuɛ alɛ, ‘Abraham yi, otii onwii lete aale, kafɔɔ aafũ kasɔ nwu. Kafɔɔ awo bupɔ; nwaako batɔɔyɔ kasɔ nwu bɛɛta wo fɛ kale wo.’ 25 Nkpo oso tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Di obe wɔ biole ni sina se di ntɔ nsi ni osi ninsĩ kaamɛ, di afiɔ lee bionyu nii, biowii ni ntɔ kafɔɔ kaasɔ, lɛ nfɛ di kasɔ nwu kabla ye kale? 26 Bietika disi di mpamii lee suoto, biɔbla ayududusaa, obiala lee kafɔɔ kɔkpanko owo nɔɔ ɔsɔfɔ. Lɛ nfɛ di kasɔ nwu kabla ye kale?’

27 "Tɔkɔ ma ɔlaa wɔ mmle falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Nwaako lɛnya nkpe ni nkpa, mba niebu basi ni di sekpoo se niɛbiɛ site ni kamɛ kamanɔɔ di kapamii kanya. Kamayɔ mba ninsi ni di lepoo nta lepoo kamɛ babɔkɛɛ mbɛbɛɛ, mba kafɔɔ ninsi ni di n-wofakɔ ku sifuɔntuu kamɛ kamakpi di ofiɛ kpile kanya. 28 Kamata kasɔ nwu nlalaa kante kafukuti, osie nɔɔ lɛkanta nwu kafɔɔ kamawa kase, Israel abokote kafɔɔ kamate afukuti alɛ otii kuonwii dilɔbafuo ɔwaalɛ ofe nya kaamɛ. 29 Ninfɛ babatofo alɛ ami ninle SAATE nwu nɛ, nse lɛbla kasɔ nwu kɛɛlalaa keete kafukuti ta ayududusaa ya amuu baabla ni oso.’

30 "Kafɔɔ afɔ, otii obi yi, okpoo lɛfɔ batii kɔkakatɛ di suoto lɛfɔ di seyoyiɛ nwu suoto ku ayo nwu nyokontũ, boobuɛ mantɔkɔ bawo alɛ, ‘Biwa biɛbanu kanya ka niekye ni SAATE nwu nfũ kɛɛwa ni.’ 31 Batii nii lɛwa ɔkyɛ lɛfɔ, fɛ mmle mambla nii, baasiɛ di anu lɛfɔ alɛ bɔɔkyɔɔ ɔlaa lɛfɔ atoko, kafɔɔ mann-yɔ sĩ bakpee di ɔkpɛ ɔbla kamɛ. Mandiki mantuo ku kanya lɛma alɛ bɛɛyɔ nwu ole, kafɔɔ situ lɛma nkpe onumbɛbɛɛ siɛta katafaa asaa ɔwɛ. 32 Nwaako, faadiɛ lɛsalɛsaa fata ma dilenkee otii wɔ ninsa ni lɛbɔmbɔ sinu ku sɛlɔ biene, ampɛ ni lɛsansaa nwaa, diekye man-nu sɛlaa lɛfɔ, kafɔɔ mann-yɔ sĩ bakpee di ɔkpɛ ɔbla kamɛ.

33 "Nse n-ya mmle amuu lɛbawa kaanya- nwaako abawa kaanya kafɔɔ- ninfɛ babatofo alɛ ɔlaabuɛtɛtɛ owo ntodiwɛ kaamɛ lɛma nɛ."