1 Ni di SAATE nwu ɔlaa lawa kuatɛɛ alɛ: 2 "Otii obi, basanko banyɔ banwii lawɛ, ɔya lɛma onwii aale. 3 Baabakple basɔnɔkpeetɛ di Egipte, baatookpee asɔnɔ diayɔ ni di sekpeele lɛma obe kamɛ. Di kasɔ nwu nkpo suoto, baamimina ma anyɛɛ, baanwɔtɔ kafɔɔ kokpeelebitɛ lɛma anyɛɛbi. 4 Ɔnɔɔfole leyooto niale Ohola, obilɛma-sankobi kafɔɔ leyooto niale Oholiba. Bale mi baale, ni baalofo babisuɔtɔbi ku babisankobi nɛ. Ohola ninle Samaria, ni di Oholiba nle Yerusalem nɛ.

5 "Ohola lakpee asɔnɔ di obe wɔ aale ni olè, ole mi; ni aawɛ lɛkɔnsɔklee aata basɔnɔ nɔɔ, Asiria- bakpɛtɛ 6 ba niakpee ni akpeele bluu, abaa kanyabayilatɛ ku bakpɛtɛ kanyabayilatɛ, di bamuu lɛma lalɛ ni sekosopo, ku bapɔnkɔ basiɛtɛ ba niasiɛ ni di bapɔnkɔ suoto. 7 Aayɔ suoto nɔɔ aata Asiria batii kplɛ bamuu fɛ sɔnɔkpeetɛ, ni aakpɔnɔfɔsa suoto nɔɔ ku otii biala afiɔ ya aawɛ lɛkɔnsɔklee aata ni nɛ. 8 Atadiɛ lɛsɔnɔkpee nwu aakye ni kasɔ di Egipte, di obe wɔ di basuɔtɔ latenko nwɔ ni di sekpeele nɔɔ kamɛ, baanwɔtɔ nwɔ ni kakpeelebitɛ anyɛɛbi nɔɔ, baanyɛɛnɛ lɛkɔnsɔklee lɛma kafɔɔ baakpete nwɔ di suoto.

9 "Nkpo oso lɛyɔ nwɔ lekpee di basɔnɔ nɔɔ nnɛɛ, Asiria batii nwu, mba aawɛ lɛkɔnsɔklee aata nii. 10 Baadiki nwɔ lɛkyɔtɔ, baakpaa babisuɔtɔbi nɔɔ ku babisankobi nɔɔ baasifiko, ni baalo nwɔ ku kapamii nɛ. Ninfɛ aabakple okyonsanu di basanko kamɛ, ni baayɔ letokonanfi baatika nwɔ di suoto nɛ.

11 "Obilɛma-sankobi Oholiba lanya nle mmle, kafɔɔ di lɛkɔnsɔklee nɔɔ ku lɛsɔnɔkpee nɔɔ kamɛ yi, aalalaa aalenkee obilɛma-sankobi nwu. 12 Nnwɔɔ kafɔɔ aawɛ lɛkɔnsɔklee aata Asiria batii nwu- abaa kanyabayilatɛ ku kakpɛ kanyabayilatɛ, bakpɛtɛ ba niasiɛ ni di akpeele ya niawo ni nimu kamɛ, bapɔnkɔ basiɛtɛ ba niasiɛ ni di bapɔnkɔ suoto, di bamuu lale ni bakosopo ba nialɛ ni sekosopo. 13 Lanya nlɛ nnwɔɔ kafɔɔ aakpɔnɔfɔsa suoto nɔɔ; akyuu lɛma nwu anyɔ lakyɛ di osuku onwii suoto.

14 "Kafɔɔ aaklee lɛsɔnɔkpee nɔɔ nwu aakyɛnko sitũ. Aanya basuɔtɔ atembi ya bɛɛta beetika ni di oyoyiɛ suoto, Kaldea batii atembi ya bɛɛta ni ku kɔfa sɛɛle, 15 ku sifiamɛ di sɛtɔ lɛma ku disi aniisaa-wua di asi lɛma; bamuu lɛma letembi late ni fɛle Babel bakeke ba di bapɔnkɔ nnanfi ni banɔɔfotii, baale ni Kaldea banantii. 16 Nfanwu aanya ma nii, aawɛ lɛkɔnsɔklee aata ma, ni aakpee ma batɔkyɛntɛ di Kaldea nɛ. 17 Ninfɛ di Babel batii lawa ɔkyɛ nɔɔ di lɛbɔmbɔ atensaa nwu suoto, ni baalalaasa nwɔ di lɛkɔnsɔklee lɛma nwu kamɛ nɛ. Baalalaasa nwɔ baaloo nii, baakpɛ nwɔ oyududu, ni aamunikĩi ɔblɔ kanya aasifi nɛ. 18 Di obe wɔ aatookpee ni asɔnɔ di lɛkpaka di lɛkyɔtɔ nɔɔ nfɛ nte ni kaayi yi, aakpɛ mi oyududu ni lamunikĩi ɔblɔ kanya lasifi ladiɛ nwɔ fɛ mmle lamunikĩi ni di obilɛma-sankobi ɔkyɛ lasifi ni nɛ. 19 Kafɔɔ mia nfɛ aakple aatookpee asɔnɔ aatoolenkeesa nɛ, di obe wɔ aatoonyuma ni sekpeele nɔɔ obe, di obe wɔ aale ni sɔnɔkpeetɛ di Egipte. 20 Nfa aawɛ lɛkɔnsɔklee aata basɔnɔ nɔɔ, mba di sisuɔtɔ lɛma late ni fɛle babɔkɛɛ ba nintuka ni atoo ale ku mba alombi niate ni fɛle bapɔnkɔ ale. 21 Nioso sekpeele lɛfɔ obe suoto sina ɔkɔnsɔ akleesaa laklee fɔ ɔkɔnsɔ, baanwɔtɔ fɔ anyɛɛbi, baamimina ni kafɔɔ sekpeele lɛfɔ anyɛɛ di obe wɔ faawɛ ni di Egipte.

22 "Nkpo oso, Oholiba, nnya ɔlaa wɔ di SAATE Kplɛ nwu kobuɛ ni alɛ: Kamatakatɛ basɔnɔ lɛfɔ nkpee fɔ, mba niakpɛ fɔ ni oyududu faakple ni di sɛmaa lɛma, kamatakatɛ ma di ɔfankyi biala nkpee fɔ. 23 Babel batii nwu ku Kaldea batii bamuu, Pekod ku Soa ku Koa basuɔtɔ, manko Asiria batii ba bamuu ninkpe ni ku mma, bakosopo ba ninlɛ ni sekosopo, di bamuu lɛma lale ni abaa kanyabayilatɛ ku bakpɛtɛ kanyabayilatɛ, bakeke ba di bapɔnkɔ nnanfi ni banɔɔfotii ku batii ba ninkpe ni n-yilakɔ kplɛ, di bamuu lɛma nsiɛ ni di bapɔnkɔ suoto. 24 Babataka fɔ di suoto ku akpɛsaa, bakeke ba di bapɔnkɔ nnanfi ni ku atoo atukasaa ku batii ɔlambu; babayila di ɔfankyi biala mantaka kakpɛ di suoto lɛfɔ ku kubiafunsaa, akplɛ ku abiibii ku abɔɔsaa akoto. Kamayɔ fɔ nkpee ma ninnɛɛ nta letokonanfi. Babananfi fɔ kafɔɔ kootoko di osuku lɛma kanya. 25 Kamadiki sɛsɔfɔwo nii ɔkpɛ ɔblɔ di suoto lɛfɔ, babablako fɔ suoto ɔkpɛ ku ɔblɔ. Bababudi sinwu lee ku atoko lee mankpa, aye ba kafɔɔ niebu bisi ni nkpa kamanɔɔ di kapamii kanya. Babakpaa babisuɔtɔbi ku babisankobi lee mansifiko, aye ba kafɔɔ nimabu ni yi, ɔtɔ kamawɔɔsa ye. 26 Babadiki akpeele lee kafɔɔ di suoto, man-yɔ anyɛnɛ lee biene nwu kafɔɔ. 27 Nkpo kamayɔ ateeteesaa ku lɛsɔnɔkpee le faakye ni kasɔ di Egipte n-wako kase nɛ. Flɔbasinnyu asaa ya mmle ku lɛkɔnsɔklee ee fanyuma Egipte diidii.

28 "Diekye nnya ɔlaa wɔ di SAATE Kplɛ nwu kobuɛ ni alɛ: Nfɛ kɔmayɔ fɔ nkpee di batii ba feekyidi ni nnɛɛ, mba niakpɛ fɔ ni oyududu, faakple ni di sɛmaa lɛma. 29 Babablako fɔ suoto ɔkpɛ di ditii kyidi kamɛ, man-yɔ kafɔɔ lɛsaa biala faabla ɔkpɛ faawɛ nii. Babadiɛ fɔ fansiɛ lɛkyɔtɔ ku ototoole, lɛsɔnɔkpee lɛfɔ sinunsɔ nwu kafɔɔ kamadie kayi. Ateeteesaa lɛfɔ ku lɛsɔnɔkpee lɛfɔ nwu 30 niata nle mmle lawa fɔ di suoto, diekye faawɛ lɛkɔnsɔklee faata nnle nwu, ni faakpɔnɔfɔsa suoto lɛfɔ ku afiɔ lɛma nɛ. 31 Obilee-sankobi kɔkpaa faayɔ; nkpo oso kamayɔ opũ nɔɔ nkpee di kɔnɛɛ lɛfɔ.

32 "Nnya ɔlaa wɔ di SAATE Kplɛ nwu kobuɛ ni alɛ:

"Obilee-sankobi opũ kamɛ fabanyi,

opũ wɔ niemuɔ kuokyofo nii;

dibata lɛ-ma ku ditufa n-wa fɔ ni di suoto,

diekye asaa amuamu ninsi kaamɛ.

33 Lɛtansiɛ ku sɛnyaami owi kamayii fɔ kamɛ pɔ,

kalalaa ku kawɔɔ opũ nwu,

ninle ni obilee-sankobi Samaria opũ.

34 Fabanyi mi ku akpiti nimi;

fababibiɛ opũ nwu wɔkyɔwɔkyɔ,

fambɛbɛɛ kafɔɔ anyɛ́ɛ lɛfɔ.

Ami niɛkakatɛ, SAATE Kplɛ nwu niebuɛ.

35 "Nkpo oso nnya ɔlaa wɔ di SAATE Kplɛ nwu kobuɛ ni alɛ: Di obe wɔ fatooyee mi, fɛɛtɛ mi ni sɛmɛntu oso yi, dikpeni feefũ seteetee ku lɛsɔnɔkpee lɛfɔ letota."

36 Ni di SAATE nwu latɔkɔ mi alɛ: "Otii obi, fabakanko Ohola ku Oholiba? Ni diki ayududusaa sɛsaabla lɛma nwu fatɔkɔ ma. 37 Diekye baakpee asɔnɔ, ntɔ kafɔɔ nsi di nnɛɛ lɛma. Baakpee asɔnɔ ku afiɔ lɛma; baayɔ bia babi lɛma baata ole, fɛ alesaa baata ma, babi ba baalofo baatɛɛ nii. 38 Baabla mi nle mmle kafɔɔ: Baakpee kakleklekɔ nii oyududu, ni baakpɔnɔfɔsa Anyɛɛtɛyi nii di obe onwii nwu kamɛ nɛ. 39 Di dii le suoto baayɔ babi lɛma baata ni ole baata ni afiɔ lɛma, baabuo kakleklekɔ nii baakpɔnɔfɔsa ka. Nni ninle lɛsaa le baabla ni di leyo nii kamɛ nɛ.

40 "Bia mankpee basuɔtɔ ba niekye ni nkyonkɔ batii alɛ bawa. Nse bɛɛbabuo, fankpe ntu ta mma oso, faakyankya anu lɛfɔ, fan-yɔ anyɛnɛ lɛfɔ fankpee. 41 Fansiɛ di akpomii yɔɔle ya nikɔlɛ ni onyu suoto, fanse opunu blɛfɛɛ di akpomii nwu anu, opunu nwu suoto, ni fan-yɔ olufui ku nnɔnyi be ninle mi ni nle fantika nɛ.

42 "Batii ɔlambu wɔ ninan-yɔ nwu ni ole kudu oyiisa lamana nwɔ kuakyi; baakyeko batasiɛntɛ ɔfaafuu kamɛ diakyakaa ni di basuɔtɔ ba niakye ni atiipɛ dikudi kamɛ baawako. Ni baakpee ɔsanko nwu ku obilɛma-sankobi nkɔnii di nnɛɛtũ, baayɔ kafɔɔ akakoto ya nikɔlɛ ni onyu baatũkunsa ma di asi nɛ. 43 Ninfɛ labuɛ di ɔsanko wɔ ditoobuo ni di lɛsɔnɔkpee kamɛ suoto nlɛ, ‘Kanunua yi, ta ma bayɔ nwɔ fɛ sɔnɔkpeetɛ, diekye nkpo otii di ɔsanko nwu nle nɛ.’ 44 Ni baatenko ɔsanko nwu nɛ. Fɛ mmle di basuɔtɔ ntenko ni sɔnɔkpeetɛ, nkpo baatenko basanko nwu di suoto kɔfiɛtũ nii, Ohola ku Oholiba nɛ. 45 Kafɔɔ basuɔtɔ batininitɛ kamananfi basanko ba ninkpee ni asɔnɔ, man-wii ni kafɔɔ ntɔ kaasɔ kootoko, diekye basɔnɔkpeetɛ bale, ntɔ kafɔɔ nsi di nnɛɛ lɛma.

46 "Nnya ɔlaa wɔ di SAATE Kplɛ nwu kobuɛ ni alɛ: Bita batii ɔlambu bawa bababuo ma di suoto, baakpee ma lɛyɛkɛ, baafũ kakpɛ kamɛ asaa lɛma. 47 Batii ɔlambu nwu kamasafɔ ma afuɔ, mansasafɔ ma kafɔɔ mantɛ ku mpamii lɛma; Babalo babisuɔtɔbi ku babisankobi lɛma, manfiɛ kafɔɔ ayo lɛma.

48 "Nkpo kamayɔ suoto sina lɛkɔnsɔklee lɛma nwu n-wako kase di kasɔ nwu suoto nɛ, alɛ diabla ɔlaa osĩ ɔta basanko bamuu, alɛ blaanyunko ye. 49 Babananfi ye kootoko di suoto lɛkɔnsɔklee lee nwu suoto, minfũ kafɔɔ letota di sikpile lee suoto di afiɔ ɔtɔ kamɛ. Ninfɛ bibatofo bilɛ ami ninle SAATE Kplɛ nwu nɛ."