1 Di lefosi lɛlɛɛ nyɔɔfa kamɛ, di Israel batii lefosi kɔwɛntɛ nyɔɔfa kamɛ di dii kasale suoto yi, SAATE nwu ɔlaa lawa kuatɛɛ alɛ: 2 "Otii obi, wola okunu di Egipte ɔka Farao suoto faatɔkɔ nwɔ falɛ:

" ‘Fate fɛle kyata di nnle nwu kamɛ;

fate fɛle bɔkɛɛ kplɛ yɛkɛle di lekpo kamɛ,

kuɔpɛ kummunikĩi ni di seklenyii lɛfɔ kamɛ,

kuɔbɔkaa ni ntu nwu ku nkpaa lɛfɔ,

kuokunsa ni kafɔɔ seklenyii nwu.

3 " ‘Nnya ɔlaa wɔ di SAATE Kplɛ nwu kobuɛ ni alɛ:

" ‘Batii ɔlambu kplɛ kamakyakaako mi

ntaa asawu nii di suoto lɛfɔ,

babananfi fɔ kafɔɔ ku asawu nii mandiki.

4 Kamafuki fɔ ntɛ di kasɔ suoto,

kamadiɛ fɔ ntɛ di lepoo nwu kamɛ.

Kamata bakansiɛ bamuu di kɔfɛɛfɔ kamɛ nsiɛ fɔ di suoto,

lepoo kamɛ babɔkɛɛ bamuu kafɔɔ kamakonko di suoto lɛfɔ.

5 Kamasamiisa suoto sina lɛfɔ nkpete di abokote suoto,

ninta sɛtaata n-yii ku kpi lɛfɔ.

6 Kamata kasɔ ku abokote amuu n-yii

ku ntɔ lɛfɔ be nikobiɛ ninfe nii,

kɔwɛ kafɔɔ kamayii ku suoto sina lɛfɔ.

7 Nse lɛwɔɔsa fɔ leloo yi, kamatĩi osi,

ninta kafɔɔ awɛntrɛbi lɛma nwɔfɔ tunutunu;

kamayɔ lelokonkyɛ ntĩi kufĩ,

kɔwɛntɛ kafɔɔ dilɔbakpa.

8 Sɛtɔ se simuu ninkpa ni di osi

dilɔbasinkpa di suoto lɛfɔ;

kamayɔ ditunu n-wako di kasɔ lɛfɔ suoto,

SAATE Kplɛ nwu niebuɛ.

9 Kamata batii kpinwu situ nnu dibuo,

nse lɛwako kawɔɔ lɛfɔ di nnle nwu kamɛ,

di nsɔ be fatatofo ni kamɛ.

10 Kamata fankpɛ batii kpinwu nyaami,

baka lɛma kafɔɔ kamatũtũkũ ku lɛyɛkɛ ta afɔ oso,

nse lɛnwanyi kapamii nii di anu lɛma.

Obiala lɛma kamatũtũkũ

anta nkpa nɔɔ obe lele

di dii le fabapɛ ni kaasɔ.

11 " ‘Diekye nnya ɔlaa wɔ di SAATE Kplɛ nwu kobuɛ ni alɛ:

" ‘Babel ɔka nwu kapamii

kamawa fɔ di suoto.

12 Kamata batii ɔlambu lɛfɔ nnɔɔ

di basientɛ mpamii kanya-

mba ninkpe ni amumu balenke ni di nnle mmuu kamɛ.

Babata Egipte ndiɛ lɛkanta nwu,

batii ɔlambu nɔɔ bamuu kafɔɔ kamawɔɔ.

13 Kamawɔɔsa banankyue nɔɔ bamuu

ndiki di ntu kpinwu ɔlɔɔkɔ,

otii kuonwii kɔkpaa dilɔbasimbɔkaa ntu nwu

ee banankyue akpɔbi dikunsa mi.

14 Ni kamata ntu nɔɔ nte,

nta kafɔɔ seklenyii nɔɔ mbiɛ sinfe fɛle nnɔnyi,

SAATE Kplɛ nwu niebuɛ.

15 Nse lɛta Egipte kasɔ lete kafukuti,

lɛlalaasa kafɔɔ lɛsaa biala di kasɔ nwu suoto,

lelo mba bamuu ninsi ni ninfa yi,

ninfɛ babatofo alɛ ami ninle SAATE nwu nɛ.’

16 "Nnya okunu wɔ babasa mantɔɔ ni. Nnle nwu babisankobi nimasa nwu; Egipte ku batii nɔɔ ɔlambu bamuu babasa nwu manta, SAATE Kplɛ nwu niebuɛ."

17 Di lefosi lɛlɛɛ nnyɔɔfa kamɛ, di Israel batii kɔwɛntɛ kasale kamɛ di lefosi dii nɔnle suoto yi, SAATE nwu ɔlaa lawa kuatɛɛ alɛ: 18 "Otii obi, wi kaku osie kanya fata Egipte batii ɔlambu nwu, faakpaa nwɔ kafɔɔ ku nnle siene babisankobi akyuu nwu anyɔ fasifiko dibiɔ kamɛ, ku mba nikosoo mansifi ni ɔkya kamɛ. 19 Kaalɛ ma falɛ, ‘Beele fɔ sibualɛ balenke batii bule? Soofasifi faalaate di batii nwu ninankyɛlɛnsa ni suoto kamɛ.’ 20 Babanɔɔ di mba beelo ni ku kapamii kamɛ. Batɔɔbɔkɔtɛ kapamii nwu; ta bananfi nwɔ ku batii nɔɔ ɔlambu bamuu basifiko. 21 Batunletɛ sientɛ nwu kamabuɛ di ɔkya nwu kamɛ di Egipte ku bakyakaakotɛ nɔɔ suoto alɛ, ‘Batoosoo bɛɛwa bate ku mba ninankyɛlɛnsa ni suoto, ku mba beelo ni ku kapamii.’

22 "Asiria nkpe ninfa ku bakpɛtɛ nɔɔ bamuu; batii nɔɔ ba baalo ni bamuu sɛkya lɛmana nwɔ siekyi, bale ni mba bamuu nianɔɔ ni di kapamii kanya. 23 Sɛkya lɛma nte di dibiɔ nwu nkyofokɔ, di bakpɛtɛ nɔɔ nte beekyi ni ɔkya nɔɔ. Batoolo mba bamuu niabuɛ ni lɛyɛkɛ ɔlaa baakyakasa ni di nkpa batii kasɔ suoto, baanɔɔ ni di kapamii kanya.

24 "Elam batii nkpe ninfa, di batii ɔlambu nɔɔ bamuu lɛmana ɔkya nɔɔ beekyi nii. Bamuu lɛma bakpi bale, baanɔɔ ni di kapamii kanya. Batii ba bamuu niabuɛ lɛyɛkɛ ɔlaa baakyakasa ni di batii ba di nkpa basiɛtɛ kasɔ suoto lasoo baasifi kasɔ kalɔ, batakyɛnlɛnsa suoto. Sinunsɔ lɛma latika ma di suoto ku mba nikosoo mansifi ni dibiɔ kamɛ. 25 Bɛɛtɛ atensaa bɛɛtɔɔ di bakpi kamɛ, manko batii ɔlambu nɔɔ ba bamuu niɛmana ɔkya nɔɔ beekyi nii. Bamuu lɛma diɛkyɛlɛnsa suoto, ni beelo ma ku kapamii nɛ. Ta di lɛyɛkɛ lɛma lakyaka ni di nkpa basiɛtɛ kasɔ suoto oso yi, sinunsɔ lɛma ntika ma di suoto ku mba nikosoo mansifi ni dibiɔ kamɛ; bɛɛyɔ ma bɛɛtɛ di bakpi kamɛ.

26 "Mesek batii ku Tubal batii nkpe ninfa, ku batii ɔlambu lɛma ba bamuu niɛmana ni sɛkya lɛma beekyi nii. Bamuu lɛma ditakyɛlɛnsa suoto, baalo ma ni ku kapamii ta baakyakasa ni lɛyɛkɛ lɛma nwu di nkpa basiɛtɛ kasɔ suoto oso. 27 Baate ku bakpɛtɛ bamba ba nitakyɛlɛnsa ni suoto, baanɔɔ ni kakpɛ, baasoo baasifi ni ɔkya kamɛ ku kakpɛ akpɛsaa lɛma, mba mpamii baayɔ baatɛ ni di asi lɛma kalɔ. Okpile lɛma letokonanfi latika di akufi lɛma suoto, nu di bakpɛtɛ ba mmle lɛyɛkɛ layii nkpa basiɛtɛ kasɔ suoto diafenko.

28 "Oo Egipte ɔka, afɔ kafɔɔ yi, bababiɛ fɔ mantɛ di batii ba ninankyɛlɛnsa ni suoto kamɛ, minko mba beelo ni ku kapamii.

29 "Edom nkpe ninfa, baka nɔɔ ku banɔɔfotii nɔɔ bamuu; nu baawɛ osie yi, bɛɛtɛ ma ku mba baalo ni ku kapamii. Bate ku batii ba ninankyɛlɛnsa ni suoto, manko mba niesoo beesifi ni dibiɔ kamɛ.

30 "Katookasɔ baka bamuu ku Sido batii bamuu nkpe ninfa; baasoo baasifi kasɔ ku bakpi di sinunsɔ kamɛ, nu di osie lɛma niawako lɛyɛkɛ nwu. Bate batakyɛlɛnsa ni suoto, manko mba baalo ni ku kapamii, ni di sinunsɔ lɛma ntika ma di suoto manko mba niesoo beesifi ni dibiɔ kamɛ nɛ.

31 "Egipte ɔka- nnwɔɔ ku bakpɛtɛ nɔɔ bamuu- kamanya ma, anta otu nte kafɔɔ batii ɔlambu nɔɔ bamuu ba baalo ni ku kapamii, SAATE Kplɛ nwu niebuɛ. 32 Kuntɛ ami niatɔɔ aakyakasa lɛyɛkɛ nwu di nkpa basiɛtɛ kasɔ suoto yi, babatɛ Egipte ɔka ku batii ɔlambu nɔɔ bamuu di batii ba ninankyɛlɛnsa ni suoto kamɛ, manko mba baalo ni ku kapamii, SAATE Kplɛ nwu niebuɛ."