1 "Afɔ, otii obi, yɔ kapamii ka ninkpe ni kobe faayɔ ka fabla fɛ disinwiɛtɛ kakpaasupamii fakpaasu disi ku okusu lɛfɔ. Ni faayɔ lɛklapoosaa fasɛ sinwini nwu kamɛ. 2 Nse ɔmana okyi lɛfɔ nwu ntooloo yi, faafiɛ sinwini nwu dikyuu tiɛfa ninwii ku ɔtɔ di okpoo kplɛ nwu ntɛɛ. Yɔ dikyuu tiɛfa nwu ninwii nimuu fasasafɔ ku kapamii fawiwii fakyiko okpoo kplɛ nwu. Faayɔ dikyuu tiɛfa nwu ninwii kafɔɔ fasa fakpete kɔɔfɛɛfɔ. Diekye kamabɔkɔtɛ kapamii ntikanko ma. 3 Kafɔɔ diki enwini ɛsɛɛ fanii di akpeele lɛfɔ atokosi fasifiko. 4 Kple fadiki ɛsɛɛ di n-se feediki ni kamɛ fakpee di ɔtɔ fiɛ. Ɔtɔ kamakye ninfa kunkpɛ kunsifi Israel kale kamuu.

5 "Nnya ɔlaa wɔ di SAATE Kplɛ nwu kobuɛ ni alɛ: Nnya Yerusalem wɔ lɛyɔ lɛtɛ ni di nnle nwu ntɛɛntɛɛ, di nnle mmuu lɛmana nwu beekyi ni. 6 Kafɔɔ Yerusalem lataka aayila di afiofa nii ku sɛsaabla nii suoto amumu kanya aalenkee nnle be niɛmana nwɔ diekyi nii. Atoosĩ afiofa nii, aakyɛ kafɔɔ di sɛsaabla nii sisuku suoto.

7 "Nkpo oso nnya ɔlaa wɔ di SAATE Kplɛ nwu kobuɛ ni alɛ: Biabla amumusaa bialenkee nnle be niɛmana ye beekyi nii, bitatikanko kafɔɔ sɛsaabla nii ee biklee afiofa nii. Bia bitabla di nnle be niɛmana ye beekyi ni ablasaa suoto.

8 "Nkpo oso nnya ɔlaa wɔ di SAATE Kplɛ nwu kobuɛ ni alɛ: Yerusalem, ami omu nii n-yɛ ye di suoto, kamawako letoko nanfi di suoto lee di nnle nwu anu. 9 Ta ayududusaa afiɔtii lee nwu oso yi, kamabla ye lɛsaa le ninadibla ni diidii, namasinkple mbla ni kafɔɔ diidii. 10 Nkpo oso babibate kamawee babi lɛma, babi kafɔɔ kamawee bate lɛma. Kamayɔ letoko nanfi n-wako di suoto lee, ninsamiisa batii lee ba niebu basi ni nkpa kafɔɔ nkpete kɔɔfɛɛfɔ. 11 Nkpo oso, nwaako lɛnya nkpe ni nkpa, SAATE Kplɛ nwu niebuɛ alɛ, ta fatɔɔyɔ ni atembi nyakatãa ku ayududusaa lɛfɔ sɛsaabla amuu fɛɛkpɔnɔfɔsa ni kakleklekɔ nii oso yi, ami omu kamatekete sibualɛ nii di suoto lɛfɔ; namanya fɔ nyaami ee n-yɔ nkyɛ fɔ. 12 Ofiɛ kpile kamalo batii lɛfɔ dikyuu tiɛfa ninwii ee kɔka kamawɔɔsa ma di kamɛ lɛfɔ; dikyuu tiɛfa bamba kamanɔɔ di kapamii kanya di seyoyiɛ lee sɛmaa; kamasamiisa dikyuu tiɛfa yɛntɛle kafɔɔ nkpete di kɔfɛɛfɔ kamɛ, nimbɔkɔtɛ kapamii kafɔɔ ntikanko ma.

13 "Ni ɔblɔ nii kamaloo, ɔblɔ yakayaka nii kafɔɔ di suoto lɛma kamayɔɔ, ni otu ntoote mi nɛ. Ni nse ntɔɔblako ɔblɔ yakayaka nii ɔkpɛ di suoto lɛma leloo yi, ni babatofo alɛ ami SAATE nwu niɛkakatɛ di sɛsɔfɔwo ɔkpɛ nii kamɛ nɛ.

14 "Kamawɔɔsa fɔ nimbla fɔ kafɔɔ ditufasaa di nnle be niɛmana fɔ diekyi ni kamɛ, di mba bamuu ninwaalɛ manfe ni di anu lɛfɔ. 15 Fabale ditufasaa ku lɛmansaa, ɔlaa disinsaa ku lɛyɛkɛsaa fanta nnle be niɛmana fɔ diekyi ni, nse lɛta letoko nanfi lɛwa di suoto lɛfɔ di ɔblɔ ku lɛblɔfiɛ yakayaka kamɛ ku ɔlaa osĩ ɔta di kakuo kanya. Ami SAATE nwu niebuɛ. 16 Nse lɛtaa ye ku kawɔɔ kɔka kɔtaa kpile nii lekpee ye yi, kamataa nwɔɔsa ye. Kamayɔ kɔka ɔkpɛ kanya ka ninkpe ni osie n-wako di suoto lee nta alesaa lee kakyekɔ kafɔɔ mbudi. 17 Kamadiki kɔka ku babɔkɛɛ yakayaka nkpee ye, manta ye mimbla batii ba ninaa ni babi. Ofiɛ kpile ku ntɔ owii kamafiɛ anfe ye kaamɛ. Kamayɔ kapamii kafɔɔ di suoto lee. Ami SAATE nwu niebuɛ."