1 Di obe onwii kamɛ Israel banɔɔfo bawo lawa ɔkyɛ nii baabasiɛ di anu nii. 2 Ninfɛ di SAATE nwu ɔlaa lawa kuatɛɛ alɛ: 3 "Otii obi, basuɔtɔ ba mmle nkle afiɔ di situ lɛma kamɛ, bɛɛyɔ kafɔɔ atuulasaa kpile bɛɛtɛ di anu lɛma. Kata ma osuku mamawolaa asaa kamɛ di ɔkyɛ nii? 4 Nkpo oso kakatɛko ma faatɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Nse Israel otii lele niekpee afiɔ di otu nɔɔ kamɛ, ɛɛyɔ kafɔɔ dituulasaa kpile ɛɛtɛ di anu nɔɔ, ɛɛkyɛ ɔlaabuɛtɛtɛ nfũ yi, ni ami SAATE nwu omu kamadiki kanya ntɔɔ di afiɔ nɔɔ ya akle ni di lɛpɔ kamɛ. 5 Kamabla nle mmle alɛ kase Israel batii bamuu nintoodiɛ mi bɛɛtɛ ni situ difũ, ta afiɔ lɛma oso.’

6 "Nkpo oso tɔkɔ Israel batii falɛ, ‘Nnya ɔlaa wɔ di SAATE nwu kobuɛ ni alɛ: Bikyi! Bikple di afiɔ lee sɛmaa, biesĩ kafɔɔ ayududusaa lee sɛsaabla simuu!

7 " ‘Nse Israel otii lele ee ɔfɔɔ lele ninsi ni di Israel lɛblasa suoto nɔɔ di suoto nii, eefũ afiɔ eekpee di otu nɔɔ kamɛ, ɛɛyɔ kafɔɔ dituulasaa kpile ɛɛtɛ di anu nɔɔ, ɛɛkyɛ ɔlaabuɛtɛtɛ nfũ alɛ ɔɔlaawolaa asaa kamɛ di ɔkyɛ nii yi, ni ami SAATE nwu kamadiki kanya ntɔɔ ami omu. 8 Kamadiki anu nii ntika di otii nwu nkpo suoto, n-yɔ nwɔ mbla ɔtɛ onyu ku okyonsanu. Kamablasa nwɔ ndiki di batii nii suoto. Ni bibatofo bilɛ ami ninle SAATE nwu nɛ.

9 " ‘Kafɔɔ nse bɛɛkyɔnkyɔ ɔlaabuɛtɛtɛ owo eebuɛ ɔlaa ɛɛtɛ, alɛ ami SAATE nwu niɛkyɔnkyɔ ɔlaabuɛtɛtɛ nwu yi, kamananfi kɔnɛɛ nii di suoto nɔɔ, nwɔɔsa nwɔ kafɔɔ di batii nii Israel kamɛ. 10 Lɛpɔɔ okpi lɛma kamatika ma di suoto- ɔlaabuɛtɛtɛ nwu kafɔɔ kamakpi lɛpɔɔ fɛ nnwɔ niɛwa ni asaa owolaa di ɔkyɛ nɔɔ. 11 Ni Israel batii dilɔbasin-yu osuku di suoto nii, ee bakpɔnɔfɔsa suoto lɛma ku sikpile lɛma simuu diidii. Alɛ babale batii nii, ami kafɔɔ kamale Yaa lɛma, SAATE Kplɛ nwu niebuɛ.’ "

12 Ni di SAATE nwu ɔlaa lawa kuatɛɛ alɛ: 13 "Otii obi, nse kale kawo lɛbla okpile di suoto nii, ta kata le ni onukwale oso, lediki kɔnɛɛ nii di kale nwu suoto, letĩi osuku wɔ kanfe kanwɛ ni alesaa, lɛta kafɔɔ kɔka lɛkpɛ kale nwu, lelo kafɔɔ batii ku babɔkɛɛ lɛma, 14 nse bia basuɔtɔ ba mmle batiɛ- Noa, Daniel ku Yob- lasiɛ di kale nwu kamɛ yi, suoto lɛma nkpa lete baafuo ofũ, ta ɔsaabla tinini lɛma oso, SAATE Kplɛ nwu niebuɛ.

15 "Ee nse lediki lepoo kamɛ babɔkɛɛ ba nikpe ni kobe lekpee di kasɔ nwu suoto, bɛɛwɔɔsa batii ninka suoto, di kasɔ nwu lɛbate kafukuti alɛ kuonwii diloofuo ofe ninka suoto ta babɔkɛɛ yakayaka nwu oso yi, 16 nwaako lɛnya nkpe ni nkpa, SAATE Kplɛ nwu niebuɛ alɛ, nse bia basuɔtɔ ba mmle batiɛ lasiɛ di kasɔ nwu suoto yi, bataafuo mma bamu babisuɔtɔbi ee babisankobi lɛma nkpa ofũ. Nkpa lɛma lete batabafũ, kafɔɔ kasɔ nwu ntabate kafukuti.

17 "Ee nse lɛwako kapamii di kasɔ nwu nkpo suoto lebuɛ nlɛ, ‘Kapamii kafe di kasɔ nwu kamuu suoto,’ lelo kasɔ nwu batii ku babɔkɛɛ lɛma yi, 18 nwaako lɛnya nkpe ni nkpa, SAATE Kplɛ nwu niebuɛ alɛ, nse bia basuɔtɔ ba mmle batiɛ lasiɛ di kasɔ nwu, bataafuo mma bamu lɛma babisuɔtɔbi ee babisankobi nkpa ofũ. Nkpa lɛma lete batabafũ.

19 "Ee nse lediki ofiɛ kpile lekpee di kasɔ nwu nkpo suoto, lɛnyɛɛnɛ ɔblɔ yakayaka nii lekpete ka diefe ni di ntɔ owii suoto, lelo kasɔ nwu batii ku babɔkɛɛ lɛma yi, 20 nwaako lɛnya nkpe ni nkpa, SAATE Kplɛ nwu niebuɛ alɛ, nse bia Noa, Daniel ku Yob lasiɛ di kasɔ nwu suoto yi, bataafuo obisuɔtɔbi ee obisankobi nkpa ofũ. Mma bamu nkpa lete batabafuo ofũ, ta ɔsaabla tinini lɛma oso.

21 "Diekye nnya ɔlaa wɔ di SAATE Kplɛ nwu kobuɛ ni alɛ: Lɛ nfɛ kubalalaa kunte nse lediki akanko nii yɛkɛle ana nwu lekpee Yerusalem- kapamii ku kɔka ɔkpɛ, lepoo kamɛ babɔkɛɛ ku ofiɛ kpile- alɛ balo kasɔ nwu batii ku babɔkɛɛ lɛma! 22 Kafɔɔ batii bawo kamabu mansiɛ nkpa- babisuɔtɔbi ku babisankobi ba babadieko ni ninwu kamɛ. Babawa ɔkyɛ lee, nse biɛnya nkpa lɛma disiɛbi ku ɔsaabla lɛma kafɔɔ yi, otu kamate ye di ɔlaa otũ wɔ lata kuawa ni di Yerusalem suoto- ɔlaa otũ biala lata kuawa ni ninwu suoto. 23 Otu kamate ye nse biɛnya nkpa lɛma disiɛbi ku ɔsaabla lɛma, diekye bibatofo bilɛ ntabla lɛsalɛsaa ninwu kamɛ kasakasa, SAATE Kplɛ nwu niebuɛ."